ນະຄອນດາຫຼາດ ຂຶ້ນກັບແຂວງ ເລີມດົງ, ຍັງຖືກເອີ້ນດ້ວຍຊື່ອື່ນໆວ່າ : ນະຄອນຢູ່ເຂດພູພຽງ, ນະຄອນແຫ່ງປ່າແປກ, ນະຄອນແຫ່ງຄວາມຮັກ, ນະຄອນນ້ຳໝອກ, ນະຄອນລະດູບານໃໝ່… ແລະ ນະຄອນ Festival ດອກໄມ້.
ດາຫຼາດ, ນະຄອນ Festival ດອກໄມ້
|
ຊຸມປີມໍ່ໆມານີ້, ນະຄອນໄດ້ຮັບການໂຄສະນາຢ່າງແຂງແຮງ ດ້ວຍເຄື່ອງໝາຍການຄ້ານະຄອນ Festival ດອກໄມ້. ປີ 2005, ເປັນຄັ້ງທຳອິດທີ່ນະຄອນ ດາຫຼາດໄດ້ຈັດງານ Festival ດອກໄມ້ຂຶ້ນ. ຜ່ານການຈັດງານບຸນ 6 ຄັ້ງ, ເຄື່ອງໝາຍການຄ້ານະຄອນ Festival ດອກໄມ້ດາຫຼາດ ໄດ້ຮັບການຢັ້ງຢືນດ້ວຍຈຳນວນແຂກທ່ອງທ່ຽວເຂົ້າມາທ່ອງທ່ຽວຢູ່ແຫ່ງນີ້ນັບມື້ນັບຫຼາຍຂຶ້ນ. ໃນງານ Festival ດອກໄມ້ດາຫຼາດປີ 2015 ຊຶ່ງຈັດຂຶ້ນໃນພຽງ 5 ວັນ ຄືແຕ່ວັນທີ 29/12/2015 ຫາວັນທີ 2/1/2016, ຈຳນວນແຂກທ່ອງທ່ຽວເຂົ້າມາທ່ອງທ່ຽວຢູ່ດາຫຼາດແມ່ນປະມານ 5 ແສນເທື່ອຄົນ. ທ່ານ ວໍ້ຫງອກຫຽບ ປະທານຄະນະກຳມະການປະຊາຊົນນະຄອນ ດາຫຼາດ ໃຫ້ຮູ້ວ່າ : ງານ Festival ດອກໄມ້ດາຫຼາດໄດ້ສ້າງຄວາມປະທັບໃຈອັນດີງາມກ່ຽວກັບນະຄອນດາຫຼາດທີ່ສະຫງົບສຸກ, ເປັນໜ້າຈັບໃຈໃຫ້ແກ່ແຂກທ່ອງທ່ຽວທັງຢູ່ພາຍໃນ ແລະ ຕ່າງປະເທດ. ທ່ານ ວໍ້ຫງອກຫຽບ ປະທານຄະນະກຳມະການປະຊາຊົນນະຄອນ ດາຫຼາດ ກ່າວວ່າ :
“ ຈຸດໝາຍຂອງງານ Festival ແມ່ນເພື່ອຍົກສູງຄຸນຄ່າຂອງຜູ້ຜະລິດດອກໄມ້. ຂອງຊາວກະສີກອນຜູ້ປູກດອກໄມ້, ຂອງຜູ້ດຳເນີນທຸລະກິດຄ້າຂາຍດອກໄມ້. ນີ້ກໍແມ່ນໂອກາດເພື່ອໂຄສະນາເຄື່ອງໝາຍການຄ້າ, ຄວາມສາມາດບົ່ມຊ້ອນຂອງນະຄອນດາຫຼາດເວົ້າສະເພາະ ແລະ ແຂວງເລີມດົງເວົ້າລວມກ່ຽວກັບດອກໄມ້, ກ່ຽວກັບການທ່ອງທ່ຽວ ການບໍລິການ, ກ່ຽວກັບຊາ, ກາເຟເພື່ອກອບສ່ວນຊຸກຍູ້ການພັດທະນາເສດຖະກິດຂອງນະຄອນດາຫຼາດ, ຂອງແຂວງເລີມດົງ”
ດາຫຼາດມີທ່າດີເມື່ອທຽບໃສ່ບັນດານະຄອນທ່ອງທ່ຽວອື່ນໆ, ນັ້ນແມ່ນມີອາກາດອົບອຸ່ນດ້ວຍອຸນຫະພູມສະເລ່ຍໃນແຕ່ລະວັນຢ່າງຕ່ຳສຸດແມ່ນ 15 ອົງສາ C ແລະ ສູງສຸດແມ່ນ 24 ອົງສາ C , ພິເສດເມື່ອມາຮອດດາຫຼາດ, ແຂກທ່ອງທ່ຽວຈະຮູ້ສຶກເຖິງອາກາດຂອງ 4 ລະດູໃນມື້ດຽວ. ຍາມລະດູຮ້ອນ, ອາກາດຢູ່ ດາຫຼາດເຢັນສະບາຍ. ຮອດຍາມໜາວ, ຂະນະທີ່ຢູ່ພາກເໜືອຫວຽດນາມມີອາກາດໜາວຈັດນັ້ນ, ແຕ່ຢູ່ດາຫຼາດ ອາກາດໜາວເຢັນຄືດັ່ງຊຸມມື້ເລີ່ມກ້າວເຂົ້າສູ່ລະດູໃບໄມ້ຫຼົ່ນຢູ່ພາກເໜືອ. ຍິ່ງກ່ວານັ້ນ, ດາຫຼາດຍັງມີຈຸດພິເສດສະເພາະຫຼາຍຢ່າງກ່ຽວກັບທຳມະຊາດ, ມະນຸດ, ວັດທະນະທຳຂອງດິນແດນໄຕງວຽນທີ່ໃຫຍ່ໂຕມະໂຫຖານ. ເພາະສະນັ້ນ, ເມື່ອດາຫຼາດກາຍເປັນນະຄອນ Festival ດອກໄມ້ນັ້ນ, ກໍແມ່ນຈຸດເວລາທີ່ບັນດາຄຸນຄ່າທາງດ້ານເງື່ອນໄຂທຳມະຊາດ, ປະຫວັດສາດ, ວັດທະນະທຳ, ມະນຸດຢູ່ແຫ່ງນີ້ຖືກທະວີຄູນຫຼາຍຂຶ້ນ, ອັນໄດ້ດຶງດູດແຂກທ່ອງທ່ຽວທັງຢູ່ພາຍ ແລະ ຕ່າງປະເທດເຂົ້າມາທ່ອງທ່ຽວຢູ່ແຫ່ງນີ້ນັບມື້ນັບຫຼາຍຂຶ້ນ. ທ່ານ ຫງວຽນວັນເຮືອງ ອະດີດຫົວໜ້າພະແນກວັດທະນະທຳ, ກິລາ ແລະ ທ່ອງທ່ຽວແຂວງເລີມດົງໃຫ້ຮູ້ວ່າ :
“ ເພື່ອສ້າງນະຄອນດາຫຼາດເປັນນະຄອນດອກໄມ້, ດຶງດູດແຂກທ່ອງທ່ຽວນັ້ນ, ນອກຈາກບັນດາສະຖານທີ່ທ່ອງທ່ຽວທີ່ລື່ຊື່ຊຶ່ງພວມມີຢູ່ແລ້ວນັ້ນ, ດາຫຼາດ ກໍສືບຕໍ່ປູກຕົ້ນໄມ້ຕື່ມອີກ. ແຕ່ລະປີ, ດາຫຼາດກໍປູກຕົ້ນໄມ້ຢູ່ລຽບຕາມຖະໜົນຫົນທາງ. ທາງອຳນາດການປົກຄອງກໍປຸກລະດົມຂະບວນການປະຊາຊົນປູກຕົ້ນໄມ້ ແລະ ດອກໄມ້ຢູ່ຕາມເຮືອນຂອງຕົນ. ”
ໜຶ່ງໃນບັນດາຜົນສຳເລັດຂອງງານ Festival ດອກໄມ້ດາຫຼາດຄັ້ງຕ່າງໆນັ້ນ ແມ່ນການປຸກລະດົມການຮ່ວມແຮງຮ່ວມໃຈຂອງທັງວົງຄະນະຍາດໃນການຈັດຕັ້ງບັນດາການເຄື່ອນໄຫວໂຄສະນາ ດາຫຼາດ. ໃນການປະກອບສ່ວນເຫຼົ່ານັ້ນ, ບັນດາເຮືອນສວນ, ບ້ານດອກໄມ້ໄດ້ກາຍເປັນປັດໄຈຕົ້ນຕໍ, ຊຶ່ງໄດ້ແນະນຳໃຫ້ແຂກທ່ອງທ່ຽວຮັບຊາບກ່ຽວກັບຮູບພາບທີ່ເຕັມສ່ວນຂອງພື້ນຖານກະສີກຳ ປູກຜັກ, ດອກໄມ້ຂອງ ດາຫຼາດ. ທ່ານ ດັ້ງບາວວິງ ຜູ້ປູກດອກໄມ້ຢູ່ບ້ານດອກໄມ້ ທ້າຍຟຽນ ໃຫ້ຮູ້ວ່າ :
“ດາຫຼາດມີ 3 ບ້ານດອກໄມ້, ນັ້ນແມ່ນ ບ້ານດອກໄມ້ຮ່າດົງ, ບ້ານດອກໄມ້ຫວ້ານແທ່ງ ແລະ ບ້ານດອກໄມ້ ທ້າຍຟຽນ, ແຕ່ລະໝູ່ບ້ານດອກໄມ້ກໍມີຈຸດພິເສດສະເພາະຂອງໃຜຂອງມັນ. ບ້ານດອກໄມ້ຫວ້ານແທ່ງ ປູກສະເພາະແຕ່ດອກກຸຫຼາບ. ບ້ານດອກໄມ້ທ້າຍຟຽນ ປູກສະເພາະແຕ່ດອກເບັນຈະມາດ ”
ຖ້າມີໂອກາດມາຢ້ຽມຢາມບັນດາບໍລິສັດ, ເຂດເຮືອນສວນ, ຟາມດອກໄມ້ໃຫຍ່ຢູ່ ດາຫຼາດ, ແຂກທ່ອງທ່ຽວທັງຫຼາຍຍັງຈະໄດ້ຮັບຊົມຄວາມງາມຂອງດອກໄມ້ຊະນິດຕ່າງໆທີ່ຍັງບໍ່ທັນໄດ້ຮູ້ໄດ້ເຫັນ, ຍັງບໍ່ທັນມີຂາຍໃນທ້ອງຕະຫຼາດ. ນອກຈາກນັ້ນ, ແຂກທ່ອງທ່ຽວຈະໄດ້ທົດລອງປູກດອກໄມ້ຕົວຈິງ ໂດຍບັນດາຊາວສວນ, ຜູ້ກຳແໜ້ນກ່ຽວກັບຈຸດພິເສດຂອງແນວປູກ ອະທິບາຍ, ແນະນຳກ່ຽວກັບວິທີປູກ ແລະ ບົວລະບັດດອກໄມ້. ນີ້ກໍແມ່ນການເຮັດທົດລອງທີ່ນຳມາເຊິ່ງບັນດາບົດຮຽນທີ່ດີໃຫ້ແກ່ແຂກທ່ອງທ່ຽວເມື່ອມາຢ້ຽມຢາມນະຄອນດາຫຼາດໃນຊ່ວງເວລາຈັດງານ Festival ດອກໄມ້ແຕ່ລະຄັ້ງ. ເພາະສະນັ້ນ, ຜ່ານການຈັດງານບຸນ 6 ຄັ້ງ, Festival ດອກໄມ້ດາຫຼາດໄດ້ກາຍເປັນເຄື່ອງໝາຍການຄ້າທີ່ດູດດື່ມ ອັນໄດ້ດຶງດູດແຂກທ່ອງທ່ຽວເຂົ້າມາທ່ອງທ່ຽວຢູ່ແຫ່ງນີ້ນັບມື້ນັບຫຼາຍຂຶ້ນ.