(vovworld) - ເຖິງວ່າໄດ້ມີອາຍຸເກືອບ 70 ປີ ແລ້ວກໍ່ຕາມ, ແຕ່ທ່ານ Huynh Ly ທະຫານເສຍອົງຄະປະເພດ ¾ ຢູ່ບ້ານ ຟູ໋ເຄືອງຊີ, ຕາແສງ ຟູ໋ກ໋ຽດ, ເມືອງເຈີ້ກ້າວ, ແຂວງກຽນຢາງ ຍາມໃດກໍ່ຕິດຄາກັບວຽກງານຄອບຄົວ ແລະ ສັງຄົມ. ໃນຫຼາຍປີຜ່ານມາ, ເມື່ອດິນຟ້າອາກາດປ່ຽນແປງ, ບາດແຜເກົ່າກໍ່ເຈັບປວດຄືນໃໝ່, ແຕ່ທ່ານ Ly ຍັງຄົງສຸດຈິດສຸດໃຈກັບວຽກງານສັງຄົມຢູ່. ຊາວທ້ອງຖີ່ນໄດ້ເວົ້າເຖິງທ່ານດ້ວຍຄວາມນັບຖື. ບໍ່ພຽງແຕ່ຜູ້ທີ່ມີອາຍຸສູງນັບຖືທ່ານເທົ່ານັ້ນ, ຫາກລຸ້ນໜຸ່ມໃນບ້ານຍາມໃດກໍ່ຖືທ່ານແມ່ນແບບຢ່າງເພື່ອຮ່ຳຮຽນຕາມ.
ໃນ 20 ກວ່າປີທີ່ຜ່ານມາ, ນັບແຕ່ໄດ້ພັກກິນເບ້ຍບຳນານມາຮອດປະຈຸບັນ, ທ່ານ Ly ໄດ້ເປັນເລຂາໜ່ວຍພັກຢູ່ 3 ບ້ານ ແລະ ເຂົ້າຮ່ວມການເຄື່ອນໄຫວຫຼາຍຢ່າງຢູ່ທ້ອງຖີ່ນ. ເຖິງວ່າຈະຢູ່ໃນຖານະຕຳແໜ່ງໃດ, ທ່ານກໍ່ເສີມຂະຫຍາຍທາດແທ້ ”ອ້າຍທະຫານລຸງໂຮ່” ປະຕິບັດໜ້າທີ່ທີ່ໄດ້ຮັບມອບໝາຍສຳເລັດຜົນຢ່າງຈົບງາມ. ພິເສດ, ດ້ວຍບົດບາດເປັນເລຂາໜ່ວຍພັກບ້ານ, ທ່ານໄດ້ປະກອບສ່ວນຢ່າງຕັ້ງໜ້າເຂົ້າໃນການກໍ່ສ້າງພັກ, ອົງການຈັດຕັ້ງມະຫາຊົນໃນບ້ານ, ຂົນຂວາຍປະຊາຊົນກໍ່ສ້າງຊົນນະບົດ, ພັດທະນາເສດຖະກິດຄອບຄົວ. ປະຈຸບັນ, ຈຳນວນຄອບຄົວທຸກຍາກໃນບ້ານຟູ໋ເຄືອງຊີ ກວມ 3% . ທາງຄົມມະນາຄົມທັງໝົດໃນບ້ານໄດ້ຮັບການປູຢາງ ຫຼື ເບຕົງ. ສະພາບຄວາມສະຫງົບປອດໄພ - ຄວາມເປັນລະບຽບຮຽບຮ້ອຍຢູ່ໃນບ້ານໄດ້ຮັບການຮັບປະກັນ. ຊີວິດອິ່ມໜຳສຳລານຂອງຄອບຄົວທ່ານໃນປະຈຸບັນ ໄດ້ສະແດງໃຫ້ເຫັນຄວາມຕັດສິນໃຈຜ່ານຜ່າຄວາມຫຍຸ້ງຍາກຂອງຄອບຄົວທ່ານ. ຫວນຄືນໄລຍະເວລາອັນຫຍຸ້ງຍາກນັ້ນ, ທ່ານກໍ່ບໍ່ຄິດໄດ້ວ່າ ເປັນຫຍັງຕົນເອງພັດທົນທານໝັ້ນໜຽວເພື່ອຜ່ານຜ່າຄວາມຫຍຸ້ງຍາກໄດ້ຄືແນວນັ້ນ. ກ່ອນນີ້ເມື່ອຫາກໍ່ສ້າງຄອບຄົວ, ຜົວເມຍທ່ານບໍ່ມີດິນພໍນີ້ວ. ທ່ານ ແລະ ເມຍຕ້ອງເຊົ່າທີ່ດິນເພື່ອປູກຜັກ, ລ້ຽງໝູແມ່ພັນ, ຫາປາເພື່ອຫາເງິນລ້ຽງຊີບ. ດ້ວຍຄວາມດຸໝັ່ນຂະຫຍັນພຽນ. ຈຳນວນເງິນຫາໄດ້ນັບມື້ນັບຫຼາຍ, ຄອບຄົວທ່ານກໍ່ຊື້ເອົາທີ່ດິນ, ເປີດກວ້າງການຜະລິດຕາມຮູບແບບ: ສວນ-ສະ-ຄອກ. ນັ້ນແມ່ນຮູບແບບລ້ຽງໝູແມ່ພັນ ຕິດພັນກັບການລ້ຽງປາ ແລະ ປູກຜັກ, ດອກໄມ້. ຈາກສອງຝາມືເປົ່າ, ມາຮອດປະຈຸບັນ, ລາຍຮັບຂອງຄອບຄົວທ່ານ Huynh Ly ໄດ້ຂຶ້ນເຖິງ100 ລ້ານດົ່ງ/ປີ. ເສດຖະກິດເປັນປົກກະຕິ, ທ່ານຍິ່ງມີເງື່ອນໄຂເພື່ອເຂົ້າຮ່ວມການເຄື່ອນໄຫວຕ່າງໆໃນບ້ານ. ທ່ານແບ່ງປັນວ່າ:
”ຂ້າພະເຈົ້າເຫັນວ່າຕົນເອງຍັງມີສຸຂະພາບຢູ່ດັ່ງນັ້ນຕ້ອງປະກອບ ສ່ວນພ້ອມກັບອົງຄະນະພັກເພື່ອກໍ່ສ້າງທ້ອງຖີ່ນ. ເຮົາມີຄວາມສາມາດແນວໃດກໍ່ປະກອບສ່ວນແນວນັ້ນ. ຍ້ອນບ້ານເກີດເມືອງນອນຍັງທຸກຍາກຢູ່, ເຮົາຈຶ່ງປະກອບກຳລັງເຫື່ອແຮງຂອງຕົນເພື່ອກໍ່ສ້າງທ້ອງຖີ່ນໃຫ້ຮັ່ງມີສວຍງາມຍິ່ງຂຶ້ນ”.
ໃນເກືອບ 30 ປີ ທີ່ເຂົ້າຮ່ວມການຕໍ່ຕ້ານຕ້ານອາເມລິກາ, ທ່ານ Huynh Ly ໄດ້ສ້າງຜົນງານທີ່ດີເດັ່ນຫຼາຍຢ່າງ. ໃນໄລຍະນັ້ນທ່ານຖືກບາດເຈັບສາຫັດເຖິງ 8 ເທື່ອ. ນັບແຕ່ປີ 1986 ມາຮອດປະຈຸບັນ, ທ່ານຍັງສະໝັກໃຈເຮັດວຽກງານຄຸ້ມຄອງສຸສານໃນຕາແສງ ຟູ໋ກ໋ຽດ. ທ່ານໄດ້ຕັ້ງໜ້າປະກອບກຳລັງເຫື່ອແຮງ, ລະດົມທຶນເພື່ອກໍ່ສ້າງສຸສານແຫ່ງນີ້ຢ່າງສະອາດສວຍງາມ. ປະຈຸບັນ, ເຂດສຸສານນັກຮົບທີ່ເສຍສະຫຼະຊີວິດເພື່ອຊາດໃນຕາແສງຟູ໋ກ໋ຽດໄດ້ປົງອັດຖິນັກຮົບ 200 ຄົນ. ໃນນັ້ນສ່ວນຫຼາຍແມ່ນເພື່ອນຮ່ວມກົມກອງຂອງທ່ານ. ທ່ານຖືວ່າ ນີ້ແມ່ນຄວາມຮັບຜິດຊອບຂອງຕົນ. ແມ່ນອາລົມຈິດຂອງຜູ້ຍັງມີຊີວິດທີ່ມີຕໍ່ຜູ້ທີ່ໄດ່ເສຍສະຫຼະຊີວິດເພື່ອຊາດ.
”ບັນດານັກຮົບທີ່ປົງຢູ່ທີ່ນີ້ແມ່ນຜູ້ທີ່ໄດ້ເສຍສະຫຼະຊີວິດເພື່ອພາລະ ກິດປົດປ່ອຍຊາດ. ເຮົາກັບເມືອທ້ອງຖີ່ນເຫັນວ່າວຽກງານເບິ່ງແຍງ, ຄຸ້ມຄອງສຸສານທີ່ມອບໃຫ້ຜູ້ມີອາຍຸສູງຍັງຖືກຈຳກັດຢູ່. ດັ່ງນັ້ນຂ້າພະເຈົ້າຈຶ່ງຮັບວຽກງານຄຸ້ມຄອງສຸສານ ເພື່ອເບິ່ງແຍງບ່ອນຝັງສົບນັກຮົບທີ່ເສຍສະຫຼະຊີວິດເພື່ອຊາດໃຫ້ດີກວ່າ”
ອາດເວົ້າໄດ້ວ່າ, ໃນການເຄື່ອນໄຫວວຽກງານໃດໆຢູ່ບ້ານ ຟູ໋ເຄືອງຊີ ກໍ່ລ້ວນແຕ່ມີການປະກອບສ່ວນຂອງສະມາຊິກພັກ-ທະຫານເສຍອົງຄະ Huynh Ly. ໂດຍແມ່ນຜູ້ເວົ້າໄດ້ ແລະ ເຮັດໄດ້ນັ້ນ, ທ່ານຈຶ່ງໄດ້ຮັບຄວາມໄວ້ເນື້ອເຊື່ອໃຈ ແລະ ຄວາມຮັກແພງຈາກອົງຄະນະພັກ, ອຳນາດການປົດຄອງທ້ອງຖີ່ນ ແລະ ປະຊາຊົນ. ທ່ານ Doan Cong Truc, ຮອງປະທານສະມາຄົມນັກຮົບເກົ່າຕາແສງ ຟູ໋ກ໋ຽນ ເວົ້າວ່າ:
”ໃນໄລຍະຜ່ານມາ, ທະຫານເສຍອົງຄະ Huynh Ly ໄດ້ມີການເຄື່ອນໄຫວທີ່ຕັ້ງໜ້າຫຼາຍຢ່າງ, ໃນວຽກງານສັງຄົມທ່ານທັງແມ່ນເລຂາໜ່ວຍພັກ, ທັງເປັນຜູ້ຄຸ້ມຄອງສຸສານນັກຮົບທີ່ເສຍສະຫຼະຊີວິດເພື່ອຊາດ. ວຽກງານໃດທ່ານກໍ່ປະຕິບັດໄດ້ດີ, ດັ່ງນັ້ນທ່ານຈຶ່ງເປັນແບບຢ່າງເພື່ອໃຫ້ສະມາຊິກໃນສະມາຄົມນັກຮົບເກົ່າຮ່ຳຮຽນເອົາ”.
ປະຈຸບັນ, ຄອບຄົວຂອງທ່ານ Huynh Ly ໄດ້ມີຊີວິດທີ່ອິ່ມໜຳສຳລານ. ລູກຂອງທ່ານຜູ້ໃດກໍ່ເຕີບໃຫຍ່, ໃນນັ້ນມີລູກ 2 ຄົນພວມຮຽນມະຫາວິທະຍາໄລຢູ່ນະຄອນ ໂຮ່ຈີມິນ ແລະ ອີກຜູ້ໜຶ່ງແມ່ນນາຍທະຫານ. ເຖິງວ່າອາຍຸເກືອບ 70 ແລ້ວ, ແຕ່ຈິດໃຈ ແລະ ຄວາມສຸດຈິດສຸດໃຈຂອງທະຫານເສຍອົງຄະຜູ້ນີ້ຍັງຄົງເປັນແບບຢ່າງເພື່ອໃຫ້ລູກຫຼານຮ່ຳຮຽນເອົາ.