(vovworld) - ຖ້າຫາກໄປລຽບຕາມເສັ້ນທາງແຕ່ເໜືອຮອດໃຕ້ກໍ່ເຫັນວ່າ, ຟູ໋ອຽນແມ່ນໜຶ່ງໃນບັນດາແຂວງທີ່ມີ ທັດສະນີຍະພາບສວຍງາມຫຼາຍແຫ່ງຄື: ບຶງກູ່ໂມງ, ອ່າວຊວນດ່າຍ, ແກ້ງດ໋າເດ້ຍ, ບຶງໂອລວານ... ໃນນັ້ນ ອ່າວຊວນດ່າຍ ແມ່ນທິວທັດທີ່ສວຍງາມດ້ວຍການປະສົມກົມກຽວລະຫວ່າງພູຜາປ່າໄມ້, ດິນຟ້າອາກາດ ແລະ ທະເລ ສ້າງເປັນພູມພາບທຳມະຊາດທີ່ງາມດັ່ງໃນຝັນ.
ຈາກໃຈກາງນະຄອນຕູຍຮ່ວາ, ແຂວງຟູ໋ອຽນ ໄປທາງທິດເໜືອປະມານ 50 ກມ ທ່ານຈະເຫັນອ່າວທະເລທີ່ຂຽວສະອາດ ແລະ ງາມດັ່ງໃນຝັນ.
ຮູບພາບທີ່ສວຍງາມຂອງອ່າວຊວນດ່າຍ
(ພາບອິນເຕີແນດ)
ອ່າວຊວນດ່າຍ ກວ້າງປະມານ 13.000 ເຮັກຕາ ໂດຍພູໂກເງື້ອ (ຄໍມ້າ) ສ້າງຂຶ້ນ. ສັງເກດຈາກທາງໄກເຫັນວ່າພູສາຍນີ້ຄືຮູບສິງໂຕ. ຝັ່ງອ່າວຍາວປະມານ 50 ກມ, ແລ່ນຜ່ານເຂດດິນທີ່ແຕກຕ່າງກັນຄື: ແກ້ງແດ່ນ (ແກ້ງໂຄມ), ແຫຼມດ໋າອອງ (ແຫຼມຫີນນຳບໍ່); ແກ້ງດໍ (ແກ້ງແດງ); ບວກມ໋ຳ (ນ້ຳປາ); ບວກດົງ (ບວກຕາເວັນອອກ)... ສ່ວນຢູ່ອ້ອມຮອບອ່າວແມ່ນພູຫຼາຍສາຍທີ່ມຸ່ງອອກສູ່ທະເລ, ສ້າງເປັນອ່າວນ້ອຍໆທີ່ງາມແບບຮົກເຮື້ອວ່າງເປົ່າ. ຢູ່ເຂດອ່າວຊວນດ່າຍຍັງມີພູ, ເກາະ, ແຫຼມຫຼາຍແຫ່ງຄື: ຫາດກູ່ລາວອົງຊ໋າ, ແຫຼມດ໋າມ່າຍ, ແຫຼມຕາຍມ້າ (ຫູມ້າ), ຫາດໝູ່ອູ. ທັງໝົດເຫຼົ່ານັ້ນໄດ້ສ້າງເປັນລັກສະນະຫຼາຍຮູບຫຼາຍແບບຂອງເຂດອ່າວທະເລທີ່ເປັນເອກະລັກສະເພາະນີ້. ອ້າຍ ເຈິ່ນຮຸ່ງວີ, ຊາວຟູ່ອຽນ ຮູ້ສຶກເອກອ້າງທະນົງໃຈເມື່ອເຕື້ອງເຖິງອ່າວຊວນດ່າຍ:
“ມາຮອດຊວນດ່າຍ, ທ່ານຈະຮູ້ສຶກສະຫວາດສະເຫວີຍຕໍ່ທຳມະຊາດຢູ່ທີ່ນີ້. ຖ້າພວກເຮົາຂີ່ເຮືອໄປທ່ຽວອ້ອມເຂດອ່າວ, ຈະເຫັນໄດ້ຄວາມງາມແບບທຳມະຊາດຂອງບັນດາພູຫີນຢູ່ທີ່ນີ້. ອ່າວຊວນດ່າຍ ມີໜ້ານ້ຳກວ້າງກວ່າອ່າວຍາຈາງ ແລະ ມີສິນທະເລຫຼາຍປະເພດທີ່ບໍ່ເຄີຍມີມາຢູ່ບ່ອນອື່ນ“.
ຄວາມງາມແບບທຳມະຊາດຂອງອ່າວຊວນດ່າຍ
(ພາບອິນເຕີແນດ) ຢູ່ອ້ອມອ່າວຊວນດ່າຍ ມີສະຖານທີ່ຫຼາຍແຫ່ງເພື່ອໃຫ້ນັກທ່ອງທ່ຽວມາຢາມ. ຢູ່ແກ້ງແດ່ນ (ແກ້ງໂຄມ) ແມ່ນພາກສ່ວນໜຶ່ງຂອງພູໄກແມ (ພູຕົ້ນຂາມ). ແກ້ງແດ່ນແມ່ນບັນດາໂງ່ນຫີນຕັ້ງຊ້ອນກັນ, ຢູ່ເທິງຈອມແກ້ງມີສະຖານີໂຄມໄຟທະເລເພື່ອເປັນສັນຍານແນະນຳໃຫ້ເຮືອ, ກ່ຳປັ່ນເຂົ້າທຽບທ່າໃນຍາມກາງຄືນ. ຢູ່ຕີນພູບ່ອນຕິດກັບທະເລມີບັນດາຫາດຊາຍທະເລ, ຫາດຫີນ. ເຖິງວ່າຫາດຊາຍທະເລເຫຼົ່ານ້ັນບໍ່ກວ້າງກໍ່ຕາມ, ແຕ່ມັນພັດພໍດີເພື່ອໃຫ້ແຂກພັກຜ່ອນ, ທ່ຽວຊົມພູມພາບທຳມະຊາດທີ່ສວຍງາມ ແລະ ດູດດື່ມຢູ່ທີ່ນີ້. ເອື້ອຍແທງຮັ່ງ, ນັກທ່ອງທ່ຽວມາຈາກຮ່າໂນ້ຍ, ເວົ້າວ່າ:
“ເມື່ອມາຢ້ຽມຢາມອ່າວຊວນດ່າຍ, ຜູ້ໃດກໍ່ຮູ້ສຶກແປກປະຫຼາດໃຈຕໍ່ຄວາມງາມຂອງພູຜາ, ທະເລແຫ່ງນີ້. ຂ້າພະເຈົ້າມັກນ້ຳທະເລທີ່ຂຽວສະອາດ, ມັກຊົມສາຍພູຂຽວອຸ່ມທູ່ມ ແລະ ເຮືອ, ກຳປັ່ນພວມເຂົ້າທຽບທ່າຢູ່ທີ່ນີ້. ໂດຍຕ່າງກັບຄວາມອຶກກະທຶກຄິກໂຄມຂອງທະເລຍາຈາງ, ອ່າວຊວນດ່າຍ ພັດມີຄວາມສະຫງົບສຸດທີ່ສຸດ“.
ທະເລທີ່ຂຽວສະອາດຢູ່ອ່າວຊວນດ່າຍ
(ພາບອິນເຕີແນດ) ຈຸດທີ່ເປັນເອກະລັກສະເພາະຂອງອ່າວຊວນດ່າຍ, ນັ້ນແມ່ຫາດຊາຍຍາວຢຽດ ແລະ ກ້ຽງສະເໝີ, ປະຈຸບັນຍັງຄົງຮັກສາໄດ້ຄວາມງາມແບບທຳມະຊາດໄວ້. ແຕ່ສິ່ງທີ່ສ້າງຄວາມປະທັບໃຈກວ່າໝູ່ນັ້ນແມ່ນຫາດບິ່ນຊາ ຫຼືເອີ້ນວ່າຫາດຍາວ. ສັງເກດຈາກທະເລກໍ່ເຫັນວ່າ, ຫາດຍາວ ປຽບເໝືອນຜ້າໄໝຂາວເຫຼື້ອມແວວວາວທີ່ປູຢູ່ລຽບຕາປ່າສົນ, ປ່າພ້າວ. ຢູ່ທີ່ນີ້ມີພຽງສຽງຄື້ນທະເລທົບໃສ່ຝັ່ງ ແລະ ສຽງລົມພັດເທົ່ານັ້ນ, ອັນໄດ້ເຮັດໃຫ້ນັກທ່ອງທ່ຽວຮູ້ສຶກສະຫວາດສະເຫລີຍທ່າມກາງຄວາມງາມຂອງທະເລ ແລະ ທຳມະຊາດ.
ໃນຈຳນວນເກາະຢູ່ອ່າວຊວນດ່າຍ ນັ້ນ, ເຍິດຕື້ເຊີນ ແມ່ນເກາະທີ່ສວຍງາມກວ່າໝູ່. ເກາະມີເນື້ອທີ່ 5 ເຮັກຕາ. ຍ້ອນຕັ້ງຢູ່ຫ່າງຈາກຝັ່ງສອງສາມຮ້ອຍແມດ, ເກາະເຍິດຕື້ເຊີນ ໄດ້ກາຍເປັນແຫ່ງກັນຄື້ນ ແລະລົມໃຫ້ໝູ່ບ້ານຊາວປະມົງໝີຫາຍ ແລະ ໝີແທ່ງ. ທ່ານ ເຈິ່ນກວາງເຍິດ, ຮອງປະທານຄະນະກຳມະການປະຊາຊົນແຂວງຟູ່ອຽນ, ໃຫ້ຮູ້ວ່າ:
“ພວກຂ້າພະເຈົ້າໄດ້ໄປສຳຫຼວດຢ່າງລະອຽດ ແລະ ເຫັນວ່າຢູ່ທີ່ນີ້ມີທັດສະນີຍະພາບສວຍງາມຫຼາຍແຫ່ງ ແລະ ມີຄູນຄ່າດ້ານວັດທະນະທຳໃຫຍ່ຫຼວງທີ່ສຸດ. ພວກຂ້າພະເຈົ້າພວມເຮັດລະບຽບການເພື່ອສະເໜີອົງການວິທະຍາສາດ ແລະ ສຶກສາ ສປຊ (UNESCO) ຮັບຮອງອ່າວຊວນດ່າຍ ແມ່ນໜຶ່ງໃນບັນດາອ່າວງາມກວ່າໝູ່ຂອງໂລກ”.
ຫາດຍາວ ປຽບເໝືອນຜ້າໄໝຂາວເຫຼື້ອມແວວວາວທີ່ປູຢູ່ລຽບຕາປ່າສົນ, ປ່າພ້າວ
(ພາບອິນເຕີແນດ)
ທະເລ, ເກາະ ແລະ ອ່າວຊວນດ່າຍ ຍັງແມ່ນແຫ່ງທີ່ມີຄວາມຮັ່ງມີດ້ານຊັບພະຍາກອນ, ມີຄວາມອຸດົມສົມບູນດ້ານອາຫານ, ແຮ່ທາດທີ່ມີຄວາມຈຳເປັນໃຫ້ແກ່ຊີວິດ. ແຕ່ສິ່ງສຳຄັນກວ່າໝູ່ນັ້ນແມ່ນ ອ່າວຊວນດ່າຍ ຍາມໃດກໍ່ແມ່ນແຫ່ງທີ່ສ້າງຄວາມດຶງດູດໃຫ້ແກ່ນັກທ່ອງທ່ຽວທັງຢູ່ພາຍໃນ ແລະ ຕ່າງປະເທດ.