(ພາບປະກອບ)
ແຂວງບັກກ້ານ, ແຂວງເຂດພູດອຍ ມີພູມສັນຖານສ່ວນຫຼາຍແມ່ນພູດອຍ ສະນັ້ນຈຶ່ງປະສົບກັບຄວາມຫຍຸ້ງຍາກ ໃນການຜັນຂະຫຍາຍ ບັນດາເຂດອຸດສາຫະກຳທີ່ມີຂະໜາດດ້ວຍເນື້ອທີ່ທົ່ງພຽງໃຫຍ່. ດັ່ງນັ້ນ, ເລື່ອງການສ້າງຕັ້ງບັນດາກຸ່ມອຸດສາຫະກຳ ທີ່ມີຂອບຂະໜາດນ້ອຍ, ກົນໄກການເຄື່ອນໄຫວຢ່າງມີໄຫວພິບ, ອ່ອນໂຍນ ເພື່ອດຶງດູດເງິນລົງທຶນ ໃນການກໍ່ສ້າງບັນດາວິສາຫະກິດຂະໜາດນ້ອຍ ແລະ ຂະໜາດກາງ ໃຫ້ເໝາະສົມ.
ຕາມຮ່າງແຜນກຳນົດ ແລະ ພັດທະນາບັນດາກຸ່ມອຸດສາຫະກຳ ແຂວງບັກກ້ານ ໄລຍະແຕ່ ປີ 2010 ຫາປີ 2020, ແຂວງບັກກ້ານ ຈະພັດທະນາ ກຸ່ມອຸດສາຫະກຳ 21 ກຸ່ມ ດ້ວຍເນື້ອທີ່ ທັງໝົດແມ່ນກ່ວາ 488 ເຮັກຕາ, ຍອດເງິນລົງທຶນ ກ່ວາ 3.000 ຕື້ດົ່ງ, ດຶງດູດ ແຮງງານ ເກືອບ 40 ພັນຄົນ. ບັນດາກຸ່ມອຸດສາຫະກຳ ຈະຖືກແບ່ງເປັນ 4 ອະນຸພາກພື້ນ ລຽບຕາມເສັ້ນທາງ ຕາມແລວທາງເສດຖະກິດ ເລກ 3. ທ່ານ ຫຼີທາຍຮ່າ, ປະທານຄະນະກຳມະການປະຊາຊົນແຂວງບັກກ້ານ, ໃຫ້ຮູ້ວ່າ: ແຂວງບັກກ້ານ ສຸມໃສ່ລົງທຶນທີ່ມີລັກສະນະບຸກທະລຸ ເພື່ອແນໃສ່ພັດທະນາ ບັນດາຂະແໜງອຸດສາຫະກຳ ທີ່ມີຄວາມສາມາດບົ່ມຊ້ອນ ມີທ່າແຮງດ້ວຍວິທີວ່ອງໄວ, ໝັ້ນຄົງ ແລະ ມີລັກສະນະເປັນໄປໄດ້ສູງ.
ແຂວງບັກກ້ານ ຕົ້ນຕໍແມ່ນອຸດສາຫະກຳ ກ່ຽວກັບການຂຸດຄົ້ນ. ປັດຈຸບັນການຂຸດຄົ້ນ ກ່ຽວກັບວັດຖຸດິບໃນການກໍ່ສ້າງ ຄື: ຊາຍຫີນຮັບໃຊ້ໃຫ້ແກ່ການກໍ່ສ້າງ ແລະ ແຮ່ທາດ, ເຊັ່ນເຫຼັກ, ເຫຼັກກ້າ, ກົ່ວ, ສັງກະສີ ເພື່ອປຸກລຸກບັນດາຄວາມສາມາດບົ່ມຊ້ອນ ແຫຼ່ງກຳລັງນີ້ຕ້ອງຮຽກຮ້ອງບັນດານັກລົງທຶນ.
ເປົ້າໝາຍຂອງແຜນຮ່າງທີ່ຍົກອອກແມ່ນ ຮອດປີ 2020 ແຕ່ລະເມືອງ, ເທດສະບານ ໃນແຂວງບັກກ້ານ ຈະມີກຸ່ມອຸດສາຫະກຳຢ່າງໜ້ອຍສຸດໜຶ່ງກຸ່ມ. ບັນດາກຸ່ມອຸດສາຫະກຳໄດ້ກຳນົດ ພິເສດສະເພາະ ຕໍ່ບັນດາເຂດຊຸມຊົນ ແລະ ຈັດສັນຢູ່ບັນດາບ່ອນ ທີ່ມີພື້ນໂຄງປະກອບພື້ນຖານໂຄງລ່າງສະດວກ, ຕິດພັນ ກັບເຂດວັດຖຸດິບ ແລະ ແຫຼ່ງແຮງງານ, ມີເງື່ອນໄຂແກ້ໄຂ ແລະ ຮັກສາສິ່ງແວດລ້ອມ, ຮັບປະກັນໃຫ້ແກ່ອຸດສາຫະກຳພັດທະນາ ຢ່າງມີປະສິດທິຜົນ ແລະ ຍືນຍົງ.