(vovworld) - ຫ່າງຈາກນະຄອນຫຼວງຮ່າໂນ້ຍ ໄປທາງທິດຕາເວັນຕົກສຽງເໜືອປະມານ 100 ກມ, ທ່ານຈະໄປ ຮອດທຸງນາຍ, ແຫ່ງທີ່ມີທີວທັດທຳມະ ຊາດ, ຜູຜາປ່າໄມ ແລະ ແມ່ນ້ຳລຳເຊທີ່ສວຍງາມດັ່ງໃນຝັນຂອງແຂວງ ຮ່ວາບິ່ງ. ຄວາມງາມຂອງທຸງນາຍຖືກປຽບທຽບເໝືອນລາຊາທິດາທີ່ພວມ ນອນຢູ່ໃນປ່າ.
(ພາບ: google.com.vn)
ທຸງນາຍ ຢູ່ຕາແສງໜຶ່ງໃນເຂດໜອງແມ່ນ້ຳດ່າ, ທີ່ຂຶ້ນກັບເມືອງກາວຟອງ, ຫ່າງຈາກໃຈກາງນະຄອນຮ່ວາບິ່ງ ປະມານ 25 ກມ. ຊາວຮ່ວາບິ່ງ ກ່ອນນີ້ເຄີຍເລົ່າສູ່ກັນຟັງກ່ຽວກັບຮ່ອມພູທີ່ອ້ອມຮອບດ້ວຍພູເຂົາສູງຊັນ, ເມກເຝື້ອປົກຄຸມໄປທົ່ວ. ນັບແຕ່ກີ້ແຕ່ກ່ອນ, ສັດປະເພດຕ່າງໆຄື: ເສືອ, ເສືອດາວ, ກວາງ,… ເຄີຍພາກັນມາດຳລົງຊີວິດຢູ່ທີ່ນີ້, ໃນນັ້ນຫຼາຍກວ່າໝູ່ແມ່ນຝູງຟານທີ່ມາອາໄສຢູ່ແຄມຫ້ວຍນ້ຳທີ່ສວຍງາມ, ຍ້ອນເຫດນັ້ນເຂົາເຈົ້າຈຶ່ງເອີ້ນວ່າທຸງນາຍ (ໝາຍຄວາມວ່າຮ່ອມພູບ່ອນໂຕຟານອາໄສຢູ່). ຕາມການເວລາ, ເມື່ອເຂື່ອນໄຟຟ້າ ແລະ ອ່າງໂຕ່ງນ້ຳຂອງເຂື່ອນໄຟ້ຟ້າໄດ້ຮັບການກໍ່ສ້າງສຳເລັດ, ນ້ຳໃນແມ່ນ້ຳດ່າ ໄດ້ຍຶ່ງຂຶ້ນສູງເຮັດໃຫ້ພູນ້ອຍໆຫຼາຍໜ່ວຍກາຍເປັນເກາະທີ່ສວຍງາມ. ດັ່ງນັ້ນຫຼາຍຄົນຈຶ່ງປຽບທຽບທຸງນາຍ ວ່າແມ່ນອ່າວຮ້າລອງໃນເຂດພູດອຍ, ທີ່ປະກອບດ້ວຍເກາະທຳມະຊາດຫຼາຍແຫ່ງ. ທ່ານ Nguyen Hang ຄົນຂັບເຮືອຢູ່ແມ່ນ້ຳດ່າ ມາຫຼາຍປີ, ໃຫ້ຮູ້ວ່າ:
”ເມື່ອມີເຂື່ອນໄຟຟ້າ ຮ່ວາບິ່ງ, ນ້ຳຂຶ້ນສູງສ້າງເປັນເກາະຫຼາຍແຫ່ງ, ອີງຕາມຮູບຊົງຂອງເກາະ, ເຂົາເຈົ້າໄດ້ຕັ້ງຊື່ໃຫ້ເກາະແຕ່ລະແຫ່ງ ຕາມຊື່ດອກໄມ້, ຕົ້ນໄມ້, ໂຕສັດຄື: ເກາະກວ້າ (ເກາະກາ), ເກາະເຢ (ເກາະແບ້… ຮອດຍາມຝົນຕົກ, ແມ່ນ້ຳມີແກ້ງຫຼາຍ, ເຮືອໄປມາປະສົບກັບຄວາມຫຍຸ້ງຍາກຫຼາຍ ແລະ ອັນຕະລາຍທີ່ສຸດ)”.
ທຸງນາຍໃນຍາມສາຍັນ (ພາບ: google.com.vn)
ຢູ່ທຸງນາຍ ບໍ່ພຽງແຕ່ມີທີວທັດທຳມະຊາດທີ່ສວຍງາມຂອງພູຜາປ່າໄມ້, ໜອງນ້ຳລຳເຊເທົ່ານັ້ນ, ຫາກຍັງແມ່ນແຫ່ງທີ່ມີປູຊະນີຍະສະຖານປະຫວັດສາດ, ວັດທະນະທຳຫຼາຍແຫ່ງອີກດ້ວຍ. ພິເສດ, ຢູ່ທຸງນາຍຍັງມີທັດສະນີຍະພາບທີ່ສວຍງາມໜຶ່ງອີກ, ເຊິ່ງນັກທ່ອງທ່ຽວມັກເຂົ້າມາຢ້ຽມຢາມ, ນັ້ນແມ່ນຖ້ຳທາກເບີ່. ນີ້ແມ່ນຖ້ຳຫີນໃຫຍ່ດ້ວຍຫີນນົມຜາອັນມະຫັດສະຈັນຫຼາຍຮູບທີ່ແຕກຕ່າງກັນ. ມີຫີນນົມຜາຈຳນວນໜຶ່ງ, ເມື່ອເຄາະໃສ່, ມັນຈະດັງກ້ອງຄືດັ່ງສຽງຄ້ອງຂອງຊາວເຜົ່າເມື່ອງ. ຊາວທ້ອງ ຖີ່ນເຄີຍເຫຼົ່າສູ່ກັນຟັງວ່າ, ນີ້ແມ່ນພູຄຳ, ແມ່ນສາງແຫ່ງພູມປັນຍາ ແລະ ຊັບສິນຂອງເຈົ້າຖີ່ນທາກເບີ່ ໃນເມື່ອກ່ອນ. ໃນຖ້ຳມີຫີນນົມຜາສອງຮູບ ເຊິ່ງປະຊາຊົນເອີ້ນວ່າຕົ້ນຄຳ ແລະ ຕົ້ນເງິນ, ຕາມເລື່ອງລາວທີ່ເລົ່າຂານກັນມາແລ້ວ, ຜູ້ໃດມາແຫ່ງນີ້, ຖ້າມືສຳພັດກັບຕົ້ນຄຳ, ຕົ້ນເງິນໄດ້ຈະມີໂຊກມີໄຊ. ໃນຖ້ຳຍັງມີວິຫານບູຊາເຈົ້າປ່າເຈົ້າເຂົາ, ຊາວທ້ອງຖີ່ນເຄີຍ ວາງແຫວນ ເທິງແທ່ນບູຊາເຈົ້າປ່າເຈົ້າເຂົາ, ເຂົາເຈົ້າຖືວ່າຜູ້ໃດໃສ່ແຫວນເຫຼົ່ານັ້ນຈະມີຄວາມໂຊກດີ ແລະ ທຳມາຫາກິນຈະໄດ້ຮັບຜົນດີ. ໃນເມື່ອກ່ອນ, ເມື່ອໄປຢ້ຽມຢາມຖ້ຳທາກເບີ່, ຕ້ອງປິນພູສູງ, ແຕ່ປະຈຸບັນເມື່ອຮອດຍາມຝົນຕົກ, ເຂົາເຈົ້າສາມາດຂີ່ເຮືອເຂົ້າໃນຖ້ຳໄດ້. ຊາວທ້ອງ ຖີ່ນຍັງເຫຼົ່າສູ່ຟັງວ່າ, ໃນເມື່ອກ່ອນແມ່ນ້ຳດ່າໄຫຼມາແຫ່ງນີ້ແຮງທີ່ສຸດ, ເຮັດໃຫ້ເຮືອລ່ອງໄປມາຜ່ານແຫ່ງນີ້ຖືກຫຼົ້ມຫຼາຍລຳ. ດັ່ງນັ້ນຊາວທ້ອງຖີ່ນຈຶ່ງສ້າງວິຫານບູຊາ ເພື່ອຂໍໃຫ້ເຈົ້າເຈົ້າປ່າເຈົ້າເຂົາກູ້ຊ່ວຍໃຫ້ເຂົາເຈົ້າ. ພາຍຫຼັງສ້າງວິຫານບູຊາແລ້ວ, ຈຳນວນເຮືອຖືກຫຼົ້ມກໍ່ຫຼຸດລົງ. ນັບແຕ່ນັ້ນ, ວິຫານທາກເບີ່ ຈຶ່ງມີຊື່ສຽງໄປທົ່ວເຂດຊົນເຜົ່າໄທ ແລະ ເມື່ອງ ໃນແຂວງ ຮ່ວາບິ່ງ, ເຊີນລາ, ລາຍເຈົາ. ທ່ານ Nguyen Hang ເລົ່າສູ່ຟັງວ່າ
”ໃນເມື່ອກ່ອນຢູ່ທີ່ນີ້ບໍ່ທັນມີເຂື່ອນໄຟຟ້ານ້ຳຕົກຮ່ວາບິ່ງ, ແມ່ນ້ຳລຳນີ້ມີແກ້ງຫຼາຍ, ເຮືອແພໄປມາແຫ່ງນີ້ປະສົບກັບຄວາມຫຍຸ້ງຍາກ ແລະ ອັນຕະລາຍທີ່ສຸດ. ເຂົາເຈົ້າເຄີຍໄປວິຫານທາກເບີ່ ເພື່ອພາວະນາຂໍໃຫ້ໄດ້ຮັບແຕ່ສິ່ງທີ່ຈົບງາມ”.
ຖ້ຳທາກເບີ່ (ພາບ: google.com.vn)
ທຸງນາຍສວຍງາມທີ່ສຸດແມ່ນໃນຍາມສາຍັນ, ທັງເຂດໜອງເຕັມໄປດ້ວຍສີອິດທີ່ມະຫັດສະຈັນ, ແສງຕາເວັນຍາມສາຍັນສາດສ່ອງແສງລົງໜ້ານ້ຳປຽບເໝືອນແວ່ນແຍງທີ່ຮາບພຽງ, ໃນໜອງມີເຮືອ ສອງ, ສາມລຳພວມລ່ອງລອຍ ຕາມກະແສນ້ຳຍິ່ງເຮັດໃຫ້ທີວທັດຢູ່ທີ່ນີ້ມີຄວາມດູດດື່ມກວ່າອີກ. ທຸງນາຍ ຍັງມີແຫ່ງໜຶ່ງເພື່ອໃຫ້ນັກທ່ອງທ່ຽວໄປພັກຜ່ອນ, ຊົມຄວາມງາມໃນຍາມກາງຄືນອີກ, ນັ້ນແມ່ນເຮືອນພັກໃບພັດໃຊ້ພະລັງແຮງລົມ. ຄວາມຈິງແລ້ວ, ໃບພັດໃຊ້ພະລັງແຮງລົມແມ່ນເຄື່ອງປະດັບປະດາໃຫ້ແກ່ເຮືອນພັກຂອງສອງຜົວເມຍຄົນຊົນເຜົ່າເມື່ອງ ເພື່ອຕ້ອນຮັບນັກທ່ອງທ່ຽວມາພັກຜ່ອນ. . ເອື້ອຍ Hoa ເຈົ້າຂອງເຮືອນຫຼັງນີ້, ໃຫ້ຮູ້ວ່າ:
”ນີ້ແມ່ນແນວຄວາມຄິດຂອງຜົວຂ້າພະເຈົ້າ. ຜົວເມຍຂ້າພະເຈົ້າແມ່ນຄົນຊົນເຜົ່າເມື່ອງ, ພວກຂ້າພະເຈົ້າມີເພື່ອນຫຼາຍຄົນຢູ່ລັດເຊຍ, ເມື່ອມາແຫ່ງນີ້, ເຂົາເຈົ້າໄດ້ແນະນຳໃຫ້ພວກຂ້າພະເຈົ້າປຸກສ້າງເຂດເຮືອນພັກເພື່ອຮັບໃຊ້ໝູ່ເພື່ອນໃນໂອກາດວັນພັກການ, ວັນບຸນ, ວັນທ້າຍອາທິດ, ດັ່ງນັ້ນພວກຂ້າພະເຈົ້າຈຶ່ງມີແນວຄວາມຄິດສ້າງໃບພັດໃຊ້ພະລັງແຮງລົມນີ້”
ເຮືອນພັກຄົກສີໃຊ້ພະລັງແຮງລົມ (ພາບ: google.com.vn)
ໃນຍາມຄ້ອຍຄ່ຳລົງແລງ, ທ່າມກາງສຽງດົນຕີທີ່ອອນຊອນແຄມແມ່ນ້ຳ, ທຸກຄົນນັ່ງອ້ອມກອງໄຟໃນເຮືອນຮ້ານ, ແລະ ພ້ອມກັນກິນອາຫານພິເສດຫຼາຍເຍື່ອງຂອງຊົນເຜົ່າເມື່ອງ. ຈາກເຂດເຮືອນພັກໃບພັດໃຊ້ພະລັງແຮງລົມຫຼຽວລົງມາ, ທ່ານຈະເຫັນຄວາມງາມທັງໝົດຂອງທຸງນາຍໄດ້. ທັງໝົດເຫຼົ່ານັ້ນໄດ້ສ້າງຄວາມປະທັບໃຈໃຫ້ແກ່ນັກທ່ອງເມື່ອມາຢ້ຽມຢາມແຫ່ງນີ້.