(vovworld) - ເລື່ອງນ້ອງ Nguyen Kim Phuong, ອາຍຸ 18 ປີ, ນັກຮຽນຂອງໂຮງຮຽນມັດທະຍົມຕອນປາຍລົງເລິກວິຊາທັງລອງ ດ່າລາດ (ແຂວງເລິມດົ່ງ) ເສັງໄດ້ທີໜຶ່ງໃນການເສັງເຂົ້າມະຫາວິທະຍາໄລຫວ່າງແລ້ວນີ້ດ້ວຍຄະແນນເຕັມ 30/30 ນັ້ນ ໄດ້ນຳມາເຊິ່ງຄວາມເບີກບານມ່ວນຊື່ນບໍ່ສະເພາະແຕ່ສຳລັບຄອບຄົວນ້ອງເທົ່ານັ້ນ, ຫາກຍັງໃຫ້ທັງຄຸ້ມບ້ານ, ຄູອາຈານ ແລະ ເພື່ອນມິດອີກດ້ວຍ. ສິ່ງທີ່ແປກປະຫຼາດນັ້ນແມ່ນ, ຜົນງານດັ່ງກ່າວພັດມາຈາກວິທີການຮຽນຢ່າງຮອບດ້ານ ໂດຍບໍ່ຖືເອົາບັນຫາຄະແນນເປັນຕົ້ນຕໍ.
Nguyen Kim Phuong
ໃນຊຸມມື້ນີ້, ມີເພື່ອນມິດ, ຍາດຕິພີ່ນ້ອງຫຼາຍຄົນມາຢ້ຽມຢາມແລະອວຍພອນ Nguyen Kim Phuong ທີ່ໄດ້ຮັບຜົນງານດີເດັ່ນໃນການເສັງເຂົ້າມະຫາວິທະຍາໄລຄັ້ງຜ່ານມາ. ແຕ່ໃນເລື່ອງລາວທີ່ໂອ້ລົມກັບທຸກຄົນ, Nguyen Kim Phuong ພັດຖືວ່າຕົນເອງແມ່ນນັກຮຽນທຳມະດາ, ບໍ່ມີຫຍັງພົ້ນເດັ່ນເມື່ອທຽບໃສ່ໝູ່ເພື່ອນ. ໃນການຮ່ຳຮຽນ Phuong ກໍ່ບໍ່ເຄີຍຖືເອົາຄະແນນເປັນບັນຫາຕົ້ນຕໍ, ດັ່ງນັ້ນຈິ່ງຮ່ຳຮຽນດ້ວຍຄວາມສະບາຍໃຈທີ່ສຸດ
”ນ້ອງຄິດວ່າບໍ່ຄວນຮຽນຕາມຮູບແບບໃດໜຶ່ງຢ່າງຕາຍຕົວ, ເພາະວ່າແຕ່ລະຄົນຈະຮັບເອົາຄວາມຮູ້ຕາມວິທີສະເພາະຂອງຕົນ, ດັ່ງນັ້ນຄວນເລືອກເອົາຮູບການທີ່ເໝາະສົມໃຫ້ແກ່ຕົນມັນຈະດີກວ່າ. ສ່ວນນ້ອງໄດ້ເລືອກເອົາຮູບການຮ່ຳຮຽນທີ່ງ່າຍດາຍນັ້ນແມ່ນກຳແໜ້ນຄວາມຮູ້ພື້ນຖານ ແລະ ຮຽນເມື່ອຮູ້ສຶກສະບາຍໃຈ. ແຕ່ເວລາຮຽນຕ້ອງພະຍາຍາມສຸມຈິດສຸມໃຈ”.
ຮຽນຢູ່ເຮືອນແມ່ນຕາມຄວາມສະບາຍໃຈ, ແຕ່ໃນຫ້ອງຮຽນ Phuong ພັດເອົາໃຈໃສ່ທີ່ສຸດ. ດ້ວຍທິດນຳທີ່ວ່າ: ບໍ່ພຽງແຕ່ຮັບຟັງຄູສອນເທົ່ານັ້ນ, ຫາກຕ້ອງພະຍາຍາມເຂົ້າໃຈເນື້ອໃນຄວາມຮູ້ໃນທຸກແງ່ມູມທີ່ແຕກຕ່າງກັນໃຫ້ໄດ້ຢ່າງວ່ອງໄວ. ນ້ອງຖືວ່າ, ພຽງແຕ່ຫັນວິທີການຂອງຄູອາຈານໃຫ້ເປັນວິທີການສະເພາະຂອງຕົນຈຶ່ງສາມາດຈື່ໄດ້ຢ່າງຍາວນານ ແລະ ຫມູນໃຊ້ໃນທຸກກໍລະນີໄດ້
”ໃນຫ້ອງຮຽນເຮົາເອົາໃຈໃສ່ຮັບຟັງ. ຄູອາຈານອະທິບາຍຫຼາຍສິ່ງຫຼາຍຢ່າງ, ແຕ່ເຮົາຕ້ອງຫັນຄວາມຮູ້ເຫຼົ່ານັ້ນໃຫ້ເປັນຄວາມຮູ້ຂອງຕົນ. ຕົວຢ່າງຄືຄູອາຈານສອນບົດຮຽນແລ້ວ, ເຮົາຕ້ອງຊອກຮູ້ເປັນຫຍັງຈຶ່ງຄືແນວນັ້ນ, ແລ້ວເຮົາຈະໝູນໃຊ້ເຂົ້າໃນເລກໂຈດອື່ນໆ. ແຕ່ຕ້ອງມີຫົວຄິດປະດິດສ້າງໃນບົດແກ້ ຂອງຕົນ”
Nguyen Kim Phuong
ເອື້ອຍຄູ Dam Thi Kinh ຫົວໜ້າອຳນວຍການ ໂຮງຮຽນມັດທະຍົມຕອນປາຍລົງເລິກວິຊາທັງລອງ ດ່າລາດເວົ້າວ່າ, Phuong ຮຽນໄດ້ດີທຸກວິຊາ. ຄະແນນສະເລ່ຍທຸກວິຊາຂອງນ້ອງໃນສົກຮຽນສຸດທ້າຍ ຊັ້ນມັດທະຍົມ ຕອນປາຍພຽງແຕ່ຈັດອັນດັບ 5 ໃນຈຳນວນນັກຮຽນເກັ່ງໃນ ຫ້ອງດຽວກັນເທົ່ານັ້ນ. ເອື້ອຍຄູ Dam Thi Kinh ຖືວ່າ, ໄດ້ຄະແນນເຕັມໃນການເສັງເຂົ້າມະຫາວິທະຍາໄລຂອງ Phuong ອາດຈະແມ່ນໝາກຜົນຂອງວິທີຮຽນ ແລະ ສອນຢ່າງຮອບດ້ານເຊິ່ງທາງໂຮງຮຽນພວມມານະພະຍາຍາມສ້າງຂຶ້ນ
”ໃນຊຸມປີມໍ່ໆມານີ້, ພວກຂ້າພະເຈົ້າໄດ້ກຳນົດທິດຢ່າງຈະແຈ້ງນັ້ນແມ່ນສ້າງສະພາບແວດລ້ອມແຫ່ງການສຶກສາຢ່າງຮອບດ້ານ. ບົນພື້ນຖານການສຶກສາຂອງໂຮງຮຽນ, ພວກເຮົາຍັງສ້າງການເຄື່ອນໄຫວຫຼາຍຢ່າງໃຫ້ແກ່ພວກນ້ອງອີກ, ດັ່ງນັ້ນຮຽນຢູ່ໂຮງຮຽນລົງເລິກວິຊາທັງລອງເມື່ອທຽບໃສ່ໂຮງຮຽນສາມັນອື່ນໆ, ພວກນ້ອງຕ້ອງມີຄວາມມານະພະຍາຍາມຫຼາຍກວ່າ, ຕ້ອງຮູ້ຜ່ານຜ່າຄວາມຫຍຸ້ງຍາກເພື່ອປະຕິບັດຄວາມມຸ້ງຫວັງຂອງຕົນ. ດັ່ງນັ້ນຈຶ່ງມີນັກຮຽນຫຼາຍຄົນປະສົບຜົນສຳເລັດໃນການເສັງເຂົ້າມະຫາວິທະຍາໄລ ດ້ວຍຄະແນນສູງພໍສົມຄວນ. ແລະ ປີນີ້ Phuong ແມ່ນຄວາມເອກອ້າງທະນົງໃຈຂອງນັກຮຽນ ແລະ ຄູອາຈານພວກເຮົາ”.
ນອກຈາກເສັງເຂົ້າມະຫາວິທະຍາໄລແພດສາດໄດ້ ດ້ວຍຄະແນນ 30/30 ນັ້ນ, Phuong ຍັງເສັງເຂົ້າພະແນກເລກ, ມະຫາວິທະຍາໄລສ້າງຄູນະຄອນ ໂຮ່ຈີມິນໄດ້ດ້ວຍ 25 ຄະແນນອີກ. ສິ່ງທີ່ຊ່ວຍນ້ອງບັນລຸໄດ້ຜົນງານດັ່ງກ່າວ, ນອກຈາກກຳແໜ້ນຄວາມຮູ້ແລ້ວ ແມ່ນຕ້ອງມີຄວາມລະມັດລະວັງໃນການສອບເສັງອີກດ້ວຍ.
”ພາຍຫຼັງເຮັດບົດເສັງສຳເລັດ ເຫັນວ່າຍັງເຫຼືອເວລາຫຼາຍ. ນ້ອງໄດ້ກວດຄືນແລະເຫັນວ່າຕົນເອງຍັງຜິດຫຼາຍຢູ່. ຖ້າຫາກບໍ່ກວດຄືນບົດຂອງຕົນ, ບາງເທື່ອນ້ອງອາດຈະບໍ່ໄດ້ຮັບຄະແນນສູງຄືແນວນັ້ນ. ນ້ອງຄິດວ່າ, ຖ້າຫາກພວກເພື່ອນເຮັດບົດສຳເລັດແລ້ວແຕ່ຍັງເຫຼືອເວລາ, ຄວນກວດບົດຄືນໃໝ່ມັນຈະດີກວ່າ”
ຕາມ Kim Phuong ແລ້ວ, ທັງສອງຂະແໜງສ້າງຄູ ແລະ ການແພດ ນ້ອງລ້ວນແຕ່ນິຍົມ. ແຕ່ນ້ອງຈະເລືອກເອົາຂະແໜງການແພດແຂ້ວຄາງໜ້າຂອງມະຫາວິທະຍາໄລແພດສາດນະຄອນໂຮ່ຈີມິນ, ດ້ວຍຄວາມປາຖະໜາວ່າ ຈະພະຍາຍາມຮຽນໃຫ້ເກັ່ງ, ຫຼັງຈາກນັ້ນຈະກັບມາຮັບໃຊ້ພໍ່ແມ່ປະຊາຊົນໃນບ້ານຂອງຕົນ .