(vovworld)- ເມື່ອມາຢ້ຽມຢາມ ໄຕງວຽນ, ນັກທ່ອງທ່ຽວ ເຄີຍໄປຢ້ຽມຊົມທັດສະນີຍະພາບຫນອງ ລາກ (Lăk), ຊື່ງແມ່ນຫນຶ່ງໃນບັນດາຫນອງນ້ຳຈືດທຳມະຊາດທີ່ສວຍງາມ ແລະ ກວ້າງໃຫຍ່ຢູ່ຫວຽດນາມ. ຢູ່ອ້ອມແອ້ມຫນອງລາກ ແມ່ນປ່າດົງດີບທີ່ໃຫຍ່ໂຕມະໂຫຖານ, ສະນັ້ນຫນອງລາກ ບໍ່ພຽງແຕ່ແມ່ນສະຖານທີ່ທ່ອງທ່ຽວຊີວະພາບທີ່ເປັນເອກະລັກສະເພາະດ້ວຍທຳມະຊາດທີ່ສວຍງາມດັ່ງໃນຝັນເທົ່ານັ້ນ ຫາກແຫ່ງນີ້ຍັງຕິດພັນກັບເລື່ອງລາວກ່ຽວກັບກົກເຄົ້າຂອງຊາວ ເມີນົງ, ຊື່ງແມ່ນຊົນເຜົ່າມີພື້ນຖານວັດທະນະທຳອຸດົມສົມບູນ ແລະ ຕັ້ງພູມລຳເນົາຢູ່ທີ່ນີ້ມາແຕ່ດົນນານອີກດ້ວຍ.
ຫນອງລາກ ຢູ່ ໄຕງວຽນ
ພາບ:internet
|
ຕາມເລື່ອງລາວທີ່ເລົ່າຂານກັນມາຂອງຊາວ ເມີນົງແລ້ວ, ແຕ່ກີ້ແຕ່ກອ່ນ ເທວະດາໄຟຊະນະເທວະດານ້ຳ ພາຍຫລັງການຕໍ່ສູ້ຢ່າງດຸເດືອດເປັນໄລຍະຍາວ ເຮັດໃຫ້ບ້ານຊ່ອງຂອງຊາວ ເມີນົງ ຕົກເຂົ້າສູ່ສະພາບແຫ້ງແລ້ງ ແລະ ຂາດເຂີນນ້ຳຢ່າງແຮງ. ໃນຄາວນັ້ນ, ມີຜູ້ບ່າວຄົນຫນຶ່ງ ໄດ້ກ້າຫານອອກເດີນທາງໄປຫານ້ຳເພື່ອກູ້ເອົາຊີວິດຂອງຊາວບ້ານ ແລະ ພາຊາວ ເນີນົງ ມາຕັ້ງພູມລຳເນົາຢູ່ທີ່ນີ້. ຫນອງນ້ຳ ແລະ ເຂດດິນແດນນັ້ນ ແມ່ນຫນອງລາກ ໃນປະຈຸບັນ. ຫນອງລາກ ຕັ້ງຢູ່ແຄມເທດສະບານ ລຽນເຊີນ, ເມືອງ ລາກ, ຫ່າງຈາກນະຄອນ ບວນມາທວດ, ແຂວງ ດັກລັກໄປທາງທິດໃຕ້ ປະມານ 52 ກິໂລແມັດ. ຫນອງລາກ ກວ້າງ 500 ເຮັກຕາ ແລະ ນອນໃນເຂດພື້ນທີ່ ສູງ 500 ແມັດເມື່ອທຽບໃສ່ຫນ້ານ້ຳທະເລ. ເມື່ອສັງເກດຈາກທາງໄກ, ຫນອງລາກ ຄືດັ່ງແພໄຫມສີຂຽວສວຍງາມຜືນຫນຶ່ງທ່າມກາງເຂດພູຜາປ່າໄມ້ໄຕງວຽນທີ່ໃຫຍ່ໂຕມະໂຫຖານ. ອ້ອມຫນອງ ລາກ ແມ່ນເຂດປ່າດົງດີບ ດ້ວຍລະບົບສັດສາວາສິ່ງອຸດົມສົມບູນ, ຢູ່ໃນປ່າມີສັດຫາຍາກຫລາຍຊະນິດ ຊື່ງໄດ້ຈັດເຂົ້າປື້ມປົກແດງ. ພິເສດ ຢູ່ເຂດອ້ອມຫນອງ ລາກ ມີຊ້າງປ່າ ແລະ ຊ້າງໄດ້ຮັບການເຝີກສອນຫລາຍສຸດຢູ່ຫວຽດນາມ. ສະນັ້ນ ສິ່ງປະທັບໃຈທີ່ສຸດ ສຳລັບນັກທ່ອງທ່ຽວເມື່ອມາຢ້ຽມຢາມ ຫນອງລາກ ນັ້ນແມ່ນໄດ້ເຫັນຮູບພາບກວານຊ້າງບັນຊາຊ້າງຍ່າງໄປຕາມຖະຫນົນສາຍຕ່າງໆ. ບາງເທື່ອຍັງພົບເຫັນຊ້າງອາບນ້ຳຢູ່ແມ່ນ້ຳ, ຊ້າງກັບຄືນເມືອບ້ານໃນຍາມສາຍັນ. ຮູບພາບເຫລົ່ານັ້ນ ໄດ້ດຶງດູດນັກທ່ອງທ່ຽວມາຢ້ຽມຊົມຫນອງ ລາກ ເປັນຈຳນວນຫລວງຫລາຍ. ອ້າຍ ຫງວຽນແມ້ງຮ່າ, ນັກທ່ອງທ່ຽວມາຈາກນະຄອນ ຫາຍຟ່ອງ ໃຫ້ຂໍ້ສັງເກດວ່າ:
“ມາຢ້ຽມຢາມ ຫນອງລາກ ມີຫລາຍຮູບການທ່ອງທ່ຽວ. ນັກທ່ອງທ່ຽວ ສາມາດຂີ່ຊ້າງ ຫລື ຂີ່ເຮືອລ່ອງຕາມແມ່ນ້ຳເພື່ອຢ້ຽມຊົມທັດສະນີຍະພາບຫນອງນ້ຳ.. ນັກທ່ອງທ່ຽວກໍ່ສາມາດໄປຢ້ຽມຢາມບ້ານຕ່າງໆຂອງຊາວເຜົ່າ ເມີນົງ ທີ່ດຳລົງຊີວິດຢູ່ແຄມຫນອງ ຫລື ເຂົ້າເລິກໃນປ່າເພື່ອຄົ້ນຫາສັດປ່າ. ຂ້າພະເຈົ້າໄດ້ໄປຫລາຍແຫ່ງແລ້ວ, ແຕ່ເມື່ອມາຢ້ຽມຢາມຫນອງລາກ ກໍ່ເຫັນວ່າມີຫລາຍສິ່ງຫລາຍຢ່າງພິເສດສະເພາະຊື່ງບ່ອນອື່ນພັດບໍ່ມີ.”
ນັກທ່ອງທ່ຽວຂີ່ຊ້າງຂ້າມແມ່ນ້ຳ
ພາບ:daclac.gov.vn
|
ມາຢ້ຽມຢາມຫນອງລາກ, ນັກທ່ອງທ່ຽວ ບໍ່ພຽງແຕ່ໄດ້ຄົ້ນຫາຄວາມງາມຂອງທຳມະຊາດເທົ່ານັ້ນ ຫາກຍັງມີໂອກາດໄດ້ຊອກຮູ້ວັດທະນະທຳທີ່ເປັນມູນເຊື້ອຂອງຊາວເຜົ່າເມີນົງ ອີກດ້ວຍ, ໃນນັ້ນ ຕ້ອງເວົ້າເຖິງອາຊີບເຝີກສອນຊ້າງປ່າ. ຢູ່ເຂດຫນອງລາກ, ມີຄອບຄົວ ລຸງດາມນັງລອງ ແມ່ນຄອບຄົວທີ່ຊື່ສຽງດ້ວຍ ອາຊີບເຝີກສອນຊ້າງປ່າ ຜ່ານ 3 ລຸ້ນຄົນ. ປະຈຸບັນ ລຸງລອງ ມີຊ້າງປ່າຫລາຍໂຕກວ່າໝູ່ຢູ່ຫນອງລາກ. ຕາມລຸງດາມນັງລອງແລ້ວ, ຊາວເຜົ່າໄຕງວຽນ ເວົ້າລວມ ແລະ ຊາວເຜົ່າເມີນົງ ເວົ້າສະເພາະ ແມ່ນຜູ້ຮັກແພງຊ້າງປ່າທີ່ສຸດ, ຖືຊ້າງເປັນສັນຍາລັກໃຫ້ກຳລັງແຮງ, ຄວາມອີ່ມຫນຳສຳລານພູນສຸກຂອງວົງຕະກຸນ.
“ ພາຍຫລັງໄດ້ຮັບການເຝິກສອນ, ປະຕິບັດຕາມຄຳສັ່ງຂອງກວານຊ້າງແລ້ວ, ແມ່ນຈະຈັດພິທີຮັບຊ້າງປ່າເຂົ້າບ້ານ, ນັບແຕ່ນັ້ນ, ຊ້າງໄດ້ຮັບຖືວ່າແມ່ນສະມາຊິກຂອງຄອບຄົວ ແລະ ໄດ້ ຕັ້ງຊື່ຕາມວົງຕະກຸນຂອງຄອບຄົວ, ຊ້າງກໍ່ໄດ້ຮັບອາລົມຈິດ, ຊັບສິນ, ເມື່ອຕາຍແລ້ວກໍ່ຖືກຝັງ, ພ້ອມກັບຊັບສິນ ຕາມຮີດຄອງປະເພນີຂອງຊາວເຜົ່າ ເມີນົງ.”
ແຕ່ລະປີ, ປະຊາຊົນຢູ່ເຂດ ຫນອງລາກ ຈັດຕັ້ງບັນດາພິທີການທີ່ເປັນມູນເຊື້ອ, ສະແດງອາລົມຈິດຄວາມຮັກແພງທີ່ມີຕໍ່ໂຕຊ້າງຄື: ພິທີຮັບຊ້າງເຂົ້າເປັນສະມາຊິກໃນບ້ານ, ພິທີພາວະນາສຸຂະພາບໃຫ້ຊ້າງ. ພິເສດ ແມ່ນງານບຸນແຂ່ງຊ້າງເຮັດໃຫ້ນັກທ່ອງທ່ຽວຄິດເຖິງຄວາມອົງອາດກ້າຫານຂອງຜູ້ບ່າວ ເມີນົງ ໃນການລ່າຊ້າງເມື່ອກ່ອນນີ້.
ໃນລາຍການຄົ້ນຫາທັດສະນີຍະພາບ ຫນອງລາກ, ນັກທ່ອງທ່ຽວ ຍັງມີໂອກາດໄດ້ໄປຢ້ຽມຢາມ ເຮືອນຍາວຂອງ ຊາວເຜົ່າ ເມີນົງ ດ້ວຍວັດຖຸອຸປະກອນຫລາຍຢ່າງທີ່ຮັບໃຊ້ໃນຊີວິດປະຈຳວັນ ສະແດງໃຫ້ເຫັນຈຸດວັດທະນະທຳທີ່ເປັນເອກະລັກສະເພາະຂອງຊາວເຜົ່າຢູ່ທີ່ນີ້ຄື: ຕັ່ງ Kpal, ກອງ H’Gor, ຄ້ອງ, ໄຫບູຮານ…ປະຈຸບັນ, ບ້ານ ຢູນ(Jun) ແລະ ບ້ານ ເມີລຽງ (M’Lieng) ຂອງຊາວເຜົ່າ ເມີນົງ ຍັງຄົງຮັກສາຮີດຄອງປະເພນີ, ວັດທະນະທຳທີ່ເປັນມູນເຊື້ອດ້ວຍອາຊີບຕ່ຳແພພື້ນເມືອງໄວ້ໄດ້. ນັກທ່ອງທ່ຽວສາມາດຊື້ເຄື່ອງເປັນທີ່ລະນຶກ, ຮັບປະທານບັນດາເຍື່ອງອາຫານ ກໍຄືຮັບຊົມບັນດາລາຍການສິລະປະທີ່ເປັນເອກະລັກສະເພາະຂອງຊາວຊົນເຜົ່າຢູ່ທີ່ນີ້ອີກ.
ດ້ວຍຄວາມງາມແບບເລິກລັບຂອງເຂດດິນແດນ ໄຕງວຽນ, ໃນຊຸມປີມໍ່ໆມານີ້, ຫນອງ ລາກ ນັບມື້ນັບດຶງດູດນັກທ່ອງທ່ຽວມາຢ້ຽມຢາມເປັນຈຳນວນຫລວງຫລາຍ. ນອກຈາກທິວທັດທຳມະຊາດທີ່ສວຍງາມ, ອາກາດປອດໂປ່ງພ້ອມກັບຮູບການທ່ອງທ່ຽວຂີ່ຊ້າງຂ້າມແມ່ນ້ຳ, ຂີ່ເຮືອລ່ອງຕາມສາຍແມ່ນ້ຳ ເກີຣົງອານາ, ບັນດາລາຍການທ່ອງທ່ຽວຄົ້ນຫາສີສັນວັດທະນະທຳ ທີ່ເປັນເອກະລັກສະເພາະຂອງຊາວເຜົ່າ ເມີນົງ ນັ້ນ, ໄດ້ເຮັດໃຫ້ ຫນອງ ລາກ ກາຍເປັນສະຖານທີ່ທ່ອງທ່ຽວທີ່ຂາດບໍ່ໄດ້ໃນບັນດາລາຍການທ່ອງທ່ຽວຢູ່ແຂວງ ດັກລັກ ເວົ້າສະເພາະ ແລະ ເຂດໄຕງວຽນ ເວົ້າລວມ.