ເກາະເຈື່ອງຊາໃຫຍ່ (ແຂວງແຄ໋ງຮ່ວາ)
(ພາບອິນເຕີແນດ)
ຂ້າມໄລຍະທາງຍາວນັບຮ້ອຍໄມທະເລ, ທ່ານຈະໄປຮອດເກາະເຈື່ອງຊາໃຫຍ່ (ແຂວງແຄ໋ງຮ່ວາ), ຈາກທະເລທີ່ຫ່າງໄກຜູ້ຄົນທັງຫຼາຍສາມາດໄດ້ເຫັນທຸງຊາດສີແດງຢູ່ຂ້າງເສົາຫຼັກໝາຍຢັ້ງຢືນອະທິປະໄຕທີ່ພົ້ນເດັ່ນຂຶ້ນທ່າມກາງທ້ອງຟ້າສີຄາມ. ຈາກຂົວທ່າກ່ຳປັ່ນ, ໄປຜ່ານປະຕູໂຂງທີ່ມີແຖວໜັງສື: “ປະເທດ ສາທາລະນະລັດ ສັງຄົມນິຍົມ ຫວຽດນາມ - ເກາະເຈື່ອງຊາ” ແມ່ນເດີນກວ້າງຄືສະໜາມຫຼວງ, ໃນນັ້ນມີເສົາຫຼັກໝາຍຢັ້ງຢືນອະທິປະໄຕທີ່ຖືກກໍ່ສ້າງບົນພື້ນຫີນຢ່າງສະຫງ່າຜ່າເຜີຍ ແລະ ໝັ້ນຄົງ. ເສົາຫຼັກໝາຍຢັ້ງຢືນອະທິປະໄຕເປັນຮູບທາດມີ 4 ໜ້າຄືດັ່ງພວມບືນຕົວຂື້ນທ້ອງຟ້າ. ເທິງຍອດເສົາມີເຄື່ອງໝາຍແຫ່ງຊາດ ແລະ ຊື່ປະເທດ ສາທາລະນະລັດ ສັງຄົມນິຍົມ ຫວຽດນາມ, ຢູ່ໃຕ້ເສົາມີຮູບຄັນທູງສີແດງດາວເຫຼືອງ ດ້ວຍແຖວໜັງສື: ເກາະເຈື່ອງຊາ ໃນເສັ້ນຂະໜານ: 08-38'-30", ເສັ້ນແວງ: 111-55'-55”. ທັງ 4 ໜ້າຂອງພື້ນເສົາ ແມ່ນຮູບພາບກອງທອງ, ເຊິ່ງແມ່ນສັນຍາລັກແຫ່ງຄວາມສາມັກຄີບັນດາເຜົ່າຫວຽດນາມ. ພັນໂທ ດິງວັນຫາຍ, ຢູ່ເກາະເຈື່ອງຊາໃຫຍ່, ໃຫ້ຮູ້ວ່າ:
“ເກາະເຈື່ອງຊາໃຫຍ່ ແມ່ນເທດສະບານໃນທະເລຂອງຕາແສງຕ່າງໆໃນເກາະເຈື່ອງຊາ. ເສົາຫຼັກໝາຍຢັ້ງຢືນອະທິປະໄຕຢູ່ທີ່ນີ້ ຖືກກໍ່ສ້າງດ້ວຍວັດຖຸທີ່ບໍ່ສາມາດຈືດຈາງຕາມການເວລາໄດ້. ເທິງເກາະຍັງມີກິດຈະກຳຢັ້ງຢືນອະທິປະໄຕໜຶ່ງອີກນັ້ນແມ່ນທຸງຊາດ ຖືກຕິດດ້ວຍດິນເຜົາເຄືອບ ສາມາດຍືນຍົງຕະຫຼອດໄປໄດ້”.
ເກາະເຈື່ອງຊາດົງ (ຕາເວັນອອກ)
(ພາບອິນເຕີແນດ)
ສຳລັບທະຫານເຈື່ອງຊາ, ທຸງຊາດ ແລະ ເສົາຫຼັກໝາຍຢັ້ງຢືນອະທິປະໄຕໃນເກາະຕ່າງໆມີຄວາມໝາຍເຄັ່ງຂຶມ. ກ່ອນອື່ນໝົດ, ນີ້ແມ່ນສັນຍາລັກຢັ້ງຢືນອະທິປະໄຕຂອງຫວຽດນາມ; ທີສອງແມ່ນສະແດງໃຫ້ເຫັນກຳລັງແຮງ, ທີ່ຕັ້ງຂອງຫວຽດນາມ; ທັງສະແດງເຈດຈຳນົງ, ຄວາມຈົ່ງຮັກພັກດີ, ການເສັຍສະຫຼະຂອງບັນດານັກຮົບ; ທີສາມ, ທຸງຊາດ ແລະ ເສົາຫຼັກຢັ້ງຢືນອະທິປະໄຕຍັງສະແດງໃຫ້ເຫັນຄວາມໄວ້ເນື້ອເຊື່ອໃຈ, ຄວາມຮັກແພງອູ້ມຊູຊ່ວຍເຫຼືອເຊິ່ງກັນ ແລະ ກັນຂອງທັງປະເທດທີ່ມີຕໍ່ເຈື່ອງຊາ. ໃນເກາະແຕ່ລະແຫ່ງຢູ່ໝູ່ເກາະເຈື່ອງຊາຄື: ເຈື່ອງຊາດົງ (ຕາເວັນອອກ), ຊອງຕືດົງ (ຕາເວັນອອກ), ຊອງຕືໄຕ (ຕາເວັນຕົກ), ເກາະທ່ວຽນ (ເຮືອ), ເກາະຕົກຕານ, ຫຼືເກາະຕຽນໜື້ (ເທວະດາ)… ເຖິງວ່າຈະແມ່ນເກາະຟູ ຫຼືເກາະບໍ່ຟູ, ລ້ວນແຕ່ມີທຸງຊາດ ແລະ ເສົາຫຼັກໝາຍຢັ້ງຢືນອະທິປະໄຕ.
ຢູ່ໝູ່ເກາະເຈື່ອງຊາ, ຍັງມີສະຖານີໂຄມໄຟທະເລຢູ່ເກາະ 8 ແຫ່ງ ບໍ່ພຽງແຕ່ເປັນສັນຍານໃຫ້ກ່ຳປັ່ນ, ເຮືອແພໄປມາບົນທະເລໃນຍາມກາງຄືນເທົ່ານັ້ນ, ຫາກຍັງເປັນຫຼັກໝາຍຢັ້ງຢືນອະທິປະໄຕເກາະທະເລຂອງຫວຽດນາມ ອີກດ້ວຍ.
ດ້ວຍທີ່ຕັ້ງເປັນດ່ານໜ້າປົກປັກຮັກສາເຂດນ່ານທະເລ, ນ່ານຟ້າ, ປົກປັກຮັກສາອະທິປະໄຕທະເລເກາະນັ້ນ, ນັບແຕ່ຫຼາຍປີມານີ້, ຍາມໃດເຈື່ອງຊາ ກໍ່ໄດ້ຮັບຄວາມເອົາໃຈໃສ່ຢ່າງຫຼວງຫຼາຍຈາກລັດ, ການຊ່ວຍເຫຼືອ, ແບ່ງປັນທັງດ້ານວັດຖຸ, ຈິດໃຈຂອງປະຊາຊົນໃນທົ່ວປະເທດ. ມີຫຼາຍຂະບວນການມຸ່ງໄປສູ່ເຈື່ອງຊາ ໄດ້ຮັບການປຸກລະດົມ, ປະກອບສ່ວນລະດົມກຳລັງໃຈ, ເພີ່ມກຳລັງແຮງຕື່ມອີກໃຫ້ແກ່ທະຫານ ແລະ ປະຊາຊົນເຈື່ອງຊາ. ຫວ່າງແລ້ວນີ້, ຄະນະຊາວໜຸ່ມກອມມູນິດ ໂຮ່ຈີມິນ ໄດ້ມີຂໍ້ລິເລີ່ມກໍ່ສ້າງ “ເສົາຫຼັກໝາຍເຈື່ອງຊາ” ຢູ່ໂຮງຮຽນ ແລະ ທ້ອງຖີ່ນຕ່າງໆ ເພື່ອແນໃສ່ໂຄສະນາ ແລະ ສຶກສາໃຫ້ລຸ້ນໜຸ່ມກ່ຽວກັບອະທິປະໄຕເກາະທະເລທີ່ສັກກະລະບູຊາຂອງປະເທດຊາດ. ບໍ່ມີເວລາໃດທີ່ເສົາຫຼັກໝາຍພັດມີຄວາມໃກ້ຊິດກັບພວກນ້ອງນັກຮຽນຄືໃນປະຈຸບັນ. ອ້າຍຄູ ຟານຮ່ວາງຫາຍ, ໂຮງຮຽນມັດທະຍົມຕອນປາຍ ໂທດນົດ 2, ໃຫ້ຮູ້ວ່າ:
“ນັບແຕ່ມີເສົາຫຼັກໝາຍນີ້, ຄວາມຮັບຮູ້ຂອງພວກນ້ອງໃນການຮຽນວິຊາປະຫວັດສາດໄດ້ມີການຫັນປ່ຽນຢ່າງຈະແຈ້ງ ເມື່ອທຽບໃສ່ວິທີໂຄສະນາດ້ວຍຮູບເງົາ ຫຼືພາຫະນະຊົມເບິ່ງ. ພວກນ້ອງກໍ່ນິຍົມວິຊານີ້ກວ່າ”.
ເກາະຊອງຕືໄຕ (ຕາເວັນຕົກ)
(ພາບອິນເຕີແນດ)
ໃນຈິດໃຈຂອງຊາວຫວຽດນາມ, ຍາມໃດທະເລເກາະກໍ່ແມ່ນພາກສ່ວນໜຶ່ງທີ່ບໍ່ອາດຕັດແຍກອອກຈາກຜືນແຜ່ນດິນຂອງຫວຽດນາມ ໄດ້. ໃນການໂອ້ລົມກັບນັກຂ່າວວິທະຍຸກະຈາຍສຽງຫວຽດນາມ, ອະດີດນັກຮົບ ເຈິ່ນວັນຊວາດ (Tran Van Xuat) ຢູ່ຕາແສງຮ່ວາຫາຍ, ເມືອງງູແຮ່ງເຊີນ (Ngu Hanh Son), ນະຄອນດ່ານັ້ງ, ຜູ້ທີ່ເຄີຍເຂົ້າຮ່ວມການປົກປັກຮັກສາເກາະເຈື່ອງຊາດົງ ມາເປັນເວລາ 3 ປີ, ແບ່ງປັນວ່າ:
“ຂ້າພະເຈົ້າຢູ່ເກາະເຈື່ອງຊາດົງ ແຕ່ປີ 1984 – 1987, ນັ້ນແມ່ນໄລຍະປະສົບກັບຄວາມຫຍຸ້ງຍາກທີ່ສຸດ. ເມື່ອກັບເມືອບ້ານເຫັນວ່າຊີວິດຢູ່ເຂດດິນຕໍ່ແຜ່ນນັບມື້ນັບດີຂຶ້ນ, ຂ້າພະເຈົ້າຍິ່ງຄິດຮອດຄິດເຖິງເພື່ອນຮ່ວມກົມກອງ. ຂ້າພະເຈົ້າກໍ່ສ້າງເສົາຫຼັກໝາຍນີ້ເພື່ອຊອກຫາເພື່ອນຮ່ວມກົມກອງ ແລະ ຢາກໃຫ້ຜູ້ຄົນທັງຫຼາຍເຂົ້າໃຈແຈ້ງໄດ້ວ່າ ຮ່ວາງຊາ ແລະ ເຈື່ອງຊາ ແມ່ນຂອງຫວຽດນາມ”.
ເຈື່ອງຊາ ດ້ວຍບັນດາເກາະເປັນດ່ານໜ້າປົກປັກຮັກສາປະເທດຊາດ. ໃນນັ້ນກິດຈະກຳແຕ່ລະແຫ່ງ ແລະ ທະຫານແຕ່ລະຄົນລ້ວນແຕ່ແມ່ນເສົາຫຼັກໝາຍທີມີພະລັງຊີວິດຢ່າງແຮງກ້າ. ເຂົາເຈົ້າພວມດັດສິນໃຈປົກປັກນັກສາຜືນແຜ່ນດິນຂອງປະເທດຊາດ. ບັນດາເສົາຫຼັກໝາຍຢັ້ງຢືນອະທິປະໄຕ ກໍ່ຝັງເລິກໃນຈິດໃຈຂອງຊາວຫວຽດນາມ ແຕ່ລະຄົນ, ເມື່ອປະຊາຊົນໃນທົ່ວປະເທດພວມມຸ່ງໄປສູ່ເຈື່ອງຊາ ດ້ວຍຈິດໃຈ ທຸກສິ່ງທຸກຢ່າງເພື່ອພາລະກິດສ້າງສາ ແລະ ປົກປັກຮັກສາອະທິປະໄຕທະເລເກາະຂອງປະເທດຊາດ.