(vovworld) - ນັບແຕ່ປີ 2006 , ດ້ວຍການກໍ່ສ້າງເຂື່ອນໄຟຟ້ານ້ຳຕົກຢູ່ເມືອງນາຮາງ, ແຂວງຕວຽນກວາງ ໄດ້ສ້າງເປັນໜອງນ້ຳກວ້າງກວ່າ 80.000 ເຮັກຕາຢູ່ກາງເຂດພູຜາປ່າໄມ້ ດ້ວຍທັດສະນີຍະພາບທີ່ສວຍງາມ ແລະ ໃຫຍ່ໂຕມະໂຫຖານ. ເຊິ່ງປຽບເໝືອນ ”ອ່າວຮ້າລອງຢູ່ກາງພູຜາປ່າໄມ້”, ເຂື່ອນໄຟຟ້ານ້ຳຕົກນາຮາງ ມີທ່າສະດວກຫຼາຍຢ່າງເພື່ອພັດທະນາການທ່ອງທ່ຽວ. ໃນຊຸມປີຜ່ານມາ, ອຳນາດການປົກຄອງທ້ອງຖີ່ນຢູ່ແຫ່ງນີ້ ໄດ້ມານະພະຍາຍາມລົງທຶນພັດທະນາຮູບການທ່ອງທ່ຽວຕ່າງໆ ເພື່ອສ້າງຄວາມດຶງດູດໃຫ້ແກ່ນັກທ່ອງທ່ຽວ, ພິເສດແມ່ນການທ່ອງທ່ຽວຊີວະພາບ, ທ່ອງທ່ຽວພະຈົນໄພ ແລະ ທ່ອງທ່ຽວເຂື່ອນໄຟຟ້ານ້ຳຕົກນາຮາງ. ໃນລາຍການປະເທດຊາດ ແລະຊາວຫວຽດນາມ ພາກນີ້, ພວກເຮົາຂໍແນະນຳຄວາມງາມຢູ່ເຂື່ອນໄຟຟ້ານ້ຳຕົກນາຮາງ, ຜ່ານບົດຂຽນຂອງນັກຂ່າວ ໂຕຕ໋ວນ
ໜອງໄຟຟ້ານ້ຳຕົກນາຮາງແຂວງຕວຽນກວາງ
(ພາບ: google.com.vn)
ນາຮາງ, ຕາມພາສາເຜົ່າຜູ້ໄທມີຄວາມໝາຍວ່າ ”ປາຍນາ”. ທຳມະຊາດໄດ້ບັນດານໃຫ້ນາຮາງມີ ປ່າດົງດິບ ແລະ ພືກສາຊາດ ດ້ວຍສັດ ແລະ ຕົ້ນໄມ້ຫຼາຍຊະນິດທີ່ຫາຍາກ. ພິເສດ, ນັບແຕ່ເມື່ອມີເຂື່ອນໄຟຟ້ານ້ຳຕົກນາຮາງ, ທັດສະນີຍະພາບຢູ່ແຫ່ງນີ້ຍິ່ງສວຍງາມຕື່ມອີກ. ເຂື່ອນໄຟຟ້ານ້ຳຕົກຖືກສ້າງຂຶ້ນດ້ວຍແມ່ນ້ຳໃຫຍ່ 2 ສາຍຄືແມ່ນ້ຳເກິມ (Gam) ແລະແມ່ນ້ຳ ນັງ (Nang) ພ້ອມກັບສາຍພູ ປັກຕະ ທີໃຫຍ່ໂຕມະໂຫຖານ, ເຊິ່ງລວມມີພູໃຫຍ່ນ້ອຍ 99 ໜ່ວຍ. ນ້ຳຖ້ວມຮ່ອມພູ ສ້າງເປັນເກາະໃຫຍ່ນ້ອຍນັບຮ້ອຍໜ່ວຍທີ່ລັບລໍ່ບົນໜ້ານ້ຳ. ນາຮາງ ມີປ່າທີ່ກວ້າງໃຫຍ່, ກວມເຖິງ 70% ເນື້ອທີ່ດິນໃນທົ່ວເມືອງ, ທັງມີຄຸນຄ່າດ້ານເສດຖະກິດ, ທັງມີຄວາມໝາຍທີ່ສຳຄັນໃນການປ້ອງກັນ ແລະ ປົກປັກຮັກສາສິ່ງແວດລ້ອມຊີວະພາບ. ຢູ່ທີນີ້, ເຂດອະນຸລັກຮັກສາທຳມະຊາດ ຕັດແກ - ບ້ານບຸງ ດ້ວຍເນື້ອທີ່ກວ່າ 42.000 ເຮັກຕາ ພ້ອມກັບເຂື່ອນໄຟຟ້ານ້ຳຕົກນາຮາງ ໄດ້ເຮັດໃຫ້ ເຂດອະນຸລັກຮັກສາທຳມະຊາດ ຕັດແກ - ບ້ານບຸງ ມີຄວາມອຸດົມສົມບູນຕື່ມອີກ ດ້ວຍລະບົບພືດສາຊາດທີ່ຫາຍາກ ລວມມີສັດ 40 ປະເພດ, ນົກ 70 ປະເພດ, ສັດເລືອຄານ 20 ປະເພດ ແລະ ພືກສາຊາດທີ່ຫາຍາກ 70 ຊະນິດ.
ມາຢ້ຽມຢາມນາຮາງ, ນັກທ່ອງທ່ຽວຈະໄດ້ລ່ອງເຮືອໄປຕາມເຂື່ອນໄຟຟ້ານ້ຳຕົກເພື່ອທ່ຽວຊົມຄວາມງາມຢູ່ໜອງນ້ຳແຫ່ງນີ້. ສະຖານທີ່ທ່ອງທ່ຽວທຳອິດແມ່ນພູ ປັກຕະ, ເຊິ່ງແມ່ນພູສູງສຸດໃນຈຳນວນພູອ້ອມໜອງ 99 ໜ່ວຍ. ເທິງຈອມພູມີວິຫານສັກສິດສອງແຫ່ງຄື: ປັກຕະ ແລະ ປັກວັງ, ນອກນັ້ນ, ນັກທ່ອງທ່ຽວຍັງໄດ້ເຫັນນ້ຳຕົກຕາດ ເມີ 5 ຊັ້ນທີ່ຖອກເທລົງມາ. ນັກທ່ອງທ່ຽວກໍ່ສາມາດພັກເຊົາລະຫຼິ້ນ ແລະ ອາບນ້ຳທີ່ເຢັນສະບາຍຢູ່ທີ່ນີ້ໄດ້. ໃນຊຸມປີມໍ່ໆມານີ້, ນາຮາງ ໄດ້ກາຍເປັນສະຖານທີ່ທ່ອງທ່ຽວທີ່ພັດທະນາຢ່າງຟົດຟື້ນ ແລະ ວ່ອງໄວ. ທ່ານ ເລືອງມິນຈິ໋ງ, ຮອງຫົວໜ້າຄະນະຄຸ້ມຄອງເຂດທ່ອງທ່ຽວຊີວະພາບນາຮາງ, ໃຫ້ຮູ້ວ່າ:
”ໄລຍະຜ່ານມາ, ຈຳນວນນັກທ່ອງທ່ຽວມາຢ້ຽມຢາມເຂດຊີວະພາບນາຮາງ ນັບມື້ນັບຫຼາຍ, ຄິດສະເລັ່ຍແຕ່ລະປີເພີ່ມຂຶ້ນກວ່າ 34%. ກ່ຽວກັບການລົງທຶນ, ຄະນະຄຸ້ມຄອງເຂດທ່ອງທ່ຽວຊີວະພາບສືບຕໍ່ລົງທຶນກໍ່ສ້າງເຂດຕ້ອນຮັບແຂກ… ດ້ວຍຍອດມູນຄ່າ 13 ຕື້ກວ່າດົ່ງ”.
ໜອງໄຟຟ້ານ້ຳຕົກນາຮາງແຂວງຕວຽນກວາງ
(ພາບ: google.com.vn)
ເພື່ອແນໃສ່ເສີມຂະຫຍາຍຄຸນຄ່າວັດທະນະທຳ ແລະ ສ້າງຄວາມດຶງດູດນັກທ່ອງທ່ຽວ, ເມືອງນາຮາງ ໄດ້ຖືການພັດທະນາການທ່ອງທ່ຽວຊີວະພາບແມ່ນປາຍແຫຼມ ດ້ວຍເລື່ອງກໍ່ສ້າງເຂດທ່ອງທ່ຽວເລິມວຽນ - ທຽນບຸງ, ເຂດອະນຸລັກຮັກສາທຳມະຊາດ ຕັດແກ - ທຽນບຸງ ໃຫ້ສຳເລັດ. ນາຮາງ ກໍ່ໄດ້ສ້າງລາຍການທ່ອງທ່ຽວທາງນ້ຳຈຳນວນໜຶ່ງຄື: ນາຮາງ - ຊອງລອງ, ນາຮາງ - ບັກເມ ( ຮ່າຢາງ), ນາຮາງ - ບາເບ (ບັກກ້ານ). ຢູ່ນາຮາງ ມີ 12 ເຜົ່າອ້າຍນ້ອງດຳລົງຊີວິດຢູ່ຮ່ວມກັນຄື: ເຜົ່າໄຕ, ຢາວ, ມົງ… ແຕ່ລະເຜົ່າລ້ວນແຕ່ມີສີສັນວັດທະນະທຳສະເພາະ ດ້ວຍທຳນອງຂັບແທນ, ສະລີ, ເລື້ອນ, ສຽງພິນ, ສຽງແຄນໄດ້ສ້າງຄວາມດູດດື່ມໃຫ້ແກ່ນັກທ່ອງທ່ຽວ. ຄະນະຄຸ້ມຄອງເຂດທ່ອງທ່ຽວຊີວະພາບນາຮາງ ໄດ້ສົມທົບກັບອຳນາດການປົກຄອງທ້ອງຖີ່ນຜັນຂະຫຍາຍການກໍ່ສ້າງບັນດາບ້ານວັດທະນະທຳຢູ່ນາດົງ, ຕາແສງເທື້ອງເລິມ, ບ້ານເທືອງບຸງ, ຕາແສງນັງຂາ, ບ້ານລູກ… ເລື່ອງແນະນຳເຍື່ອງອາຫານພິເສດຕ່າງໆຂອງຊາວທ້ອງຖີ່ນ ກໍ່ສ້າງຄວາມດຶງດູດໃຫ້ແກ່ນັກທ່ອງທ່ຽວ. ເອື້ອຍເຈິ່ນທິງາ, ເຈົ້າຂອງຮ້ານອາຫານແຫ່ງໜຶ່ງຢູ່ເທດສະບານນາຮາງ, ໃຫ້ຮູ້ວ່າ:
”ແຂກທ່ອງທ່ຽວມາຢ້ຽມຢາມນາຮາງ ສ່ວນຫຼາຍແມ່ນນິຍົມກິນປາໃນໜອງນາຮາງ, ແລະ ຜັກປ່າ. ນອກນັ້ນ, ນັກທ່ອງທ່ຽວຍັງນິຍົມກິນເຍື່ອງອາຫານຕ່າງໆຂອງເຜົ່າຢູ່ທ້ອງຖີ່ນຄື: ຊີ້ນໝູ, ຊີ້ນສົ້ມ, ປາສົ້ມ”.
ໜອງໄຟຟ້ານ້ຳຕົກນາຮາງແຂວງຕວຽນກວາງ
(ພາບ: google.com.vn)
ເພື່ອຈັດຕັ້ງການເຄື່ອນໄຫວໂຄສະນາການທ່ອງທ່ຽວໃຫ້ດີ, ແຂວງຕວຽນກວາງໄດ້ສົມທົບກັບບັນດາແຂວງຄື: ບັກກ້ານ, ຮ່າຢາງ, ຈັດຕັ້ງງານຕະຫຼາດນັດການຄ້າ, ສັບປະດາທ່ອງທ່ຽວໜອງເທິງພູ… ທາງ ອຳນາດການປົກຄອງກໍ່ໄດ້ເອົາໃຈໃສ່ເປັນພິເສດເຖິງການຟື້ນຟູງານບຸນທີ່ ເປັນມູນເຊື້ອ, ບຸລະນະບັນດາວັດວາອາຮາມ, ວາງແຜນກຳນົດບັນດາ ທ່າເຮືອ, ສະຖານທີ່ທ່ອງທ່ຽວ, ກໍ່ສ້າງບ້ານວັດທະນະທຳ, ທ່ອງທ່ຽວ… ດ້ວຍຄວາມມານະພະຍາຍາມນັ້ນ, ປີ 2011 ລາຍການທ່ອງທ່ຽວເຂື່ອນໄຟຟ້ານ້ຳຕົກນາຮາງໄດ້ດຶງດູດນັກທ່ອງທ່ຽວ 16.000 ເທື່ອຄົນມາຢາມ. ສະເພາະໄຕມາດທີ 1 ປີ 2012, ເຂື່ອນໄຟຟ້ານ້ຳຕົກນາຮາງ ກໍ່ໄດ້ຕ້ອນຮັບນັກທ່ອງທ່ຽວເກືອບ 4.100 ເທື່ອຄົນ, ດ້ວຍລາຍຮັບບັນລຸ 260 ລ້ານດົ່ງ.
ດ້ວຍຄວາມສາມາດບົ່ມຊ້ອນທີ່ມີຢູ່ແລ້ວ, ໃນຊຸມປີຈະມາເຖິງ, ແຂວງຕວຽນກວາງ ກຳນົດຈະສົມທົບການທ່ອງທ່ຽວເຂື່ອນໄຟຟ້ານ້ຳຕົກ, ກັບການທ່ອງທ່ຽວວັດທະນະທຳ, ທ່ອງທ່ຽວປະຫວັດສາດ ເພື່ອພັດທະນາເສດຖະກິດ - ສັງຄົມ, ປະກອບສ່ວນເຂົ້າໃນກິດຈະການລົບລ້າງຄວາມອຶດຫີວ ຫຼຸດຜ່ອນຄວາມທຸກຍາກ, ອະນຸລັກຮັກສາ ແລະ ເສີມຂະຫຍາຍບັນດາຄຸນຄ່າວັດທະນະທຳທີ່ເປັນມູນເຊື້ອຂອງຊາວຊົນເຜົ່າຢູ່ແຫ່ງນີ້.