ເຂດພູພຽງລາງບຽງຫຼືເຂດພູພຽງເລີມວຽນ, ນອນຢູ່ຫ່າງຈາກໃຈກາງນະຄອນດາຫຼາດ 12 ກິໂລແມັດໄປທາງທິດເໜືອ, ແມ່ນສະຖານທີ່ທ່ອງທ່ຽວທີ່ດຶງດູດສຳລັບແຂກທ່ອງທ່ຽວທັງຫຼາຍເມື່ອມາຢ້ຽມຢາມນະຄອນດາຫຼາດ. ມາຢ້ຽມຢາມເຂດພູພຽງລາງບຽງ, ພວກເພື່ອນຈະໄດ້ຍ່າງບົນທາງຄ້ອຍ, ເດີນຜ່ານປ່າແປກຂຽວອຸ່ມທຸ່ມທີ່ກ້ວາງໃຫຍ່ໄພສານ, ທັງໄດ້ເຊື່ອມຕົວເຂົ້າກັບທິວທັດທຳມະຊາດທີ່ສວຍສົດງົດງາມດັ່ງໃນຝັນ. ຫຼຽວເບິ່ງຈາກຈອມພູລາງບຽງ, ນະຄອນດາຫຼາດກໍປຽບເໝືອນພວມເລື່ອນລອຍໃນທ່າມກາງນ້ຳໝອກກິ້ວ.
ຢືນຢູ່ຈອມພູ ແຂກທ່ອງທ່ຽວສາມາດເຫັນທິວທັດທຳມະຊາດຢູ່ທົ່ວນະຄອນດາຫຼາດທີ່ສວຍສົດງົດງາມດັ່ງໃນຝັນ |
ເຂດພູພຽງລາງບຽງບໍ່ພຽງແຕ່ແມ່ນທິດທັດທຳມະຊາດເທົ່ານັ້ນ, ຫາກຍັງແມ່ນເຂດນິເວດວິທະຍາຂອງໂລກຊຶ່ງໄດ້ຮັບການຮັບຮອງຈາກອົງການອຸຍແນັສໂກເມື່ອປີ 2015. ເຂດພູພຽງລາງບຽງກໍແມ່ນຍັງແມ່ນ ເຂດນິເວດວິທະຍາໂລກແຫ່ງທຳອິດຢູ່ດິນແດນໄຕງວຽນທີ່ໃຫຍ່ໂຕມະໂຫຖານ. ເຂດພູພຽງລາງບຽງມີເນື້ອທີ່ 275.439 ແຮັດຕາ, ຊຶ່ງນອນຢູ່ທາງກ້ຳເໜືອແຂວງເລີມດົງ. ນີ້ແມ່ນແຫ່ງເກັບຮັກສາບັນດາຄຸນຄ່າອັນໂດດເດັ່ນທາງດ້ານຊີວະນາໆພັນ, ທິວທັດທຳມະຊາດທີ່ປະສົມປະສານເຂົ້າກັບບັນດາຄວາມເປັນເອກະລັກທາງດ້ານວັດທະນະທຳຄ້ອງຢູ່ເຂດໄຕງວຽນ. ເຂດນິເວດວິທະຍາລາງບຽງ ລວມມີເຂດປ່າດົງດິບທີ່ກ້ວາງໃຫຍ່ໄພສານຊຶ່ງຢູ່ເຄິ່ງກາງແມ່ນເຂດປ່າສະຫງວຽນແຫ່ງຊາດ Bidoup-ນຸ້ຍບາ ແລະ ແຫ່ງນີ້ໄດ້ຮັບການຕີລາຄາວ່າ ແມ່ນໜຶ່ງໃນຈຳນວນສູນຊີວະນາໆພັນ 4 ແຫ່ງຂອງຫວຽດນາມ. ທ່ານວູ້ວັນຕື ຜູ້ອຳນວຍການສູນສົ່ງເສີມການລົງທຶນ, ການຄ້າ ແລະ ການທ່ອງທ່ຽວແຂວງເລີມດົງ ຢືນຢັນວ່າ :
“ ແຂກທ່ອງທ່ຽວເມື່ອມີໂອກາດມາຢ້ຽມຢາມ ນະຄອນດາຫຼາດນັ້ນ, ນອກຈາກມີຊີວິດຢູ່ໃນເຂດທີ່ມີອາກາດດີ, ປອດໂປ່ງເທົ່ານັ້ນ, ຫາກຍັງໄດ້ໄປຢ້ຽມຢາມ ທັດສະນະສຶກສາຢູ່ສະຖານທີ່ທ່ອງທ່ຽວບາງແຫ່ງທີ່ຈັບອົກຈັບໃຈອີຫຼີ. ເປັນຕົ້ນແມ່ນຢູ່ຈອມພູລາງບຽງ ດ້ວຍຄວາມສູງເກືອບ 2000 ແມັດເມື່ອທຽບໃສ່ໜ້ານ້ຳທະເລ. ເມື່ອຢືນຢູ່ຈອມພູນີ້, ແຂກທ່ອງທ່ຽວສາມາດເຫັນໄດ້ທິວທັດທຳມະຊາດທຸກແຫ່ງໃນນະຄອນດາຫຼາດເວົ້າລວມ ແລະ ທົ່ວເທດສະບານເມືອງເວົ້າສະເພາະ. ພ້ອມກັນນັ້ນ ພວກເຮົາກໍສາມາດເຂົ້າເຖິງຄວາມເປັນເອກະລັກທາງດ້ານວັດທະນະທຳຂອງບັນດາເຜົ່າຢູ່ເຂດໄຕງວຽນ, ພິເສດແມ່ນຊົນເຜົ່າຕ່າງໆທີ່ພວມດຳລົງຊີວິດຢູ່ຕີນພູລາງບຽງໃນທຸກວັນນີ້ ”
ຈາກຕີນພູລາງບຽງ, ຊຶ່ງແມ່ນຈຸດເລີ່ມຕົ້ນຂອງການທ່ອງທ່ຽວ, ແຂກທ່ອງທ່ຽວຈະມີໂອກາດພິຊິດ 2 ຈອມພູໃນບໍລິເວນເຂດນິເວດວິທະຍາໂລກລາງບຽງດ້ວຍໄລຍະທາງປະມານ 14 ກິໂລແມັດ. ລາງບຽງມີ 2 ຈອມພູດ້ວຍຄວາມສູງ 1.950 ແມັດ. ແຂກທ່ອງທ່ຽວສ່ວນຫຼາຍກໍມັກຍ່າງຕາມທາງຊອຍໃນປ່າແປກເພື່ອຮັບຊົມຄວາມງາມດັ່ງໃນຝັນຂອງໜອງດານເກຍດ້ວຍນ້ຳໃສ ແລະ ຂຽວເຢັນ. ແຕ່ເພື່ອຂຶ້ນຈອມພູດ້ວຍຄວາມສູງ 2.169 ແມັດນັ້ນ, ຄວາມປະທັບໃຈທີ່ສຸດ ແມ່ນໄດ້ຍ່າງໃນເຂດປ່າດົງດິບ, ຍິ່ງຂຶ້ນສູງ ຄວາມໜາວກໍຍິ່ງເພີ່ມຂຶ້ນຕາມບາດຍ່າງແຕ່ລະກ້າວ. ຍິ່ງຂຶ້ນສູງ, ທາງໄປກໍຍິ່ງແຄບເຂົ້າ, ມີຕອນຄ້ອຍ ແລະ ຄົດໆລ້ຽວໆ. ອ້າຍຮົ່ງກວນ ຢູ່ນະຄອນດາຫຼາດ ໃຫ້ຮູ້ວ່າ :
“ ເມື່ອເວົ້າເຖິງ ນະຄອນດາຫຼາດ ແມ່ນຕ້ອງເວົ້າເຖິງເຂດພູພຽງລາງບຽງ. ລາງບຽງແມ່ນພູສູງ, ຢູ່ແຫ່ງນີ້ໄດ້ຕິດພັນກັບບັນດາເລື່ອງລາວແຫ່ງຄວາມຮັກຂອງປະຊາຊົນທີ່ດຳລົງຊີວິດຢູ່ຕີນພູລາງບຽງ. ເມື່ອເພື່ອນເຂົ້າຢ້ຽມຢາມໝູ່ບ້ານລາງບຽງ, ໄປຮອດຕີນພູ, ແລ້ວກໍຂຶ້ນຈອມພູ. ຄວາມຮູ້ສຶກເມື່ອຂຶ້ນຮອດຈອມພູ ແມ່ນຄວາມຮູ້ສຶກທີ່ສະຫງວນໃຫ້ແກ່ຄົນໜຸ່ມ ”
ສຳລັບບັນດາຜູ້ຄົນມັກຄົ້ນຫາທຳມະຊາດນັ້ນ, ກໍເຄີຍເລືອກເອົາວິທີຍ່າງ, ນອກຈາກນັ້ນ ກໍຍັງມີຍານພາຫະນະຮັບໃຊ້ແຂກທ່ອງທ່ຽວເຊັ່ນ : ກວຽນມ້າ ແລະ ລົດຈິບ, ນາງ ບິກຈີ ຜູ້ນຳທ່ຽວສັງກັດບໍລິສັດທ່ອງທ່ຽວໄຊງ່ອນ ໃຫ້ຮູ້ວ່າ :
“ ຖ້າຂີ່ລົດຈິບ, ກໍຈະມີຄວາມປອດໄພ ແລະ ໄວກວ່າ. ພຽງເສຍເວລາປະມານ 10 ນາທີ່ເທົ່ານັ້ນ, ແຂກທ່ອງທ່ຽວກໍສາມາດຂຶ້ນເຖິງຈອມພູ. ບົນເສັ້ນທາງເດີນ, ແຂກທ່ອງທ່ຽວທັງຫຼາຍຈະມີຄວາມປະທັບໃຈເມື່ອໄປຜ່ານເຂດປ່າແປກ, ພ້ອມກັນນັ້ນ, ແຂກທ່ອງທ່ຽວຈະຮູ້ສຶກຕົກສະເງີ້ເມື່ອລົດພາເຂົາເຈົ້າແລ່ນຜ່ານເສັ້ນທາງຄົດລ້ຽວ ແລະ ໄດ້ພົບຫຼາຍສິ່ງທີ່ປະຫຼາດໃຈ ”
ເມື່ອຂຶ້ນຮອດຈອມພູລາງບຽງ ດ້ວຍຄວາມສູງ 1950 ແມັດເມື່ອທຽບໃສ່ໜ້ານ້ຳທະເລ, ເບິ່ງຄືວ່າ ແຂກທ່ອງທ່ຽວພວມໄດ້ເຊື່ອມຕົວເຂົ້າກັບກຸ່ມເມັກເລື່ອນລອຍເທິງເວຫາ. ຖ້າຢືນຢູ່ຈອມພູ, ມຸ່ງສາຍຕາໄປທາງໄກ, ແຂກທ່ອງທ່ຽວສາມາດເຫັນທິວທັດທຳມະຊາດຢູ່ທົ່ວນະຄອນດາຫຼາດທີ່ສວຍສົດງົດງາມດັ່ງໃນຝັນ. ນາງມາຍລານ ແຂກທ່ອງທ່ຽວຢູ່ແຂວງດົງນາຍ ແບ່ງປັນວ່າ :
“ ມື້ນີ້ພວກນ້ອງໄປຮານີມຸນຢູ່ສະຖານທີ່ທ່ອງທ່ຽວແຫ່ງນີ້. ເມື່ອຂຶ້ນຮອດຈອມພູລາງບຽງນີ້, ຄວາມອິດເມື່ອຍກໍສູນຫາຍໄປ. ນ້ອງຮູ້ສຶກສະບາຍໃຈ ”
ເມື່ອມາຮອດນະຄອນດາຫຼາດ, ຢາລືມໄປເຂດພູພຽງລາງບຽງ. ນອກຈາກໄດ້ໄປຢ້ຽມຊົມ, ທັດສະນະສຶກສາຢູ່ຕາມສະຖາທີ່ທ່ອງທ່ຽວ, ແຂກທ່ອງທ່ຽວຍັງໄດ້ຮັບຟັງບັນດາເລື່ອງລາວແຫ່ງຄວາມຮັກຊຶ່ງຕິດພັນກັບເຂດພູພຽງລາງບຽງແຫ່ງເທບນິຍາຍນີ້