ນອກຈາກບັນດາສະຖານທີ່ທ່ອງທ່ຽວທີ່ລືຊື່ເຊັ່ນ: ຮ່ອມພູແຫ່ງຄວາມຮັກ, ນ້ຳຕົກຕາດ ປເຣັນ, ນ້ຳຕົກຕາດກາມລີ…ດາຫຼາດຍັງມີກຸ່ມເຂດທ່ອງທ່ຽວຊີວະພາບໜອງຕວຽນເລີມ - ພູຫີນຕຽນຊຶ່ງແມ່ນທິວທັດທຳມະຊາດທີ່ສວຍສົດງົດງາມ ແລະ ເປັນເອກະລັກສະເພາະຂອງດາຫຼາດ.
ໜອງຕວຽນເລີມ
|
ຫ່າງຈາກນະຄອນດາຫຼາດປະມານ 15 ກິໂລແມັດ, ຈາກກີ່ວ ປເຣັນໄປວັດ ຈຸກເລີມ, ລ້ຽວຊ້າຍປະມານ 2-3 ກິໂລແມັດ ກໍຈະຮອດເຂດທ່ອງທ່ຽວຊີວະພາບໜອງຕວຽນເລີມ - ພູຫີນຕຽນ. ຕາມທິດໄປໜອງຕວຽນເລີມ, ເຂົ້າໄປເລິກໃນປ່າອີກ 2-3 ກິໂລແມັດ ກໍຈະພາແຂກທ່ອງທ່ຽວໄປຮອດເຂດທ່ອງທ່ຽວຊີວະພາບພູຫີນຕຽນ. ໄລຍະທາງຈາກໃຈກາງນະຄອນດາຫຼາດໄປຮອດກຸ່ມເຂດທ່ອງທ່ຽວຊີວະພາບນີ້ເຖິງວ່າຕ້ອງເສຍເວລາປະມານເຄິ່ງຊົ່ວໂມງກໍຕາມ, ແຕ່ກໍພໍສ້າງຄວາມປະທັບໃຈໃຫ້ແຂກທ່ອງທ່ຽວຍ້ອນບັນດາທັດສະນີຍະພາບທີ່ສວຍງາມ. ຢູ່ລຽບຕາມ 2 ຟາກທາງ ແມ່ນບັນດາເນື້ອທີ່ປາແປກຂຽວອຸ່ມທຸ່ມ ແລະ ຢູ່ບາງບ່ອນກໍສະຫຼັບກັບຕົ້ນດອກໄມ້ປ່າທີ່ສວຍງາມດັ່ງໃນຝັນ, ອັນໄດ້ພາໃຫ້ແຂກທ່ອງທ່ຽວຈົນຕົກສະເງີ້. ໃນທ່າມກາງເຂດພູຜາປ່າໄມ້ທີ່ໃຫຍ່ໂຕມະໂຫຖານນັ້ນ, ກໍປະກົດມີເຮືອນຮ້ານບາງຫຼັງຖືກປຸກສ້າງຄຽງຂ້າງສວນດອກໄມ້ດ້ວຍສີສັນຫຼາກຫຼາຍ. ແຂກທ່ອງທ່ຽວຫຼາຍຄົນເມື່ອມາທ່ອງທ່ຽວດາຫຼາດ, ບໍ່ພຽງແຕ່ເພື່ອຢ້ຽມຊົມທັດສະນະສຶກສາທິວທັດທຳມະຊາດທີ່ສວຍງາມເທົ່ານັ້ນ, ຫາກຍັງເພື່ອມີຊີວິດໃນບັນຍາກາດທີ່ປອດໂປ່ງອີກດ້ວຍ. ນັ້ນກໍແມ່ນເຫດຜົນທີ່ນັກທ່ອງທ່ຽວຫຼາຍຄົນມັກເລືອກເອົາກຸ່ມເຂດທ່ອງທ່ຽວຊີວະພາບໜອງຕວຽນເລີມ - ພູຫີນຕຽນ. ອ້າຍ ຫງວຽນກ໋ວກຮຸ່ງ ແຂກທ່ອງທ່ຽວຄົນໜຶ່ງແບ່ງປັນວ່າ :
“ ຕາມຂ້າພະເຈົ້າແລ້ວ, ບໍ່ຄວນສຳນຶກວ່າ ໄປທ່ອງທ່ຽວແມ່ນພັກຜ່ອນບຳລຸງສຸຂະພາບ, ຕ້ອງເຂົ້າພັກຜ່ອນຢູ່ໂຮງແຮມ 5 ດາວ. ແລ້ວ, ຂະແໜງທ່ອງທ່ຽວກໍຕ້ອງລົງທຶນກໍ່ສ້າງບັນດາກິດຈະກຳຂະໜາດໃຫຍ່ ຈຶ່ງສາມາດເຮັດທ່ອງທ່ຽວໄດ້. ທີ່ຈິງແລ້ວ, ຢູ່ດາຫຼາດຍັງມີບັນດາຜະລິດຕະພັນອັນປະເສີດຢູ່ຄຽງຂ້າງພວກເຮົາ, ນັ້ນແມ່ນບັນດາເນື້ອທີ່ປ່າຢູ່ນີ້ເປັນຕົ້ນ. ນັ້ນແມ່ນບັນດາຜະລິດຕະພັນທ່ອງທ່ຽວທີ່ດູດດື່ມຢ່າງແທ້ຈິງ ”
ມາຢ້ຽມຊົມກຸ່ມເຂດທ່ອງທ່ຽວຊີວະພາບໜອງຕວຽນເລີມ - ພູຫີນຕຽນ, ແຂກທ່ອງທ່ຽວທັງຫຼາຍຈະມີໂອກາດໄດ້ຂີ່ເຮືອຈັກຫຼືພາຍເຮືອຫຼີ້ນຢູ່ໜອງຕວຽນເລີມເພື່ອຢ້ຽມຊົມທິວທັດທຳມະຊາດທີ່ສວຍສົດງົດງາມ ໃຫຍ່ໂຕມະໂຫຖານ, ຫຼືຕຶກປາຢູ່ໜອງແຫ່ງນີ້ອີກ. ມາຢ້ຽມຊົມກຸ່ມເຂດທ່ອງທ່ຽວຊີວະພາບໜອງຕວຽນເລີມ - ພູຫີນຕຽນ, ແຂກທ່ອງທ່ຽວຍັງຈະມີໂອກາດຄົ້ນຫາຈອມພູຊ້າງທີ່ສູງຊັນດ້ວຍລະບົບຊີວະນາໆພັນຫຼືໄດ້ຂີ່ຊ້າງໂຕໃຫຍ່ເດີນຕາມທາງດິນແດງ ບາຊານ ຫຼືເຂົ້າຢ້ຽມຊົມທັດສະນະສຶກສາຢູ່ໝູ່ບ້ານບັນດາເຜົ່າ ດາຣາຮວາ, ຊອກຮູ້ຮີດຄອງປະເພນີ, ພົບປະແລກປ່ຽນກັບພໍ່ແມ່ພີນ້ອງເຜົ່າ ກຮໍ. ແຂກທ່ອງທ່ຽວຫຼາຍຄົນເມື່ອມີໂອກາດແວ່ຢາມແຫ່ງນີ້ໄດ້ເອີ້ນທິວທັດທຳມະຊາດຢູ່ແຫ່ງນີ້ວ່າ ແມ່ນແດນສະຫວັນ. ອ້າຍ ຫງວຽນຕ້ວນແອງ ແຂກທ່ອງທ່ຽວທີ່ມາຈາກຮ່າໂນ້ຍ ໃຫ້ຂໍ້ສັງເກດວ່າ :
“ ນ້ອງພ້ອມກັບໝູ່ເພື່ອນຊອກຮູ້ກ່ຽວກັບເຂດທ່ອງທ່ຽວແຫ່ງນີ້ຜ່ານສື່ສັງຄົມ Facebook, ແຕ່ເມື່ອມາແຫ່ງນີ້, ນ້ອງໄດ້ຕົກສະເງີ້ຕໍ່ໜ້າຄວາມງາມທີ່ໃຫຍ່ໂຕມະໂຫຖານຂອງພູຜາປ່າໄມ້. ທັດສະນີຍະພາບຢູ່ແຫ່ງນີ້ແມ່ນສວຍງາມ ແລະ ສະຫງົບງຽບ. ພວກນ້ອງໄດ້ຍ່າງ, ຂີ່ເຮືອ, ຂີ່ຊ້າງຮັບຊົມທິດທັດທຳມະຊາດ ແລະ ໄດ້ຖ່າຍຮູບຢ່າງຫຼວງຫຼາຍ. ເຖິງວ່າຕ້ອງຍ່າງ ແລະ ປີນພູ, ບາງຄັ້ງຄາວ ມີຄວາມອິດເມື່ອຍກໍຕາມ, ແຕ່ພວກນ້ອງຮູ້ສຶກມີຄວາມເບີກບານມ່ວນຊື່ນເພາະໄດ້ຄົ້ນຫາ ແລະ ເຫັນໄດ້ຫຼາຍສິ່ງຫຼາຍຢ່າງທີ່ຈັບໃຈ ”
ເຂົ້າໄປເລິກໃນປ່າແປກ, ແຂກທ່ອງທ່ຽວຈະເຫັນເຮືອນຫຼັງຕ່າງໆຂອງພໍ່ແມ່ພີນ້ອງເຜົ່າກຮໍໄດ້ປຸກສ້າງດ້ວຍໄມ້, ຕັ້ງຢູ່ກະແຈກກະຈາຍຕາມເນີນພູ. ແຂກທ່ອງທ່ຽວຍັງມີໂອກາດຊອກຮູ້ກ່ຽວກັບຮີດຄອງປະເພນີ ແລະ ເຫັນປະຈັກຕາການດຳລົງຊີວິດແບບລຽບງ່າຍຂອງພໍ່ແມ່ພີນ້ອງເຜົ່າກຮໍ.
ໃນລະດູແລ້ງ, ແຂກທ່ອງທ່ຽວຈະໄດ້ເຂົ້າຮ່ວມງານຕັ້ງຄ້າຍ, ຮັບຊົມການສະແດງຕີຄ້ອງອ້ອມກອງໄຟໃນທ່າມກາງດິນຟ້າອາກາດທີ່ໜາວຈັດ. ສຳລັບແຂກທ່ອງທ່ຽວຫຼາຍຄົນແລ້ວ, ສິ່ງທີ່ປະຫຼາດໃຈທີ່ສຸດ ແມ່ນເມື່ອມາຢ້ຽມຊົມກຸ່ມເຂດທ່ອງທ່ຽວຊີວະພາບໜອງຕວຽນເລີມ - ພູຫີນຕຽນ ແມ່ນໄດ້ພັກຜ່ອນ ແລະ ນອນຄ້າງຄືນຢູ່ໃນເຮືອນຕູບມຸງຫຍ້າ. ເມື່ອນອນໃນເຮືອນຕູບມຸງຫຍ້າ, ແຂກຈະໄດ້ຍິນສຽງລົມພັດຜ່ານປ່າແປກດັງວີ່ໆຢ່າງບໍ່ຂາດສາຍ ແລະ ຈະໄດ້ຕື່ນນອນໃນທ່າມກາງສຽງນົກຮ້ອງທີ່ເປັນໜ້າມ່ວນຫູ.
ສຳລັບແຂກທ່ອງທ່ຽວຫຼາຍຄົນເມື່ອມາຢ້ຽມຢາມດາຫຼາດນັ້ນ, ຄວາມປະທັບໃຈກໍບໍ່ແມ່ນໄດ້ໄປຢ້ຽມຊົມຢູ່ສະຖານທີ່ທ່ອງທ່ຽວຫຼາຍແຫ່ງເທົ່ານັ້ນ, ຫາກຍັງມີຄວາມປະທັບໃຈຍ້ອນໄດ້ມີຊີວິດໃນທ່າມກາງບັນຍາກາດທີ່ມິດງຽບ ແລະ ປອດໂປ່ງອີກດ້ວຍ.