(vovworld) - ເກືອບ 20 ປີ ທີ່ເປັນນັກຂ່າວຂອງວິທະຍຸກະຈາຍສຽງຫວຽດນາມ, ນັກຂ່າວ Le Hang ໄດ້ຮັບຜົນສຳເລັດຫຼາຍຢ່າງໃນອາຊີບຂອງຕົນ ແລະ ໄດ້ຮັບລາງວັນສື່ມວນຊົນຫຼາຍລາງວັນ. ໃນນັ້ນມີລາງວັນ B ໃນການປະກວດສື່ມວນຊົນແຫ່ງຊາດປີ 2011 ໂດຍສະມາຄົມນັກຂ່າວຫວຽດນາມມອບໃຫ້ ດ້ວຍບົດປະພັນ ”ການສົ່ງອອກແຮງງານຢູ່ນາມດິ້ງ - ໃນຂະນະທີ່ພະນັກງານຄອບງຳຕະຫຼາດ”. ລາງວັນນີ້ຍິ່ງມີຄວາມໝາຍສຳລັບນັກຂ່າວ Le Hang ເມື່ອເອື້ອຍໄດ້ຮັບລາງວັນດັ່ງກ່າວກົງກັບວັນສື່ມວນຊົນປະຕິວັດຫວຽດນາມ (21/6).
( ພາບປະກອບ )
ຄາວຍັງນ້ອຍ, ໃຜໆກໍ່ມີຄວາມໄຝ່ຝັນສະເພາະກ່ຽວກັບອາຊີບຂອງຕົນ. ບາງຄົນຢາກເປັນທ່ານໝໍ, ບາງຄົນຢາກເປັນຕຳຫຼວດ, ເປັນນັກຮ້ອງ, ຄູສອນ… ແລະຕາມການເວລາ, ຄວາມໄຝ່ຝັນນັ້ນອາດຈະຖືກປ່ຽນແປງໄປນຳ. ແຕ່ສຳລັບ Le Hang ແລ້ວ, ນັບແຕ່ນ້ອຍເອື້ອຍໄດ້ມີຄວາມໄຝ່ຝັນຢາກເປັນນັກຂ່າວ. ເມື່ອຫວນຄືນຄວາມໄຝ່ຝັນຂອງຕົນ, ນັກຂ່າວ Le Hang ແບ່ງປັນວ່າ:
”ນັບແຕ່ເວລາຍັງນ້ອຍ, ຂ້າພະເຈົ້າໄດ້ເປັນຜູ້ຟັງປະຈຳວັນຂອງວິທະ ຍຸກະຈາຍສຽງຫວຽດນາມ, ບັນດາລາຍການຂ່າວ, ເລື່ອງລາວ, ບົດດົນຕີ…ທາງວິທະຍຸໄດ້ເຊື່ອມຊືມເຂົ້າໃນຕົວຂ້າພະເຈົ້າ, ດັ່ງນັ້ນຂ້າພະເຈົ້າຈຶ່ງຫວັງວ່າ, ເມື່ອເຕີບໃຫຍ່ຈະກາຍເປັນນັກຂ່າວຂອງວິທະຍຸກະຈາຍສຽງຫວຽດນາມ ແລະ ຕາມການເວລາ, ພ້ອມກັບຄວາມມານະພະຍາຍາມຂອງຕົນ, ຄວາມໄຝ່ຝັນນັ້ນໄດ້ປະກົດຜົນເປັນຈິງ”.
ນັກຂ່າວແມ່ນອາຊີບທີ່ລຳບາກ, ແລະຫຼາຍຄົນກໍ່ຖືວ່າ, ອາຊີບນັກຂ່າວບໍ່ເໝາະສົມກັບຜູ້ຍິງ. ສຳລັບ Le Hang ແລ້ວ, ເມື່ອເລືອກເຟັ້ນອາຊີບເປັນນັກຂ່າວ ກໍ່ໝາຍຄວາມວ່າເລືອກເຟັ້ນຄວາມຫຍຸ້ງຍາກລຳບາກໃຫ້ແກ່ຕົນ. ແຕ່ເອື້ອຍຖືວ່າຄວາມຫຍຸ້ງຍາກລຳບາກເຫຼົ່ານັ້ນກໍ່ແມ່ນການທົດສອບຂອງອາຊີບ. ແລະ ຕໍ່ໜ້າຄວາມທົດສອບນັ້ນ, Le Hang ໄດ້ຊອກເຫັນຄວາມຈັບອົກຈັບໃຈໃນວຽກງານຂອງຕົນ, ເຮັດໃຫ້ເອື້ອຍຍິ່ງຮັກອາຊີບກວ່າ ແລະ ຍິ່ງຕັດສິນໃຈຜ່ານຜ່າກວ່າອີກ. ຫວນຄືນອະນຸສອນຄັ້ງທຳອິດທີ່ໄປຂຽນບົດກ່ຽວກັບໂລກລະບາດ HIV ນັບແຕ່ປີ 1996, ເອື້ອຍ Le Hang ເຫລົ່າສູ່ຟັງວ່າ:
”ເມື່ອຂຽນກ່ຽວກັບພະຍາດ HIV ຂ້າພະເຈົ້າຮູ້ສຶກຢ້ານກົວຫຼາຍ, ຍ້ອນຂາດຂໍ້ມູນ ແລະ ຄວາມຮູ້ກ່ຽວກັບພະຍາດນີ້. ແຕ່ເມື່ອມີບົດຮຽນ ກໍ່ຄືຄວາມຮູ້ທີ່ເປັນພື້ນຖານກ່ຽວກັບພະຍາດນີ້ແລ້ວ, ຂ້າພະເຈົ້າຈຶ່ງເຂົ້າໃຈໄດ້ວ່າ, ພະຍາດນີ້ພຽງແຕ່ຕິດແປດຜ່ານການສຳພັດ 3 ທາງເທົ່ານັ້ນ. ເມື່ອມີຄວາມເຂົ້າໃຈແລ້ວ, ຂ້າພະເຈົ້າເຫັນວ່າບັນດາຜູ້ທີ່ຕິດເຊື້ອ HIV ກໍ່ມີສິດພົນລະເມືອງຄືກັນກັບຄົນທຳມະດາອື່ນໆ. ດັ່ງນັ້ນຄວາມຮັບຜິດຊອບຂອງນັກຂ່າວແມ່ນຕ້ອງໂຄສະນາຄືແນວໃດເພື່ອໃຫ້ປະຊາຊົນມີຄວາມເຂົ້າໃຈກ່ຽວກັບພະຍາດນີ້ ແລະ ບໍ່ມີການຈຳແນກການປະພຶດຕໍ່ສຳຫຼັບຜູ້ທີ່ຕິດເຊື້ອ HIV ”.
ເພື່ອນຮ່ວມງານເຄີຍເອີ້ນເອື້ອຍວ່າ Hang ”ໄພສັງຄົມ”, ເພາະວ່າບັນດາບົດປະພັນທີ່ພົ້ນເດັ່ນຂອງເອື້ອຍ ແມ່ນບັນດາບັນຫາກ່ຽວກັບໄພສັງຄົມຄື: ຢາເສບຕິດ, ໂສເພນີ, HIV… ເອື້ອຍຖືວ່າຊື່ເອີ້ນພິເສດນີ້ແມ່ນການຮັບຮູ້ຂອງເພື່ອນຮ່ວມງານທີ່ມີຕໍ່ທຸກສິ່ງທຸກຢ່າງທີ່ເອື້ອຍເຮັດໄດ້, ນັ້ນແມ່ນຈຸດພິເສດຂອງ Le Hang. ດ້ວຍຄວາມສຸດຈິດສຸດໃຈ, ຄວາມເມົາມົວກັບອາຊີບ, ຍາມໃດນັກຂ່າວ Le Hang ກໍ່ແມ່ນໜຶ່ງໃນບັນດານັກຂຽນຕົ້ນຕໍຂອງລະບົບ VOV2 (ລາຍການວັດທະນະທຳ - ຊີວີດ - ວິທະຍາສາດ, ສຶກສາ) ຂອງວິທະຍຸກະຈາຍສຽງຫວຽດນາມ. ທ່ານນາງTran Thi Tri ຫົວໜ້າອຳນວຍການ ລະບົບ VOV2, ໃຫ້ຮູ້ວ່າ:
” Le Hang ແມ່ນໜຶ່ງໃນບັນດານັກຂ່າວທີ່ຂະຫຍັນຂັນເຄື່ອນທີ່ສຸດຂອງ ລະບົບ VOV2, ແມ່ນຜູ້ສຸດຈິດສຸດໃຈກັບວຽກງານ. ເອື້ອຍທັງແມ່ນຮອງຫົວໜ້າພະແນກບັນດາບັນຫາສັງຄົມ ທັງແມ່ນກຳມະການຄະນະບໍລິຫານງານ ສະມາຄົມນັກຂ່າວ ສາຂາ VOV2. ໃນຖານະຕຳແໜ່ງໃດ, ນັກຂ່າວ Le Hang ກໍ່ມີການປະກອບສ່ວນທີ່ໜ້າຮັບຮູ້. ພິເສດແມ່ນໃນວຽກງານນັກຂ່າວ, ເອື້ອຍ Hang ແມ່ນຄົນດຸໝັ່ນທີ່ສຸດໃນການຊອກຫາຂໍ້ມູນ, ພິເສດເພື່ອຊ່ວຍໃຫ້ຜູ້ຟັງຮັບຮູ້ໄດ້ບັນດາບັນຫາສັງຄົມຢ່າງຮອບດ້ານ, ເລິກເຊິ່ງກວ່າ.”
ປະຈຸບັນ, ນັກຂ່າວພວມຮັບຜິດຊອບຫົວຂໍ້ກ່ຽວກັບບັນຫາແຮງງານ, ວຽກເຮັດງານທຳ. ຜ່ານບັນດາບົດຂຽນ, ບົດສາລະຄະດີສືບສວນຂອງນັກຂ່າວ Le Hang ກໍ່ຄືບັນດາເພື່ອນຮ່ວມງານອື່ນໆ, ໄດ້ສ້າງຄວາມປະທັບໃຈຢ່າງແຮງໃຫ້ແກ່ຜູ້ຟັງ. ທ່ານ Nguyen Trong Dinh, ນັກຮົບເກົ່າຢູ່ ຮ່າໂນ້ຍ, ຜູ້ຟັງວິທະຍຸກະຈາຍສຽງຫວຽດນາມເປັນປະຈຳ, ໃຫ້ຮູ້ວ່າ:
”ນອກຈາກພາກຂ່າວ, ຂ້າພະເຈົ້າຍັງຢາກຟັງບັນດາບົດສາລະຄະດີສືບສວນບັນດາບັນຫາສັງຄົມຂອງວິທະຍຸກະຈາຍສຽງຫວຽດນາມ. ຂ້າພະເຈົ້າເຫັນວ່ານັ້ນແມ່ນບັນດາບົດປະພັນທີ່ໄດ້ຮັບການລົງທຶນຢ່າງລະອຽດ ແລະ ມີຄຸນນະພາບທີ່ສຸດ. ພິເສດແມ່ນບັນດາບົດຂຽນຂອງນັກຂ່າວຍິງ, ຂ້າພະເຈົ້ານັບຖືເຂົາເຈົ້າຫຼາຍ, ຍ້ອນບໍ່ໄດ້ຫວາດຫວັ່ນຕໍ່ຄວາມຫຍຸ້ງຍາກ ເພື່ອມີບັນດາບົດຂຽນທີ່ມ່ວນຕອບສະໜອງຄວາມຕ້ອງການໃຫ້ແກ່ຜູ້ຟັງ”.
ເຖິງວ່າຈະຂ້ອງຄາກັບວຽກງານຫຼາຍກໍ່ຕາມ, ແຕ່ນັກຂ່າວ Le Hang ຍັງສະຫງວນເວລາເພື່ອພາລູກໄປຫຼິ້ນ ຫຼືເຕົ້າໂຮມກັບຄອບຄົວໃນວັນທ້າຍສັບປະດາ, ກໍ່ຄືພ້ອມກັບໝູ່ເພື່ອນຈັດຕັ້ງງານລ້ຽງນ້ອຍໆ ເມື່ອໄດ້ຮັບລາງວັນ. ຄວາມມ່ວນຊື່ນແບບທຳມະດາສາມັນນີ້ ກໍ່ແມ່ນກຳລັງໜູນ ເພື່ອໃຫ້ນັກຂ່າວ Le Hang ສືບຕໍ່ປະຕິບັດຄວາມໄຝ່ຝັນໄດ້ໄປປະຕິບັດງານ ແລະ ໄດ້ຂຽນບົດຂອງເອື້ອຍ.