(vovworld) – ຖ້າຫາກແຕ້ມແຜນທີ່ຫວຽດນາມ, ບ່ອນຕັ້ງຟອຍແຕ້ມທຳອິດນັ້ນແມ່ນແຫຼມຊາຫວີ ທີ່ຂຶ້ນກັບຕາແສງຈ່າໂກ, ນະຄອນມ໋ອງກ໋າຍ, ແຂວງກວາງນິງ. “ຊາ“ ໝາຍຄວາມວ່າຊາຍທະເລ, “ຫວີ“ ໝາຍຄວາມວ່າຫາງ. ເຂົາເຈົ້າເອີ້ນວ່າຊາຫວີ ເພາະວ່າແຕ່ລະເທື່ອເມື່ອນ້ຳທະເລລົດລົງ, ຈະເຫັນຫາດຊາຍທະເລທີ່ຍາວຢຽດປຽບເໝືອນຫາງມັງກອນພົ້ນເດັ່ນຂຶ້ນ. ໃນລາຍການຄົ້ນຫາຫວຽດນາມພາກນີ້, ນັກຂ່າວວິທະຍຸກະຈາຍສຽງຫວຽດນາມຂໍແນະນຳບົດສາລະຄະດີທີ່ມີຫົວຂໍ້ວ່າ: “ຄວາມປະທັບໃຈກ່ຽວກັບຊາຫວີ, ບ່ອນຕັ້ງຟອຍແຕ້ມທຳອິດຂອງແຜນທີ່ຫວຽດນາມ“ ເຊີນທ່ານຮັບຟັງ.
ປ້າຍຂອບອ້ອມຊາຍແດນຈາລຶກຄຳກອນຂອງນັກກະວີ ໂຕ໋ຫືວ ທີ່ວ່າ:
“ຈາກຈ່າໂກປ່າ ຕົ້ນສົນ. ເຖິງກ່າເມົາປ່າ ໂກງກາງ“
(ພາບ: ອິນເຕີແນດ)
ພວກຂ້າພະເຈົ້າເດີນທາງອອກຈາກນະຄອນມ໋ອງກ໋າຍ ໃນຍາມຮຸ່ງເຊົ້າດ້ວຍລົດໃຫຍ່, ບົນເສັ້ນທາງປູຢາງຊື່ຖັດແຄມທະເລກໍ່ຮູ້ສຶກວ່າທ້ອງຟ້າຄືກວ້າງກວ່າ ແລະ ໜ້າດິນຮາບພຽງກວ່າ. ຜ່ານໝູ່ບ້ານຈ່າໂກ, ສາລາຈ່າໂກ, ໂບດຈ່າໂກ .... ກໍ່ໄປຮອດແຫຼມຊາຫວີ. ປ້າຍຂອບອ້ອມຊາຍແດນຕັ້ງຢູ່ປາຍທາງ, ບ່ອນໂປໂລອອກສູ່ທະເລປຽບເໝືອນນີ້ວມືຊີ້ອອກມະຫາສະໝຸດທີ່ກວ້າງໃຫຍ່ສຸດສາຍຕາ, ເທິງປ້າຍນີ້ໄດ້ຈາລຶກຄຳກະວີຂອງນັກກະວີ ໂຕ໋ຫືວ ທີ່ວ່າ: “ຈາກຈ່າໂກປ່າ ຕົ້ນສົນ. ເຖິງກ່າເມົາປ່າ ໂກງກາງ“. ບົນທະເລບ່ອນໄກໆນັ້ນ, ແມ່ນຫຼັກໝາຍຊາຍແດນທີ່ຢັ້ງຢືນອະທິປະໄຕລະຫວ່າງຫວຽດນາມ - ຈີນ. ຜູ້ທຳອິດທີ່ພວກຂ້າພະເຈົ້າພົບປະຢູ່ແຫຼມຊາຫວີ ນັ້ນແມ່ນບັນດານັກຮົບປ້ອງກັນຊາຍແດນກອງທີ 3, ປ້ອມປ້ອງງກັນຊາຍແດນຈ່າໂກ. ພວກອ້າຍພວມເລີ່ມຕົ້ນວຽກງານປະຈຳວັນຂອງຕົນຢູ່ຊາຫວີ. ຮ້ອຍໂທ ໂຮ່ວັນຕົງ, ຜູ້ທີ່ຫາກໍ່ຮັບໜ້າທີ່ຢູ່ປ້ອມປ້ອງກັນຊາຍແດນນີ້ມາເປັນເວລາພຽງ 8 ເດືອນເທົ່ານັ້ນໄດ້ແນະນຳໃຫ້ພວກຂ້າພະເຈົ້າກ່ຽວກັບຈຸດພິເສດສະເພາະຂອງດິນແດນແຫ່ງນີ້ວ່າ:
“ບ່ອນທີ່ພວກເຮົາພວມຢືນແມ່ນປາກແມ່ນ້ຳ ບັກລວນ. ຢູ່ເບື້ອງໜ້າແມ່ນ 2 ຫຼັກໝາຍສຸດທ້າຍລະຫວ່າງຫວຽດນາມ - ຈີນ, ແລະ ກໍ່ຢູ່ຕໍ່ໜ້າແມ່ນເທດສະບານຈຽງຜິງ , ນະຄອນຕຸງຊິງ ຂອງຈີນ. ຢູ່ເບື້ອງຂວາ ແມ່ນແຫຼມປາຍຫຼົງ ຂອງທ່າເພິງເສິງ , ກວາງສີ, ຈີນ. ພວກເຈົ້າເຫັນບໍ່, ຊາວປະມົງຫວຽດນາມກຳລັງຫາປາ ແລະ ເຂົາເຈົ້າໄດ້ປະຕິບັດບັນດາສັນຍາ, ສົນທິສັນຍາລະຫວ່າງຫວຽດນາມ - ຈີນຢ່າງເຂັ້ມງວດ“.
ຮູບພາບຢູ່ຫາດຊາຍທະເລຈ່າໂກ
(ພາບ: ອິນເຕີແນດ)
ຮ້ອຍໂທ ໂຮ່ວັນຕົງ, ເວົ້າວ່າ, ທຸກສິ່ງທຸກຢ່າງຢູ່ທີ່ນີ້ລ້ວນແຕ່ມີຈິດວີນຍານ - ຈິດວີນຍານຂອງ “ນັກຮົບ“
“ຄື້ນທະເລກະທົບໃສ່ບ່ອນນີ້, ບາງເທື່ອທົບໃສ່ປ້ອມປ້ອງກັນຊາຍແດນອີກ. ໃນຍາມຮ້ອນ, ລົມພັດແຮງທີ່ສຸດ, ແຮງກວ່າຢູ່ເຂດດິນຕໍ່ແຜ່ນ. ຮອດລະດູໜາວອາກາດໜາວຈັດ. ຫ່າຝົນມາໄວທີ່ສຸດ. ໃນເວລາພຽງ 15 ນາທີເທົ່ານັ້ນ, ແຕ່ດິນຟ້າອາກາດໄດ້ຫັນປ່ຽນຈາກແຈ້ງສະຫວ່າງເປັນມືດມົວໂດຍທັນທີ“
ຮ້ອຍໂທ ໂຮ່ວັນຕົງ ບໍ່ທັນເວົ້າໝົດຄວາມ ຝົນກໍ່ຕົກລົງແຫຼມຊາຫວີຢ່າງແຮງ. ຟ້າຮ້ອງ, ຟ້າແມບ, ຝົນ ແລະ ລົມພັດ ໄດ້ເຮັດໃຫ້ຕົ້ນຕະຊົນ, ເຊິ່ງແມ່ນຕົ້ນໄມ້ທີ່ເປັນສັນຍາລັກຂອງ ຊາຫວີ ແລະ ຫາດຊາຍທະເລຈ່າໂກໂອນອຽງໄປຕາມສາຍລົມ.
ໃນຂະນະທີ່ຝົນຍັງຕົກນັ້ນ, ຮ້ອຍໂທ ໂຮ່ວັນຕົງ ໄດ້ເຕື້ອງເຖິງດວງຕາເວັນຢູ່ເຂດດິນແຫ່ງສັກກະລະບູຊາ ຊາຫວີ ນີ້ວ່າ:
ດວງຕາເວັນພົ້ນຂອບຟ້າຂື້ນມາສຸດແສນສວຍງາມ, ພິເສດ, ສຳລັບທະຫານປ້ອງກັນຊາຍແດນຢູ່ທີ່ນີ້ ໄດ້ມອງເຫັນດວງຕາເວັນຂື້ນງາມກ່ວາຢູ່ບ່ອນອ່ືນ. ຂ້າພະເຈົ້າຮູ້ສຶກເອກອ້າງທະນົງໃຈເມື່ອໄດ້ເຮັດໜ້າທີ່ປົກປັກຮັກສາອະທິປະໄຕຢູ່ດິນແດນແຫ່ງນີ້. ທຳມະຊາດທີ່ສວຍງາມຢູ່ຈ່າໂກ ໄດ້ສ້າງຄວາມສະອອນໃຈເພື່ອໃຫ້ພວກຂ້າພະເຈົ້າປະຕິບັດສຳເລັດໜາ້ທີ່ປົກປັກຮັກສາອະທິປະໄຕປະເທດຊາດ.
ດວງຕາເວັນພົ້ນຂອບຟ້າຂື້ນມາສຸດແສນສວຍງາມ
(ພາບ: ອິນເຕີແນດ)
ສິ່ງທີ່ແປກປະຫຼາດນັ້ນແມ່ນ, ພາຍຫຼັງຫ່າຝົນ, ດິນຟ້າອາກາດຢູ່ຊາຫວີ ກໍ່ແຈ້ງສະຫວ່າງ ແລະ ຄື້ນທະເລກໍ່ອ່ອນລົງໃນທັນທີ, ຫາດຊາຍຊາຫວີ ຢູ່ກາງທະເລທີ່ຢືນຢັນອະທິປະໄຕຂອງຫວຽດນາມສືບຕໍ່ຕ້ອນຮັບເຮືອຫາປາຂອງຊາວປະມົງເຂົ້າທຽບທ່າ. ບັນດາກຳມະກອນທີ່ພວມເຮັດວຽກຢູ່ກຸ່ມກິດຈະກຳສື່ສານປຸກລະດົມຊາຫວີ, ໃນເນື້ອທີ່ກວ່າ 15.000 ຕາລາງແມດ ເຊິ່ງຕັ້ງຢູ່ມໍ່ໆນີ້ສືບຕໍ່ຕີເຫຼັກ, ປະສົມເບຕົງ. ນາຍທະຫານປ້ອງກັນຊາຍແດນ ໂຮ່ວັນຕົງຂໍລາພວກຂ້າພະເຈົ້າເພື່ອເລີ່ມຕົ້ນວຽກງານເວນຍາມຂອງຕົນ ດ້ວຍຄວາມເອກອ້າງທະນົງໃຈທີ່ເປັນທະຫານປ້ອງກັນຕອນດິນເໜືອສຸດຂອງປະເທດ. ສ່ວນພວກຂ້າພະເຈົ້າກ່ອນຈະເດີນທາງອອກຈາກຊາຫວີ ໄດ້ພົບປະກັບຊາວປະມົງບ້ານຈ່າໂກ ແລະ ໄປຜ່ານສວນໄມ້ໂດຍບັນດາປະມຸກລັດປູກເມື່ອມາຢ້ຽມຢາມຊາຫວີ, ແລ້ວລົງຫາດຊາຍທະເລເພື່ອສຳພັດກັບທະເລ ແລະ ຮັບຟັງສຽງຄື້ນທະເລກະທົບໃສ່ຝັ່ງ.