(vovworld) - ​​ຕອນ​ເຊົ້າ​ວັນ​ທີ 18/10, ທີ່​ນະ​ຄອນ​ດ່າ​ນັງ​ ທ່ານ ຫງວຽນ​ຈີ້​ວິ້ງ ຮອງ​ລັດ​ຖະ​ມົນ​ຕີ​ກະ​ຊວງ​ປ້ອງ​ກັນ​ປະ​ເທດຫວຽດ​ນາມ ແລະ ທ່ານ Ted Osius ເອກ​ອັກ​ຄະ​ລັດ​ຖະ​ທູດ​ອາ​ເມ​ລິ​ກາ​ປະ​ຈຳ​ຫວຽດ​ນາມ ໄດ້​ເປັນ​ປະ​ທານ​ໃນ​ພິ​ທີ​ເລີ່ມ​​ດຳ​ເນີນ​ໂຄງ​ການ​ກຳ​ຈັດ ມົນ​ລະ​ພິດ​ດີ​ໂອ​ຊີນ​ໄລ​ຍະ2 ແລະ ກໍ່​ແມ່ນ​ໄລ​ຍະ​ສຸດ​ທ້າຍ​ຢູ່​ສະ​ໜາມ​ບິນ​ດ່າ​ນັງ. ໄລ​ຍະ​ທີ່2ຂອງ​ໂຄງ​ການ ຄາດ​ຄະ​ເນ​ວ່າ​ຈະ​ສຳ​ເລັດ​ໃນ​ກາງ​ປີ 2017. ທ່ານ​ຮອງ​ລັດ​ຖະ​ມົນ​ຕີ ຫງວຽນ​ຈີ້ວິ້ງ ໃຫ້​ຮູ້​ວ່າ :

        “​ໄລ​ຍະ2ຂອງ​ໂຄງ​ການ​ກຳ​ຈັດ​ທາດ​ພິດ​ດີ​ໂອ​ຊີນ​ຢູ່​ສະ​ໜາມ​ບິນ​ດ່າ​ນັງ ແມ່ນ​ບາດ​ກ້າວ​ສຳ​ຄັນ, ໄດ້​ຢັ້ງ​ຢືນ​​ເຖິງຄວາມ​ມາ​ນະ​ພະ​ຍາ​ຍາມ​ຂອງ​ບັນ​ດາ​ອົງ​ການ​ທີ່​ກ່ຽວ​ຂ້ອງ​ຂອງ​ຫວຽດ​ນາມ-ອາ​ເມ​ລິ​ກາ​ໃນ​ການ​ຊຸກ​ຍູ້​ຄວາມ​ຄືບ​ໜ້າ​ໃນ​ການ​ປະ​ຕິ​ບັດ​ໂຄງ​ການ. ​ປະ​ຕິ​ບັດສຳ​ເລັດ​ເລື່ອງ​ກຳ​ຈັດ​ດີ​ໂອ​ຊີນ​ຢູ່​ດ່າ​ນັງ​ໂດຍ​ໄວ ຕາມ​ຄຳ​ໝັ້ນ​ສັນ​ຍາ​ຂອງ​ລັດ​ຖະ​ບານ​ສອງ​ປະ​ເທດ​ຫວຽດ​ນາມ ແລະ ອາ​ເມ​ລິ​ກາ. ຜ່ານນັ້ນ, ປະ​ກອບ​ສ່ວນ​ເຮັດ​ໃຫ້​ສະ​ພາບ​ແວດ​ລ້ອມ​ທີ່​ດິນ​ປອດ​ສານ​ພິດ, ຮັບ​ປະ​ກັນ​ສຸ​ຂະ​ພາບ​ໃຫ້​ແກ່​ມະ​ນຸດ”

        ນັບ​ແຕ່​ປີ 2000, ລັດ​ຖະ​ບານ​ຫວຽດ​ນາມ ແລະ ອາ​ເມ​ລິ​ກາ ໄດ້​ຮ່ວມ​ມື​​ກ່ຽວ​ກັບ​ບັນ​ດາ​ບັນ​ຫາ​ທີ່​ກ່ຽວ​ຂ້ອງ​ເຖິງ​ທາດ​ພິດ​ສີ​ສົ້ມ/ດີ​ໂອ​ຊີນ. ໂຄງ​ການ​ກຳ​ຈັດ​ມົນ​ລະ​ພິດ​ດີ​ໂອ​ຊີນ​ຢູ່​ສະ​ໜາມ​ບິນ​​ສາ​ກົນດ່າ​ນັງ ເປັນ​ຂີດ​ໝາຍ​ສຳ​ຄັນ​ສຳ​ລັບ​ການ​ພົວ​ພັນ​ສອງ​ຝ່າຍ​ລະ​ຫວ່າງ​ສອງ​ປະ​ເທດ. ປະ​ຈຸ​ບັນ, ລັດ​ຖະ​ບານ​ສອງ​ປະ​ເທດ​ພວມ​ສ້າງ​ແຜນ​ການ​ກຳ​ຈັດ​ມົນ​ລະ​ພິດ​ດີ​ໂອ​ຊີນ​ຢູ່​ສະ​ໜາມ​ບິນ​ບຽນ​ຮ​ວ່າ.