(vovworld) - ໜອງບາເບ ແມ່ນທັດສະນີຍະພາບທຳມະຊາດທີ່ສວຍງາມ, ຂຶ້ນກັບຕາແສງ ນາມເມົ້າ (Nam Mau), ເມືອງ ບາເບ, ແຂວງ ບັກກ້ານ, ຫ່າງຈາກຮ່າໂນ້ຍ ໄປທາງທິດຕາເວັນອອກສ່ຽງເໜືອປະມານ 220 ກມ, ແລະ ຫວ່າງແລ້ວນີ້, ໄດ້ຮັບການຮັບຮອງຈາກລັດຖະບານຫວຽດນາມ ວ່າ ແມ່ນປູຊະນີຍະສະຖານລະດັບຊາດພິເສດ. ກ່ອນໜ້ານັ້ນ, ປີ 1995, ກອງປະຊຸມບັນດາໜອງນ້ຳຈືດຂອງໂລກ, ເຊິ່ງຈັດຂຶ້ນຢູ່ອາເມລິກາ ໄດ້ຮັບຮອງວ່າ ໜອງບາເບ ແມ່ນໜຶ່ງໃນຈຳນວນໜອງນ້ຳຈືດພິເສດ 20 ແຫ່ງຂອງໂລກທີ່ຄວນໄດ້ຮັບການປົກປັກຮັກສາໄວ້. ທ້າຍປີ 2004, ປ່າສະຫງວນບາເບ ໄດ້ຮັບການຮັບຮອງວ່າແມ່ນປ່າມໍລະດົກຂອງອາຊຽນ. ປີ 2011, ໜອງບາເບ ໄດ້ຮັບການຮັບຮອງວ່າແມ່ນເຂດ Ramsar (ໝາຍເຖິງເຂດນ້ຳຖ້ວມທີ່ມີຄວາມສຳຄັນລະດັບໂລກ) ແຫ່ງທີ 1938. ໃນລາຍການປະເທດຊາດ ແລະ ຊາວຫວຽດນາມ ພາກນີ້, ເຊີນທ່ານຮັບຟັງບົດຂອງນັກຂ່າວ ໂຕຕ໋ວນ ທີ່ແນະນຳກ່ຽວກັບທັດສະນີຍະພາບໜອງບາເບ.
ໜອງບາເບ
(ພາບອິນເຄີແນດ)
ຊ່າວທ້ອງຖີ່ນເອີ້ນ ບາເບ ແມ່ນ Slampe ໝາຍຄວາມວ່າ ໜອງສາມແຫ່ງ. ໂດຍນອນໃນເຂດພູຜາປ່າໄມ້ທີ່ກວ້າງໃຫຍ່, ໜອງບາເບ ມີຄວາມງາມແບບທຳມະຊາດ ແລະ ງາມດັ່ງໃນຝັນ ດ້ວຍອາກາດເຢັນສະບາຍ. ໃນຍາມເຊົ້າ, ໜອງມີຄວາມງາມແບບມະຫັດສະຈັນ, ເມື່ອຮູບພາບພູຜາປ່າໄມ້ ແລະ ໝູ່ບ້ານລີ້ຊ້ອນໃນມ່ານນ້ຳໝອກທີ່ປົກຄຸມໄປທົ່ວໜອງນ້ຳ. ບາງເທື່ອກໍ່ໄດ້ເຫັນບັນດານາງສາວຊາວເຜົ່າໄຕ່ ໃນຊຸດອາພອນປະຈຳເຜົ່າສີຄາມພວມລ່ອງເຮືອໄມ້ເທິງໜອງນ້ຳທີ່ກວ້າງໃຫຍ່. ສິ່ງທີ່ສ້າງຄວາມປະທັບໃຈທີ່ສຸດໃຫ້ແກ່ນັກທ່ອງທ່ຽວເມື່ອມາແຫ່ງນີ້ ນັ້ນແມ່ນທັງລ່ອງເຮືອຈັກໄປທ່ຽວຊົມທັດສະນີຍະພາບຂອງໜອງ, ທັງຮັບຟັງຊາວທ້ອງຖີ່ນເລົ່າເລື່ອງນິທານກ່ຽວກັບໜອງ. ເຮືອຈະພາທ່ານໄປຢ້ຽມຢາມບັນດາເກາະ, ສະຖານທີ່ມະຫັດສະຈັນຕ່າງໆເຊັ່ນ: ອາວຕຽນ (ສະເທວະດາ) ເທິງຈອມພູຫີນປູນ, ທີ່ຫ່າງຈາກໜອງ ບາເບ 100 ແມດ, ອາວຕຽນມີນ້ຳເຕັມສະຕະຫຼອດປີ. ເລື່ອງລາວເລົ່າສູ່ຟັງວ່າ, ແຕ່ກີ້ແຕ່ກ່ອນ ບັນດາເທວະດາເຄີຍລົງອາບນ້ຳຢູ່ທີ່ນີ້ ດັ່ງນັ້ນຈຶ່ງມີຊື່ວ່າອາວຕຽນ (ສະເທວະດາ), ຫຼືນິທານກ່ຽວກັບຄວາມເປັນມາຂອງໜອງບາເບ. ນອກຈາກໄປທ່ອງທ່ຽວເຂດພູຜາທີ່ກວ້າງໃຫຍ່ແລ້ວ, ນັກທ່ອງທ່ຽວຍັງມີໂອກາດໄປຢາມຖ້ຳປວງ ທີ່ມີຄວາມຍາວ 300 ແມດ, ສູງກວ່າ 30 ແມດ ດ້ວຍຫີນນົມມະຫັດສະຈັນ ແລະ ສວຍງາມນັບໝື່ນຮູບ. ບ່ອນສຸດທ້າຍທີ່ມີຫຼາຍຄົນມັກມາຢ້ຽມຢາມທີ່ສຸດນັ້ນແມ່ນຕາດ ເດົາດັງ (Dau Dang) ທີ່ມີຄວາມຍາວກວ່າ 1000 ແມດ, ເຊິ່ງປະກອບດ້ວຍຫີນໃຫຍ່ນ້ອຍສາມຊັ້ນ, ອັນໄດ້ເຮັດໃຫ້ໜອງບາເບ ຍິ່ງມີຄວາມສວຍງາມແບບທຳມະຊາດກວ່າ.
ໜອງບາເບ
(ພາບອິນເຄີແນດ)
ບໍ່ພຽງແຕ່ດຶງດູດນັກທ່ອງທ່ຽວຍ້ອນຄວາມງາມຂອງໜອງນ້ຳເທົ່ານັ້ນ, ບາເບ ຍັງດຶງດູດນັກທ່ອງທ່ຽວຍ້ອນລະບົບປ່າສະຫງວນ ດ້ວຍພືດສາຊາດກວ່າ 417 ປະເພດ, ສັດທີ່ມີກະດູດສັນຫຼັງ 299 ປະເພດ. ໃນໜອງມີປານ້ຳຈືດປະມານ 50 ປະເພດ, ໃນນັ້ນມີບາງປະເພດແມ່ນປາທີ່ມີຄ່າຫາຍາກ. ມາຢ້ຽມຢາມບາເບ, ນັກທ່ອງທ່ຽວຍັງໄດ້ຊອກຮູ້ກ່ຽວກັບຊີວິດປະຈຳວັນຂອງຊາວເຜົ່າຕ່າງໆຄື: ໄຕ່, ມົງ, ຢ້າວອີກດ້ວຍ. ບ້ານປັກງ່ອຍ (Pac Ngoi) ຂອງຊາວເຜົ່າໄຕ່ ດ້ວຍເຮືອນຮ້ານກວ່າ 70 ຫຼັງ ຢູ່ເບື້ອງຫຼັງແມ່ນອີງໃສ່ເນີນພູແຄມໜອງ. ນີ້ແມ່ນແຫ່ງທີ່ນັກທ່ອງທ່ຽວຄັດເລືອກເປັນບ່ອນພັກຜ່ອນ. ປັກງ່ອຍ ແມ່ນໝູ່ບ້ານຍັງຄົງຮັກສາບັນດາຮີດຄອງປະເພນີຂອງຊາວເຜົ່າໄຕ່ໄວ້ໄດ້. ທ່ານ ໂງວັນຕ່ວານ, ເຈົ້າຂອງເຮືອນຮ້ານຫຼັງໜຶ່ງ, ໃຫ້ຮູ້ວ່າ:
“ປະຈຸບັນ, ບ້ານປັກງ່ອຍ ຂອງພວກຂ້າພະເຈົ້າມີພົນລະເມືອງປະມານ 350 – 360 ຄົນ, ໃນນັ້ນສ່ວນຫຼາຍແມ່ນຊາວເຜົ່າໄຕ່, ເຊິ່ງດຳລົງຊີວິດດ້ວຍອາຊີບປູກສາລີ, ປູກເຂົ້າຢູ່ຫາດໜອງນ້ຳເປັນຕົ້ນຕໍ່ ແລະ ອາຊີບສຳຮອງຢູ່ທີ່ນີ້ແມ່ນຫາປາໃນໜອງ. ຢູ່ທີ່ນີ້ທຸກຄົນນັບແຕ່ຜູ້ເຖົ້າຜູ້ແກ່ຕະຫຼອດຮອດເດັກນ້ອຍລ້ວນແຕ່ສາມາດຫາປາຢູ່ໜອງແຫ່ງນີ້ໄດ້”.
ໜອງບາເບ
(ພາບອິນເຄີແນດ)
ນັບແຕ່ດົນນານມາແລ້ວ, ບາເບ ແມ່ນສະຖານທີ່ທ່ອງທ່ຽວທີ່ມີຊື່ສຽງໃນທົ່ວປະເທດ. ມາຢາມໜອງບາເບ, ນັກທ່ອງທ່ຽວຮູ້ສຶກວ່າໄດ້ເຈືອຈານເຂົ້າກັບທີວທັດທຳມະຊາດທີ່ສວຍງາມ. ອ້າຍ ຫງວຽນຈ້ອງບິ່ນ, ນັກທ່ອງທ່ຽວມາຈາກ ຮ່າໂນ້ຍ, ໃຫ້ຮູ້ວ່າ:
“ນີ້ແມ່ນຄັ້ງທຳອິດທີ່ຂ້າພະເຈົ້າມາຢ້ຽມຢາມແຫ່ງນີ້, ແຕ່ບາເບ ໄດ້ສ້າງຄວາມປະທັບໃຫ້ແກ່ຂ້າພະເຈົ້າ, ດ້ວຍລາຍການທ່ອງທ່ຽວຊີວະພາບດີທີ່ສຸດ, ດ້ວຍໜອງນ້ຳທີ່ຂຽງສະອາດ, ປ່າດົງດິບ ແລະ ພິເສດແມ່ນປະຊາຊົນຢູ່ທີ່ນີ້ມີຄວາມຮັກແພງແຂກຄົນຫຼາຍ. ເຂົາເຈົ້າຕ້ອນຮັບນັກທ່ອງທ່ຽວຄືດັ່ງຍາດຕິພີ່ນ້ອງຂອງຕົນ. ນັ່ງໃນເຮືອນຮ້ານຂອງຊາວເຜົ່າໄຕ່, ພວກເຮົາສາມາດຊົມເຫັນຮູບພາບໜອງໃນຍາມສາຍັນ ແລະ ຕ້ອນຮັບແສງອະລຸນເທິງໜ້ານ້ຳບາເບ. ພວກເຮົາສາມາດລ່ອງເຮືອໄມ້ໄປຢ້ຽມຢາມໄດ້, ນີ້ແມ່ນຈຸດພິເສດສະເພາະຂອງບາເບ”.
ໜອງບາເບ
(ພາບອິນເຄີແນດ)
ດ້ວຍເລື່ອງບາເບໄດ້ຮັບການຮັບຮອງວ່າແມ່ນປູຊະນີຍະສະຖານລະດັບຊາດພິເສດນັ້ນ, ມັນໄດ້ເປັນຂີດໝາຍທີ່ສຳຄັນ, ປະກອບສ່ວນຍົກສູງຄູນຄ່າທັດສະນີຍະພາບແຫ່ງນີ້ຂຶ້ນ, ພ້ອມທັງສ້າງກາລະໂອກາດໃໝ່ໃຫ້ແກ່ການພັດທະນາຂະແໜງທ່ອງທ່ຽວແຂວງບັກກ້ານ ໃຫ້ກາຍເປັນສະຖານທີ່ທ່ອງທ່ຽວຕົ້ນຕໍ່ຂອງເຂດພູດອຍທາງພາກເໜືອຫວຽດນາມ, ແມ່ນເຄື່ອງໝາຍທ່ອງທ່ຽວແຫ່ງຊາດທີ່ດຶງດູດນັກທ່ອງທ່ຽວສາກົນມາຢ້ຽມຢາມຫວຽດນາມນັບມື້ນັບຫຼາຍ.