(vovworld) - ວັນທີ 10 ເດືອນຈຽງປະຈຳປີ ແມ່ນວັນໄຂງານບຸນອຽນຕື ທີ່ຂຶ້ນກັບນະຄອນອວງບີ໋, ແຂວງກວາງນິງ ຢ່າງເປັນທາງການ. ໃນບັນຍາກາດລະດູບານໃໝ່, ພຸດທະສາສະນິກະຊົນ ແລະ ແຂກທ່ອງທ່ຽວທີ່ມາຈາກທຸກສາລະທິດໄດ້ພາກັນໄປອຽນຕື. ມາແຫ່ງນີ້, ນັກທ່ອງທ່ຽວບໍ່ພຽງແຕ່ໄດ້ກັບເມືອແຫ່ງກຳເນີດພຸດທະສາສະໜາ ນິກາຍຈຸກເລິມເທົ່ານັ້ນ, ຫາກຍັງໄດ້ທ່ຽວຊົມທີວທັດທຳມະຊາດທີ່ໃຫຍ່ໂຕມະໂຫຖານ, ກໍ່ຄືບັນດາສະຖາປັດຕະຍະກຳທີ່ເປັນເອກະລັກສະເພາະຢູ່ຈອມພູແຫ່ງສັກສິດນີ້ອີກດ້ວຍ
ພຸດທະສາສະນິກະຊົນ ແລະ ແຂກທ່ອງທ່ຽວທີ່ມາຈາກທຸກສາລະທິດໄດ້ພາກັນໄປອຽນຕື
ງານບຸນອຽນຕື ແມ່ນງານບຸນທີ່ເປັນມູນເຊື້ອ ຖືກຈັດຂຶ້ນປະຈຳປີ. ທຸກຄົນໄປອຽນຕື ແມ່ນໄປຍັງສູນພຸດທະສາສະໜາໃນສະໄໝລາດຊະວົງ ເຈິ່ນ, ແຫ່ງທີ່ເຈົ້າຊີວິດ ເຈິ່ນເຍິນຕົງ ເຄີຍຖືສິນກິນບວດ ແລະ ສິ້ນຊີວິດ. ທ່າມກາງພູຜາປ່າໄມ້ທີ່ໃຫຍ່ໂຕມະໂຫຖານຢູ່ເຂດຕາເວັນອອກສ່ຽງເໜືອ, ອຽນຕື ພົ້ນເດັ່ນຂຶ້ນໃນຄວາມສູງ 1068 ແມັດ ເມື່ອທຽບໃສ່ໜ້ານ້ຳທະເລ ປຽບເໝືອນສິ່ງມະຫັດສະຈັນ ໂດຍທຳມະຊາດບັນດານໃຫ້. ຍ້ອນມີທີ່ຕັ້ງພິເສດ ແລະ ທັດສະນີຍະພາບທີ່ສວຍງາມນັ້ນ, ກ່ອນນີ້ນັບຮ້ອຍປີ, ບັນດານັກບວດໄດ້ເລືອກເຟັ້ນອຽນຕື ເປັນແຫ່ງສັກສິດເພື່ອໄຫວ້ບູຊາພະພຸດທະເຈົ້າ. ໜຶ່ງໃນບັນດານັກບວດຜູ້ມີຊື່ສຽງທີ່ສຸດຢູ່ ອຽນຕື ນັ້ນແມ່ນພະພຸດ ເຈົ້າຊີວິດ ເຈິ່ນເຍິນຕົງ, ຜູ້ທີ່ໄດ້ກໍ່ຕັ້ງນິກາຍຈຸກເລິມອຽນຕື
ວັດໃຫຍ່ນ້ອຍຢູ່ອຽນຕື
ໃນມື້ທີ່ມີແສງແດດສົດໄສ, ຢືນຢູ່ຈອມພູ, ນັກທ່ອງທ່ຽວສາມາດສັງເກດທັດສະນີຍະພາບທີ່ໃຫຍ່ໂຕມະໂຫຖານທັງໝົດຂອງສາຍພູດົງຈ່ຽວ, ປ່າຫວາຍ, ປ່າແປກທີ່ຂຽວອຸ່ມທູ່ມ. ມາຢ້ຽມຢາມອຽນຕື ໃນລະດູບານໃໝ່, ນັກທ່ອງທ່ຽວຈະຮູ້ສຶກມີຄວາມອົບອູ່ນ ແລະ ຄວາມສັກສິດຂອງງານບຸນ. ໃນບັນຍາກາດໜາວເຢັນຂອງລະດູບານໃໝ່. ປະຊາຊົນພາກັນໄປເປັນຂະບວນ, ເຂົາເຈົ້າພະຍາຍາມຂຶ້ນຂັ້ນໄດຫີນແຕ່ລະຂັ້ນໄປຍັງວັດດົ່ງ ເພື່ອສະແດງຄວາມນັບຖືຕໍ່ພະພຸດທະເຈົ້າ ແລະ ພາວະນາຂໍໃຫ້ໄດ້ຮັບທຸກສິ່ງທຸກຢ່າງທີ່ຈົບງາມ. ນາງ ຟ້າມທິຮົ່ງ, ນັກສຶກສາປີທີ 4 ຢູ່ມະຫາວິທະຍາໄລແຫ່ງໜຶ່ງທີ່ຮ່າໂນ້ຍ, ສະແດງຄວາມພາກພູມໃຈເມື່ອໄດ້ໄປອຽນຕື ກົງກັບໂອກາດໄຂງານບຸນ.
“ມື້ນີ້ນ້ອງໄປອຽນຕື, ຂຶ້ນວັດດົ່ງ ເພື່ອພາວະນາຂໍໃຫ້ຄອບຄົວມີຄວາມປອງດອງກັນ ແລະ ເບີກບານມ່ວນຊື່ນ, ຫວັງວ່າປີໜ້າຮຽນຈົບມະຫາວິທະຍາໄລ ນ້ອງຈະມີຊີວິດເປັນປົກກະຕິ. ຜູ້ເຖົ້າຜູ້ແກ່ຫຼາຍຄົນໄດ້ໄປຮອດວັດດົ່ງ, ດັ່ງນັ້ນນ້ອງກໍ່ພະຍາຍາມໄປວັດດົ່ງເຊັ່ນກັນ”.
ອຽນຕື
ບົນເສັ້ນທາງໄປນະມັດສະການນັ້ນ ມີທັດສະນີຍະພາບທີ່ສວຍງາມຫຼາຍແຫ່ງ, ອັນໄດ້ສ້າງຄວາມດຶງດູດໃຫ້ແກ່ພຸດທະສາສະນິກະຊົນ ແລະ ນັກທ່ອງທ່ຽວ. ລະບົບວັດວາອາຮາມຢູ່ທີ່ນີ້ໄດ້ຮັບການກໍ່ສ້າງນັບແຕ່ສະຕະວັດທີ 13 ຄື: ວັດເວິນຕຽນ, ແທງລອງ, ບາວຊ໋າຍ, ຮວາອຽນ, ເກິມທຶກ… ເຖິງວ່າຈະໃຫຍ່ຫຼືນ້ອຍ, ວັດທັງໝົດລ້ວນແຕ່ມີສະຖາປັດຕະຍະກຳສວຍງາມທີ່ສຸດ ແລະ ຮັກສາວັດຖຸພັນພິເສດຫຼາຍຢ່າງ ພ້ອມກັບເລື່ອງລາວອັນມະຫັດສະຈັນ. ທູເວິນ, ນັກທ່ອງທ່ຽວມາຈາກຮ່າໂນ້ຍ, ຮູ້ສຶກສະເທືອນໃຈທີ່ສຸດເມື່ອໄດ້ໄປນະມັດສະການອຽນຕື.
“ເມື່ອຂຶ້ນຮອດວັດດົ່ງ, ນ້ອງຮູ້ສຶກສະເທືອນໃຈຫຼາຍ ແລະ ຄິດວ່າຕໍ່ມາຈະໄປອີກຫຼາຍເທື່ອ. ເມື່ອຂຶ້ນຮອດວັດດົ່ງເຫັນວ່າຈິດໃຈສະຫວາດສະເຫວີຍ. ຢູ່ພາກເໜືອແລ້ວ, ເດືອນຈຽງແມ່ນເດືອນໄປນະມັດສະການວັດວາອາຮາມ. ໃນນັ້ນວັດທີ່ຂາດບໍ່ໄດ້ໃນການໄປນະມັດສະການ ນັ້ນແມ່ນວັດເຮືອງ, ວັດອຽນຕື ແລະ ວັດໄຕທຽນ”.
ນັກທ່ອງທ່ຽວຂຶ້ນວັດດົ່ງ
ງານບຸນໃຫຍ່ເຊິ່ງຊາວຫວຽດນາມ ຜູ້ໃດກໍ່ຢາກເຂົ້າຮ່ວມ ນັ້ນແມ່ນງານບຸນອຽນຕື. ອຽນຕື ບໍ່ພຽງແຕ່ຖືກຈັດອັນດັບແມ່ນ “ພູທີ່ມີຊື່ສຽງ” ເທົ່ານັ້ນ, ຫາກຍັງແມ່ນດິນແດນພະພຸດທະເຈົ້າແຫ່ງສັກສິດຂອງພຸດທະສາສະໜາຫວຽດນາມ ອີກດ້ວຍ. ເຖິງວ່າເຂົາເຈົ້າຈະດຳລົງຊີວິດຢູ່ແຫ່ງໃດ “ເຖິງວ່າຈະຖືສິນກິນບວດມາໄດ້ນັບຮ້ອຍປີ, ແຕ່ບໍ່ທັນໄປອຽນຕື ໝາຍຄວາມວ່າຖືສິນບໍ່ໄດ້ຮັບຜົນ”.ງານບຸນອຽນຕືດຳເນີນໄປແຕ່ວັນທີ 10 -15 ເດືອນ 3 ໄລ່ຕາມຈັນທະປະຕິທິນຫວຽດນາມ. ໄປອຽນຕື ບໍ່ພຽງແຕ່ໄດ້ເຂົ້າຮ່ວມງານບຸນໃຫຍ່ເພື່ອພາວະນາຂໍໃຫ້ມີຄວາມສຸກ, ຄວາມໂຊກດີ ແລະ ເຄື່ອນໄຫວທາງສາສະໜາທາມກາງພູຜາປ່າໄມ້ທຳມະຊາດທີ່ໃຫຍ່ໂຕມະໂຫຖານເທົ່ານັ້ນ, ຫາກຍັງແມ່ນໂອກາດໄດ້ສູນສາສະໜາໃຫຍ່ກວ່າໝູ່ໃນປະຫວັດສາສະໜາຂອງຫວຽດນາມອີກດ້ວຍ. ທ່ານ ເລຈ້ອງແທງ, ຮອງຜູ້ອຳນວຍການບໍລິສັດຕຸ່ງເລິມ ໃຫ້ຮູ້ວ່າ:
“ສຳລັບນັກທ່ອງທ່ຽວໄປອຽນຕື ໃນແຕ່ລະປີນັ້ນ, ມີ 80% ແມ່ນນັກທ່ອງທ່ຽວທີ່ເຄີຍມາກ່ອນແລ້ວ, ສ່ວນ 20% ແມ່ນນັກທ່ອງທ່ຽວທີ່ມາໃໝ່. ພວກຂ້າພະເຈົ້າເອົາໃຈໃສ່ທີ່ສຸດເຖິງຜູ້ທີ່ມາໃໝ່, ຕົວຢ່າງຄືແນະນຳໃຫ້ເຂົາເຈົ້າຜ່ານໂທລະສັບ ຫຼືຜ່ານບັນດາບໍລິສັດທ່ອງທ່ຽວ, ກ່ຽວກັບເວລາໄປຄືແນວໃດໃຫ້ສະດວກສະບາຍ ແລະ ບົນເສັ້ນທາງໄປ, ພວກຂ້າພະເຈົ້າກໍ່ມີປ້າຍແນະນຳທາງໄປຢ່າງລະອຽດເຮັດໃຫ້”ເຂົາເຈົ້າມີຄວາມອູ່ນອ່ຽນໃຈກວ່າ”
ປ້າຍແນະນຳທາງໄປຍັງສາລາສັກສິດອຽນຕືໃຫ້ນັກທ່ອງທ່ຽວ
ໄປນະມັດສະການຕົ້ນລະດູບານໃໝ່ ໄດ້ກາຍເປັນລົມຫາຍໃຈຂອງຊີວິດ, ແມ່ນຄວາມຊິນເຄີຍ, ແມ່ນວັດທະນະທຳທີ່ດີງາມ, ແມ່ນແຫ່ງສະແດງຄວາມໄຝ່ຝັນນັບພັນປີຂອງຊາວຫວຽດນາມ, ທີ່ພາວະນາຂໍໃຫ້ດິນຟ້າອາກາດເອື້ອອຳນວຍຄວາມສະດວກ, ຂໍໃຫ້ຊີວິດມີຄວາມສະຫງົບສຸກ ແລະ ເບີກບານມ່ວນຊື່ນ.