(vovwold) - ດ້ຽນບຽນ, ແມ່ນແຂວງໜຶ່ງຢູ່ເຂດຊາຍແດນທີ່ຫ່າງຈາກຮ່າໂນ້ຍ ໄປທາງທິດຕາເວັນຕົກສ່ຽງເໜືອເກືອບ 500 ກ.ມ, ທັງແມ່ນແຫ່ງທີ່ມີປູຊະນີຍະສະຖານຫຼາຍແຫ່ງເຊິ່ງຕິດພັນກັບໄຊຊະນະປະຫວັດສາດດ້ຽນບຽນຝູ ວັນທີ 7/5/1954 ”ທີ່ມີຊື່ສຽງໂດ່ງດັງໄປທົ່ວໂລກ” . ບັນດາປູຊະນີຍະສະຖານທີ່ມີຊື່ສຽງຄື: ໂນນພູຮີມລາມ, ໂນນພູ A1, D1, ກອງບັນຊາການກຸ່ມທີ່ໝັ້ນດ້ຽນບຽນຝູ, ກອງບັນຊາການບັ້ນຮົບເມື່ອງຟັງ… ມາຮອດປະຈຸບັນຍັງຄົງໄດ້ຮັບການຮັກສາໄວ້ປຽບເໝືອນໜ້າປະຫວັດສາດແຫ່ງການຕ້ານເສິກຕ່າງດ້າວຢ່າງພິລະອົງອາດຂອງຊາດຫວຽດນາມ.
ດ້ຽນບຽນພາຍຫຼັງ 58 ປີ ແຫ່ງວັນປົດປ່ອຍ
(ພາບ: google.com.vn)
ກຸ່ມປູຊະນີຍະສະຖານປະຫວັດສາດດ້ຽນບຽນຝູ ແມ່ນເຕົ້າໂຮມຢູ່ດ້ຽນບຽນ, ປະຈຸບັນແມ່ນນະຄອນດ້ຽນບຽນຝູ. ບັນດາປູຊະນີຍະສະຖານທີ່ເດັ່ນກວ່າໝູ່ນັ້ນແມ່ນໂນນພູຮີມລາມ, ເຊິ່ງແມ່ນແຫ່ງດຳເນີນບັ້ນຮົບເປີດສາກໃຫ້ແກ່ບັ້ນຮົບຂະໜາດໃຫຍ່ດ້ຽນບຽນຝູ ເມື່ອວັນທີ 13/3/1954; ໂນນພູເອກະລາດ, ແມ່ນແຫ່ງດຳເນີນການສູ້ຮົບຢ່າງດຸເດືອດ ເອົາເປັນເອົາຕາຍ ເພື່ອຢືດເອົາທີ່ໝັ້ນເມື່ອວັນທີ 15/3/1954. ບັນດາໂນນພູ C, D, E ກໍ່ແມ່ນແຫ່ງທີ່ກອງທັບຫວຽດນາມ ແລະ ກອງທະຫານເລວໄກຝລັ່ງ ຍາດຊິງດິນແຕ່ລະນີ້ວໃນບັ້ນຮົບດ້ຽນບຽນຝູ. ໃນກຸ່ມປູຊະນີຍະສະຖານປະຫວັດສາດດ້ຽນບຽນຝູ ຍັງມີອະນຸສາວະລີໄຊຊະນະດ້ຽນບຽນຝູ ຢູ່ໂນນພູ D1, ນີ້ແມ່ນສັນຍາລັກແຫ່ງນ້ຳໃຈຕັດສິນຍາດເອົາໄຊຊະນະຂອງກອງທັບ ແລະ ປະຊາຊົນ ຫວຽດນາມ. ທ່ານ ຫງວຽນວັນນາມ (Nguyen Van Nam), ຫົວໜ້າຫ້ອງວິຊາການທ່ອງທ່ຽວ, ພະແນກວັດທະນະທຳ, ກິລາ ແລະ ການທ່ອງທ່ຽວດ້ຽນບຽນ, ໃຫ້ຮູ້ວ່າ:
”ເນື່ອງໃນໂອກາດສະເຫຼີມສະຫຼອງ 50 ປີ ແຫ່ງວັນໄຊຊະນະດ້ຽນບຽບຝູ, ທ່ານພົນເອກ ຫວໍງວຽນຢາບ (Vo Nguyen Giap) ໄດ້ມີບົດກ່ຽວກັບດ້ຽນບຽນ, ໃນນັ້ນມີຕອນຂຽນວ່າ: ດ້ຽນບຽນຝູ ແມ່ນໜຶ່ງໃນບັນດາປູຊະນີຍະສະຖານລະດັບຊາດທີ່ສຳຄັນກວ່າໝູ່ ແລະ ມີຄວາມໝາຍສາກົນອັນໃຫຍ່ຫຼວງ. ການບຸລະນະຮັກສາດ້ຽນບຽນຝູ ເພື່ອເຮັດໃຫ້ ປູຊະນີຍະສະຖານປະຫວັດສາດນີ້ຍືນຍົງຄົງຕົວຕະຫຼອດໄປພ້ອມກັບປະເທດຊາດ ແມ່ນໜ້າທີ່ສຳຄັນຍິ່ງ, ປະກອບສ່ວນສຶກສາມູນເຊື້ອວິລະຊົນ ແລະ ຫົວຄິດປະດິດສ້າງຂອງຊາວຫວຽດນາມລຸ້ນກ່ອນໃນກິດຈະການສ້າງສາ ແລະ ປົກປັກຮັກສາປະເທດຊາດ, ຍູ້ແຮງພາລະກິດປ່ຽນແປງໃໝ່.”
ຈຸດພົ້ນເດັ່ນໃນກຸ່ມປູຊະນີຍະສະຖານປະຫວັດສາດດ້ຽນບຽນຝູ ແມ່ນໂນນພູ A1, ເຊິ່ງແມ່ນແຫ່ງທີ່ເຄີຍດຳເນີນບັ້ນຮົບອັນດຸເດືອດ ແລະ ແກ່ຍາວທີ່ສຸດ, ມີລັກສະນະຕັດສິນໃຫ້ແກ່ບັ້ນຮົບດ້ຽນບຽນຝູ. ຢູ່ທີ່ນີ້ມີ ຂຸມຄອງບັນຊາການສູ້ຮົບຂອງນາຍພົນ De Castries, ແມ່ນແຫ່ງທີ່ກອງບັນຊາການກຸ່ມທີ່ໝັ້ນດ້ຽນບຽນຝູ ພ້ອມກັບນາຍພົນຄົນຝລັ່ງຕ້ອງຍອມຈຳນົນ, ຍອມປະລາໄຊຕໍ່ໜ້າກອງກຳລັງຫຼວງຂອງພົນເອກ ຫວໍງວຽນຢາບ (Vo Nguyen Giap). ຢູ່ເຂດນີ້, ສະໜາມບິນເມື່ອງແທງ, ແລະ ທີ່ໝັ້ນ 206 ແມ່ນຕັ້ງຢູ່ໃຈກາງກຸ່ມທີ່ໝັ້ນດ້ຽນບຽນຝູ ໃນເມື່ອກ່ອນ, ປະຈຸບັນໄດ້ຮັບການບຸລະນະຍົກລະດັບເປັນທ່າອາກາດສະຍານສາກົນດ້ຽນບຽນຝູ. ປ້າ ເລທິຕວຽດງາ (Le Thi Tuyet Nga), ຮອງຫົວໜ້າອຳນວຍການຫໍພິພິດທະພັນໄຊຊະນະດ້ຽນບຽນຝູ, ເຊິ່ງແມ່ນຫົວໜ່ວຍຄຸ້ມຄອງບັນດາປູຊະນີຍະສະຖານປະຫວັດສາດດ້ຽນບຽນຝູ, ເນັ້ນໜັກວ່າ:
”ໄຊຊະນະປະຫວັດສາດດ້ຽນບຽນຝູແມ່ນມີຊື່ສຽງ, ມີຄວາມໝາຍອັນໃຫຍ່ຫຼວງ. ກ່ຽວກັບດ້ານການສຶກສາ, ບັນດາປູຊະນີຍະສະຖານນີ້ຊ້ອນແຝງບັນດາຄູນຄ່າອັນໃຫຍ່ຫຼວງກ່ຽວກັບນ້ຳໃຈຕໍ່ສູ້ ກໍ່ຄືການເສຍສະຫຼະຂອງປະຊາຊົນທົ່ວປະເທດ ເພື່ອຍາດໄດ້ໄຊຊະນະດ້ຽນບຽນຝູ”
ກຸ່ມອະນຸສາວະລີໃນສວນສາທາລະນະໄຊຊະນະຢູ່ເມື່ອງຟັງ - ນະຄອນດ້ຽນບຽນຝູ
(ພາບ: google.com.vn)
ໃນກຸ່ມປູຊະນີຍະສະຖານປະຫວັດສາດດ້ຽນບຽນຝູ, ຍັງມີກຸ່ມປູຊະນີຍະສະຖານກອງບັນຊາການບັ້ນຮົບດ້ຽນບຽນຝູ ຢູ່ຕາແສງເມື່ອງຟັງ, ຫ່າງຈາກນະຄອນດ້ຽນບຽນ ເກືອບ 40 ກ.ມ. ເຂດນີ້ມີລະບົບຜາມເຮັດວຽກຂອງບັນດາກອງບັນຊາການບັ້ນຮົບດ້ຽນບຽນຝູດ ໃນນັ້ນມີຜາມເຮັດວຽກຂອງພົນເອກ ຫວໍງວຽນຢາບ (Vo Nguyen Giap). ກິດຈະກຳໃຫຍ່ໂຕກວ່າໝູ່ຢູ່ເມື່ອງຟັງ ນັ້ນແມ່ນຂຸມຄອງທີ່ເຊື່ອມຕໍ່ຜາມເຮັດວຽກຂອງ ພົນເອກ ຫວໍງວຽນຢາບ (Vo Nguyen Giap) ແລະ ຫົວໜ້າເສນາທິການ ຮ່ວາງວັນທ້າຍ (Hoang Van Thai) ດ້ວຍຄວາມຍາວ 69 ມ ຖືກຂຸດທະລຸຜ່ານໂນນພູ ເພື່ອຫຼົບຫຼີກລະເບີດ, ລູກປືນ. ນອກນັ້ນຍັງມີກຸ່ມອະນຸສາວະລີ, ສວນສາທາລະນະ ໄຊຊະນະເມື່ອງຟັງ, ປູຊະນີຍະສະຖານທາງແກ່ດຶງປືນໃຫຍ່ເຂົ້າສະໝໍລະພູມປືນໃຫຍ່ຂອງທະຫານໃນບັ້ນຮົບດ້ຽນບຽນຝູ… ທ່ານ ຫງວຽນວັນນາມ (Nguyen Van Nam) ຍັງໃຫ້ຮູ້ຕື່ມອີກວ່າ:
”ເພື່ອເສີມຂະຫຍາຍຄຸນຄ່າບັນດາປູຊະນີຍະສະຖານນີ້, ທາງແຂວງດ້ຽນບຽນຈະຕ້ອງເຮັດວຽກງານຫຼາຍຢ່າງ, ໃນນັ້ນມີການເພີ່ມທະວີການລົງທຶນບຸລະນະປະຕິສັງຂອນ, ເພື່ອເຮັດໃຫ້ປູຊະນີຍະຖານແຕ່ລະແຫ່ງກາຍເປັນຈຸດນັດພົບຂອງນັກທ່ອງທ່ຽວທັງພາຍໃນ ແລະ ຕ່າງປະເທດ, ແມ່ນຜະລິດຕະພັນການທ່ອງທ່ຽວທີ່ເປັນເອກະລັກສະເພາະຂອງດ້ຽນບຽນ, ແຕ່ຍັງຄົງຮັກສາຮູບເດີມໄວ້ໄດ້ ເພື່ອສຶກສາມູນເຊື້ອໃຫ້ລຸ້ນຕໍ່ໆໄປ”.
ນອກຈາກບັນດາສຸສານນັກຮົບທີ່ເສຍສະຫຼະຊີວິດເພື່ອຊາດຄືໂນນພູ A1, ເອກະລາດ, ຮີມລາມ, ຕົງຄາວ ແລ້ວ… ໃນແຕ່ລະປີຍັງຊອກເຫັນຂຸມຝັງສົບນັກຮົບນັບຮ້ອຍຂຸມຢູ່ດ້ຽນບຽນຝູ. ອັນໄດ້ເປັນການພິສູດໃຫ້ເຫັນການເສຍສະຫຼະຊີວິດຂອງທະຫານ ແລະ ປະຊາຊົນຫວຽດນາມໃນບັ້ນຮົບດ້ຽນບຽນຝູ ເພື່ອຍາດເອົາໄຊຊະນະທີ່ມີຊື່ສຽງດົງດັງໄປທົ່ວ 5 ທະວີບໃນວັນທີ 7-5-1954, ເຮັດໃຫ້ຊາວຫວຽດນາມ ແລະ ນັກທ່ອງທ່ຽວສາກົນແຕ່ລະຄົນລ້ວນແຕ່ຮູ້ສຶກຕື້ນຕັນໃຈເມື່ອມາຢ້ຽມຢາມດິນແດນອັນມະຫັດສະຈັນແຫ່ງນີ້.