(vovworld) - ຮ້າລອງແມ່ນໜຶ່ງໃນບັນດາອ່າວງາມທີ່ສຸດຂອງໂລກ, ເຊິ່ງໄດ້ຮັບການຮັບຮອງຈາກ UNESCO ສອງຄັ້ງວ່າແມ່ນ ສິ່ງມະຫັດສະຈັນທຳມະຊາດຂອງໂລກ. ເຫດການ Carnaval ຮ້າລອງ 2013 ດ້ວຍຫົວຂໍ້ວ່າ “ສີສັນກວາງນິງ, ແຫ່ງເຕົ້າໂຮມ ແລະ ແຜ່ຂະຫຍາຍ” ທີ່ຫາກໍ່ດຳເນີນຫວ່າງແລ້ວນີ້ ໄດ້ດຶງດູດແຂກມາຢາມເປັນຈຳນວນຫຼວງຫຼາຍ. ພາຍຫຼັງຈັດຕັ້ງເປັນ 7 ຄັ້ງ, Carnaval ຮ້າລອງ ໄດ້ກາຍເປັນເຄື່ອງໝາຍຂອງຂະແໜງທ່ອງທ່ຽວກວາງນິງ.
Carnaval ຮ້າລອງ 2013
(ພາບ: ອິນເຕີແນດ)
ງານບຸນ Carnaval ຮ້າລອງ 2013 ໄດ້ຕ້ອນຮັບນັກທ່ອງທ່ຽວ 10.000 ກວ່າຄົນມາຊົມ. ໃນນັ້ນມີນັກທ່ອງທ່ຽວສາກົນຫຼາຍຄົນ. ເຖິງວ່າແຕ່ລະຄົນຈະມີຄວາມຮູ້ສຶກກ່ຽວກັບ Carnaval ແຕກຕ່າງກັນກໍ່ຕາມ, ແຕ່ເຂົາເຈົ້າລ້ວນແຕ່ມີຄວາມປະທັບໃຈວ່າ, Carnaval ຮ້າລອງ 2013 ແມ່ນງານບຸນທີ່ເປັນເອກະລັກສະເພາະ, ຟົດຟື້ນ ແລະ ມີສີສັນຫຼາກຫຼາຍ. ນັກທ່ອງທ່ຽວຊາວຊູແອດ ສະແດງຄວາມພາກພູມໃຈ ເມື່ອເຂົ້າຮ່ວມບັນຍາກາດຂອງງານບຸນ.
“ບັນຍາກາດງານບຸນ Carnaval ຮ້າລອງ ມ່ວນຫຼາຍ, ບັນດານັກສະແດງ ແລະ ຊາວຮ້າລອງ ເປັນຕາຮັກທີ່ສຸດ. ຂ້າພະເຈົ້າດີໃຈທີ່ໄດ້ເລືອກເຟັ້ນຮ້າລອງ ເປັນແຫ່ງມາທ່ອງທ່ຽວໃນໂອກາດນີ້”.
ຈຸດໃໝ່ຂອງ Carnaval ຮ້າລອງ 2013 ນັ້ນແມ່ນ, ໜ່ວຍປະດິດສິລະປະທັງໝົດລ້ວນແຕ່ໂດຍຊາວກວາງນິງ ຮັບຜິດຊອບ. ຕາມທ່ານນາງ ຫວໍທິທູຖູຍ, ຮອງປະທານຄະນະກຳມະການປະຊາຊົນແຂວງກວາງນິງ ແລ້ວ, ຂະແໜງທ່ອງທ່ຽວກວາງນິງ ຢາກຈັດງານບຸນໃຫ້ມີສີສັນສະເພາະ, ພ້ອມທັງສ້າງບັນດາຜະລິດຕະພັນທ່ອງທ່ຽວ ວັດທະນະທຳທ້ອງຖີ່ນອີກ ເພື່ອຮັບໃຊ້ໃຫ້ແກ່ນັກທ່ອງທ່ຽວ.
“ໃນຊຸມປີຜ່ານມາ, Carnaval ຮ້າລອງ ໄດ້ກາຍເປັນຜະລິດຕະພັນທ່ອງທ່ຽວ, ວັດທະນະທຳທີ່ເປັນເອກະລັກສະເພາະຂອງກວາງນິງ ຢ່າງແທ້ຈິງ, ອັນໄດ້ສ້າງຄວາມຈັບອົກຈັບໃຈໃຫ້ແກ່ປະຊາຊົນ ແລະ ນັກທ່ອງທ່ຽວ. ດ້ວຍຄວາມສຸດຈິດສຸດໃຈ ແລະ ຄວາມພະຍາຍາມຂອງປະຊາຊົນກວາງນິງ, Carnaval ຮ້າລອງ 2013 ທີ່ມີສີສັນຫຼາກຫຼາຍ ແລະ ເຂັ້ມຄົ້ນໄປດ້ວຍສີສັນວັດທະນະທຳທ້ອງຖີ່ນໄດ້ສ້າງຄວາມປະທັບໃຈອັນດີງາມໃຫ້ແກ່ນັກທ່ອງທ່ຽວ”
Carnaval ຮ້າລອງ 2013
(ພາບ: ອິນເຕີແນດ)
ກວາງນິງ ໄດ້ຮັບການປຽບທຽບແມ່ນຮູບພາບຫຍໍ້ເຂົ້າຂອງປະເທດຫວຽດນາມ ບໍ່ພຽງແຕ່ຍ້ອນປັດໃຈພູມີປະເທດ, ພູມສັນຖານເທົ່ານັ້ນ, ຫາກແມ່ນຍ້ອນການມີໜ້າຂອງ 34 ຊົນເຜົ່າຄື: ເຜົ່າກິງ, ສ໋ານຢີ່ວ, ໄຕ່, ນຸ່ງ, ເມື່ອງ, ຜູ່ໄທ… ດ້ວຍວັດທະນະທຳທີ່ເປັນເອກະລັກສະເພາະ. ຊາວເຜົ່າຢາວ 60 ຄົນ ໄດ້ເຂົ້າຮ່ວມວາດຟ້ອນ ພາວະນາຂໍໃຫ້ຝົນຕົກເພື່ອເອື້ອອຳນວຍຄວາມສະດວກໃຫ້ແກ່ລະດູການປູກຝັງ, ພິທີຮັບລູກໃພ້ຂອງຊາວປະມົງໃນທະເລຮ້າລອງ, ຟ້ອນຫາກຸ້ງນ້ອຍຂອງເຜົ່າສ໋ານໄຈ, ຟ້ອນ ແລະ ຂັບແທນຂອງເຜົ່າໄຕ່…ທ່ານ ຮ່ວາງກວົກທ໋າຍ, ຮອງຫົວໜ້າພະແນກວັດທະນະທຳ, ກິລາ ແລະ ທ່ອງທ່ຽວແຂວງກວາງນິງ, ຜູ້ກຳກັບການສະແດງ, ທັງແມ່ນຜູ້ແຕ່ງລະຄອນ Carnaval ຮ້າລອງ 2013, ໃຫ້ຮູ້ວ່າ, ງານບຸນຕາມຖະໜົນ Carnaval ຮ້າລອງ 2013 ໄດ້ແນະນຳບັນດາງານບຸນ, ການລະຫຼິ້ນພື້ນເມືອງ, ການດຳເນີນຊີວິດ, ການອອກແຮງງານຂອງປະຊາຄົມບັນດາເຜົ່າທີ່ພວມດຳລົງຊີວິດຢູ່ແຂວງກວາງນິງ.
“ບັນດາຄູນຄ່າເກືອບທັງໝົດຂອງ Carnaval ຮ້າລອງ 2013 ໄດ້ສະແດງອອກຕາມຖະໜົນຫົນທາງ ຜ່ານວາດຟ້ອນ, ການດຳລົງຊີວິດປະຈຳວັນ, ການຊ່ວງເຮືອ, ການເຄື່ອນໄຫວວັດທະນະທຳພື້ນເມືອງຂອງປະຊາຊົນບັນດາເຜົ່າຢູ່ກວາງນິງ”.
Carnaval ຮ້າລອງ 2013
(ພາບ: ອິນເຕີແນດ)
ຈຸດພົ້ນເດັ່ນສຳຄັນທີ່ສຸດຂອງງານບຸນ Carnaval ຮ້າລອງ ແມ່ນຂະບວນແຫ່ຢ່າງຟົດຟື້ນມ່ວນຊື່ນ ແລະ ດູດດື່ມຕາມຖະໜົນຫົນທາງ ດ້ວຍບັນດາລົດໃຫຍ່ທີ່ໄດ້ຮັບການປະດັບປະດາຢ່າງສວຍງາມ, ການສະແດງຟ້ອນພື້ນເມືອງຂອງບັນດາເຜົ່າໃນແຂວງກວາງນິງ. Carnaval ຮ້າລອງ 2013 ຍັງມີການສະແດງສິລະປະຂອງບັນດາຄະນະສິລະປະກຳສາກົນທີ່ມາຈາກລາວ, ຈີນ, ສເກົາຫຼີ… ທ່ານ ຫງວຽນຢູຍເກື່ອງ, ຮອງປະທານຜູ້ປະຈຳການສະມາຄົມມິດຕະພາບຫວຽດນາມ - ກູບາ, ໃຫ້ຮູ້ວ່າ:
“ເມື່ອເວົ້າເຖິງ Carnaval ເຂົາເຈົ້າເຄີຍຄິດເຖິງບັນດາປະເທດອາເມລິກາ - ລາຕີນ, ພິເສດແມ່ນ ບຮາຊິນ ແລະ ກູບາ. ແຕ່ Carnaval ຮ້າລອງ ແມ່ນຫົວຄິດປະດິດສ້າງຂອງແຂວງກວາງນິງ, ດ້ວຍການໝູນໃຊ້ຮູບການ Carnaval ຂອງປະເທດຕ່າງໆ ແລະ ນຳເຂົ້າເນື້ອໃນໃໝ່ຂອງຫວຽດນາມ, ສ້າງເປັນຜະລິດຕະພັນທ່ອງທ່ຽວທີ່ເປັນເອກະລັກສະເພາະຂອງກວາງນິງ. ນີ້ແມ່ນໝາກຜົນແຫ່ງການເຊື່ອມໂຍງວັດທະນະທຳຂອງພວກເຮົາ ໃນສະພາບປະເທດພວມປ່ຽນໃໝ່”.
Carnaval ຮ້າລອງ 2013
(ພາບ: ອິນເຕີແນດ)
ຜູ້ຊົມຕ່າງກໍ່ຮູ້ສຶກເພິ່ງພໍໃຈຍ້ອນຄວາມອຸດົມສົມບຸນ, ຄວາມດູດດື່ມຂອງລາຍການ, ບັນດາຄູນຄ່າວັດທະນະທຳທີ່ເປັນມູນເຊື້ອຂອງແຂວງກວາງນິງ. ທ່ານ ໂງວັນເຮີ້ຍ, ຊາວບ້ານບ້າຍໃຈ, ຮ້າລອງ, ເວົ້າວ່າ:
“ຂ້າພະເຈົ້າຮູ້ສຶກເປັນກຽດ ແມ່ນຜູ້ທີ່ໄດ້ດຳລົງຊີວິດຢູ່ຝັ່ງທະເລຮ້າລອງທີ່ສວຍງາມ. ນັກທ່ອງທ່ຽວພາຍໃນ ແລະ ຕ່າງປະເທດນັບໝື່ນຄົນມາແຫ່ງນີ້ເພື່ອເຂົ້າຮ່ວມCarnaval ຮ້າລອງ. ເມື່ອໄດ້ຮັບຊົມການສະແດງສິລະປະຂອງບັນດາຄະນະສິລະປະຕ່າງປະເທດ ແລະ ບັນດາເຜົ່າໃນແຂວງ, ພວກຂ້າພະເຈົ້າຮູ້ສຶກຄືວ່າຕົນເອງຄືໜຸ່ມແໜ້ນກວ່າ”
Carnaval ຮ້າລອງ 2013 ແມ່ນການສົມທົບຢ່າງກົມກຽວລະຫວ່າງວັດທະນະທຳທີ່ເປັນມູນເຊື້ອ ແລະ ທັນສະໄໝ, ອັນໄດ້ສ້າງຄວາມຈັບອົກຈັບໃຈ, ຄວາມດູດດື່ມ ແລະ ເຮັດໃຫ້ຜູ້ຊົມແປກປະຫຼາດໃຈ. ເຈືອຈານໃນບັນຍາກາດຂອງງານບຸນ, ນັກທ່ອງທ່ຽວໄດ້ຮັບຊົມ Carnaval ທີ່ເຂັ້ມຄົ້ນໄປດ້ວຍສີສັນວັດທະນະທຳທີ່ເປັນເອກະລັກສະເພາະຂອງເຂດທະເລຮ້າລອງທີ່ສວຍງາມໃນແຂວງກວາງນິງ ປະຈຸບັນນີ້.