(vovworld)- 70 ປີຜ່ານມາ ນັບແຕ່ວັນທີ 19/8/1945, ການປະຕິວັດເດືອນສິງຫາ ສຳເລັດຜົນ ແລະ ວັນຊາດທີ 2/9/1945, ທ່ານປະທານໂຮ່ຈິມີນ ອ່ານບົດຖະແຫລງປະກາດເອກະລາດສະຖາປະນາປະເທດ ສາທາລະນະລັດປະຊາທິປະໄຕ ຫວຽດນາມ ມາຮອດປະຈຸບັນ ຫວຽດນາມຈາກ ລັດຂອງກຳມະກອນ ຊາວນາທີ່ຫນຸ່ມແຫນ້ນ ໄດ້ບືນຂຶ້ນກາຍເປັນປະເທດພັດທະນາຢ່າງຂະຫຍັນຂັນເຄື່ອນຢູ່ພາກພື້ນ ອາຊີຕາເວັນອອກສ່ຽງໃຕ້. ໄລຍະ 70 ປີຜ່ານມາ, ຫວຽດນາມ ໄດ້ດຳເນີນການປະຕິວັດ ຊາດ, ປະຊາທິປະໄຕ, ກໍ່ສ້າງສັງຄົມນິຍົມ, ສ້າງສາປະເທດຊາດເທື່ອລະກ້າວໃຫ້ເຂັ້ມແຂງ, ສວຍງາມກວ່າ ຄືດັ່ງຄວາມມຸ້ງຫວັງໃນຄຳພິໄນກຳຂອງປະທານໂຮ່ຈິມີນ ຊື່ງໄດ້ວາດພາບຜ່ານຮູບພາບທີ່ເຕັມໄປດ້ວຍຄວາມໝາຍໃນ ປື້ມ “ປະເທດຊາດ ແລະຊາວ ຫວຽດນາມ -ຜົນງານຜ່ານ 70 ປີແຫ່ງການສ້າງສາ ແລະພັດທະນາ” ຂອງສຳນັກຂ່າວສານຫວຽດນາມ. ບົດຂຽນຂອງນັກຂ່າວ ລານແອງ
 |
ປື້ມຫົວນີ້ໄດ້ແບ່ງເປັນ 3 ພາກ: ພາກທີຫນຶ່ງ: ຫວຽດນາມ ເອກະລາດ, ເສລີພາບ ແລະ ທ້ອນໂຮມປະເທດຊາດເປັນເອກະພາບ; ພາກທີສອງ: ຫວຽດນາມ ໃນໄລຍະສັນຕິພາບ, ປ່ຽນໃຫມ່, ເຊື່ອມໂຍງ ແລະພັດທະນາ; ພາກທີ 3: ຫວຽດນາມ ປະເທດສວຍງາມ, ມີມູນເຊື້ອວັດທະນະທຳຫລາຍຮູບຫລາຍແບບ. ແຕ່ລະພາກແມ່ນບັນດາຮູບພາບທີ່ເຕັມໄປດ້ວຍຄວາມປະທັບໃຈ ແລະ ຂໍ້ມູນຂ່າວຫລາຍຢ່າງ, ມີລັກສະນະປະຫວັດສາດ. ຕາມທ່ານ ຫງວຽນຮ່ວາຍເຢືອງ, ຮອງຜູ້ອຳນວຍການໃຫຍ່ ສຳນັກຂ່າວສານ ຫວຽດນາມ ແລ້ວ, ຜ່ານ ພາບເອກະສານທີ່ມີຄຸນຄ່າ ກວ່າ 400 ແຜ່ນ ຂອງສຳນັກຂ່າວສານຫວຽດນາມ ໄດ້ສະແດງໃຫ້ເຫັນໄລຍະ 70 ປີຂອງການປະຕິວັດຫວຽດນາມ.
“ພາບຖ່າຍ 400 ກວ່າແຜ່ນເຫລົ່ານັ້ນ ເປັນຂີດໝາຍສຳຄັນທີ່ສຸດ, ແມ່ນຈຸດເວລາໃນວິວັດການປະຫວັດສາດຂອງປະເທດຊາດໃນ 70 ປີຜ່ານມາ. ຈາກໄລຍະຕໍ່ຕ້ານຕ້ານພວກລ່າເມືອງຂຶ້ນຝລັ່ງ ແລະ ຈັກກະພັດອາເມລິກາ ຕະຫລອດຮອດໄລຍະສ້າງສາ ແລະ ປົກປັກຮັກສາປະເທດຊາດ, ການເຊື່ອມໂຍງ ແລະ ພັດທະນາ.”
ພາບຖ່າຍແຕ່ລະແຜ່ນລ້ວນແຕ່ເຮັດໃຫ້ຜູ້ຊົມຕ້ອງຄຳນຶງຫລາຍຢ່າງ ແລະ ມີຄວາມປະທັບໃຈ. ໃນນັ້ນ ມີຮູບພາບປະທານໂຮ່ຈິມີນ ນຸ່ງຊຸດໂສ້ງເສື້ອທີ່ລຽບງ່າຍອ່ານຖະແຫລງປະກາດເອກະລາດຢູ່ສະຫນາມຫລວງ ບາດີງ ເມື່ອວັນທີ 2/9/1945 ຫລື ຮູບຂາວດຳ ກ່ຽວກັບຕະຫລາດ ເບນແທ່ງ -ໄຊງ່ອນ ໃນຊຸມມື້ໄລຍະຕົ້ນຂອງການຕໍ່ຕ້ານຕ້ານລ່າເມືອງຂຶ້ນຝລັ່ງ, ຮູບພາບລົດຖີບຂົນສົ່ງອາວຸດ ແລະ ເຄື່ອງຂອງອອກສູ່ສະຫນາມຮົບ ຫລືຮູບພາບແມ່ຍິງ ແບກລູກປືນອອກສູ່ແນວຮົບເພື່ອຮັບໃຊ້ການຕໍ່ສູ້ຕ້ານສັດຕູ. ທັງໝົດເຫລົ່ານັ້ນລ້ວນແຕ່ເຮັດໃຫ້ໃຫ້ຜູ້ຊົມມີຄວາມຮູ້ສຶກຫລາຍຢ່າງ ກໍຄືຄິດເຖິງພະລັງຊີວິດ, ກຳລັງຕໍ່ສູ້ຢ່າງອົງອາດກ້າຫານ ແລະ ມີຄວາມປະເອີບໃຈ, ນ້ຳໃຈຮັກຊາດຂອງຊາດຫວຽດນາມໃນໄລຍະຕໍ່ສູ້ຕ້ານສັດຕູຢ່າງລຳບາກກາກກຳ, ຍືດເຍື້ອຍາວນານ. ທ່ານນາງ ຟຸ່ງທິໝີ, ຮອງຜູ້ອຳນວຍການໃຫຍ່ ສຳນັກພິມຈຳຫນ່າຍສຳນັກຂ່າວສານ ໃຫ້ຮູ້ວ່າ:
“ບັນດາຮູບພາບກ່ຽວກັບໄລຍະສົງຄາມ ຊື່ງພວກຂ້າພະເຈົ້າຮຽບຮຽງເປັນປື້ມຫົວນີ້ຄືດັ່ງວາດພາບເຖິງໄລຍະທາງໃນສົງຄາມຂອງຊາດ, ຈາກໄລຍະທີ່ທົ່ວປະເທດດຳເນີນເຫດການການປະຕິວັດເດືອນສິງຫາສຳເລັດຜົນ, ເຫດການປະທານໂຮ່ຈິມີນ ອ່ານບົດຖະແຫລງປະກາດເອກະລາດຢູ່ສະຫນາມຫລວງ ບາດີງ. ເມື່ອປະຕິບັດການຮຽບຮຽງຮູບພາບທັງໝົດເຫລົ່ານັ້ນ ພວກຂ້າພະເຈົ້າລ້ວນແຕ່ຮູ້ສຶກຕື້ນຕັນໃຈທີ່ສຸດຕໍ່ໄລຍະສະຫງ່າອົງອາດຂອງຊາດຫວຽດນາມ.”
ຈຸດເດັ່ນໃນປື້ມຫົວນີ້ ນັ້ນແມ່ນບັນດາຜົນງານແຫ່ງການພັດທະນາເສດຖະກິດສັງຄົມ ໄລຍະ ແຕ່ປີ 1975 ມາຮອດປະຈຸບັນ. ນັ້ນແມ່ນໄລຍະປ່ຽນແປງໃຫມ່ ແລະ ສ້າງສາປະເທດຊາດ. ໃນປື້ມຫົວນີ້ ຮູບພາບສ່ວນຫລາຍແມ່ນວາດພາບເຖິງປະເທດ ຫວຽດນາມ ມານະພະຍາຍາມແກ້ໄຂຜົນຮ້າຍຈາກສົງຄາມ, ສ້າງສາປະເທດຊາດ, ພັດທະນາ ໃນທຸກຂົງເຂດ ແຕ່ ບໍ່ຫລົງລືມການອະນຸລັກຮັກສາ ເສີມຂະຫຍາຍຄຸນຄ່າມໍລະດົກວັດທະນະທຳທີ່ເປັນເອກະລັກສະເພາະຂອງຊາດ. ທ່ານນາງ ຟຸ່ງທິໝີ, ໃຫ້ຮູ້ວ່າ:
“ບໍ່ບໍ່ສຸມໃສ່ຫລາຍເກີນໄປເຖິງຫົວເລື່ອງກ່ຽວກັບສົງຄາມ, ພວກຂ້າພະເຈົ້າລົງເລິກບັນດາຜົນງານຂອງປະເທດ. ພິເສດໄລຍະພາຍຫລັງພາກໃຕ້ໄດ້ຮັບການປົດປ່ອຍ, ຫວຽດນາມ ກ້າວຂຶ້ນສັງຄົມນິຍົມ, ໄລຍະ 30 ປີ ແຫ່ງກິດຈະການປ່ຽນແປງໃຫມ່ ບັນລຸໄດ້ຜົນງານຫລາຍຢ່າງໃນທຸກຂົງເຂດ ເສດຖະກິດ, ການເມືອງ ວັດທະນະທຳ.”
ພາບຖ່າຍແຕ່ລະແຜ່ນ ລ້ວນແຕ່ແມ່ນບົດປະພັນ ທັງດ້ານສື່ມວນຊົນ ແລະ ສິລະປະ. ປື້ມຫົວນີ້ໄດ້ຮັບການພິມຈຳຫນ່າຍ ກໍແມ່ນຄວາມເອກອ້າງທະນົງໃຈມູນເຊື້ອຮັກຊາດ, ເຈດຈຳນົງເພິ່ງຕົນເອງ ສ້າງຄວາມເຂັ້ມແຂງດ້ວຍຕົນເອງ, ຄວາມມຸ້ງຫວັງສັນຕິພາບຂອງຊາດ, ສະແດງໃຫ້ເຫັນຄວາມຮູ້ບຸນຄຸນຢ່າງເລິກເຊິ່ງຕໍ່ຄົນລຸ້ນກ່ອນໆທີ່ໄດ້ເສຍສະຫລະຊີວິດເພື່ອເອກະລາດແຫ່ງຊາດ, ທ້ອນໂຮມປະເທດຊາດເປັນເອກະພາບ. ປື້ມຫົວນີ້ກໍແມ່ນສານສົ່ງເຖິງເພື່ອນມິດສາກົນກ່ຽວກັບປະເທດຫວຽດນາມ ມີອະທິປະໄຕ ພວມຢູ່ໃນທ່າປ່ຽນແປງໃຫມ່, ເຊື່ອມໂຍງເຂົ້າກັບສາກົນ ແລະ ຍາມໃດກໍພ້ອມແລ້ວເປັນເພື່ອນກັບທຸກປະເທດໃນໂລກ ເພື່ອໂລກສະຖຽນລະພາບ, ສັນຕິພາບ ແລະ ພັດທະນາແບບຍືນຍົງ.