(vovworld)-ໃນຊຸມປີມໍ່ໆມານີ້, ນະຄອນຫລວງ ຮ່າໂນ້ຍ ມີການປ່ຽນແປງຢ່າງແຮງ ກາຍເປັນຕົວເມືອງໃຈກາງຂອງທົ່ວປະເທດ. ສິ່ງທີ່ພົ້ນເດັ່ນນັ້ນແມ່ນມີຂົວທັນສະໄຫມ ຂ້າມແມ່ນ້ຳແດງຫລາຍແຫ່ງ ຄື ຂົວລອງບຽນ, ຂົວທັງລອງ, ຂົວເຈືອງເຢືອງ, ຂົວແທງຈີ, ຂົວຫວີງຕູຍ, ຂົວຫວີງທີ້ງ ແລະ ຂົວເຍີດເຕີນ. ແລະ ຫວ່າງແລ້ວນີ້ ຂົວ ດົງຈູ ຂ້າມແມ່ນ້ຳດວງ ກໍໄດ້ນຳເຂົ້າເຄື່ອນໄຫວກົງກັບໂອກາດ ສະເຫລີມສະຫລອງ 60 ປີແຫ່ງວັນປົດປ່ອຍ ນະຄອນຫລວງ ຮ່າໂນ້ຍ (10/10/1954-10/10/2014). ຂົວທັນສະໄຫມດັ່ງກ່າວ, ສະແດງໃຫ້ເຫັນພູມປັນຍາ, ຫົວຄິດປະດິດສ້າງ ແລະ ກຳລັງແຮງພາຍໃນຂອງຮ່າໂນ້ຍ ບົນເສັ້ນທາງປ່ຽນແປງໃຫມ່.
ຂົວທັງລອງ
ພາບ:internet
|
ເຖິງວ່າ ຊີວິດມີການປ່ຽນແປງຫລາຍຢ່າງ ແຕ່ສຳລັບຊາວນະຄອນຫລວງ ຮ່າໂນ້ຍ ຂົວລອງບຽນ ບໍ່ພຽງແຕ່ແມ່ນສັນຍາລັກຂອງຮ່າໂນ້ຍ ເທົ່ານັ້ນ ຫາກຍັງແມ່ນຫໍພິພິດທະພັນກາງແຈ້ງ ແມ່ນຮ່ອງຮອຍປະຫວັດສາດຂອງຮ່າໂນ້ຍ. ແຕ່ເພື່ອໃຫ້ສົມກັບນະຄອນຫລວງຂອງປະເທດຊາດ, ຮ່າໂນ້ຍ ບໍ່ສາມາດມີພຽງຂົວລອງບຽນເທົ່ານັ້ນ ຕ້ອງມີຂົວຫລາຍແຫ່ງອີກ. ສະນັ້ນ ປີ 1985 ພາຍຫລັງກໍ່ສ້າງມາເປັນເວລາ 10 ປີ, ຂົວທອງລອງ ໄດ້ນຳເຂົ້າເຄື່ອນໄຫວ. ຂົວແຫ່ງນີ້ແມ່ນສັນຍາລັກແຫ່ງນ້ຳໃຈມິດຕະພາບຫວຽດນາມ - ໂຊຫວຽດ. ສ່ວນຂົວເຈືອງເຢືອງ ກໍ່ໄດ້ຮັບການກໍ່ສ້າງຫ່າງຈາກຂົວທັງລອງ ປະມານ 2 ກິໂລແມັດ ໂດຍຫວຽດນາມ ອອກແບບ ແລະ ກໍ່ສ້າງເອງ. ຂົວແຫ່ງນີ້ ແມ່ນຄວາມເອກອ້າງທະນົງໃຈແຫ່ງພູມປັນຍາຫວຽດນາມ. ທ່ານ ຮ່າດີງເກີ໋ນ, ອະດີດຜູ້ອຳນວຍການບໍລິສັດຂົວ 12 ຊື່ງແມ່ນຫົວຫນ່ວຍປະຕິບັດການກໍ່ສ້າງຂົວເຈືອງເຢືອງ ໃຫ້ຮູ້ວ່າ:
“ພວກເຮົາພຽງແຕ່ມີຄວາມຕັດສິນໃຈ ແລະ ມີຄວາມຮັບຜິດຊອບຕໍ່ປະເທດຊາດເທົ່ານັ້ນ. ກຳລັງຍອດຢ້ຽມທັງໝົດລ້ວນແຕ່ຖືກນຳໃຊ້ໃນການກໍ່ສ້າງຂົວເຈືອງເຢືອງ. ພວກຂ້າພະເຈົ້າເຮັດວຽກຕະຫລອດວັນ ແລະ ຄືນ ບໍ່ຫວາດຫວັ່ນຕໍ່ຄວາມຫຍຸ້ງຍາກລຳບາກ ແລະ ສິ່ງທະທາຍຫຼາຍຢ່າງເຮັດແນວໃດເພື່ອນຳຂົວແຫ່ງນີ້ເຂົ້າເຄື່ອນໄຫວໂດຍໄວ. ພ້ອມກັບຂົວທັງລອງ, ຂົວເຈືອງເຢືອງ ໄດ້ປະກອບສ່ວນສ້າງຄວາມສະດວກໃຫ້ແກ່ການຈໍລະຈອນໄປມາຂອງປະຊາຊົນລະຫວ່າງຮ່າໂນ້ຍ ແລະ ບັນດາແຂວງ ພາກເຫນືອ, ພາກໃຕ້.”
ຂົວ 3 ແຫ່ງດັ່ງກ່າວ ບໍ່ທັນພຽງພໍສຳລັບນະຄອນພວມໃນທ່າພັດທະນາເທື່ອ. ໃນຂະນະທີ່ເຂດເສດຖະກິດຈຸດສຸມທາງພາກເຫນືອໄດ້ຮັບການກໍ່ສ້າງ, ດ້ວຍການພັດທະນາອຸດສາຫະກຳຢ່າງແຮງຂອງນະຄອນ ຫາຍຟ່ອງ, ກວ໋າງນີງ, ຫວີງຟຸກ, ສິນຄ້າສົ່ງອອກນຳເຂົ້າສ່ວນຫຼາຍແມ່ນຜ່ານທາງຫລວງເລກ 5 ແລະ ນະຄອນ ຮ່າໂນ້ຍ. ສະນັ້ນຈຶ່ງປະກົດມີແນວຄວາມຄິດກໍ່ສ້າງບັນດາຂົວຂ້າມແມ່ນ້ຳແດງແຫ່ງໃໝ່. ແລະ ຕົ້ນປີ 2007, ຂົວແທງຈີ ດ້ວຍ ທາງລົດ 6 ລານ, ລາຍຈ່າຍກໍ່ສ້າງປະມານ 5.700 ຕື້ດົງ ໄດ້ນຳເຂົ້າໃຊ້ການ, ກາຍເປັນຂົວຂ້າມແມ່ນ້ຳແດງຕົ້ນຕໍ ທີ່ເຊື່ອມຕໍ່ປະຕູທາງທິດຕາເວັນອອກຂອງຮ່າໂນ້ຍ ກັບທາງຫລວງ 1 A. ປີ 2010 ຂົວຫວີງຕູຍ ກໍໄດ້ຮັບການກໍ່ສ້າງສຳເລັດ, ຂົວແຫ່ງນີ້ໄດ້ເຊື່ອມຕໍ່ໃຈກາງນະຄອນຫລວງ ຮ່າໂນ້ຍ ກັບທາງຫລວງເລກ 5. ສາຍໄປຍັງຫາຍຟ່ອງ, ກວ໋າງນີງ ອອກສູ່ທະເລໃຫຍ່. ທ່ານ ເລຊວນທາວ, ຢູ່ເມືອງ ລອງບຽນ ຮ່າໂນ້ຍ ແບ່ງປັນວ່າ:
ຂົວແທງຈີ
|
“ສອງສາມປີມານີ້ ການກໍ່ສ້າງພື້ນຖານໂຄງລ່າງຢູ່ຮ່າໂນ້ຍ ໄດ້ພັດທະນາຢ່າງວ່ອງໄວ. ເສັ້ນທາງດ່ວນ, ເສັ້ນທາງອ້ອມຮອບ ເລກ 1, ເລກ 2, ເລກ 3 ຕໍ່ມາແມ່ນ ຂົວເຍີດເຕີນ ບໍ່ພຽງແຕ່ແມ່ນບັນດາກິດຈະກຳທັນສະໄຫມເທົ່ານັ້ນ ຫາກຍັງສ້າງຄວາມງາມໃຫ້ແກ່ນະຄອນອີກດ້ວຍ. ປະຊາຊົນພວກຂ້າພະເຈົ້າຮູ້ສຶກເອກອ້າງທະນົງໃຈ ແລະ ເຊື່ອໝັ້ນວ່າ ພາຍຫລັງມີຂົວທີ່ທັນສະໄຫມ ຫລາຍແຫ່ງນັ້ນ, ພາບພົດຂອງນະຄອນຫລວງຈະມີການປ່ຽນແປງຫລາຍຢ່າງ.”
ຂົວຫວິງຕູຍ
ພາບ:TTXVN
|
ນອກຈາກບັນດາຂົວທັນສະໄຫມດັ່ງກ່າວ, ຍັງມີຂົວແຫ່ງຫນຶ່ງອີກ ມີຄວາມຍາວເກືອບ 9 ກິໂລແມັດ ດ້ວຍເງິນລົງທຶນ 13.600 ຕື້ດົ່ງ ທີ່ເຊື່ອມຕໍ່ໃຈກາງນະຄອນຫລວງ ກັບສະຫນາມບິນສາກົນ ໄດ້ກໍ່ສ້າງສຳເລັດໂດຍພື້ນຖານ ແລະ ໃກ້ຈະນຳເຂົ້າເຄື່ອນໄຫວ. ຫວ່າງແລ້ວນີ້ ຂົວ ດົງຈູ ຊື່ງແມ່ນຂົວແຫ່ງທີ 7 ຢູ່ ຮ່າໂນ້ຍ ກໍໄດ້ຮັບການກໍ່ສ້າງສຳເລັດຖືກຕາມກຳນົດເວລາ ແລະ ຖືກນຳເຂົ້າເຄື່ອນໄຫວກົງກັບໂອກາດສະເຫລີມສະຫລອງ 60 ປີແຫ່ງວັນປົດປ່ອຍນະຄອນຫລວງ ຮ່າໂນ້ຍ. ພ້ອມກັບຂົວເຍີດເຕີນ, ຂົວ ດົງຈູ ຈະຊ່ວຍພັດທະນາເຂດຕົວເມືອງ, ເຂດອຸດສາຫະກຳ ຂ້າມແມ່ນ້ຳແດງ, ປະກອບສ່ວນສຳຄັນໃນການແກ້ໄຂສະພາບລົດຕິດໃຫ້ແກ່ທາງທິດເຫນືອຂອງນະຄອນ. ທ່ານ ຫວູວັນວ້ຽນ, ຫົວຫນ້າພະແນກຄົມມະນາຄົມຂົນສົ່ງ ຮ່າໂນ້ຍ ໃຫ້ຮູ້ວ່າ:
“ບັນດາກິດຈະກຳຄົມມະນາຄົມ ໄດ້ປະກອບສ່ວນສ້າງຜົນງານດ້ານເສດຖະກິດສັງຄົມໃຫ້ນະຄອນຫລວງ ຮ່າໂນ້ຍ. ຂົວທັນສະໄຫມຫລາຍແຫ່ງໄດ້ເຊື່ອມຕໍ່ເສັ້ນທາງຄົມມະນາຄົມ ລະຫວ່າງ ນະຄອນຫລວງ ຮ່າໂນ້ຍ ກັບບັນດາແຂວງພາກເໜືອ. ສິ່ງດັ່ງກ່າວໄດ້ຊ່ວຍໃຫ້ນະຄອນຫລວງຮ່າໂນ້ຍ ແລະ ບັນດາແຂວງພາກເຫນືອພັດທະນາເສດຖະກິດສັງຄົມ.”
ພາຍຫລັງນະຄອນຫລວງໄດ້ຮັບການປົດປ່ອຍເປັນເວລາ 60 ປີ, ຮ່າໂນ້ຍ ໄດ້ກາຍເປັນນະຄອນທັນສະໄຫມ, ສົມກັບສູນເສດຖະກິດ ການເມືອງ, ວັດທະນະທຳຂອງທົ່ວປະເທດ. ແລະ ບັນດາຂົວດັ່ງກ່າວ ໄດ້ ແລະ ພວມປະກອບສ່ວນເຮັດໃຫ້ພາບພົດຂອງນະຄອນຫລວງຍິ່ງສວຍງາມກວ່າ, ໝັ້ນຄົງເຂັ້ມແຂງບົນເສັ້ນທາງເຊື່ອມໂຍງ ແລະ ພັດທະນາ.