(vovworld) - ໂດຍຫ່າງຈາກຮ່າໂນ້ຍ ໄປທາງທິດຕາເວັນຕົກສຽງເໜືອ 130 ກ.ມ, ປ່າສະຫງວນແຫ່ງຊາດຊວນເຊີນ ແມ່ນທັດສະນີຍະພາບທີ່ສວຍງາມຂອງແຂວງຟູ໋ທໍ້. ປ່າດົງດິບຢູທີ່ນີ້ ຍັງຄົງຮັກສາຄວາມງາມແບບທຳມະຊາດ ພ້ອມກັບລະບົບພືກສາຊາດ, ສັດສາວາສິ່ງທີ່ອຸດົມສົມບຸນ, ອັນໄດ້ສ້າງເປັນພາບພົດທຳມະຊາດທີ່ສວຍງາມ. ດ້ວຍລະບົບພູຜາປ່າໄມ້ທີ່ໃຫຍ່ໂຕມະໂຫຖານ, ເປີ້ນພູສູງ, ຖ້ຳຜາຫີນທີ່ມະຫັດສະຈັນ ແລະ ຫ້ວຍນ້ຳໄຫຼຜາດໆກາງປ່າ, ປ່າສະຫງວນແຫ່ງຊາດຊວນເຊີນ ໄດ້ຮັບຖືວ່າແມ່ນສະຖານທີ່ທ່ອງທ່ຽວຊີວະພາບທີ່ສ້າງຄວາມດູດດື່ມທີ່ສຸດ.
ປ່າສະຫງວນແຫ່ງຊາດຊວນເຊີນ
(ພາບ: google.com.vn)
ປ່າສະຫງວນແຫ່ງຊາດຊວນເຊີນ ຂຶ້ນກັບເມືອງແທງເຊີນ, ແຂວງຟູ໋ທໍ້, ນອນຢູ່ຕອນໃຕ້ສາຍພູຮ່ວາງລຽນເຊີນ ທີ່ໃຫຍ່ໂຕມະໂຫຖານ, ປ່າສະຫງວນແຫ່ງຊາດຊວນເຊີນ ແມ່ນປ່າສະຫງວນແຫ່ງໜຶ່ງດຽວທີ່ມີປ່າດົງດິບເທິງພູຫີນປູນ ທີ່ມີຄວາມສູງແຕ່ 700 – 1300 ມ. ດ້ວຍຊີວະພາບຫຼາຍຮູບຫຼາຍແບບ ແລະ ທຳມະຊາດທີ່ເປັນເອກະລັກສະເພາະ, ປ່າສະຫງວນແຫ່ງຊາດຊວນເຊີນ ຖືກຈັດອັນດັບທີ 12 ໃນຈຳນວນປ່າສະຫງວນແຫ່ງຊາດ 30 ແຫ່ງຂອງຫວຽດນາມ. ດ້ວຍເນື້ອທີ່ທັງໝົດກວ່າ 15.000 ເຮັກຕາ, ເຂດເຊື່ອມຕໍ່ກວ່າ 18.000 ເຮັກຕາ, ເຂດປ່າປ້ອງກັນກວ່າ 9000 ເຮັກຕາ, ປ່າສະຫງວນແຫ່ງຊາດຊວນເຊີນ ມີປ່າດົງດິບເທິງປ່າຫີນປູນກວ້າງປະມານ 2.400 ເຮັກຕາ. ປະຈຸບັນ, ຢູ່ປ່າສະຫງວນແຫ່ງຊາດຊວນເຊີນ ມີພືກສາຊາດ ແລະ ຕົ້ນໄມ້ທີ່ມີຄ່າຫາຍາກນັບຮ້ອຍຊະນິດຄື: ຕົ້ນຈິກ , ໄມ້ຍາງ , ໄມ້ສີສຽດ (nghien), doi, ຕົ້ນຊາງລໍ (vau)…ໃນນັ້ນປ່າ ໄມ້ຍາງ (cho chi) ຢູ່ຊວນເຊີນ ແມ່ນໜຶ່ງໃນບັນດາປ່າທີ່ສວຍງາມແລະອຸດົມສົມບູນທີ່ສຸດຢູ່ພາກເໜືອ. ປີ 2005, ທ່ານນາຍົກລັດຖະມົນຕີຫວຽດນາມ ໄດ້ຕົກລົງຍົກລະດັບປ່າຊວນເຊີນ ໃຫ້ເປັນປ່າສະຫງວນແຫ່ງຊາດ. ທ່ານ Dang Van Lau , ຜູ້ອຳນວຍການປ່າສະຫງວນຊວນເຊີນ, ໃຫ້ຮູ້ວ່າ:
“ຊວນເຊີນ ນອນໃນເຂດຊີວະນາໆພັນຂອງຫວຽດນາມ, ທີ່ຂຶ້ນກັບສາຍພູຮ່ວາງລຽນເຊີນ. ປ່າສະຫງວນແຫ່ງຊາດຊວນເຊີນ ມີພືກສາຊາດ 1.217 ປະເພດ, ໃນນັ້ນ 665 ປະເພດແມ່ນພຶກສາສະໝູນໄພ, 300 ຊະນິດທັງແມ່ນພຶດສະໝູນໄພ ທັງແມ່ນພຶກສາຜະລິດສະບຽງອາຫານ. ນີ້ແມ່ນຄວາມສາມາດບົ່ມຊ້ອນອັນໃຫຍ່ຫຼວງ ທີ່ຮັບໃຊ້ໃຫ້ແກ່ຂະແໜງທ່ອງທ່ຽວ ແລະ ການພັດທະນາປະຊາຄົມຢູ່ທ້ອງຖີ່ນ”.
ປ່າສະຫງວນແຫ່ງຊາດຊວນເຊີນ
(ພາບ: google.com.vn)
ປ່າສະຫງວນແຫ່ງຊາດຊວນເຊີນ ແມ່ນສາງທຳມະຊາດອັນລ້ຳຄ່າ ໃນເຂດປ່າດົງດິບເທິງພູຫີນປູນ. ປະຈຸບັນ, ພະນັກງານ, ພາລະກອນທີ່ເຮັດວຽກໃນປ່າ ແລະ ປະຊາຊົນທ້ອງຖີ່ນພວມປ້ອງກັນປ່າຢ່າງເຄັ່ງຄັດ, ທ່ານ Le Van Tam, ນັກວິສາວະກອນປ່າໄມ້ຢູ່ປ່າສະຫງວນແຫ່ງຊາດຊວນເຊີນ, ໃຫ້ຮູ້ວ່າ:
”ເທິງພູຫີນປູນຕົ້ນໄມ້ປົ່ງຂຶ້ນຍາກ, ດັ່ງນັ້ນ, ເມື່ອຖືກທຳລາຍຈະບໍ່ສາມາດປູກຄືນໃໝ່ໄດ້. ເວົ້າລວມແລ້ວ, ລະບົບຊີວະພາບຢູ່ເປີນພູຫີນປູນສ່ວນຫຼາຍແມ່ນປະເພດທີ່ລ້ຳຄ່າຫາຍາກ. ປະຈຸບັນ, ປ່າສະຫງວນຊວນເຊີຍ ມີຕົ້ນໄມ້ອັນລ້ຳຄ່າຫຼາຍປະເພດຖືກຈັດເຂົ້າໝວດ 3 ແລະ ໝວດ 4”
ປ່າສະຫງວນແຫ່ງຊາດຊວນເຊີນ
(ພາບ: google.com.vn)
ນອກຈາກລະບົບພືກສາຊາດທີ່ມີຫຼາຍຮູບຫຼາຍແບບແລ້ວ, ປ່າສະຫງວນແຫ່ງຊາດຍັງມີສັດ 365 ປະເພດ, ໃນນັ້ນມີ 46 ປະເພດຖືກຈົດໃນປຶ້ມປົກແດງ (ປື້ມບັນຊີລາຍຊື່ສັດແລະພືດສາຊາດທີ່ມີຄ່າຫາຍາກ) ຂອງຫວຽດນາມ ແລະ 18 ປະເພດຖືກຈົດໃນປື້ມປົກແດງຂອງໂລກ. ຄື ວອກໜົ່ນ, ທະນີ, ກະຮອກເອິກແດງຫາງຂາວ, ໝີ, ເສືອດາວ….ສ່ວນນົກມີ: ໄກ່ຕອກ, ນົກອິນຊີ …. ປ່າສະຫງວນແຫ່ງຊາດຍັງດືງດູດແຂກທີ່ມາຈາກທຸກສາລະທິດ, ເພາະວ່າ, ໃນປ່າດົງດິບມີໄກ່ຫຼາຍເດືອຍ.
ນອກຈາກຄວາມດຶງດູດຂອງລະບົບພຶກສາຊາດທີ່ອຸດົມສົມບູນແລ້ວ, ຊວນເຊີນ ຍັງມີທັດສະນີຍະພາບມະຫັດສະຈັນຫຼາຍແຫ່ງອີກ. ໃນບໍລິເວນປ່າສະຫງວນຊວນເຊີນ ມີພູສູງກວ່າ 1.000 ມ, 3 ໜ່ວຍຄື: ພູວອຍ (ຊ້າງ), ພູແຕນ ແລະ ພູເກິນ, ດ້ວຍຖ້ຳນັບຮ້ອຍແຫ່ງ ແລະ ຫ້ວຍນ້ຳຫຼາຍສາຍເຊັ່ນ: ຫ້ວຍເລິບ, ຫ້ວຍທາງ ແລະ ຕາດນ້ຳສູງ 50 ມ ຫຼາຍແຫ່ງ, ສີຂາວຂອງນ້ຳຕົກຕາດປະສານກັບສີຂຽວຂອງປ່າດົງດິບ ໄດ້ສ້າງເປັນທັດສະນີຍະພາບທັງໃຫຍ່ໂຕມະໂຫຖານ, ທັງສວຍງາມດັ່ງໃນຝັນ. ຢູ່ຊວນເຊີນ ມີຖ້ຳຫີນ 16 ແຫ່ງ ດ້ວຍນົມຜາຫຼາຍຮູບຫຼາຍແບບທີ່ສວຍງາມ. ໃນນັ້ນຖ້ຳຕຽນ (ສັບປະດາ) ແມ່ນຖ້ຳຢູ່ໃນພູຫີນອ່ອນ, ຍາວ 10 ກມ. ໃນຖ້ຳມີຊ່ອງປ່ອງລົມຂຶ້ນຈອມພູ, ເຮັດໃຫ້ອາກາດໃນຖ້ຳເຢັນສະບາຍ. ນີ້ກໍ່ແມ່ນແຫ່ງທີ່ດຶງດູດນັກທ່ອງທ່ຽວມາຢ້ຽມຢາມ.
ປ່າສະຫງວນແຫ່ງຊາດຊວນເຊີນ
(ພາບ: google.com.vn) ອາກາດຢູ່ຊວນເຊີນ ໃນມື້ໜຶ່ງມີ 4 ລະດູ, ຕອນເຊົ້າເຢັນສະບາຍ, ອາກາດປອດໂປ່ງຄືໃນລະດູບານໃໝ່, ຕອນທ່ຽງອາກາດອົບອຸ່ນຄືລະດູຮ້ອນ, ຕອນແລງອາກາດຄືລະດູໃບໄມ້ຫຼົ່ນ, ຕອນຄຳອາກາດແຊ່ເຢັນຄືລະດູໜາວ. ດ້ວຍຄວາມສາມາດບົ່ມຊ້ອນກ່ຽວກັບທຳມະຊາດ, ທັດສະນີຍະພາບນັ້ນ, ຊວນເຊີນພວມສ້າງຄວາມດຶງດູດນັກທ່ອງທ່ຽວທັງຢູ່ພາຍໃນ ແລະ ຕ່າງປະເທດມາຢ້ຽມຢາມເປັນຈຳນວນຫຼວງຫຼາຍ.