(vovworld)-ຮ່າໂນ້ຍແມ່ນນະຄອນຕິດພັນກັບແມ່ນ້ຳຫຼາຍສາຍ, ໃນນັ້ນແມ່ນ້ຳແດງ (ແມ່ນ້ຳຮົ່ງ) ແມ່ນແມ່ນ້ຳໃຫຍ່ກ່ວາໝູ່. ໃນຄວາມນຶກຄິດຂອງຊາວຮ່າໂນ້ຍ, ແມ່ນ້ຳແດງບໍ່ພຽງແຕ່ແມ່ນລຳແມ່ນ້ຳ ເພື່ອລ້ຽງດູມະນຸດເທົ່ານັ້ນ, ຫາກຕາມການເວລາ, ແມ່ນ້ຳແດງຍັງໄດ້ສ້າງພື້ນຖານວັດທະນາທຳ, ປະຫວັດສາດມາແຕ່ດົນນານຂອງປະເທດຊາດ, ຄວາມຈະເລີນຮຸ່ງເຮືອງຂອງພະລາຊະວັງ ແທງລອງ ໃນເມື່ອກ່ອນ ແລະ ຮ່າໂນ້ຍປະຈຸບັນອີກດ້ວຍ.
ກຳປັ່ນທ່ອງທ່ຽວບົນແມ່ນ້ຳແດງ
ພາບ:internet
|
ແມ່ນ້ຳແດງແມ່ນເລີ່ມໄຫຼຈາກພູຫວຍຊານ (ຈີນ), ມີຄວາມສູງ 1776ແມັດ, ໄຫຼເຂົ້າສູ່ຫວຽດນາມຈາກແຂວງ ລ່າວກາຍ, ໄຫຼຜ່ານແຂວງ ອຽນບ໋າຍ, ຟູ໋ທໍ້, ວິ້ງຟຸກ ເຖິງນະຄອນຫຼວງຮ່າໂນ້ຍ, ຫຼັງຈາກນັ້ນໄຫຼຜ່ານບັນດາແຂວງຄື: ຮືງອຽນ, ຮ່ານາມ, ນາມດິ້ງ, ທ໋າຍບີ່ງ ແລ້ວອອກສູ່ທະເລຕາເວັນອອກ. ແມ່ນ້ຳແດງມີຄວາມຍາວ 1.150 ກິໂລແມັດ, ໃນນັ້ນ 800 ກິໂລແມັດ ແມ່ນໄຫຼຜ່ານເຂດພູພຽງ ແລະ ພູສູງ, ສະນັ້ນຮອດລະດູຝົນ, ແມ່ນ້ຳສາຍນີ້ນ້ຳຫຼາຍແຮງທີ່ສຸດ ແຕ່ເມື່ອໄຫຼເຂົ້າເຂດທົ່ງພຽງແມ່ນ້ຳແດງຄວາມສູງຍັງເຫຼືອພຽງປະມານ 3 ແມັດເມື່ອທຽບໃສ່ລະດັບໜ້ານ້ຳທະເລ. ນັບແຕ່ພັນປີມານີ້, ແມ່ນ້ຳແດງໄດ້ປ້ານດິນສັນດອນສ້າງເປັນເຂດທົ່ງພຽງອັນກ້ວາງໃຫຍ່, ດິນແດນອຸດົມສົມບູນ, ຕົ້ນໄມ້ໃບຫຍ້າຂຽວສົດງົດງາມ, ໃນນັ້ນມີເຂດດິນນະຄອນຫຼວງຮ່າໂນ້ຍ. ແມ່ນ້ຳແດງບໍ່ພຽງແຕ່ແມ່ນສັນຍາລັກຂອງພື້ນຖານອະລິຍະທຳແຫ່ງການປູກເຂົ້ານາຕາມເທົ່ານັ້ນ, ຫາກຍັງມີບັນດາຄຸນຄ່າວັດທະນະທຳຂອງຊາວຫວຽດນາມອີກດ້ວຍ. ສາດສະດາຈານ, ດຣ ເຈິ່ນຈີ໋ຢ້ອຍ ນັກຄົ້ນຄ້ວາວັດທະນະທຳສັງກັດມະຫາວິທະຍາໄລແຫ່ງຊາດຮ່າໂນ້ຍ ໃຫ້ຮູ້ວ່າ:
“ ແມ່ນ້ຳແດງ, ທຳອິດມີຊື່ວ່າ: ແມ່ນ້ຳກ໋າຍ (ໝາຍເຖິງລຳແມ່ນ້ຳສາຍແມ່), ຫຼັງຈາກນັ້ນຍັງມີຊື່ວ່າ: ແມ່ນ້ຳໂລ ຫຼືເອີ້ນວ່າ: ໂລຢາງ ໄຫຼຜ່ານເມືອງ ຄ໋ວາຍເຈົາ ໄຫຼສູ່ລົງອີກຕອນໜຶ່ງເອີ້ນວ່າແມ່ນ້ຳດ້າຍຮ່ວາງ ຫຼື ຮ່ວາງຢາງ. ໄລຍະຕໍ່ມາເມື່ອຊາວຝຮັ່ງມານີ້ໄດ້ເຫັນວ່າ ແມ່ນ້ຳສາຍນີ້ມີສີແດງຂອງດິນສັນດອນ ຈຶ່ງເອີ້ນແມ່ນ້ຳສາຍນີ້ວ່າ: ແມ່ນແມ່ນ້ຳແດງ.”
ແມ່ນ້ຳແດງໄຫຼຜ່ານຮ່າໂນ້ຍພຽງໃນຕອນສັ້ນເມື່ອທຽບໃສ່ຄວາມຍາວຂອງມັນ ແຕ່ກໍປະໄວ້ຮ່ອງຮອຍທີ່ເປັນເອກະລັກສະເພາະຂອງເຂດວັດທະນະທຳແມ່ນ້ຳລຳເຊ, ນັ້ນແມ່ນບັນດາໝູ່ບ້ານຊາວປະມົງ, ໝູ່ບ້ານອາຊີບຫັດຖະກຳ, ໝູ່ບ້ານບູຮານແຄມແມ່ນ້ຳ, ໃນນັ້ນມີບັນດາຮີດຄອງປະເພນີເຂັ້ມຂົ້ນໄປດ້ວຍສີສັນຊາດ ຫວຽດນາມ.
ຕະຫລາດຂາຍເຄື່ອງປັ້ນດິນເຜົາແຄມແມ່ນ້ຳແດງ
ພາບ:dulichgo
|
ກ່ອນນີ້ 1000 ປີ, ເຈົ້າຊີວິດ ລີກົງອວນ ຍ້າຍເມືອງຫລວງ ຈາກແຂວງນີງບີງ ມາຕັ້ງຢູ່ ດ້າຍລາ ແລະ ໃຫ້ກໍ່ສ້າງພະລາຊະວັງ ທັງລອງ. ດ້ວຍທີ່ຕັ້ງແມ່ນໃຈກາງເຂດທົ່ງພຽງພາກເຫນືອ ແລະ ຢູ່ແຄມແມ່ນ້ຳລຳໃຫຍ່ ເຮັດໃຫ້ເສັ້ນທາງຄົມມະນາຄົຂອງ ທັງລອງ - ຮ່າໂນ້ຍ ເຊື່ອມຕໍ່ກັບບັນດາທ້ອງຖິ່ນອື່ນແມ່ນສະດວກທີ່ສຸດ. ດ້ວຍທິວທັດທຳມະຊາດທີ່ສວຍງາມຂອງເຂດດິນຢູ່ແຄມແມ່ນ້ຳແດງພ້ອມກັບຄວາມສຸພາບຮຽບຮ້ອຍ ແລະ ຮັກແພງແຂກຂອງ ຊາວຮ່າໂນ້ຍ ນັ້ນກໍແມ່ນຫົວເລື່ອງຂອງບັນດາບົດກາບກອນ, ບົດເພງ…. ຊື່ງນັກດົນຕີ, ນັກກະວີໄດ້ແຕ່ງຂຶ້ນໃນຫລາຍປີຜ່ານມາ ແລະ ກໍເປັນສິ່ງສ້າງຄວາມດູດດື່ມນັກທ່ອງທ່ຽວມາຈາກທຸກສາລະທິດ. ຮ່າໂນ້ຍ ປະຈຸບັນ ມີບັນດາລາຍການທ່ອງທ່ຽວຄົ້ນຫາແມ່ນ້ຳແດງ ບໍ່ພຽງແຕ່ສຳລັບຊາວ ຮ່າໂນ້ຍເທົ່ານັ້ນ ນັກທ່ອງທ່ຽວມາຈາກທຸກສາລະທິດ ເມື່ອເຂົ້າຮ່ວມລາຍການທ່ອງທ່ຽວບົນລຳແມ່ນ້ຳແດງ ດ້ວຍກຳປັ່ນ ນັກທ່ອງທ່ຽວຈະເຂົ້າໃຈຕື່ມອີກກ່ຽວກັບແມ່ນ້ຳແດງຕິດພັນກັບປະຫວັດສາດນະຄອນຫລວງ ຮ່າໂນ້ຍ ແລະ ປະເທດຫວຽດນາມ. ອ້າຍ ຫງວຽນແມ້ງຮຸ່ງ, ຜູ້ນຳທ່ຽວລາຍການທ່ອງທ່ຽວແມ່ນ້ຳແດງໃຫ້ຮູ້ວ່າ:
“ພື້ນຖານອະລິຍະທຳແມ່ນ້ຳແດງແມ່ນຫນຶ່ງໃນຈຳນວນ 36 ພື້ນຖານອະລິຍະທຳຂອງໂລກ. ຈາກອູ່ວັດທະນະທຳຂອງເຂດທົ່ງພຽງແມ່ນ້ຳແດງ, ອະລິຍະທຳແຫ່ງການປູກເຂົ້ານາທາມ, ແລະ ວັດທະນະທຳຂອງເຂດບ້ານນາ ໄດ້ສ້າງເປັນສີສັນວັດທະນະທຳຫວຽດນາມທີ່ເປັນຫລາຍຮູບຫລາຍແບບ. ເມື່ອເສັ້ນທາງບົກບໍ່ທັນພັດທະນາ, ການໄປມາຂອງປະຊາຊົນສ່ວນຫລາຍຜ່ານທາງນ້ຳ, ສະນັ້ນ ໄດ້ສ້າງເປັນບັນດາໝູ່ບ້ານຫັດຖະກຳ, ຕະຫລາດແຄມແມ່ນ້ຳ ແລະ ບັນດາຮີດຄອງປະເພນີ, ວັດທະນະທຳຕິດພັນກັບແມ່ນ້ຳລຳເຊ.”
ເມື່ອໄປທ່ອງທ່ຽວເທິງແມ່ນ້ຳແດງ, ນັກທ່ອງທ່ຽວໄດ້ເຊື່ອມຕົວເຂົ້າກັບທິວທັດທຳມະຊາດຂອງແມ່ນ້ຳລຳເຊ, ໄດ້ຮັບຊົມຄວາມງາມແບບເກົ່າແກ່ຂອງບັນດາໝູ່ບ້ານບູຮານ, ຢ້ຽມຊົມວັດວາອາຮາມຢູ່ແຄມແມ່ນ້ຳ, ເຂົ້າຮ່ວມບັນດາງານບຸນປະເພນີ, ເຂົ້າໃຈກ່ຽວກັບປະເພນີບູຊາພະແມ່ ຊື່ງແມ່ນການເຫລື້ອມໃສພື້ນເມືອງທີ່ເປັນເອກະລັກສະເພາະຂອງຊາວ ຫວຽດນາມ. ພິເສດ ໃນລາຍການທ່ອງທ່ຽວບົນແມ່ນ້ຳແດງ, ນັກທ່ອງທ່ຽວຈະໄດ້ແວ່ຢາມໝູ່ບ້ານຜະລິດເຄື່ອງປັ້ນດິນເຜົາ ບາດຈ່າງ ທີ່ລືຊື່, ມີກວ່າ 700 ປີ ເພື່ອເລືອກຊື້ໃຫ້ແກ່ຕົນເອງຜະລິດຕະພັນເຄື່ອງປັ້ນດິນເຜົາຈຳນວນຫນຶ່ງ. ລາຍການທ່ອງທ່ຽວ ບົນແມ່ນ້ຳແດງ ຊ່ວຍໃຫ້ນັກທ່ອງທ່ຽວເຂົ້າໃຈສ່ວນໃດຫນຶ່ງກ່ຽວກັບວັດທະນະທຳຂອງຫວຽດນາມ.