(vovworld)- ມາຢ້ຽມຢາມນະຄອນ ດ້ຽນບຽນຝູ, ແຂວງ ດ້ຽນບຽນ, ນອກຈາກບັນດາປູຊະນີຍະສະຖານປະຫວັດສາດຢູ່ສະຫນາມຮົບໃນເມື່ອກ່ອນແລ້ວ, ຫໍພິພິດທະພັນ ໄຊຊະນະດ້ຽນບຽນຝູ, ແຫ່ງທີ່ຍັງຮັກສາບັນດາເອກະສານ, ວັດຖຸພັນທີ່ກ່ຽວຂ້ອງເຖິງບັ້ນຮົບດ້ຽນບຽນຝູ ກໍ່ແມ່ນສະຖານທີ່ແຫ່ງໜຶ່ງ ທີ່ໄດ້ສ້າງຄວາມດຶງດູດບັນດານັກທ່ອງທ່ຽວພາຍໃນ ແລະ ຕ່າງປະເທດເມື່ອມາຄົ້ນຫາດ້ຽນບຽນ, ຊອກຮູ້ກ່ຽວກັບປະຫວັດສາດ.
ຮູບປັ້ນປະທານໂຮ່ຈິມີນ ພວມຕັກເຕືອນພົນເອກ ຫວໍງວຽນຢາບ
ພາບ:internet
|
ຫໍພິພິດທະພັນໄຊຊະນະດ້ຽນບຽນຝູ ຕັ້ງຢູ່ຕາແສງເມື່ອງແທງ, ນະຄອນ ດ້ຽນບຽນຝູ ແຂວງ ດ້ຽນບຽນ. ໂດຍໄດ້ຮັບການກໍ່ສ້າງເມື່ອປີ 1984, ຫໍພິພິດທະພັນນີ້ມີວັດຖຸພັນກວ່າ 270 ຢ່າງ ແລະ ຮູບພາບທີ່ມີຄຸນຄ່າກວ່າ 200 ແຜ່ນ. ບັນດາວັດຖຸພັນ ແລະ ເອກະສານນຳມາວາງສະແດງຢູ່ທີ່ນີ້ແມ່ນຖືກຈັດວາງຕາມ 5 ຫົວເລື່ອງສະເພາະຄື: ທີ່ຕັ້ງຍຸດທະສາດດ້ຽນບຽນຝູ, ຖານທີ່ໝັ້ນຂອງສັດຕູ ຢູ່ ດ້ຽນບຽນຝູ, ພັກກອມມູນິດຫວຽດຮາມ ກະກຽມແນວທາງບັນຊາບັ້ນຮົບ ດ້ຽນບຽນຝູ; ຜົນສະທ້ອນຂອງ ໄຊຊະນະດ້ຽນບຽນຝູ ແລະ ດ້ຽນບຽນຝູ ໃນປະຈຸບັນ.
ໃນໂອກາດສະເຫລີມສະຫລອງ 60 ປີແຫ່ງໄຊຊະນະດ້ຽນບຽນຝູ, ນັກທ່ອງທ່ຽວພາຍໃນ ແລະ ຕ່າງປະເທດ ໄດ້ມາຢ້ຽມຢາມຫໍພິພິດທະພັນເປັນຈຳນວນຫລວງຫລາຍ. ບັນດາວັດຖຸພັນໃຫຍ່ຄື: ປືນໃຫຍ່ທຸກຂະຫນາດ, ລົດຖັງ, ປືນທຸກປະເພດ.. ທີ່ວາງສະແດງຢູ່ເດີນຫໍພິພິດທະພັນ ໄດ້ສ້າງຄວາມປະທັບໃຈໃຫ້ແກ່ແຂກມາຊົມນັບແຕ່ວິນາທີທຳອິດເມື່ອກ້າວເຂົ້າຫໍພິພິດທະພັນ. ບັນດາອາວຸດທີ່ນຳໃຊ້ໃນບັ້ນຮົບ ດ້ຽນບຽນຝູ ໄດ້ປະກອບສ່ວນບໍ່ຫນ້ອຍເຂົ້າໃນໄຊຊະນະດ້ຽນບຽນຝູຂອງກອງທັບປະຊາຊົນຫວຽດນາມ. ປະຈຸບັນ ບັນດາວັດຖຸພັນເຫຼົ່ານັ້ນຍັງວາດພາບໃຫ້ເຫັນສະຫນາມຮົບປືນໃຫຍ່ປອ້ງກັນອາກາດຂອງກອງທັບປະຊາຊົນຫວຽດນາມໃນຄາວນັ້ນອີກ.
ໃນຫໍພິພິດທະພັນ, ຫ້ອງທຳອິດທີ່ແຂກມາຢາມນັ້ນແມ່ນຫ້ອງໂຖງ. ຢູ່ທີ່ນີ້ ມີຮູບປັ້ນປະທານໂຮ່ຈິມີນ ພວມຕັກເຕືອນພົນເອກ ຫວໍງວຽນຢາບ ກ່ອນທີ່ຜູ້ບັນຊາການໃຫຍ່ບັ້ນຮົບ ດ້ຽນບຽນຝູ ເດີນທາງອອກສະຫນາມຮົບເມື່ອເດືອນ 1/1954.
ພາບ:mytour.vn
|
ຕໍ່ຈາກນັ້ນແມ່ນເຂດວາງສະແດງບັນດາຮູບພາບ, ວັດຖຸພັນໃນບັ້ນຮົບ ດ້ຽນບຽນຝູ. ໃນຈຳນວນແຂກມາຢ້ຽມຊົມຫໍພິພິດທະພັນນັ້ນ ມີນັກທ່ອງທ່ຽວຕ່າງປະເທດຫລາຍຄົນ. ເຂົາເຈົ້າບໍ່ໄປຕາມຂະບວນ, ບາງເທື່ອບໍ່ຮັບຟັງຕາມຜູ້ແນະນຳ ຫາກບາງຄົນຢາກສັງເກດບັນດາວັດຖຸພັນ, ຮູບພາບຕາມໃຈ. ທ່ານ Rodney ແລະ ເມຍ ຊື່ງແມ່ນນັກທ່ອງທ່ຽວມາຈາກ ອັງກິດ ພວມຊົມບັນດາຮູບພາບເອກະສານສີດຳຂາວ. ທ່ານ Rodney ທັງເບິ່ງຮູບທັງອະທິບາຍໃຫ້ເມຍຂອງຕົນຟັງກ່ຽວກັບເຫດການທີ່ໄດ້ສ່ອງແສງຜ່ານຮູບພາບ ດ້ວຍບັນດາເລື່ອງລາວປະຫວັດສາດ ຊື່ງຕົນເອງໄດ້ອ່ານແລ້ວ. ທ່ານ Rodney ໃຫ້ຮູ້ວ່າ:
“ ພວກຂ້າພະເຈົ້າຫາກໍ່ຮອດດ້ຽນບຽນຝູ ມື້ວານນີ້. ແລະ ມື້ນີ້ ຂ້າພະເຈົ້າໄປຢ້ຽມຊົມສະຫນາມຮົບ ດ້ຽນບຽນຝູ ເລີຍ ແລະ ເລືອກເຟັ້ນ ຫໍພິພິດທະພັນແມ່ນສະຖານທີ່ຢ້ຽມຢາມທຳອິດ. ຫໍພິພິດທະພັນແຫ່ງນີ້ໄດ້ສ້າງຄວາມປະທັບໃຈຫລາຍ. ກ່ອນອື່ນໝົດແມ່ນບັນດາຮູບພາບວາງສະແດງຢູ່ທີ່ນີ້. ນອກນັ້ນ ບັນດາວັດຖຸພັນກໍມີຄຳອະທິບາຍດ້ວຍພາສາຕ່າງປະເທດ.”
ຢູ່ຫໍພິພິດທະພັນຍັງມີຮູບຈຳລອງໃຫຍ່ ວາດພາບຢ່າງຊັດເຈນບັນດາບັ້ນສູ້ຮົບລະຫວ່າງທະຫານ ຫວຽດນາມ ແລະ ທະຫານ ຝລ່ັງ ໃນບັ້ນຮົບ ດ້ຽນບຽນຝູ. ຄຽງຂ້າງນັ້ນ ແມ່ນຫນ້າຈໍຂະຫນາດໃຫຍ່ ສາຍຟິມເອກະສານເພື່ອໃຫ້ນັກທ່ອງທ່ຽວສາມາດເຂົ້າໃຈກວ່າກ່ຽວກັບບັນດາເຫດການກ່ຽວຂ້ອງເຖິງຮູບພາບ, ວັດຖຸພັນທີ່ວາງສະແດງຢູ່ທີ່ນີ້.
ເຄື່ອງແບບທະຫານຝລ່ັງ, ໝວກເຫລັກ, ເຄື່ອງໃຊ້ສ່ວນຕົວ ແລະ ຮູບພາບຫລາຍແຜ່ນຂອງນາຍທະຫານຝລ່ັງ ທີ່ເຂົ້າຮ່ວມບັ້ນຮົບ ດ້ຽນບຽນຝູ ກໍໄດ້ນຳວາງສະແດງຢູ່ຫໍພິພິດທະພັນ. ທ່ານ Didial, ນັກທ່ອງທ່ຽວມາຈາກ ຝລັ່ງ ຮູ້ສຶກຕື້ນຕັນໃຈເມື່ອເຂົ້າຊົມບັນດາຫ້ອງວາງສະແດງ, ໂດຍສະເພາະ ເມື່ອເບິ່ງຮູບລົດຖີບຂົນສົ່ງອາວຸດແລະສະບຽນອາຫານຮັບໃຊ້ສະຫນາມຮົບດ້ຽນບຽນຝູ ກໍຄືທ່ານຮູ້ສຶກເຈັບໃຈ ເມື່ອເຫັນບັນດາອາວຸດຫນັກ, ລູກລະເບີດຊື່ງທະຫານ ຝລ່ັງ ໄດ້ນຳໃຊ້ໃນບັ້ນຮົບ. ສຸດທ້າຍ ທ່ານນິຍົມນັບຖືຈິດໃຈສູ້ຮົບຢ່າງພິລະອາດຫານຂອງບັນດານັກຮົບຫວຽດນາມ. ທ່ານ Didial ແບ່ງປັນວ່າ:
“ຢູ່ຫໍພິພິດທະພັນ, ພວກຂ້າພະເຈົ້າຊອກຮູ້ກ່ຽວກັບການຕໍ່ສູ້ຂອງປະຊາຊົນຫວຽດນາມ ເພື່ອຍາດເອົາເສລີພາບມາໃຫ້ປະເທດຊາດ. ພວກຂ້າພະເຈົ້າກໍໄດ້ຮັບຊົມຊຸດຟີມຍ້ອງຍໍສັນລະເສີນການເສຍສະຫລະຊີວິດຂອງບັນດານັກຮົບເພື່ອພື້ນຖານເອກະລາດປະເທດຊາດ, ໄດ້ເຫັນປະຈັກຕາສິ່ງທີ່ຕົນເອງໄດ້ອ່ານກ່ອນ ແລະ ໄດ້ຮັບຊົມໃນຟິມຮູບເງົາຢູ່ ຝລັ່ງ ກ່ອນນີ້. ຂ້າພະເຈົ້າໄດ້ຄົ້ນຄ້ວາເຫດການນີ້ແຕ່ດົນນານແລ້ວ ແລະ ຢາກມາ ດ້ຽນບຽນຝູ ເພື່ອຢາກເຫັນປະຈັກຕາສິ່ງທີ່ຕົນເອງໄດ້ອ່ານ. ຂ້າພະເຈົ້າຮູ້ສຶກຕື້ນຕັນໃຈຫລາຍ.”
ໃນຈຳນວນແຂກມາຢ້ຽມຊົມຫິພິພິດທະພັນ ມີນັກຮົບເກົ່າຫລາຍຄົນພວມຕັ້ງໃຈຊົມບັນດາພາບເອກະສານ, ວັດຖຸພັນເພື່ອຫວນຄືນໄລຍະຕໍ່ຕ້ານ. ທ່ານນາງ ເຈີນທິຊວນ, ນັກຮົບເກົ່າ ໄດ້ແບ່ງປັນຄວາມຮູ້ສຶກວ່າ:
“ຂ້າພະເຈົ້າເອງກໍໄດ້ເຂົ້າຮ່ວມການຕໍ່ຕ້ານ, ເຂົ້າຮ່ວມສະຫນາມຮົບ, ສະນັ້ນ ເມື່ອຢ້ຽມຢາມຫໍພິພິດທະພັນປະຫວັດສາດນີ້ ຂ້າພະເຈົ້າຮູ້ສຶກຕື້ນຕັນໃຈຫລາຍ ແລະ ຄິດເຖິງຊຸມວັນເດືອນຕໍ່ສູ້ຂອງບັນດານັກຮົບກອງທັບປະຊາຊົນຫວຽດນາມ. ເຖິງວ່າ ຂ້າພະເຈົ້າບໍ່ໄດ້ເຂົ້າຮ່ວມບັ້ນຮົບ ດ້ຽນບຽນຝູ ແຕ່ຂ້າພະເຈົ້າຮູ້ສຶກເອກອ້າງທະນົງໃຈ ເພາະວ່າ ລຸ້ນພໍ່ລຸ້ນອ້າຍຂອງຕົນໄດ້ເຂົ້າຮ່ມບັ້ນຮົບທີ່ດັງກ້ອງກັນວານທົ່ວໂລກນີ້.”
ໃນໂອກາດສະເຫລີມສະຫລອງ 60 ປີແຫ່ງວັນໄຊຊະນະດ້ຽນບຽນຝູ, ຫໍພິພິດທະພັນ ຫາກໍ່ໄດ້ຮັບວັດຖຸພັນທີ່ມີຄຸນຄ່າຫລາຍຢ່າງຈາກບັນດາສ່ວນບຸກຄົນ ຊື່ງແມ່ນນັກຮົບເກົ່າທີ່ໄດ້ເຂົ້າຮ່ວມການຕໍ່ຕ້ານຢູ່ສະຫນາມຮົບ ດ້ຽນບຽນຝູ, ບັນດານັກຄົ້ນຄ້ວາປະຫວັດສາດຢູ່ພາຍໃນ ແລະ ຕ່າງປະເທດ. ບັນດາວັດຖຸພັນ, ຮູບພາບ, ເລື່ອງລາວປະຫວັດສາດທີ່ໄດ້ແນະນຳຢູ່ຫໍພິພິດທະພັນໄຊຊະນະດ້ຽນບຽນຝູ ຍິ່ງເຮັດໃຫ້ສາງເອກະສານອັນລ້ຳຄ່າກ່ຽວກັບໄຊຊະນະດ້ຽນບຽນຝູ ນັບມື້ນັບອຸດົມສົມບູນກວ່າ. ຈາກນັ້ນ ຊ່ວຍໃຫ້ນັກທ່ອງທ່ຽວຕ່າງປະເທດ ເຂົ້າໃຈກ່ຽວກັບກຳລັງແຮງຂອງຫວຽດນາມ ໃນສົງຄາມຕໍ່ຕ້ານຕ້ານພວກລ່າເມືອງຂຶ້ນ ຝລັ່ງ ແລະ ເຮັດໃຫ້ປະຊາຊົນຫວຽດນາມ ຍິ່ງຮູ້ສຶກເອກອ້າງທະນົງໃຈກ່ຽວກັບໄຊຊະນະອັນຍິ່ງໃຫຍ່ຂອງປະເທດຊາດໃນ 60 ປີກ່ອນນີ້.