(ພາບປະກອບຈາກ TTXVN)
(vovworld) – ວັນທີ 6/7, ຄະນະຜູ້ຕາງໜ້າ ຫວຽດນາມ ປະຈຳ ເຊີແນວ ໂດຍ ທ່ານ ຫງວຽນແທ່ງຈູງ, ເອກອັກຄະລັດຖະທູດ, ຫົວໜ້າຄະນະປະຕິບັດງານ ນຳໜ້າໄດ້ເຂົ້າຮ່ວມງານບຸນບັນດາປະຊາຊາດ ແລະ ພິທີສະເຫຼີມສະຫຼອງ 70 ປີແຫ່ງວັນສ້າງຕັ້ງພັກແຮງງານ ລັດ ເຊີແນວ (ປະເທດສະວິດ) ດ້ວຍຖານະເປັນແຂກກິຕິມະສັກ. ຕໍ່ໜ້າຄວາມເອົາໃຈໃສ່ຂອງເພື່ອນມິດສາກົນເປັນຈຳນວນຫຼວງຫຼາຍ, ທ່ານເອກອັກຄະລັດຖະທູດ ເລຮ່ວາຍຈູງ, ໄດ້ແຈ້ງໃຫ້ຊາບກ່ຽວກັບຄວາມເຄັ່ງຕຶງໄລຍະມໍ່ໆມານີ້ຢູ່ທະເລຕາເວັນອອກ ຊຶ່ງເລີ່ມມາຈາກເລື່ອງ ຈີນ ຕັ້ງຮ້ານເຈາະນ້ຳມັນ ໄຮຢາງ 891 ຢ່າງຜິດກົດໝາຍໃນເຂດເສດຖະກິດຈຳເພາະ ແລະ ໄຫຼ່ທະວີບຂອງ ຫວຽດນາມ, ຢືນຢັນຢ່າງຈະແຈ້ງກ່ຽວກັບອະທິປະໄຕຂອງຫວຽດນາມ ທີ່ມີຕໍ່ໝູ່ເກາະຮ່ວາງຊາ ແລະ ເຈື່ອງຊາ ຢູ່ທະເລຕາເວັນອອກ, ພ້ອມທັງຢືນຢັນທັດສະນະສະເໝີຕົ້ນສະເໝີປາຍຂອງ ຫວຽດນາມ ແມ່ນນຳໃຊ້ທຸກໆມາດຕະການສັນຕິພາບ, ສອດຄ່ອງກັບກົດໝາຍສາກົນໃນນັ້ນມີສົນທິສັນຍາ ສປຊ ກ່ຽວກັບກົດໝາຍວ່າດ້ວຍທະເລປີ 1982 (UNCLOS) ເພື່ອແກ້ໄຂຄວາມເຄັ່ງຕຶງ, ປະກອບສ່ວນຮັກສາສັນຕິພາບ, ສະຖຽນລະພາບຂອງພາກພື້ນກໍ່ຄືຂອງໂລກ.
ບັນດາສະມາຊິກຂອງພັກແຮງງານລັດ ເຊີແນວ (ປະເທດສະວິດ), ເພື່ອນມິດສາກົນ ແລະ ມະຫາຊົນເຂົ້າຮ່ວມໄດ້ຕີລາຄາສູງບັນດາຂໍ້ມູນຂ່າວສານຂອງ ຫວຽດນາມ, ຊ່ວຍເຂົາເຈົ້າເຂົ້າໃຈຫຼາຍກ່ວາອີກກ່ຽວກັບສະພາບການຢູ່ທະເລຕາເວັນອອກ. ກ່ອນໜ້ານັ້ນ, ສະມາຄົມມິດຕະພາບກັບ ຫວຽດນາມຂອງຫຼາຍປະເທດເຊິ່ງລວມມີ: ສະວິດ, ຝຣັ່ງ, ເຢຍລະມັນ, ແອັດສະປາຍ... ໄດ້ສົມທົບ, ພ້ອມກັນອອກຖະແຫຼງການຄັດຄ້ານການກະທຳຂອງ ຈີນ ລ່ວງລ້ຳເຂດເສດຖະກິດຈຳເພາະ ແລະ ໄຫຼ່ທະວີບຂອງ ຫວຽດນາມ ຢ່າງຮຸນແຮງ, ລະເມີດກົດໝາຍສາກົນຢ່າງໜັກ, ເດັດດ່ຽວທວງໃຫ້ ຈີນ ຢຸດຕິທຸກການເຄື່ອນໄຫວນາບຂູ່ ຫວຽດນາມ ກໍ່ຄືກັບສັນຕິພາບ ແລະ ສະຖຽນລະພາບໃນພາກພື້ນ.