(vovword)-ໃນຊຸມມື້ນີ້ ຈຳນວນນັກທ່ອງທ່ຽວມາຢ້ຽມຢາມ ທຳນຽບທົງເຍີດ(ກ່ອນນີ້ເອີ້ນວ່າ ທຳນຽບດົກເລີບ)ເພີ່ມຂຶ້ນກະໂດດຂັ້ນ. ເຂົາເຈົ້າມາແຫ່ງນີ້ ບໍ່ພຽງແຕ່ເພື່ອຢ້ຽມຊົມ, ທັດສະນະສຶກສາ, ຊອກຮູ້ກ່ຽວກັບປະຫວັດສາດເທົ່ານັ້ນ ຫາກຍັງແມ່ນການກັບຄືນມາສະຖານທີ່ຊື່ງອຳນາດສາທາລະນະລັດຫວຽດນາມຖືກພັງທະລາຍ. ປະຈຸບັນ ທຳນຽບທົງເຍີດ ແມ່ນປູຊະນີຍະສະຖານປະຫວັດສາດແຫ່ງຊາດພິເສດ ໄດ້ຮັບການຮັບຮອງກ່ຽວກັບຄຸນຄ່າປະຫວັດສາດ ແລະ ສະຖາປັດຕະຍະກຳ. ບົດຂຽນຂອງນັກຂ່າວ ລານແອງ ດ້ວຍຫົວຂໍ້ວ່າ: ທຳນຽບທົງເຍີດ, ປູຊະນີຍະສະຖານປະຫວັດສາດວັດທະນະທຳພິເສດ
ທຳນຽບ ທົງເຍີດ
ພາບ:internet
|
ທາງເບື້ອງຫນ້າຂອງທຳນຽບ ທົງເຍີດແມ່ນເສັ້ນທາງ ນາມກີເຂີຍເຫງັຍ, ຢູ່ອ້ອມຂ້າງແມ່ນບັນດາເສັ້ນທາງໃຈກາງນະຄອນ ໂຮ່ຈີມີນ, ຢູ່ສອງຟາກທາງມີຕົ້ນໄມ້ຂຽວສົດງົດງາມ. ທຳນຽບ ທົງເຍີດ ໄດ້ຮັບການກໍ່ສ້າງດ້ວຍສີມືອັນຄອ່ງແຄ້ວ ແລະ ຫົວຄິດປະດິດສ້າງຂອງຊາວຫວຽດນາມ ແລະ ກາຍເປັນສະຖານທີ່ຂາດບໍ່ໄດ້ສຳລັບນັກທ່ອງທ່ຽວແຕ່ລະຄົນເມື່ອມາຢ້ຽມຢາມນະຄອນ ໂຮ່ຈິມີນ. ປີ 1962, ປະທານາທິບໍດີ ອຳນາດການປົກຄອງ ຫຸ່ນໄຊງ່ອນ, ໂງດີງຢ້ຽມ ອະນຸຍາດໃຫ້ກໍ່ສ້າງ ທຳນຽບ ທົງເຍີດ ຢູ່ເຂດດິນຂອງທຳນຽບ Norodom. ນັກສະຖາປານິກ ໂງຫວຽດຖູ້, ຊາວຫວຽດນາມ ຄົນທຳອິດ ແລະ ແມ່ນຜູູ້ຫນຶ່ງດຽວໄດ້ຮັບລາງວັນສະຖາປັດຕະຍະກຳໂລກ ທີ່ໄດ້ອອກແບບ ທຳນຽບ ທົງເຍີດຄືນໃຫມ່. ທ່ານ ໄດ້ປະສານສົມທົບຢ່າງກົມກຽວລະຫວ່າງສິລະປະສະຖາປັດຕະຍະກຳທັນສະໄຫມ ແລະ ສະຖາປັດຕະຍະກຳພື້ນເມືອງຝ່າຍຕາເວັນອອກສຳລັບກິດຈະກຳແຫ່ງນີ້. ທຳນຽບ ທົງເຍີດ ໄດ້ຮັບການກໍ່ສ້າງໃນເນື້ອທີ່ 12 ເຮັກຕາ ລວມມີ 3 ຊັ້ນ, ພ້ອມດ້ວຍຊັ້ນດາດຟ້າ, ຊັ້ນໃຕ້ດິນ….. ທຳນຽບ ທົງເຍີດ ໄດ້ຮັບການອອກແບບຕາມຕົວຫນັງສືຈີຂອງຈີນ ໝາຍເຖິງຄວາມໂຊກດີ.
11 ໂມງ 30 ນາທີຂອງວັນທີ 30/4/1975, ທຸງຂອງແນວໂຮມປົດປ່ອຍຊາດ ພາກໃຕ້ຫວຽດນາມ ປິວສະບັດຢູ່ເທິງ ທຳນຽບ ທົງເຍີດ. ທ່ານ ຫງວຽນຫືວເຈົາ, ອະດີດພະນັກງານ ວິທະຍຸກະຈາຍສຽງປົດປ່ອຍໃນຄາວນັ້ນ ໃຫ້ຮູ້ວ່າ:
“ເມື່ອໄດ້ຮັບຟັງກຳລັງປ້ອງກັນຄວາມສະຫງົບຂອງຫວຽດນາມ ປັກທຸງຊາດຢູ່ເທິງທຳນຽບທົງເຍີດ ຂ້າພະເຈົ້າຮູ້ສຶກດີໃຈຫລາຍ. ປະຊາຊົນ ແຕ່ລະຄົນ ຕ້ອງຈົດຈຳຕໍ່ເຫດການນັ້ນ ເພາະວ່າ ເພື່ອໃຫ້ມີຄັນທຸງປິວສະບັດ ຊາວຫວຽດນາມ ຫລາຍຄົນຕ້ອງເສຍກຳລັງເຫື່ອແຮງ ແລະ ເລືອດເນື້ອຂອງຕົນບໍ່ຈັກວ່າເທົ່າໃດ.”
ຢູ່ທາງເບື້ອງຫນ້າຂອງທຳນຽບ ທົງເຍີດ ແມ່ນທົ່ງຫຍ້າຂຽວອ່ອນ, ແລະນ້ຳພຸ ໄດ້ສ້າງຄວາມງາມໃຫ້ແກ່ກິດຈະກຳແຫ່ງນີ້. ພາຍຫລັງມື້ປົດປ່ອຍ, ທຳນຽບ ທົງເຍີດ ໄດ້ຮັບການຮັກສາແບບດັ້ງເດີມໄວ້ ຈາກສະຖາປັດຕະຍະກຳຢູ່ເບື້ອງນອກຕະຫລອດຮອດບັນດາວັດຖຸພັນຂອງອຳນາດການປົກຄອງເກົ່າພ້ອມດ້ວຍລົດຖັງ 2 ຄັນ ຂອງກອງທັບປະຊາຊົນ ຫວຽດນາມ, ປະກອບສ່ວນປົດປ່ອຍ ໄຊງ່ອນ. ນັກສິລະປິນ ປະຊາຊົນ ແທງຮວາ ຫວນຄືນມື້ທີ່ຕົນເອງພ້ອມກັບທະຫານປົດປ່ອຍບຸກເຂົ້າທຳນຽບທົງເຍີດ:
“ພວກຂ້າພະເຈົ້າຮ້ອງເພງສູ່ກັນຟັງ. ເມື່ອຢືນໃນທຳນຽບ, ພວກຂ້າພະເຈົ້າຂັບຮ້ອງຫລາຍບົດເພງ. ພວກຂ້າພະເຈົ້າຮູ້ສຶກດີໃຈຫລາຍເພາະວ່າ ນັບແຕ່ນີ້ເປັນຕົ້ນໄປບໍ່ມີສົງຄາມ ແລະ ພວກຂ້າພະເຈົ້າໄດ້ກັບຄືນມາເຕົ້າໂຮມກັບຄອບຄົວ.”
ເຮືອບິນສູ້ຮົບຢູ່ທຳນຽບ ທົງເຍີດ
ພາບ:dantri.com
|
ໃນເດືອນ 11/1975 ຢູ່ ທຳນຽບທົງເຍີດ ໄດ້ດຳເນີນກອງປະຊຸມປຶກສາການເມືອງໂຮມສອງພາກເຫນືອ-ໃຕ້ເປັນເອກະພາບ. ປີ 1976, ທຳນຽບ ທົງເຍີດ ໄດ້ຮັບການຮັບຮອງຈາກ ລັດຫວຽດນາມວ່າ ເປັນປູຊະນີຍະສະຖານປະຫວັດສາດວັດທະນະທຳພິເສດ, ແມ່ນສະຖານທີ່ທ່ອງທ່ຽວທີ່ຂາດບໍ່ໄດ້ສຳລັບນັກທ່ອງທ່ຽວແຕ່ລະຄົນເມື່ອມາຢ້ຽມຢາມນະຄອນໂຮ່ຈິມີນ. ເອື້ອຍ ຫງວຽນທິທູຮ່ວຽນ, ພະນັກງານສູນສົ່ງເສີມການທ່ອງທ່ຽວນະຄອນ ໂຮ່ຈິມີນ ໃຫ້ຮູ້ວ່າ: ແຕ່ລະມື້ ທຳນຽບທົງເຍີດ ຕ້ອນຮັບແຂກເຂົ້າຢ້ຽມຢາມນັບພັນເທື່ອຄົນ.
“ຂ້າພະເຈົ້າມີຄວາມເອກອ້າງທະນົງໃຈກ່ຽວກັບບ້ານເກີດເມືອງນອນຂອງຕົນ ເມື່ອມີປູຊະນີຍະສະຖານສຳຄັນພິເສດສຳລັບປະເທດຊາດຄືແນວນີ້. ທຳນຽບທົງເຍີດ ແມ່ນສະຖານທີ່ຈົດຈຳບັນດາຂີດໝາຍສຳຄັນໃນປະຫວັດສາດຂອງຊາດຫວຽດນາມ. ທຳນຽບທົງເຍີດ ປະຈຸບັນ ໄດ້ກາຍເປັນເຂດປູຊະນີຍະສະຖານປະຫວັດສາດມີລັກສະນະສັນຍາລັກໃຫ້ແກ່ຈິດໃຈມະຫາສາມັກຄີທົ່ວປວງຊົນທັງຊາດ. ຜ່ານບັນດາວັດຖຸພັນ ແລະ ຮູບພາບທີ່ໄດ້ຮັກສາໄວ້ຢູ່ທີ່ນີ້ ຂ້າພະເຈົ້າຍິ່ງເຂົ້າໃຈກວ່າກ່ຽວກັບສົງຄາມ ຊື່ງປະເທດຊາດ ແລະ ປະຊາຊົນ ຫວຽດນາມ ໄດ້ຜ່ານຜ່າໄລຍະ ກວ່າ 40ປີຄືນຫລັງ”
ເມື່ອເຂົ້າຢ້ຽມຢາມ ທຳນຽບທົງເຍີດ, ນັກທ່ອງທ່ຽວ ໄດ້ສູບອາກາດທີ່ປອດໂປ່ງຂອງຕົ້ນໄມ້ໃບຫຍ້າທີ່ຂຽວສົດງົດງາມ ຢູ່ທີ່ນີ້, ໄດ້ຮັບຊົມສະຖາປັດຕະຍະກຳທີ່ເປັນເອກະລັກສະເພາະ ແລະ ຊອກຮູ້ບັນດາຄຸນຄ່າປະຫວັດສາດ. ວັດຖຸພັນ , ເອກະສານ ແຕ່ລະຢ່າງ ຢູ່ ທຳນຽບທົງເຍີດ ລ້ວນແຕ່ມີຄວາມໝາຍຕິດພັນກັບປະຫວັດສາດຂອງນະຄອນທີ່ໃສ່ຊື່ປະທານໂຮ່ຈິມີນ.