ໝູ່ບ້ານກູເລີ່ນທີ່ຮົກເຮື້ອ ດ້ວຍເຮືອນຮ້ານຕັ້ງແບບກະແຈກກະຈາຍຂອງຂອງຊາວເຜົ່າກະຮໍ ໃນທ່າມກາງດິນຟ້າອາກາດເຢັນສະບາຍຢູ່ເຂດພູພຽງລາງບຽງ ໃນແຂວງເລີມດົງ. ນີ້ກໍເປັນທີ່ຮູ້ຈັກກັນດີຂອງແຂກທ່ອງທ່ຽວຫຼາຍຄົນ. ເມື່ອມາຢ້ຽມຢາມ ໝູ່ບ້ານກູເລີ່ນ, ແຂກທ່ອງທ່ຽວຮູ້ສຶກສະຫວາດສະເຫວີຍເມື່ອໄດ້ເຊື່ອມຕົວເຂົ້າກັບທຳມະຊາດທີ່ສວຍສົດງົດງາມ.
ຄວາມງາມດັ່ງໃນຝັນຢູ່ໝູ່ບ້ານກູເລີ່ນໃນແຂວງເລີມດົງ |
ໝູ່ບ້ານກູເລີ່ນຖືກຕັ້ງຢູ່ກາງປ່າດົງດິບທີ່ຮົກເຮື້ອ ໃຕ້ຕີນພູລາງບຽງ ຂຶ້ນກັບເມືອງຫຼາກເຢືອງ, ແຂວງເລີມດົງ. ໝູ່ບ້ານກູເລີ່ນມີເນື້ອທີ່ປະມານ 30 ແຮັກຕາ ຫ່າງຈາກໃຈກາງນະຄອນດາຫຼາດປະມານ 20 km. ໝູ່ບ້ານກູເລີ່ນແມ່ນບ້ານເກີດເມືອງນອນຂອງປະຊາຄົມຊາວເຜົ່າກະຮໍ. ເຂົາເຈົ້າດຳລົງຊີວິດໃນທ່າມກາງຄວາມສະຫງົບສຸກໃນເຮືອນຮ້ານຫຼັງຕ່າງໆ. ຍ້ອນຫຼົງໄຫຼກັບຄວາມງາມແບບຮົກເຮື້ອດັ່ງໃນຝັນຂອງໝູ່ບ້ານ, ນັກດົນຕີ ວັນຕ້ວນແອງ ໄດ້ສ້າງໝູ່ບ້ານໃຫ້ກາຍເປັນສະຖານທີ່ທ່ອງທ່ຽວທຳມະຊາດທີ່ເປັນເອກະລັກສະເພາະ ແລະ ດູດດື່ມສຳລັບແຂກທ່ອງທ່ຽວ. ອ້າຍດວານເຈື່ອງເຊີນ ຜູ້ນຳທ່ຽວຂອງບໍລິສັດ Vietravel ໃຫ້ຮູ້ວ່າ :
“ ສຳລັບໝູ່ບ້ານກູເລີ່ນ, ຊື່ຂອງໝູ່ບ້ານມີລັກສະນະພື້ນເມືອງ, ຟັງລຽບງ່າຍປຽບເໝືອນທັດສະນີຍະພາບຢູ່ແຫ່ງນີ້. ແຕ່ເມື່ອເຫັນດ້ວຍຕາ, ພວກເຮົາຈະພົບເຫັນຫຼາຍສິ່ງຫຼາຍຢ່າງທີ່ຈັບໃຈ. ຢູ່ແຫ່ງນີ້ ໄດ້ເຊື່ອມຈອດມະນຸດດ້ວຍກັນແບບທຳມະຊາດ. ສຳລັບແຂກທ່ອງທ່ຽວທີ່ມາຈາກບັນດາຕົວເມືອງໃຫຍ່ທີ່ມີການດຳລົງຊີວິດແບບອຸດສາຫະກຳນັ້ນ, ເມື່ອມາຮອດແຫ່ງນີ້ ກໍລ້ວນແຕ່ຮູ້ສຶກມີຄວາມແຕກຕ່າງກັນຫຼາຍ ”
ໂດຍໄດ້ເຊື່ອມຕົວເຂົ້າກັບທັດສະນີຍະພາບທີ່ກ້ວາງໃຫຍ່ໄພສານຄືໝູ່ບ້ານກູເລີ່ນ, ແຂກທ່ອງທ່ຽວທັງຫຼາຍຈະມີໂອກາດໄດ້ຄົ້ນຫາສະຖານທີ່ທ່ອງທ່ຽວຕ່າງໆຕາມໃຈ. ອາດຈະໄດ້ຍ່າງເລາະຫຼິ້ນ, ຂຶ້ນຄ້ອຍຫຼືຍ່າງຕາມທາງຊອຍໄປຮອດເຮືອນຫຼັງຕ່າງໆຖືກມຸງຫຍ້າຂອງຊາວເຜົ່າກະຮໍ.
ຖ້າຫາກໄດ້ຂີ່ລົດຈິບຕາມເສັ້ນທາງນ້ອຍທີ່ຄົດງໍ, ເມື່ອຮອດປາຍທາງ, ບັງເອີນມີບັນດາເຂດໂນນພູຫຼືຫ້ວຍນ້ຳລຳຕ່າງໆປະກົດຂຶ້ນໃນສາຍຕາຂອງແຂກທ່ອງທ່ຽວ, ອັນໄດ້ເຮັດໃຫ້ເຂົາເຈົ້າມີຄວາມປະທັບໃຈ. ນາງຈິ້ງທິຫງອດ ຢູ່ນະຄອນໂຮ່ຈິມິນ ເປີດເຜີຍວ່າ :
“ ເມື່ອໄປຮອດໝູ່ບ້ານກູເລີ່ນ, ກ່ອນອື່ນໝົດແມ່ນໄດ້ຂີ່ລົດຈິບ ຈະຮູ້ສຶກໄດ້ເຖິງການທ່ອງທ່ຽວແບບຜະຈົນໄພ. ນັບແຕ່ກ່ອນເປັນຕົ້ນມາ, ເຮົາຍັງບໍ່ທັນຂຶ້ນຄ້ອຍທີ່ຕັ້ງຊືແບບນີ້. ນີ້ແມ່ນການບໍລິການທ່ອງທ່ຽວທີ່ອຸດົມສົມບູນ, ເຮັດໃຫ້ເຮົາມີຄວາມປະທັບໃຈ ”
ມາຮອດໝູ່ບ້ານກູເລີ່ນ, ແຂກທ່ອງທ່ຽວຈະໄດ້ເຂົ້າຮ່ວມບັນດາການເຄື່ອນໄຫວຢູ່ກາງແຈ້ງເຊັ່ນ: ປີນພູ, ປ່ອຍວາວ, ພາຍເຮືອໃນໜອງ, ຂ້າມປ່າ, ຕຶກປາ. ຍິ່ງໄປກວ່ານັ້ນ, ຈະໄດ້ຕັ້ງຄ້າຍ, ຈູດໄຟ, ເຂົ້າຮ່ວມການລະຫຼິ້ນພື້ນເມືອງ, ຟັງຕີຄ້ອງ. ທ້າວມິນເລີນ, ບັນນາທິການວິທະຍຸກະຈາຍສຽງ ແລະ ໂທລະພາບແຂວງເລີມດົງ ໃຫ້ຮູ້ວ່າ :
“ ພາຍຫຼັງເດີນຕາມທາງອ້ອມພູໄປຮອດໝູ່ບ້ານກູເລີ່ນດ້ວຍທິວທັດທຳມະຊາດທີ່ສວຍສົດງົດງາມດັ່ງໃນຝັນຂອງຕະຫຼາດ ຈົມຫົມ, ບ້ານດວກ, ຫ້ວຍລຳຕ່າງໆ, ແຂກທ່ອງທ່ຽວກໍຢາພາດໂອກາດໄປຢ້ຽມຊົມຫ້ອງວາງສະແດງພາບແຕ້ມ. ຢູ່ບອ່ນນີ້, ເຄີຍຈັດງານວາງສະແດງພາບແຕ້ມຂອງຈິດຕະກອນທີ່ມີຊື່ສຽງຫຼາຍຄົນທັງຢູ່ພາຍໃນ ແລະ ຕ່າງປະເທດ ”
ໃນໝູ່ບ້ານກູເລີ່ນ, ຈາກຂົວໄມ້ໄຜ່, ສາລາບ້ານ ຕະຫຼອດຮອດດອກໄມ້ປົງຂຶ້ນແບບທຳມະຊາດ, ຕົ້ນໄມ້ໄຜ່, ຄອກສັດ…ທັງໝົດເຫຼົ່ານັ້ນ ກໍສໍ່ສະແດງໃຫ້ເຫັນຄວາມລຽບງ່າຍແບບດັ້ງເດີມ. ນັກດົນຕີ ວັນຕ້ວນແອງ ເວົ້າວ່າ :
“ ໃນທຸກວັນນີ້, ແຂກທ່ອງທ່ຽວທັງຫຼາຍ ຢາກເຊື່ອມຕົວເຂົ້າກັບການດຳລົງຊີວິດແບບທຳມະຊາດ, ດັ່ງນັ້ນ, ວັດທະນະທຳທ້ອງຖິ່ນ ແມ່ນບັນຫາເປັນຕາຍຂອງ ໝູ່ບ້ານກູເລີ່ນ. ໃນໄລຍະຕໍ່ໄປ, ໝູ່ບ້ານກູເລີ່ນຍັງຈະຂະຫຍາຍຕົວຕາມແນວໂນ້ມກາຍເປັນໝູ່ບ້ານທີ່ມີຊີວິດແບບດັ້ງເດີມ, ມີຊາວທ້ອງຖິ່ນດຳເນີນຊີວິດ, ມີການແລກປ່ຽນວັດທະນະທຳຄ້ອງ, ມີໄກ່, ມີໝູຖືກລ້ຽງໃນປ່າ ມີຜັກຖືກປູກໃນປ່າ... ”
ບໍ່ວ່າຜູ້ໃດທີ່ໄດ້ມາຢ້ຽມຢາມໝູ່ບ້ານກູເລີ່ນແລ້ວ, ຮອດເວລາກັບເມືອ, ກໍລ້ວນແຕ່ຄິດຮອດຄິດເຖິງແຫ່ງນີ້ດ້ວຍອະນຸສອນທີ່ດີງາມ. ແລະ ໃນແຜນທີ່ທ່ອງທ່ຽວດາຫຼາດ, ໝູ່ບ້ານກູເລີ່ນໃນສາຍຕາຂອງ ນັກດົນຕີ ວັນຕ້ວນແອງ ໄດ້ກາຍເປັນຈຸດແວ່ຢ້ຽມຢາມທີ່ຂາດບໍ່ໄດ້ຂອງແຂກທ່ອງທ່ຽວທັງຫຼາຍເມື່ອເຂົ້າມາທ່ອງທ່ຽວຢູ່ແຂວງເລີມດົງ.