ວັນທີ 14/12, ຢູ່ຮ່າໂນ້ຍ,ໃນຂອບເຂດລາຍການກອງປະຊຸມການຕ່າງປະເທດຄັ້ງທີ 27, ໄດ້ໄຂກອງປະຊຸມທີ່ປຶກສາດ້ານການຄ້າ 2011 ດ້ວຍຫົວເລື່ອງ “ການເຊື່ອມໂຍງເຂົ້າກັບສາກົນ ແລະ ໜ້າທີ່ເສດຖະກິດການຕ່າງປະເທດໃນໄລຍະໃໝ່” ແລະກອງປະຊຸມວຽກງານການພົວພັນຕ່າງປະເທດທົ່ວປະເທດຄັ້ງທີ 16 ດ້ວຍຫົວເລື່ອງ “ຍູ້ໄວວຽກງານການຕ່າງປະເທດທ້ອງຖິ່ນຢ່າງຮອບດ້ານ, ປະກອບສ່ວນຢ່າງຕັ້ງໜ້າເຂົ້າໃນວິວັດທະນາການເຊື່ອມໂຍງເຂົ້າກັບເສດຖະກິດຂອງປະເທດຊາດ”
ກ່າວຄຳເຫັນທີ່ກອງປະຊຸມທີ່ປຶກສາດ້ານການຄ້າ 2011, ທ່ານນາຍົກລັດ ຖະມົນຕີຫວຽດນາມ ຫງວຽນເຕີນຢູງຢັ້ງຢືນວ່າ: ວຽກງານການພົວພັນກັບຕ່າງປະເທດເວົ້າລວມ ແລະ ເສດຖະກິດຕ່າງປະເທດເວົ້າສະເພາະ ໄດ້ປະກອບສ່ວນຢ່າງແທດຈິງ ເຂົ້າໃນຜົນງານລວມຂອງປະເທດຊາດ. ທ່ານໄດ້ເນັ້ນໜັກເຖິງບັນດາໜ້າທີ່ຈຸດສຸມສຳລັບວຽກງານການຕ່າງປະເທດໃນປີ 2012 ວ່າ:
“ຂ້າພະເຈົ້າສະເໜີໃຫ້ສ້າງຍຸດທະສາດສັງລວມກ່ຽວກັບການເຊື່ອມໂຍງເຂົ້າກັບເສດຖະກິດຂອງຊາດນັບແຕ່ໄຕມາດທີ 1 ປີ 2012 ຕ້ອງລາຍງານຕໍ່ລັດຖະບານ, ບົນພື້ນຖານນັ້ນ, ຕ້ອງມີຍຸດທະສາດການຮ່ວມມືດ້ານເສດຖະກິດກັບແຕ່ລະປະເທດ, ແຕ່ລະພາກພື້ນ”
ທ່ານນາຍົກລັດຖະມົນຕີສະເໜີໃຫ້ບັນດາທ່ານເອກອັກຄະລັດຖະທູດ, ທີ່ປຶກສາດ້ານການຄ້າ ຈົ່ງຕັ້ງໜ້າຂົນຂວາຍປະເທດຕ່າງໆ ຮັບຮູ້ຂໍ້ກຳນົດເສດຖະກິດການຕະຫຼາດຂອງຫວຽດນາມ, ສືບຕໍ່ຂົນຂວາຍທຶນ ODA ສຸມໃສ່ພັດທະນາພື້ນຖານໂຄງລ່າງ, ພັດທະນາຕົວເມືອງໃຫ່ຍ, ສາທາລະນະສຸກ, ການສຶກສາ, ຮັບມືກັບການປ່ຽນແປງຂອງດິນຟ້າອາກາດ… ທ່ານນາຍົກລັດຖະມົນຕີໃສ່ໃຈວ່າ ຕ້ອງເພີ່ມທະວີຂົນຂວາຍການລົງທຶນໂດຍກົງຈາກຕ່າງປະເທດ ຕາມທິດລົງທຶນເຂົ້າລວງເລິກ, ເຕັກໂນໂລຊີສູງ ຕິດພັນກັບບັນດາກົນໄກສ້າງເງື່ອນໄຂອຳນວຍຄວາມສະດວກທີ່ສຸດໃຫ້ບັນດານັກລົງທຶນ, ຖືເປັນສຳຄັນວຽກງານພະນັກງານ, ຮຽກຮ້ອງໃຫ້ກວດກາຄືນບັນດາອົງການການທູດ, ອົງການຜູ້ຕາງໜ້າຢູ່ຕ່າງປະເທດ ເພື່ອສົມທົບກັນຢ່າງແໜ້ນແຟ້ນກ່ວາອີກ, ເສີມຂະຫຍາຍກຳລັງແຮງ ພ້ອມກັນປະຕິບັດໜ້າທີ່ເຊື່ອມໂຍງເຂົ້າກັບເສດຖະກິດໃຫ້ເປັນຢ່າງດີ.
ຕອນບ່າຍດຽວກັນ ຢູ່ ຮ່າໂນ້ຍ, ໃນຂອບເຂດກອງປະຊຸມການທູດຄັ້ງທີ 27 ໄດ້ດຳເນີນກອງປະຊຸມການຕ່າງປະເທດຄັ້ງທີ 16 ພາຍໃຕ້ຫົວເລື່ອງວ່າ: ຍູ້ແຮງວຽກງານການຕ່າງປະເທດຢູ່ທ້ອງຖິ່ນຢ່າງຮອບດ້ານ, ປະກອບສ່ວນຢ່າງຕັ້ງຫນ້າເຂົ້າໃນວິວັດການເຊື່ອມໂຍງເຂົ້າກັບສາກົນຂອງປະເທດຊາດ“ ໂດຍມີການເຂົ້າຮ່ວມຂອງຜູ້ແທນ 300 ກວ່າຄົນ ທີ່ມາຈາກ 63 ແຂວງ, ນະຄອນ ໃນທົ່ວເທດ ແລະ ບັນດາກະຊວງ, ຂະແຫນງການ.
ກ່າວຄຳເຫັນທີ່ກອງປະຊຸມ, ທ່ານ ຟ້າມບີ່ງມີນ ລັດຖະມົນຕີການຕ່າງປະເທດຫວຽດນາມ ຕີລາຄາສູງບັນດາຜົນງານໃນວຽກງານການຕ່າງປະເທດຂອງທ້ອງຖິ່ນໃນ 2 ປີ ພາຍຫລັງກອງປະຊຸມການຕ່າງປະເທດທ້ອງຖິ່ນທົ່ວປະເທດຄັ້ງທີ 15 ຈັດຂຶ້ນໃນເດືອນກັນຍາປີ 2009. ເມື່ອຫວນຄືນວຽກງານການຕ່າງປະເທດຢູ່ທ້ອງຖິ່ນໃນ 2 ປີຜ່ານມາ, ທ່ານລັດຖະມົນຕີການຕ່າງປະເທດ ຟ້າມບີ່ງມີນ ຊີ້ໃຫ້ເຫັນຂໍ້ຄົງຄ້າງຄວນແກ້ໄຂ.
“ການແນະນຳແຜນນະໂຍບາຍ, ຂໍ້ມູນຂ່າວສານກ່ຽວກັບຕະຫລາດຂອງຄູ່ຮ່ວມມື, ແກ້ໄຂບັນຫາເກີດຂຶ້ນ ເມື່ອມີຄະນະຜູ້ແທນມາຢ້ຽມຢາມທ້ອງຖິ່ນ ບາງເທ່ືອບໍຕອບສະຫນອງຢ່າງທັນການ, ບັນຫາບູລະນະກົງຈັກ, ກົນໄກຍົກສູງລະດັບຄວາມຮູ້ວິຊາການ, ພາສາຕ່າງປະເທດຂອງຖັນແຖວພະນັກງານເຮັດວຽກງານການຕ່າງປະເທດຢູ່ທ້ອງຖິ່ນກໍຄວນໄດ້ຮັບຄວາມເອົາໃຈໃສ່ ແລະ ປົວແປງໃຫ້ຫລາຍກວ່າອີກ ເພື່ອຕອບສະຫນອງຄວາມຮຽກຮ້ອງຕ້ອງການຂອງວຽກງານການຕ່າງປະເທດໃນສະພາບການໃຫມ່.“