(vovworld) - ໂດຍໄດ້ກາຍເປັນມູນເຊື້ອ, ໃນຊຸມວັນຕົ້ນລະດູບານໃໝ່, ຊາວຫວຽດນາມ ເຄີຍໄປນະມັດສະການວິຫານ ແລະ ວັດວາອາຮາມ ເພື່ອພາວະນາຂໍໃຫ້ຄວາມໂຊກດີໃຫ້ແກ່ຄອບຄົວໃນຕະຫຼອດປີໃໝ່. ຢູ່ຮ່າໂນ້ຍ ກໍ່ມີສະຖານທີ່ແຫ່ງໜຶ່ງ, ເຊິ່ງຫຼາຍຄົນມັກເລືອກເຟັ້ນເປັນບ່ອນໄປນະມັດສະການ ແລະ ຢ້ຽມຢາມໃນໂອກາດຕົ້ນປີ, ນັ້ນແມ່ນວິຫານເກງ (Ghenh).
ວິຫານເກງ (ພາບອິນເຕີແນດ)
ວິຫານເກງ ຕັ້ງເລິກຢູ່ຮ່ອມບ້ານນ້ອຍໆທີ່ຂຶ້ນກັບຕາແສງໂບ່ເດ່, ເມືອງລອງບຽນ, ຮ່າໂນ້ຍ, ຫ່າງຈາກຂົວເຈືອງເຢືອງ ໄປທາງທິດເໜືອ 100 ກວ່າແມັດ. ເອີ້ນວ່າວິຫານເກງ ເພາະວ່າກ່ອນນີ້ຕໍ່ໜ້າວິຫານມີແກ້ງນ້ຳໃຫຍ່, ດັ່ງນັ້ນປະຊາຊົນຈຶ່ງເອີ້ນວ່າວິຫານເກງ. ມາຮອດປະຈຸບັນ, ປະຊາຊົນຍັງເລົ່າຂານກັນກ່ຽວກັບເລື່ອງລາວວິຫານເກງ ທີ່ຕິດພັນກັບຊາຕາກຳຂອງລາຊະທິດາ ງອກເຮິນ ຜູ້ສວຍງາມ ແລະ ມີຄວາມສາມາດພົ້ນເດັ່ນ. ເຈົ້າຊີວິດບິດາໄດ້ຕົກລົງໃຫ້ ລາຊະທິດາ ງອກເຮິນ ເປັນເມຍຂອງ ກວາງຈູງຫງວຽນເຫ້ (Quang Trung Nguyen Hue), ເຊິ່ງແມ່ນວິລະຊົນທີ່ໄດ້ສ້າງເປັນໄຊຊະນະປະຫວັດສາດ ງອກໂຫ່ຍດົ໋ງດາ, ທັບມ້າງເສິກຕ່າງດ້າວ Thanh 2 ແສນກວ່າຄົນທີ່ມາຮຸກຮານ (ເມື່ອປີ 1789). ຄວາມຮັກລະຫວ່າງລາຊະທິດາ ງອກເຮີນ ກັບ ຫງວຽນເຫ້ ແກ່ຍາວພຽງ 6 ປີ ເທົ່ານັ້ນ, ເພາະມະຫາກະສັດທີ່ເກັ່ງກ້າສາສາດຜູ້ນີ້ໄດ້ສະຫວັນນະຄົດໂດຍບັງເອີນ, ເຮັດໃຫ້ລາຊະທິດາໂສກເສົ້າຈົນເສຍຊີວີດໄປນຳໃນເມື່ອອາຍຸຍັງໜຸ່ມ. ຕໍ່ມາລາຊະວົງ ຫງວຽນ ໄດ້ແກ້ແຄ້ນທະຫານໄຕເຊີນ ດ້ວຍການຖີ້ມອັດຖິຂອງນາງ ແລະ ລູກສອງຄົນລົງແມ່ນ້ຳແດງ. ເພື່ອອາໄລຫາລາຊະທິດາ ງອກເຮິນ, ຊາວບ້ານອ້າຍໂມ້ ໄດ້ສ້າງວິຫານບູຊາຢູ່ແຄມແມ່ນ້ຳແດງ. ເລື່ອງລາວກ່ຽວກັບຄວາມຮັກຂອງ ລາຊະທິດາງອກເຮິນ ແລະ ຊີວິດທີ່ໂສກເສົ້າຂອງນາງ ໄດ້ຝັງເລິກໃນດວງໃຈຂອງປະຊາຊົນ, ເຮັດໃຫ້ວິຫານເກງ ມີຄວາມມະຫັດສະຈັນ ແລະ ສັກສິດຍິ່ງຂຶ້ນ. ປະຈຸບັນໃນແຜ່ນສີລາຂອງວິຫານໄດ້ລະບຸວ່າ: ປີ 1858, ແມ່ຕູ້ ດັ້ງທິບານ ຊາວໃນເຂດໄດ້ລະດົມການບໍລິຈາກເພື່ອກໍ່ສ້າງວິຫານນີ້. ຜ່ານໄລຍະເວລາເກືອບ 200 ປີແລ້ວ. ແຕ່ລູກຫຼານຂອງແມ່ຕູ້ ດັ້ງທິບານ ຍັງຄົງເບິ່ງແຍງ, ຮັກສາວິຫານນີ້ຢູ່. ແມ່ເຖົ້າ ດັ້ງທິເຄ, ຜູ້ເບິ່ງແຍງວິຫານເກງ, ໃຫ້ຮູ້ວ່າ:
“ຂ້າພະເຈົ້າແມ່ນລູກຫຼານລຸ້ນທີ 5 ຂອງຕະກຸນດັ້ງ ທີ່ໄດ້ເຮັດວຽກງານເບິ່ງແຍງຮັກສາວິຫານນີ້. ໃນເມື່ອກ່ອນ, ຢູ່ແຫ່ງນີ້, ມີທ່າເຮືອໄປມາ ແລະ ມີຕົ້ນໄຮຢູ່ທ່ານີ້ອີກ, ຕໍ່ມາວິຫານຖືກນ້ຳສຸໄປ, ຈຶ່ງຍ້າຍມາແຫ່ງນີ້”
ປະຈຸບັນ, ສຳລັບຊາວຮ່າໂນ້ຍແລ້ວ, ວິຫານເກງ ແມ່ນວິຫານທີ່ມີຄວາມສັກສິດ, ຮອດຕອນບ່າວວັນທີ 6 ເດືອນຈຽງ ໄລ່ຕາມຈັນທະປະຕິທິນຫວຽດນາມ, ມີພຸດທະສາສະນີກະຊົນຫຼາຍຄົນ ໄດ້ມາແຫ່ງນີ້ເພື່ອເຂົ້າຮ່ວມພິທີພາວະນາຂໍໃຫ້ປະເທດຊາດມີຄວາມສະຫງົບສຸກ. ນີ້ແມ່ນພິທີຖືກຈັດຂຶ້ນໃນຕົ້ນປີ, ເພື່ອບໍ່ພຽງແຕ່ພາວະນາໃຫ້ຄອບຄົວມີສຸຂະພາບເຂັ້ມແຂງ, ມີຄວາມຜາສຸກເທົ່ານັ້ນ, ຫາກຍັງແມ່ນໂອກາດເພື່ອໄປຢ້ຽມຢາມ, ຊົມເຫັນທັດສະນີຍະພາບຂອງລະດູບານໃໝ່ເພື່ອໃຫ້ຈິດໃຈສະຫວາດສະເຫວີຍ. ປ້າ ຫງວຽນທິຮົ່ງ ຢູ່ຖະໜົນເຄິມທຽນ, ຮ່າໂນ້ຍ, ປີໃດກໍ່ໄປນະມັດສະການວິຫານເກງ, ໃຫ້ຮູ້ວ່າ:
“ຕາມປະເພນີຂອງຊາດຫວຽດນາມ, ນັ້ນແມ່ນຕົ້ນປີໄປນະມັດສະການວັດວາອາຮາມ. ຂ້າພະເຈົ້າມາແຫ່ງນີ້ເພື່ອໃຫ້ຈິດໃຈມີຄວາມສະຫງົບ, ແລະ ພາວະນາຂໍໃຫ້ການທຳມາຫາກິນໃນປີສະດວກສະບາຍ”.
ວິຫານເກງ (ພາບອິນເຕີແນດ)
ໄປນະມັດສະການວິຫານ ເກງ, ບໍ່ພຽງແຕ່ມີຜູ້ອາຍຸສູງເທົ່ານັ້ນ, ຫາກຍັງມີບ່າວສາວຫຼາຍຄົນອີກດ້ວຍ. ນອກຈາກພາວະນາຂໍໃຫ້ມີສຸຂະພາບເຂັ້ມແຂງ, ມີຄວາມຜາສຸກໃຫ້ຄອບຄົວເທົ່ານັ້ນ, ບ່າວສາວຫຼາຍຄູ່ ຍັງຂໍໃຫ້ມີຄວາມຮັກ, ຄວາມສຸກຍືນຍົງຕະຫຼອດໄປອີກດ້ວຍ. ເພື່ອນ ຢ້ຽມຮັ່ງ, ຢູ່ເມືອງ ດົ໋ງດາ, ແບ່ງປັນວ່າ:
“ຂ້າພະເຈົ້າຄິດວ່າ ນີ້ແມ່ນມູນເຊື້ອທີ່ດີງາມ, ເພາະວ່າເມື່ອພາວະນາ, ຕົນເອງກໍ່ຕ້ອງປັບປຸງການກະທຳ, ແບບແຜນດຳລົງຊີວິດຂອງຕົນໃຫ້ດີກວ່າ. ມາແຫ່ງນີ້, ເຖິງວ່າຈຸດປະສົງຂອງແຕ່ລະຄົນຈະແຕກຕ່າງກັນກໍ່ຕາມ, ແຕ່ເຂົາເຈົ້າລ້ວນແຕ່ພາວະນາດ້ວຍຄວາມຈິງໃຈ”.
ໃນຈຳນວນຜູ້ມີໜ້າໃນພິທີພາວະນາຂໍໃຫ້ຄວາມສະຫງົບສຸກໃນຕົ້ນປີຢູ່ວິຫານເກງ ຍັງມີນັກທຸລະກິດອີກ. ສຳລັບເຂົາເຈົ້າແລ້ວ, ໄປນະມັດສະການ, ວັດວາອາຮາມໃນຕົ້ນປີ ແມ່ນເພື່ອເຮັດໃຫ້ຈິດໃຈສະຫວາດສະເຫວີຍພາຍຫຼັງໜຶ່ງປີທີ່ເຮັດວຽກຢ່າງລຳບາກ. ນີ້ແມ່ນປີທີ 3 ທີ່ອ້າຍ ຫວູແອງກວນ, ເຈົ້າຂອງວິສາຫະກິດດຳເນີນທຸລະກິດເງິນ, ຄຳ ມີໜ້າຢູ່ວິຫານເພື່ອເຂົ້າຮ່ວມພິທີພາວະນາຂໍໃຫ້ມີຄວາມສະຫງົບສຸກ. ສຳລັບອ້າຍແລ້ວ, ເລື່ອງໄປນະມັດສະການໃນຕົ້ນປີແມ່ນຈຸດວັດທະນະທຳທີ່ເປັນມູນເຊື້ອ, ເພື່ອຂໍໃຫ້ວິສາຫະກິດ ແລະ ຍາດຕິພີ່ນ້ອງມີຄວາມໂຊກດີໃນຊຸມວັນຕົ້ນລະດູບານໃໝ່.
“ຊາວຫວຽດນາມທຸກຄອບຄົວເຄີຍໄປນະມັດສະການໃນໂອກາດທ້າຍປີ ແລະ ຕົ້ນປີ ເພື່ອພາວະນາຂໍໃຫ້ມີຄວາມໂຊກດີ, ຄວາມຈະເລີນ, ມີສຸຂະພາບເຂັ້ມແຂງ ແລະ ເບີກບານມ່ວນຊື່ນຕະຫຼອດປີ. ຂ້າພະເຈົ້າມາແຫ່ງນີ້ເພື່ອພາວະນາຂໍໃຫ້ໄດ້ຮັບທຸກສິງທຸກຢ່າງດັ່ງຄວາມມຸ້ງຫວັງ”.
ວິຫານເກງ (ພາບອິນເຕີແນດ)
ຈາກປະຕູວິຫານເກງ, ນັກທ່ອງທ່ຽວສາມາດເຫັນທັງເຂດແມ່ນ້ຳແດງ ດ້ວຍຂົວເຈືອງເຢືອງ ທີ່ເຊື່ອມຕໍ່ກັບໃຈກາງນະຄອນ. ສຳລັບຊາວຫວຽດນາມແລ້ວ, ໃນຊຸມວັນຕົ້ນລະດູບານໃໝ່, ສັດສາວາສິງຄືໄດ້ເຈືອຈານພ້ອມກັບຈິດໃຈສະຫວາດສະເຫວີຍຂອງມະນຸດ. ແຕ່ລະຄົນມາວິຫານສັກສິດແຫ່ງນີ້ລ້ວນແຕ່ມີຄວາມມຸ້ງຫວັງທີ່ຈິງໃຈ, ສະແດງຄວາມເຄົາລົບນັບຖືຂອງຕົນທີ່ມີຕໍ່ພະພຸດ, ບັນພະບຸລຸດ, ຄິດຮອດບຸນຄຸນຂອງລຸ້ນກ່ອນ. ຍ້ອນເຫດນັ້ນ, ໄປນະມັດສະການວິຫານ, ວັດວາອາຮາມຕົ້ນລະດູບານໃໝ່ບໍ່ພຽງແຕ່ມີຄວາມໝາຍເຊື່ອຖືເທົ່ານັ້ນ, ຫາກຍັງແມ່ນວັດທະນະທຳທີ່ດີງາມຂອງຊາດຫວຽດນາມ ອີກດ້ວຍ.