ທ່ານຮອງນາຍົກລັດຖະມົນຕີ ເວືອງດິ່ງເຫ້ວ
(ພາບປະກອບ)
|
(vovworld) – ຕອນບ່າຍວັນທີ 19/10, ຢູ່ຫ້ອງວ່າການລັດຖະບານ, ທ່ານຮອງນາຍົກລັດຖະມົນຕີ ເວືອງດິ່ງເຫ້ວ ເປັນປະທານກອງປະຊຸມຕີລາຄາກ່ຽວກັບໝາກຜົນແຫ່ງການຄວບຄຸມໄພເງິນເຟີ້, ຮັບປະກັນເສດຖະກິດມະຫາພາກເປັນປົກກະຕິເວົ້າລວມ ແລະ ການບໍລິຫານສິນຄ້າບາງປະເພດຢ່າງລະອຽດໃນ 9 ເດືອນປີ 2016, ກຳນົດທິດການບໍລິຫານໃນ 3 ເດືອນທ້າຍປີ. ທ່ານຮອງນາຍົກລັດຖະມົນຕີ ເວືອງດິ່ງເຫ້ວ ຊີ້ແຈ້ງບັນດາໝວດສາຍເຫດທີ່ກະທົບເຖິງການເພີ່ມ - ຫລຸດຜ່ອນດັດຊະນີຄ່າໃຊ້ສອຍທົ່ວປະເທດໃນ 9 ເດືອນຂອງປີ 2016, ຜ່ານນັ້ນໄດ້ຍ້ອງຍໍຊົມເຊີຍບັນດາກະຊວງ, ຂະແໜງການດ້ວຍຈິດໃຈຕັ້ງໜ້າ ແລະ ມີຄວາມຮັບຜິດຊອບໃນການຜະລິດ ແລະ ຊີວິດການເປັນຢູ່ຂອງປະຊາຊົນ. ດ້ວຍຈິດໃຈຕັດສິນໃຈຄວບຄຸມໄພເງິນເຟີ້ໃຫ້ຢູ່ໃນລະດັບຕ່ຳກ່ວາ 5% ຕາມຄາດໝາຍທີ່ສະພາແຫ່ງຊາດໄດ້ວາງອອກ, ທ່ານຮອງນາຍົກລັດຖະມົນຕີ ຮຽກຮ້ອງ, ສຳລັບນະໂຍບາຍເງິນຕາທະນາຄານແຫ່ງລັດຕ້ອງບໍລິຫານເພື່ອຮັກສາອັດຕາໄພເງິນເຟີ້ພື້ນຖານແຕ່ 1,8% - 2%, ຜັນຂະຫຍາຍບັນດາມາດຕະການຕັ້ງໜ້າເພື່ອຫລຸດຜ່ອນດອກເບ້ຍກູ້ຢືມ. ເພື່ອຈຳກັດການເພີ່ມລາຄາໃນໄລຍະທ້າຍປີ, ທ່ານຮອງນາຍົກລັດຖະມົນຕີສະເໜີໃຫ້ບັນດາກະຊວງ, ຂະແໜງການ, ສົມທົບກັບບັນດາທ້ອງຖິ່ນມີວິທີການຜັນຂະຫຍາຍວຽກງານກະກຽມສິນຄ້າ, ຍູ້ແຮງບັນດາການເຄື່ອນໄຫວເຊື່ອມຕໍ່ຜະລິດຕະພັນກະເສດປອດສານພິດ, ປອດໄພ, ຜັນຂະຫຍາຍລາຍການຮັບປະກັນລາຄາຕະຫຼາດເປັນປົກກະຕິເໝາະສົມກັບສະພາບຕົວຈິງຂອງທ້ອງຖິ່ນໃນໂອກາດງານ, ບຸນຕ່າງໆ.