(vovworld) - ການໄຫວ້ບູຊາເຈົ້າຊີວິດຮູ່ງໃນມື້ນີ້ ບໍ່ພຽງແຕ່ດຳເນີນຢູ່ເຂດປູຊະນີຍະສະຖານປະຫວັດສາດວິຫານຮຸ່ງ ຢູ່ແຂວງຟູ໋ທໍ້ ເທົ່ານັ້ນ, ຫາກຍັງດຳເນີນຢູ່ທົ່ວທຸກແຫ່ງທັງຢູ່ພາຍໃນ ແລະ ຕ່າງປະເທດ. ການເຫຼື້ອມໃສໄຫວ້ບູຊາເຈົ້າຊີວິດຮຸ່ງ ບໍ່ພຽງແຕ່ມີຢູ່ເຂດດິນແດນແຫ່ງບັນພະບຸລຸດເທົ່ານັ້ນ, ຫາກຍັງມີຢູ່ໃນຈິດວີນຍານຂອງຊາວຫວຽດນາມ ທຸກຄົນອີກດ້ວຍ. ໃນບົດສາລະຄະດີ “ການເຫຼື້ອມໃສໄຫວ້ບູຊາເຈົ້າຊີວິດຮຸ່ງໃນຊີວິດຂອງວົງຄະນາຍາດ” ນັກຂ່າວ ແອງເຟືອງ ຈະສ່ອງແສງສິ່ງດັ່ງກ່າວ, ເຊີນທ່ານຮັບຟັງ.
ພິທີໄຫວ້ບູຊາເຈົ້າຊີວິດຮຸ່ງ
(ພາບ: baomoi.com)
ໃນໂອກາດພິທີໄຫວ້ບູຊາເຈົ້າຊີວິດຮຸ່ງ ປີນີ້, ຄອບຄົວຂອງປ້າ ຫງວຽນທິໂຫ້ຍ, ເຊິ່ງແມ່ນຄອບຄົວທີ່ມີຊື່ສຽງດ້ວຍການເຮັດເຂົ້າຕົ້ມ (ຫໍ່ເປັນຮູບກົມຍາວ) ແຊບກວ່າໝູ່ຢູ່ເທດສະບານເດິດດໍ (ດິນແດງ), ເມືອງເດິດດໍ, ແຂວງບ່າເຮ້ຍ-ວຸ້ງເຕົ່າ, ໄດ້ຮັບໜ້າທີ່ເຮັດເຂົ້າຕົ້ມ 500 ໜ່ວຍ ເພື່ອເປັນເຄື່ອງຂອງຖະຫວາຍບູຊາເຈົ້າຊີວິດຮຸ່ງ. ນັບແຕ່ຕົ້ນເດືອນ 4 , ປ້າ ຫງວຽນທິໂຫ້ຍ ພ້ອມກັບຄອບຄົວໄດ້ສັ່ງຊື້ເຂົ້າໜຽວກວ່າ 200 ກິໂລກຼາມ, ຖົ່ວຂຽວ 50 ກິໂລກຼາມ, ຖົ່ວດຳ 50 ກິໂລກຼາມ, ໃບຕອງ 100 ກິໂລກຼາມ ເພື່ອກະກຽມຮອດຕອນເຊົ້າວັນທີ 15/4 (ວັນທີ 6/3 ໄລ່ຕາມຈັນທະປະຕິທິນ), ປ້າ ໂຫ້ຍ ຈະພ້ອມກັບຜູ້ອື່ນ 5 ຄົນພ້ອມກັນຫໍ່ເຂົ້າຕົ້ມ (ເຂົ້າໜຽວປົນຖົ່ວດຳ) 250 ໜ່ວຍ ແລະ (ເຂົ້າໜຽວໃນຖົ່ວຂຽວ) 250 ໜ່ວຍ. ເພື່ອໃຫ້ເຂົ້າຕົ້ມສຸກໜຽວ ຕ້ອງຄິດໄລ່ເວລາຕົ້ມເຂົ້າຕົ້ມແຕ່ລະປະເພດຢ່າງລະອຽດ, ສຳລັບເຂົ້າຕົ້ມ (ໃນຖົ່ວຂຽວ) ຕ້ອງຕົ້ມໃນເວລາ 7 ຊົ່ວໂມງ, ສ່ວນເຂົ້າຕົ້ມ (ເຂົ້າໜຽວປົນຖົ່ວດຳ) ຕ້ອງຕົ້ມໃນຕະຫຼອດເວລາ 8 ຊົ່ວໂມງ. ປ້າ ຫງວຽນທິໂຫ້ຍ, ຖືວ່າໄດ້ຕົ້ມເຂົ້າຕົ້ມເພື່ອຖະຫວາຍບູຊາເຈົ້າຊີວິດຮຸ່ງ ແມ່ນໂອກາດເພື່ອໃຫ້ລູກຫຼານສະແດງຄວາມນັບຖືຕໍ່ບັນພະບຸລຸດ:
“ຂ້າພະເຈົ້າຮູ້ສຶກເປັນກຽດເມື່ອໄດ້ຮັບໜ້າທີ່ຫໍ່ເຂົ້າຕົ້ມເພື່ອຖະຫວາຍບູຊາເຈົ້າຊີວິດຮຸ່ງ. ຂ້າພະເຈົ້າຕັດສິນໃຈຈະເຮັດຫຼ້ອນໜ້າທີ່ຂອງຕົນ ເພື່ອບ້ານເກີດເມືອງນອນ. ມື້ນີ້ກະກຽມເຂົ້າໜຽວ, ໝາກຖົ່ວຂຽວ, ໝາກຖົ່ວດຳ, ໃບຕອງສຳເລັດແລ້ວ, ພຽງແຕ່ຖ້າຮອດມື້ໃກ້ຈະຮອດພິທີຈະຫໍ່”.
ຫໍ່ເຂົ້າຕົ້ມ (ເປັນຮູບກົມຍາວ)
(ພາບ: tamhoc.com)
ມື້ນີ້, ຄະນະຜູ້ແທນແຂວງບ່າເຮ້ຍ-ວຸ້ງເຕົ່າ ໄດ້ນຳເອົາເຂົ້າຕົ້ມໂດຍຄອບຄົວປ້າ ຫງວຽນທິໂຫ້ຍ ຢູ່ ເດິດດໍ ຕົ້ມ ໄປພູເຫງ້ຍລິ້ງ, ແຂວງຟູ໋ທໍ້ ເພື່ອຖະຫວາຍບູຊາເຈົ້າຊີວິດຮຸ່ງ. ພ້ອມກັບເຂົ້າຕົ້ມຂອງບ່າເຮ້ຍ-ວຸ້ງເຕົ່າ ແລ້ວ, ຍັງມີເຄື່ອງຂອງບູຊາທີ່ມາຈາກສາມພາກຂອງປະເທດຄື: ແຂວງລ້າງເຊີນ, ຮ່ານາມ, ແທງຮ໋ວາ, ຮ່າຕິ້ງ, ດັກລັກ, ບິ່ນດິ້ນ ແລະ ດົ່ງນາຍ ຖືກນຳໄປຖະຫວາຍບູຊາເຈົ້າຊີວິດຮຸ່ງເຊັ່ນກັນ, ອັນໄດ້ສະແດງໃຫ້ເຫັນຄວາມຮູ້ບຸນຄູນຂອງຊາວຫວຽດນາມ ທີ່ມີຕໍ່ບັນພະບຸລຸດ. ພາຍຫຼັງພິທີຖະຫວາຍບູຊາເຈົ້າຊີວິດຮຸ່ງ ຢູ່ວິຫານເທື້ອງ ແລ້ວ, ປະຊາຊົນຟູ໋ທໍ້ ແລະ ແຂກທີ່ມາຈາກທຸກສາລະທິດຍັງຈັດຕັ້ງການເຄື່ອນໄຫວຫຼາຍຢ່າງເພື່ອຈາລຶກບຸນຄູນຂອງເຈົ້າຊີວິດຮຸ່ງ ໃນວັນໄຫວ້ບູຊາບັນພະບຸລຸດອີກ.
ໃນຂະນະທີ່ພິທີໄຫວ້ບູຊາເຈົ້າຊີວິດຮຸ່ງ ພວມດຳເນີນຢູ່ແຂວງຟູ໋ທໍ້ ນັ້ນ, ຢູ່ແຫຼມກ່າເມົາ, ໃນວິຫານບູຊາບັນດາເຈົ້າຊີວິດຮຸ່ງ ຢູ່ບ້ານຢາວເຂົາ, ຕາແສງເຕິນຟູ໋, ເມືອງຟູ໋ເຕິນ ກໍ່ດຳເນີນພິທີໄຫວ້ບູຊາ, ສະແດງໃຫ້ເຫັນຄວາມຮູ້ບຸນຄູນຂອງປະຊາຊົນໃນແຫຼມກ່າເມົາ ທີ່ມີຕໍ່ບັນພະບຸລຸດຂອງປະເທດຊາດ. ສຳລັບບັນດາທ້ອງຖີ່ນບໍ່ມີວິຫານບູຊາເຈົ້າຊີວິດຮຸ່ງ ຄືຢູ່ເກິ່ນເທີ, ປະຊາຊົນ ແລະ ອຳນາດການປົກຄອງທ້ອງຖີ່ນກໍ່ໄດ້ຕັ້ງແທ່ນບູຊາເຈົ້າຊີວິດຮຸ່ງ, ເຖິງວ່າຈະຢູ່ແຂວງເກິ່ນເທີ ກໍ່ຕາມ, ແຕ່ຈິດວີນຍານພັດມຸງໄປສູ່ດິນແດນແຫ່ງບັນພະບຸລຸດ, ການເຄື່ອນໄຫວນີ້ບໍ່ພຽງແຕ່ຈັດຂຶ້ນໃນເທື່ອດຽວເທົ່ານັ້ນ, ຫາກຖືກຈັດຂຶ້ນມາຫຼາຍປີແລ້ວ.
ດ້ວຍຄວາມເຊື່ອໝັ້ນຢ່າງເດັດຂາດຕໍ່ບັນພະບຸລຸດຂອງປະເທດ, ນັບແຕ່ໄດ້ຮັບການສ້າງຕັ້ງຂຶ້ນມາຮອດປະຈຸບັນ, ອຳນາດການປົກຄອງທ້ອງຖີ່ນຕ່າງໆ ແຕ່ພາກເໜືອຕະຫຼອດຮອດພາກໃຕ້ ຄືຫາຍຝ່ອງ, ບັກນິງ, ເງ້ອານ, ເທື່ອທຽນເຫວ໋, ເລິມດົ່ງ, ບິ່ງເຟືອກ, ແຄ໋ງຮ່າວ, ດົ່ງນາຍ, ນະຄອນໂຮ່ຈີມິນ….ແລະ ຊາວຫວຽດນາມ ໄດ້ປະກອບເງິນຄຳ, ທີ່ດິນ ເພື່ອກໍ່ສ້າງວິຫານບູຊາເຈົ້າຊີວິດຮຸ່ງ ເກືອບ 1500 ແຫ່ງ ເພື່ອເປັນແຫ່ງໄຫວ້ບູຊາ ແລະ ຈັດຕັ້ງພິທີ ສະແດງຄວາມຮູ້ບຸນຄູນ, ອາໄລຫາບັນດາເຈົ້າຊີວິດຮຸ່ງ ຜູ້ທີ່ມີຄຸນງາມຄວາມດີໃນການກໍ່ສ້າງປະເທດ. ທ່ານ ຟ້າມບ໋າຄຽມ, ຮອງຫົວໜ້າພະແນກວັດທະນະທຳ ກິລາ ແລະ ທ່ອງທ່ຽວແຂວງຟູ໋ທໍ້, ໃຫ້ຮູ້ວ່າ:
“ການເຫຼື້ອມໄສໃຫວ້ບູຊາເຈົ້າຊີວິດຮຸ່ງ ບໍ່ແມ່ນພຽງແຕ່ດຳເນີນຢູ່ວິຫານຮຸ່ງເທົ່ານັ້ນ, ຫາກຍັງດຳເນີນຢູ່ທົ່ວແຂວງ ກໍ່ຄືທົ່ວປະເທດ. ສະເພາະແຂວງຟູ່ທໍ້ ມີເຖິງ 326 ແຫ່ງບູຊາເຈົ້າຊີວິດຮຸ່ງ ແລະ ບັນດາບຸກຄົນທີ່ເດັ່ນໃນສະໄໝເຈົ້າຊີວິດຮຸ່ງ”.
(ພາບ: baomoi.com)
ໜຶ່ງໃນບັນດາວິຫານບູຊາເຈົ້າຊີວິດຮຸ່ງ ຫ່າງໄກທີ່ສຸດຂອງຊາວຫວຽດນາມ ແມ່ນວິຫານຢູ່ນະຄອນ San Jose, ລັດ Califonia, ປະເທດອາເມລິກາ. ຜູ້ກໍ່ສ້າງວິຫານນີ້ແມ່ນທ່ານ ຫງວຽນແທງລຽມ, ທ່ານໄດ້ໃຊ້ເງິນຕົວເອງເພື່ອຊື້ທີ່ດິນ, ສ້າງວິຫານບູຊາເຈົ້າຊີວິດຮຸ່ງ, ອັນໄດ້ດຶງດູດຜູ້ມີສັນຊາດຫວຽດນາມ 1000 ກວ່າຄົນເຂົ້າຮ່ວມ. ໃນພິທີໄຫວ້ບູຊາບັນພະບຸລຸດຂອງປະເທດປີນີ້, ມີຫຼາຍຄົນຄືທ່ານ ຫງວຽນແທງລຽມ ໄດ້ດຳເນີນພິທີໄຫວ້ບູຊາເຈົ້າຊີວິດຮຸ່ງ ຢູ່ວິຫານທີ່ຫ່າງໄກຈາກບ້ານເກີດເມືອງນອນ, ໃນຂະນະນັ້ນ, ມີຊາວຫວຽດນາມ ຢູ່ຕ່າງປະເທດຫຼາຍຄົນໄດ້ກັບເມືອດິນແດນແຫ່ງບັນພະບຸລຸດ ຟູ໋ທໍ້ ເພື່ອເຂົ້າຮ່ວມພິທີໄຫວ້ບູຊາເຈົ້າຊີວິດຮຸ່ງ. ທ່ານ ເລວັນງວຽນ, ຜູ້ດຳລົງຊີວິດຢູ່ San Jose ມາເປັນເວລາ 40 ກວ່າປີແລ້ວ, ໃຫ້ຮູ້ວ່າ:
“ພວກຂ້າພະເຈົ້າຮູ້ສຶກເອກອ້າງທະນົງໃຈທີ່ເປັນຄົນຫວຽດນາມ, ແມ່ນລູກຫຼານຂອງເຈົ້າແມ່ ເອົາເກີ ແລະ ເຈົ້າຊີວິດຮຸ່ງ. ພວກຂ້າພະເຈົ້າກັບເມືອປະເທດ ເພື່ອເຂົ້າຮ່ວມພິທີໄຫວ້ບູຊາ. ເຖິງວ່າຈະຢູ່ຫ່າງໄກຈາກບ້ານເກີດເມືອງນອນກໍ່ຕາມ, ແຕ່ຍາມໃດຈິດໃຈກໍ່ອ່ວາຍເມືອຫາປະເທດຊາດ”.
ເລື່ອງລາວກ່ຽວກັບບັນດາວິຫານຢູ່ຫ່າງໄກຈາກບ້ານເກີດເມືອງນອນ ແລະ ປະເພນີໄຫວ້ບູຊາເຈົ້າຊີວິດຮຸ່ງໃນວົງຄະນາຍາດຊາວຫວຽດນາມທັງຢູ່ພາຍໃນ ແລະ ຕ່າງປະເທດ ຈະເປັນການຕິດພັນຊາວຫວຽດນາມ ທຸກຄົນ ຜ່ານການເຄື່ອນໄຫວສິນທຳທີ່ເປັນມູນເຊື້ອຂອງຊາດນັ້ນແມ່ນກິນເຂົ້າຄິດຮອດຄູນນາ, ກິນປາຄິດຮອດຄູນນ້ຳ.