(vovworld)- ດັກລັກແມ່ນແຂວງຫນຶ່ງຂຶ້ນກັບເຂດດິນ ໄຕງວຽນ, ບໍ່ພຽງແຕ່ມີຊື່ສຽງຍ້ອນທິວທັດທຳມະຊາດສວຍງາມດ້ວຍເຂດປ່າທີ່ໃຫຍ່ໂຕມະໂຫຖານ, ນ້ຳຕົກຕາດຫລາຍແຫ່ງເທົ່ານັ້ນ ດັກລັກ ຍັງມີຊື່ສຽງກ່ຽວກັບອາຊີບລ່າເນື້ອ ແລະ ຝຶກສອນຊ້າງປ່າ. ມາຢ້ຽມຢາມແຫ່ງນີ້ ນັກທ່ອງທ່ຽວ ບໍ່ພຽງແຕ່ຂີ່ຊ້າງຊົມທິດທັດທຳມະຊາດສວຍງາມຂອງເຂດພູຜາປ່າໄມ້ທີ່ກວ້າງໃຫຍ່ເທົ່ານັ້ນຫາກຍັງໄດ້ເຈືອຈານກັບຊີວິດປະຈຳວັນຢູ່ບ້ານຕ່າງໆຂອງຊາວຊົນເຜົ່າຄື: ເອເດ, ເມີນົງ, ຢາຣາຍ, ລາວ, ໄທ …ອີກດ້ວຍ. ນີ້ແມ່ນສະຖານທີ່ທ່ອງທ່ຽວດຶງດູດນັກທ່ອງທ່ຽວມາຈາກທຸກສາລະທິດເປັນຈຳນວນຫລວງຫລາຍ. ບົດຂຽນຂອງນັກຂ່າວໂຕຕວນທີ່ມີຫົວຂໍ້ວ່າ: ທ່ອງທ່ຽວຢ້ຽມຢາມບ້ານຕ່າງໆຂອງຊາວຊົນເຜົ່າຢູ່ດັກລັກ.
ນັກທ່ອງທ່ຽວຢ້ຽມຢາມບ້ານໂດນ
ພາບ:internet
|
ເພື່ອອອກຈາກຄວາມເນື່ອງນັນ ແລະ ອຶກກະທຶກຄຶກໂຄມຢູ່ເຂດຕົວເມືອງ ມາຢ້ຽມຢາມບ້ານຕ່າງໆຂອງປະຊາຊົນບັນດາເຜົ່າຢູ່ແຂວງ ດັກລັກ, ນັກທ່ອງທ່ຽວໄດ້ສູບອາກາດປອດໂປ່ງຂອງເຂດດິນໄຕງວຽນ. ຢູ່ ດັກລັກ ມີບັນດາສະຖານທີ່ທ່ອງທ່ຽວລືຊື່ ທີ່ຂາດບໍ່ໄດ້ໃນລາຍການທ່ອງທ່ຽວໄຕງວຽນ ນັ້ນແມ່ນ ບ້ານໂດນ(ບວນໂດນ) ຂຶ້ນກັບເມືອງ ກະຣົງ ອານາ(Krong Ana) ແລະ ບ້ານ ຢູນ ຂຶ້ນກັບເມືອງ ລັກ(Lak). ນີ້ແມ່ນບັນດາສະຖານທີ່ລືຊື່ດ້ວຍອາຊີບເຝືກສອນຊ້າງປ່າ ແລະ ກໍແມ່ນແຫ່ງເພິ່ງພາອາໄສປະຊາຄົມບັນດາເຜົ່າຄື: ເອເດ, ເມີນົງ, ຢາຣາຍ… ເຕັມໄປດ້ວຍສີສັນວັດທະນະທຳຊົນເຜົ່າ. ເມື່ອຊົມບັນດາເຮືອນຮ້ານໄດ້ຮັບການກໍ່ສ້າງຕາມເຮືອນຮ້ານບູຮານຂອງຊາວຊົນເຜົ່າໄຕງວຽນ ກໍຄືໄດ້ຮັບຊົມຮູບພາບບັນດານາງສາວຊາວຊົນເຜົ່ານັ່ງຕຳຫູກຢູ່ກີ່… ໄດ້ສ້າງຄວາມປະທັບໃຈໃຫ້ແກ່ນັກທ່ອງທ່ຽວ. ເຮືອນຫລັງຕ່າງໆ ໃນບ້ານລ້ວນແຕ່ເປີດປະຕູຄືດັ່ງພ້ອມແລ້ວຕ້ອນຮັບນັກທ່ອງທ່ຽວມາຢ້ຽມຢາມ. ອ້າຍ ອາມາແທງ, ຊາວຊົນເຜົ່າຢູ່ບ້ານຢູນ ເມືອງ ລັກ ເລົ່າສູ່ຟັງຮູ້ວ່າ:
“ກ່ອນນີ້ ບໍ່ມີແຂກມາຢ້ຽມຢາມ, ມີແຕ່ຊາວຊົນເຜົ່າເທົ່ານັ້ນ ແລະ ກ່ອນນີ້ຕົ້ນໄມ້ໃບຫຍ້າກໍ່ມີຫລາຍ, ເສັ້ນທາງເກົ່າ ແລະ ຄັບແຄບ, ມາບັດນີ້ ມີເສັ້ນທາງໄປເຖິງບ້ານແລ້ວ. ແຕ່ກີ້ພຽງແຕ່ຍ່າງໄປ, ຂີ່ຊ້າງ ບໍ່ມີລົດຄືດຽວນີ້ດອກ”.
ຢູ່ພາຍໃນບ້ານ ຖ້າຫາກເຮືອນຣົງຢູ່ໃຈກາງບ້ານ ແມ່ນສັນຍາລັກເຕົ້າໂຮມກຳລັງແຮງຂອງປະຊາຄົມ, ແມ່ນບ່ອນດຳເນີນບັນດາງານບຸນພື້ນເມືອງ, ສ່ວນບັນດາເຮືອນຮ້ານແມ່ນສະແດງໃຫ້ເຫັນບັນດາຮີດຄອງປະເພນີ, ການເຊື່ອຖື ແລະ ສິລະປະສະຖາປັດຕະຍະກຳພື້ນເມືອງທີ່ມີຊີວິດຊີວາ. ຢູ່ບ້ານແຕ່ລະແຫ່ງຂອງຊາວເຜົ່າ ເອເດ ຫລື ຊາວເຜົ່າ ເມີນົງ, ເຮືອນຣົງ ໄດ້ຮັບຖືວ່າ ແມ່ນຫໍພິພິດທະພັນນ້ອຍກ່ຽວກັບຮີດຄອງປະເພນີວັດທະນະທຳຂອງປະຊາຄົມ. ນີ້ແມ່ນບ່ອນວາງສະແດງບັນດາວັດຖຸພັນທີ່ສະແດງໃຫ້ເຫັນຈຸດວັດທະນະທຳພື້ນເມືອງທີ່ຍອດຢ້ຽມຂອງປະຊາຄົມຊາວຊົນເຜົ່າຄື: ຕັ່ງ Kpal, ຊຸດທະນູ, ຊຸດກອງ, ຄ້ອງທີ່ມີຄ່າ, ໄຫເຫລົ້າຫລືວັດຖຸອຸປະກອນອື່ນທີ່ໄດ້ນຳໃຊ້ໃນງານບຸນພື້ນເມືອງຕ່າງໆຄື: ງານບຸນແທງຄວາຍ, ໄຫວ້ບູຊາຊ້າງ, ບຸນເຂົ້າໃຫມ່, ການເກັບກ່ຽວໄດ້ຮັບຜົນດີ. ເຮືອນຣົງກໍແມ່ນບ່ອນດຳເນີນບັນດາພິທີການສຳຄັນຂອງທັງບ້ານ. ສ່ວນບັນດາເຮືອນຍາວ ແມ່ນກິດຈະກຳສະແດງໃຫ້ເຫັນບັນດາຮີດຄອງປະເພນີວັດທະນະທຳ. ສະຖາປັດຕະຍະກຳເຮືອນຣົງ, ເຮືອນຍາວ ແມ່ນສະຖານທີ່ທ່ອງທ່ຽວສ້າງຄວາມປະທັບໃຈສຳລັບບັນດານັກທອ່ງທ່ຽວຢາກຊອກຮູ້, ຄົ້ນຫາກ່ຽວກັບຈຸດວັດທະນະທຳພື້ນເມືອງຂອງເຂດໄຕງວຽນ. ເອື້ອຍ ເຮີເນີມ(H’nom) ຜູ້ນຳທ່ຽວຢູ່ ບ້ານໂດນ ໃຫ້ຮູ້ວ່າ:
“ຢາກຊອກຮູ້ວັດທະນະທຳເຂດໄຕງວຽນ ແມ່ນເລີ່ມຕົ້ນຈາກເຮືອນຍາວ. ເມື່ອຜູ້ສາວ ເມີນົງ ຮອດອາຍຸແຕ່ງງານ, ຄອບຄົວຂອງຜູ້ສາວໄດ້ກໍ່ສ້າງເຮືອນຍາວຕື່ມອີກຫລາຍຫ້ອງເພື່ອໃຫ້ລູກສາວຂອງຕົນພ້ອມກັບລູກເຂີຍມາຢູ່ນຳ. ສະນັ້ນ ເຮືອນຍາວບາງຫລັງ ບາງເທື່ອມີລູກສາວຮອດ 10 ຄົນຫລື 10 ຄູ່ຜົວເມຍມາຢູ່ນຳ.”
ເຮືອນຍາວຂອງຊາວເຜົ່າເອເດ
ພາບ:vov
|
ຢູ່ບ້ານໂດນ ແລະ ບ້ານຢູນ ມີຮູບການທ່ອງທ່ຽວທີ່ຂາດບໍ່ໄດ້ສຳລັບນັກທ່ອງທ່ຽວເກືອບທຸກຄົນເມື່ອມາຢ້ຽມຢາມເຂດໄຕງວຽນ ນັ້ນແມ່ນ ຂີ່ຊ້າງຊົມທັດສະນີຍະພາບບ້ານຕ່າງໆ. ແຂກທ່ອງທ່ຽວຈະໄດ້ຂີ່ຊ້າງຂ້າມແມ່ນຳ Serepok ຫລື ເຂົ້າໄປທ່ຽວຊົມປ່າສະຫງວນແຫ່ງຊາດ Yokdon ບ່ອນທີ່ມີຊ້າງປ່າຫລາຍທີ່ສຸດຢູ່ຫວຽດນາມ. ບົນເສັ້ນທາງທ່ອງທ່ຽວ, ແຂກທ່ອງທ່ຽວໄດ້ແວ່ຢາມເຮືອນບູຮານທີ່ມີອາຍຸ 120 ປີ ຂອງຜູ້ລ່າຊ້າງ Amakong ເພື່ອຊົມບັນດາຮູບພາບ, ຮັບຟັງການແນະນຳກ່ຽວກັບອາຊີບລ່າຊ້າງ ແລະເຝິກສອນຊ້າງປ່າ. ເມື່ອມາຢ້ຽມຢາມບ້ານຢູນ ຢູ່ແຄມຫນອງ ລັກ, ນັກທ່ອງທ່ຽວໄດ້ຂີ່ຊ້າງຊົມທິວທັດທຳມະຊາດພູຜາປ່າໄມ້, ເຮືອນຊານບ້ານຊ່ອງ, ແມ່ນ້ຳລຳເຊທີ່ສວຍງາມຢູ່ເຂດໄຕງວຽນ. ສິ່ງທີ່ສ້າງຄວາມປະທັບໃຈຫນຶ່ງອີກນັ້ນແມ່ນນັກທ່ອງທ່ຽວຍັງໄດ້ຂີ່ເຮືອລ່ອງຕາມຫນອງລັກ. ຫລັງຈາກນັ້ນ ນັກທ່ອງທ່ຽວໄດ້ກິນເຂົ້າຫລາມ ແລະ ບັນດາອາຫານພິເສດຂອງຊາວຊົນເຜົ່າຢູ່ທີ່ນີ້. ອ້າຍ ຫງວຽນຄັກຈິງ, ນັກທ່ອງທ່ຽວມາຈາກນະຄອນ ໂຮ່ຈິມີນ ແບ່ງປັນວ່າ:
“ເມື່ອມາຢ້ຽມຢາມແຫ່ງນີ້ ຂ້າພະເຈົ້າໄດ້ເຊື່ອມຕົວເຂົ້າກັບທິວທັດທຳມະຊາດທີ່ສວຍງາມ, ພິເສດ ແຫ່ງນີ້ທັງມີປ່າ, ມີແມ່ນ້ຳ ເຮັດໃຫ້ພວກເຮົາຮູ້ສຶກສະຫວາດສະເຫວີຍກວ່າ.”
ໃນລາຍການທ່ອງທ່ຽວຢ້ຽມຢາມບ້ານຕ່າງໆ, ເມື່ອຮູ້ສຶກວ່າອິດເມື່ອຍແລ້ວ, ນັກທ່ອງທ່ຽວສາມາດພັກຜ່ອນຢູ່ເຮືອນຮ້ານ, ໄດ້ດື່ມເຫລົ້າໄຫພ້ອມກັບຊາວບ້ານ, ໄດ້ຮັບຟັງເລື່ອງເລົ່າຂານກັນມາ, ເທບນິຍາຍຂອງເຂດດິນແຫ່ງນີ້ໃນເມື່ອກອ່ນ.
ບ້ານຕ່າງໆຂອງບັນດາຊົນເຜົ່າຢູ່ແຂວງດັກລັກ ຍາມໃດກໍແມ່ນສະຖານທີ່ທ່ອງທ່ຽວເຕັມໄປດ້ວຍຄວາມປະທັບໃຈສຳລັບແຂກທ່ອງທ່ຽວຜູ້ທີ່ຢາກມາຊອກຮູ້, ຄົ້ນຫາກ່ຽວກັບຈຸດວັດທະນະທຳຂອງບ້ານບູຮານຢູ່ ໄຕງວຽນ.