ໂດຍຂີ່ລົດຜ່ານໄລຍະທາງເກືອບ 200 ກິໂລແມັດ ກໍຈະຮອດ ໂມກເຈົາ, ຢູ່ແຫ່ງນີ້, ນັກທ່ອງທ່ຽວຈະໄດ້ຮູ້ສຶກເຖິງອາກາດປອດໂປ່ງ, ເຢັນສະບາຍດ້ວຍບັນດາສະຖານທີ່ທ່ອງທ່ຽວທີ່ເປັນເອກະລັກສະເພາະຢູ່ທ້ອງຖິ່ນ. ການທ່ອງທ່ຽວຢູ່ ໂມກເຈົາເປັນເວລາມື້ໜຶ່ງ ຈະສ້າງຄວາມປະທັບໃຈໃຫ້ແກ່ແຂກທ່ອງທ່ຽວທັງຫຼາຍ.
ທົ່ງຜັກກາດຂາວຢຸ່ມົກເຈົາພວມບານສະພັ່ງເອ້ຄວາມງາມ |
ຕອນເຊົ້າຢູ່ ໂມກເຈົາ, ອາກາດເຢັນສະບາຍ ແລະ ສະຫງົບງຽບ. ແຂກທ່ອງທ່ຽວເມື່ອຕື່ນນອນໃນຫ້ອງພັກ Bunalow container ຂອງເຂດຊີວະພາບ ໂມກເຈົາ Arena Villege, ຈະມີໂນນຊາຂຽວອຸ່ມທຸ່ມປະກົດຂຶ້ນໃນສາຍຕາ. ຊາຖືກປູກເປັນແຖວທີ່ງາມຕາ. ເມື່ອຫຼຽວເບິ່ງຈາກທາງໄກ, ບັນດາຫ້ອງພັກ Bunalow container ນອນຕ່າງຫາກໃນທ່າມກາງໂນນຊາທີ່ກ້ວາງໃຫຍ່ໄພສານ, ທາງເທິ່ງແມ່ນທ້ອງຟ້າແຈ່ມໃສ ແລະ ທາງລຸ່ມມີແຕ່ຊາຂຽວອຸ່ມທຸ່ມເທົ່ານັ້ນ. ຢູ່ສະຖານທີ່ແຫ່ງນີ້, ແຂກທ່ອງທ່ຽວຮູ້ສຶກໄດ້ເຖິງຄວາມກົມກ່ຽວ, ສະໜິດຕິດພັນກັບທຳມະຊາດ, ທັງນີ້ກໍເປັນການບັນເທົາຄວາມອິດເມື່ອຍພາຍຫຼັງເຮັດວຽກມາເປັນໄລຍະໜຶ່ງ. ເມື່ອໄດ້ພັກຜ່ອນຢ່ອນອາລົມໃນຫ້ອງພັກໃນທ່າມກາງທັດສະນີຍະພາບເຊັ່ນນີ້, ເບິ່ງຄືວ່າ ແຂກທ່ອງທ່ຽວທັງຫຼາຍຈະມີພະລັງແຮງຕື່ມອີກ. ນາງຝ້າມແມງເຕີມ ນັກທ່ອງທ່ຽວຜູ້ໜຶ່ງໃຫ້ຮູ້ວ່າ:
“ ເຮົາມັກທີ່ສຸດ ແມ່ນຍາມຕອນເຊົ້າ, ຍ້ອນອາກາດປອດໂປ່ງ. ໄດ້ພັກໃນຫ້ອງທີ່ມີເຄື່ອງປັບອາກາດເຊັ່ນດຽວກັນ, ແຕ່ຄວາມຮູ້ສຶກກ່ຽວກັບອາກາດແມ່ນແຕກຕ່າງກັບຢູ່ເຂດຕົວເມືອງ. ຢູ່ແຫ່ງນີ້, ຂ້າພະເຈົ້ານອນລັບດີ, ຮູ້ສຶກແຂງແຮງ ແລະ ຢາກເຊື່ອມຕົວເຂົ້າກັບທຳມະຊາດ. ໃນເວລາພັກຜ່ອນຢູ່ແຫ່ງນີ້, ແຂກທ່ອງທ່ຽວຍັງຈະລົງຕົວຈິງເພື່ອເດັດຊາ ນຳເອົາເມືອຊົງດື່ມອີກດ້ວຍ ”
ຈາກໂນນທີ່ງຽບສະຫງັດ, ເດີນຜ່ານເຂດປ່າຂຽວອຸ່ມທຸ່ມ, ແຂກທ່ອງທ່ຽວກໍໄປຮອດບ້ານອ້າງ ທີ່ຂຶ້ນກັບຕາແສງ ດົງຊາງ, ເມືອງ ໂມກເຈົາ, ແຫ່ງທີ່ມີປ່າແປກທີ່ພວມທອດເງົາລົງໜ້ານ້ຳໃນໜອງໃຫຍ່ທີ່ເປັນໜ້າຈັບໃຈ. ແຂກທ່ອງທ່ຽວຈະໄດ້ຍ່າງຊົມທິວທັດແຄມໜອງ ແລະ ຄົ້ນຫາໃນປ່າແປກທີ່ກວ້າງໃຫຍ່ໄພສານ. ຄວາມຮົກເຮື້ອຂອງທຳມະຊາດຈະສ້າງຄວາມປະທັບໃຈໃຫ້ແກ່ແຂກທ່ອງທ່ຽວ, ພິເສດ ສຳລັບແຂກທ່ອງທ່ຽວມັກຖ່າຍຮູບນັ້ນ, ທິວທັດທຳມະຊາດຂອງປ່າແປກໃນບ້ານອ້າງຈະແມ່ນສະຖານທີ່ດູດດື່ມອີຫຼີ.
ຈຸດທີ່ເປັນເອກະລັກສະເພາະອີກອັນໜຶ່ງໃນບ້ານອ້າງ ແມ່ນບັນດາການດຳເນີນຊີວິດວັດທະນະທຳພື້ນເມືອງຂອງປະຊາຊົນບັນດາເຜົ່າຢູ່ແຫ່ງນີ້. ບັນດາເຮືອນຮ້ານທີ່ຊ້ອນຕົວກ້ອງຮົ່ມເຢັນຂອງຕົ້ນແປກ ກໍແມ່ນຈຸດທີ່ໂດດເດັ່ນທາງດ້ານສະຖາປັດຕະຍະກຳຂອງສະຖານທີ່ທ່ອງທ່ຽວນີ້. ຢູ່ແຫ່ງນີ້, ແຂກທ່ອງທ່ຽວຈະເຫັນປະຈັກຕາການດຳເນີນຊີວິດປະຈຳວັນ, ບັນດາງານບຸນອັນເປັນປະເພນີຫຼືບັນດາເຍື່ອງອາຫານພື້ນເມືອງຂອງຊາວເຜົ່າຜູ້ໄທ ແລະ ຊາວເຜົ່າມົ້ງດຳລົງຊີວິດຢູ່ນີ້. ນາງ ວູ້ມາຍແຄງ ສັງກັດບໍລິສັດຫຸ້ນສ່ວນທ່ອງທ່ຽວສາກົນ ແຄ້ງຊິງ ໃຫ້ຮູ້ວ່າ :
“ ສຳລັບສະຖານທີ່ ໂມກເຈົາ, ບໍລິສັດພວກຂ້າພະເຈົ້າ ມຸ່ງໄປສູ່ການສົມທົບລາຍການພັກຜ່ອນຢ່ອນອາລົມຢູ່ເຂດທິວທັດທຳມະຊາດພ້ອມກັບການໄປຄົ້ນຫາກ່ຽວກັບຊີວິດການເປັນຢູ່ຂອງພໍ່ແມ່ປະຊາຊົນຢູ່ໂມກເຈົາ, ຈຸດທີ່ເປັນເອກະລັກສະເພາະຂອງຊາວເຜົ່າຜູ້ໄທ ແລະ ຊາວເຜົ່າມົ້ງ, ແຂກທ່ອງທ່ຽວຈະຮູ້ສຶກໄດ້ເຖິງຄວາມສະໜິດຕິດພັນ ແລະ ຈິດໃຈຮັກແພງແຂກຄົນຂອງຊາວທ້ອງຖິ່ນ ພ້ອມທັງໄດ້ຊອກຮູ້ກ່ຽວກັບຮີດຄອງປະເພນີຂອງປະຊາຊົນບັນດາເຜົ່າຢູ່ ໂມກເຈົາອີກດ້ວຍ. ນອກຈາກນັ້ນ, ແຂກທ່ອງທ່ຽວຈະໄດ້ຮັບຟັງສຽງຂັບຮ້ອງ, ຮັບຊົມວາດຟ້ອນຂອງຊາວເຜົ່າມົ້ງ, ຟ້ອນແຊຂອງຊາວເຜົ່າຜູ້ໄທ, ການເຕັ້ນສາກຂອງພໍ່ແມ່ພີນ້ອງເຂດທາງທິດຕາເວັນຕົກສ່ຽງເໜືອຫວຽດນາມ ”
ໂມກເຈົາໃນຍາມຕອນບ່າຍ ກໍງາມເຊັ່ນກັນ, ບັນດາທົ່ງຜັກກາດຂາວບານສະພັ່ງເອ້ຄວາມງາມ. ແຂກທ່ອງທ່ຽວຈະລົງໄປຢ້ຽມຢາມເຂດຟາມລ້ຽງງົວຂອງຊາວ ໂມກເຈົາ ແລະ ໂຮງງານປຸງແຕ່ງນ້ຳນົມ ໂມກເຈົາ, ຢູ່ບ່ອນນີ້, ແຂກທ່ອງທ່ຽວຈະໄດ້ໃຫ້ງົວກິນ ແລະ ບີບນ້ຳນົມງົວ, ທັງນີ້ກໍຊ່ວຍໃຫ້ ແຂກທ່ອງທ່ຽວເຂົ້າໃຈກ່ຽວກັບບັນດາຂັ້ນຕອນຈາກລ້ຽງງົວຕະຫຼອດຮອດການຜະລິດນ້ຳນົມງົວ. ທ່ານນາງ ຟຸ່ງລິວລີ ຮອງຫົວໜ້າຂະແໜງວັດທະນະທຳເມືອງ ໂມກເຈົາ ໃຫ້ຮູ້ວ່າ :
“ ລາຍການທ່ອງທ່ຽວ ໂມກເຈົາ ຈະມຸ່ງໄປສູ່ຜະລິດຕະພັນກະສີກຳ, ຍົກຕົວຢ່າງຄື : ເຂົ້າໜົມນ້ຳນົມ, ຊາ, ນອກຈາກນັ້ນກໍມີໝາກໄມ້, ຜັກສະອາດ. ໃນປີນີ້ ກໍມີລາຍການທ່ອງທ່ຽວໄປຢ້ຽມຢາມເຂດປູກໝາກໝັ້ນ ເພື່ອໂຄສະນາຜະລິດຕະພັນທີ່ມີຢູ່ທ້ອງຖິ່ນ. ”
ຍາມຕອນຄ່ຳຢູ່ ໂມກເຈົາ, ອາກາດກັບຄືນສູ່ຄວາມໜາວ, ມີນ້ຳໝອກກີ້ວປົກຄຸມໄປທົ່ວເຂດ. ນິີ້ກໍແມ່ນເວລາທີ່ ແຂກທ່ອງທ່ຽວຈະໄດ້ເຂົ້າຮ່ວມບັນດາການເຄື່ອນໄຫວດ້ານວັດທະນະທຳ, ສະແດງສິລະປະຂອງຊາວເຜົ່າຜູ້ໄທ ແລະ ຊາວເຜົ່າມົ້ງໃນເຮືອນຮ້ານທີ່ລຽບລ່າຍ ແຕ່ເຕັມໄປດ້ວຍຄວາມອົບອຸ່ນ. ກ່ອນທີ່ຈະສິ້ນສຸດການເດີນທາງຄົ້ນຫາທີ່ເປັນໜ້າຈັບໃຈ, ແຂກທ່ອງທ່ຽວຈະຊົມໃຊ້ການບໍລິການຢ່ອນອາລົມຂອງທ້ອງຖິ່ນເຊັ່ນ : ອາບນ້ຳຊາ, ອາບນ້ຳນົມ…
ການທ່ອງທ່ຽວຢູ່ໂມກເຈົາມື້ໜຶ່ງ ກໍແມ່ນການຄົ້ນຫາ, ຊອກຮູ້ຕົວຈິງທີ່ເປັນໜ້າຈັບອົກຈັບໃຈ. ແຂກທ່ອງທ່ຽວຈະມີຄວາມປະທັບໃຈ ແລະ ຍາກຈະລືມໄດ້.