(vovworld) “ໂດຍແມ່ນຄົນລຽບງ່າຍໃນຊີວິດການເປັນຢູ່ ແຕ່ພັດມີ ຄວາມຂະຫຍັນຂັນເຂື່ອນ, ມີຫົວຄິດປະດິດສ້າງ ແລະ ມີຄວາມ ສະດຸ້ງໄວ ໃນການດຳເນີນທຸລະກິດ” ນັ້ນແມ່ນຂໍ້ສັງເກດຂອງ ຫຼາຍຄົນທີ່ສະຫງວນ ໃຫ້ແກ່ທ່ານນາງ Ha Thi Vinh, ຜູ້ອຳນວຍການບໍລິສັດ Quang Vinh ຈຳກັດ, ຢູ່ຕາແສງບາດຈ່າງ, ເມືອງຢາເລິມ, ນະຄອນຮ່າໂນ້ຍ. ທ່ານນາງແມ່ນຜູ້ທີ່ຍາມໃດກໍ່ຄິດເຖິງເລື່ອງປັບປຸງດ້ານເຕັກນິກ, ຍົກສູງຄຸນ ນະພາບຜະລິດຕະພັນເຄື່ອງເຄືອບດິນເຜົາ. ມາຮອດປະຈຸບັນ, ຜະລິດຕະ ພັນເຄື່ອງເຄືອບດິນເຜົາຂອງບາດຈ່າງ ໄດ້ມີໜ້າຢູ່ຫຼາຍປະເທດໃນໂລກ ແລະ ມີທີ່ຕັ້ງໃນຕະຫຼາດ.
ນັກທຸລະກິດ Ha Thi Vinh
(ພາບ: HM)
ໂດຍໄດ້ຮັບການກຳເນີດ ແລະ ເຕີບໃຫຍ່ຢູ່ເຂດໝູ່ບ້ານທີ່ມີມູນເຊື້ອຜະລິດເຄື່ອງເຄືອບດິນເຜົາມາເປັນເວລາກວ່າ 600 ປີ, ດັ່ງນັ້ນ, ອາຊີບນີ້ຈຶ່ງຊືມເລິກໃນເລືອດເນື້ອຂອງພວກເດັກນ້ອຍໃນໝູ່ບ້ານຄືທ່ານນາງ Ha Thi Vinh. ປີ 1989, ທ່ານນາງຕົກລົງພັກການຢູ່ໂຮງງານຜະລິດເຄື່ອງເຄືອບດິນເຜົາບາດຈ່າງ ແລ້ວກັບມາສ້າງຕັ້ງໜ່ວຍຜະລິດເຄື່ອງເຄືອບດິນເຜົາສົ່ງອອກ My Hanh ດ້ວຍຈຳນວນທຶນໃນເບື້ອງຕົ້ນພຽງແຕ່ພໍຊື້ລົດຖີບຄັນໜຶ່ງໃນເວລານັ້ນໄດ້ເທົ່ານັ້ນ. ໃນເບື້ອງຕົ້ນ, ທ່ານນາງໄດ້ກຳນົດຍຸດທະສາດດຳເນີນທຸລະກິດແມ່ນສຸມໃສ່ການຜະລິດເພື່ອສົ່ງອອກຕະຫຼາດຕ່າງປະເທດ. ແຕ່ເວລານັ້ນ, ເຄື່ອງໝາຍການຄ້າຂອງບໍລິສັດບໍ່ທັນໄດ້ຮັບການຢັ້ງຢືນ, ທ່ານນາງຈຶ່ງຕ້ອງໄປໂຄສະນາຜະລິດຕະພັນຂອງຕົນໃນບໍລິສັດຂາອອກຂາເຂົ້າຫຼາຍແຫ່ງຢູ່ຮ່າໂນ້ຍ ແຕ່ກໍ່ບໍ່ມີບໍລິສັດໃດສັ່ງຊີ້ສິນຄ້າເທື່ອ.
”ເວລານັ້ນຂ້າພະເຈົ້າຕົກລົງເຂົ້ານະຄອນໂຮ່ຈີມິນ ເພື່ອຊອກຫາລູກຄ້າ, ທຳອິດແມ່ນລູກຄ້າອີຕາລີ. ໃນວິວັດການຜະລິດເຄື່ອງເຄືອບດິນເຜົາຕາມໃບສັ່ງຊື້ສິນຄ້ານີ້, ພວກຂ້າພະເຈົ້າໄດ້ເຊີນບັນດາບໍລິສັດຢູ່ພາກເໜືອມາຊົມ ແລະ ຢັ້ງຢືນກຳລັງຄວາມສາມາດຂອງພວກຂ້າພະເຈົ້າ. ດັ່ງນັ້ນ, ຖັດຈາກໃບສັ່ງຊື້ສິນຄ້ານີ້, ບໍລິສັດຂາອອກຂາເຂົ້າຈຳນວນໜຶ່ງຢູ່ຮ່າໂນ້ຍ ກໍ່ສືບຕໍ່ສັ່ງຊື້ສິນຄ້າຂອງພວກເຮົາ. ນີ້ແມ່ນກາລະໂອກາດທຳອິດເພື່ອໃຫ້ໜ່ວຍປະສົມຜະລິດເຄື່ອງເຄືອບດິນເຜົາ My Hanh ພັດທະນາເປັນປົກກະຕິ ແລະ ຮັບປະກັນວຽກເຮັດງານທຳ”
ນັກທຸລະກິດ Ha Thi Vinh ແນະນຳຄວາມງາມ
ຂອງຜະລິດຕະພັນເຄື່ອງປັ້ນດິນເຜົາ Quang Vinh
(ພາບ: HM)
ໃນເບື້ອງຕົ້ນໜ່ວຍປະສົມຜະລິດເຄື່ອງເຄືອບດິນເຜົາ My Hanh ມີຜູ້ອອກແຮງງານພຽງ 6 ຄົນ ເທົ່ານັ້ນ, ປະຈຸບັນ, ໄດ້ກາຍເປັນບໍລິສັດເຄື່ອງເຄືອບດິນເຜົ່າ Quang Vinh ຈຳກັດ ດ້ວຍຈຳນວນຜູ້ອອກແຮງງານເກືອບ 400 ຄົນ. ກ່ອນນີ້, ຜະລິດຕະພັນຖືກເຜົາດ້ວຍຖ່ານ, ຟືນ, ໄດ້ກໍ່ມົນລະພິດສິ່ງແວດລ້ອມຢ່າງໜັກໜ່ວງ. ທ່ານນາງ Ha Thi Vinh ເປັນຜູ້ທຳອິດທີ່ໄດ້ນຳເຂົ້າເຕົາເຜົາດ້ວຍແກດ ເພື່ອຮັບໃຊ້ໃຫ້ແກ່ການຜະລິດຢູ່ບາດຈ່າງ. ຈາກນັ້ນໄດ້ປຸກລຸກຂະບວນການນຳໃຊ້ເຕົາເຜົາດ້ວຍແກດ, ສ້າງບາດລ້ຽງໃໝ່ໃຫ້ແກ່ເຕັກໂນໂລຢີຜະລິດເຄື່ອງເຄືອບດິນເຜົາຢູ່ບາດຈ່າງ. ທ່ານນາງກໍ່ແມ່ນຜູ້ນຳໜ້າໃນການສົ່ງອອກເຄື່ອງເຄືອບດິນເຜົາໄປຍັງຕະຫຼາດອາເມລິກາ. ການສ້າງຕັ້ງຂອງບໍລິສັດ Quang Vinh ຖືກຖືວ່າ ແມ່ນໜຶ່ງໃນບັນດາຄວາມມານະພະຍາຍາມໃນການຮັກສາສີສັນສະເພາະຂອງເຄື່ອງເຄືອບດິນເຜົາບາດຈ່າງ, ທັງສົມທົບລະຫວ່າງແບບວິທີເດີມກັບວິທີທັນສະໄໝ, ທັງມີລັກສະນະປະດິດສ້າງສະເພາະທີ່ເໝາະສົມກັບຍຸກສະໄໝ, ນີ້ກໍ່ແມ່ນ ຄວາມເອກອ້າງທະນົງໃຈຂອງວັດທະນະທຳຮ່າໂນ້ຍ. ທ່ານ Le Xuan Pho, ປະທານສະມາຄົມໝູ່ບ້ານຜະລິດເຄື່ອງເຄືອບດິນເຜົາບາດຈ່າງ, ໃຫ້ຮູ້ວ່າ:
”ທ່ານນາງ Vinh ແມ່ນໜຶ່ງໃນບັນດາຜູ້ທີ່ໄດ້ສ້າງຄວາມສະຫງ່າອົງອາດໃຫ້ແກ່ບາດຈ່າງ ເພື່ອໃຫ້ທົ່ວໂລກ ນັບແຕ່ອາເມລິກາ, ເອີລົບ, ອົດສະຕາລີ ຕະຫຼອດຮອດ ຍີ່ປຸ່ນຮູ້ຈັກເຖິງບາດຈ່າງ”.
"ພົນລະເມືອງດີເດັ່ນນະຄອນຫຼວງປີ " Hà Thị Vinh.
(ພາບ: laodong)
ບໍ່ພຽງແຕ່ສຸມໃສ່ພັດທະນາຮາກຖານການຜະລິດ, ນຳເຄື່ອງໝາຍເຄື່ອງເຄືອບດິນເຜົາບາດຈ່າງອອກສູ່ຕະຫຼາດໂລກເທົ່ານັ້ນ, ຫາກຍາມໃດທ່ານນາງກໍ່ພະຍາຍາມຮັກສາ ແລະ ຖ່າຍທອດສິ່ງທີ່ຍອດຢ້ຽມຂອງອາຊີບໃຫ້ແກ່ລຸ້ນຫຼັງ. ຍ້ອນເຫດນັ້ນ, ທ່ານນາງໄດ້ພ້ອມກັບພີ່ນ້ອງໃນຄອບຄົວກໍ່ສ້າງບໍລິສັດໃຫ້ນັບມື້ນັບໝັ້ນຄົງເຂັ້ມແຂງ. ທ່ານ Le Van Loi, ຫົວໜ້າຄະນະຜູ້ຕາງໜ້າວັດທະນະທຳໝູ່ບ້ານຜະລິດເຄື່ອງເຄືອບດິນເຜົາບາດຈ່າງ, ໃຫ້ຮູ້ວ່າ:
”ເອື້ອຍ Vinh ແມ່ນຜູ້ສຸດຈິດສຸດໃຈກັບໝູ່ບ້ານອາຊີບທີ່ສຸດ, ເອື້ອຍແມ່ນຜູ້ມີແນວຄວາມຄິດຂຽນປື້ມປະຫວັດຄວາມເປັນມາຂອງໝູ່ບ້ານບາດຈ່າງ, ໃນນັ້ນເວົ້າເຖິງຊີວິດການເປັນຢູ່, ຮີດຄອງປະເພນີ, ງານບຸນ, ອາຊີບຫັດຖະກຳທີ່ມີມາກ່ອນນີ້ນັບຮ້ອຍປີ. ຂ້າພະເຈົ້າເຫັນວ່າປື້ມປະຫວັດນີ້ມີຄວາມຈຳເປັນທີ່ສຸດ ເພື່ອຕັກເຕືອນໃຫ້ລູກຫຼານເຂົ້າໃຈ ແລະ ຄິດຮອດຄິດເຖິງໝູ່ບ້ານ. ເຖິງວ່າຈະຢູ່ໃກ້ຫຼືຢູ່ໄກ, ເມື່ອມີປື້ມຫົວນີ້, ເຂົາເຈົ້າລ້ວນແຕ່ເຂົ້າໃຈໝົດກ່ຽວກັບປະຫວັດຄວາມເປັນມາຂອງໝູ່ບ້ານນັບແຕ່ບູຮານນະການມາຮອດປະຈຸບັນ”.
ປະຈຸບັນ, 80% ຈຳນວນຜະລິດຕະພັນຂອງບໍລິສັດ Quang Vinh ແມ່ນໄດ້ສົ່ງອອກໃຫ້ບັນດາລູກຄ້າລາຍໃຫຍ່ຄືອາເມລິກາ, ຍີ່ປຸ່ນ, ບັນດາປະເທດເອີລົບ… ເຖິງວ່າເຄື່ອງເຄືອບດິນເຜົາຂອງບໍລິສັດ Quang Vinh ໄດ້ມີໜ້າຢູ່ຫຼາຍປະເທດແລ້ວກໍ່ຕາມ, ແຕ່ທ່ານນາງ Vinh ພັດບໍ່ພໍໃຈກັບຜົນງານດັ່ງກ່າວເທື່ອ, ຍາມໃດທ່ານນາງກໍ່ພະຍາຍາມຊອກຫາເຕັກໂນໂລຢີໃໝ່, ເພື່ອຍົກສູງຄຸນນະພາບຜະລິດຕະພັນ. ສຳລັບນັກທຸລະກິດຍິງ Ha Thi Vinh ແລ້ວ, ຜະລິດຕະພັນແຕ່ລະອັນລ້ວນແຕ່ແມ່ນຜະລິດຕະພັນສິລະປະ, ແມ່ນແຫ່ງເພື່ອໃຫ້ກຳມະກອນພັດທະນາ ດ້ວຍຫົວຄິດປະດິດສ້າງທີ່ໄດ້ຮັບການເສີມຂະຫຍາຍຢ່າງບໍ່ຢຸດຢັ້ງ.