(vovworld)- ຫ່າງຈາກໃຈກາງແຂວງ ອຽນບາຍທາງທິດເຫນືອ ປະມານ 80 ກິໂລແມັດ, ເມືອງ ລຸກອຽນ ທີ່ມີຊື່ສຽງດ້ວຍອາຊີບຜະລິດພາບແກ້ວມະນີ ນັບສິບໆປີມານີ້. ຈາກ ສີມືອັນຄ່ອງແຄ້ວຂອງນາຍຊ່າງໄດ້ເຮັດໃຫ້ບັນດາກ້ອນຫີນທຳມະຊາດກາຍເປັນພາບແກ້ວມະນີທີ່ສວຍງາມ, ມີມູນຄ່າສູງ ແລະ ໄດ້ຮັບຄວາມນິຍົມຈາກລູກຄ້າຢູ່ພາຍໃນ ແລະ ຕ່າງປະເທດ. ເບື້ອງຕົ້ນ ມີພຽງແຕ່ບາງຮາກຖານຜະລິດພາບແກ້ວມະນີເທົ່ານັ້ນ, ແຕ່ມາຮອດປະຈຸບັນ ຢູ່ ລຸກອຽນ ໄດ້ປະກົດອອກນັບຮ້ອຍແຫ່ງ ອັນໄດ້ດຶງດູດຄົນງານມາເຮັດວຽກຢູ່ທີ່ນີ້ນັບພັນໆຄົນ. ພາບແກ້ວມະນີ ໄດ້ກາຍເປັນອາຊີບຕົ້ນຕໍ, ປະກອບສ່ວນຍົກສູງຊີວິດທາງດ້ານວັດຖຸ ແລະ ຈິດໃຈໃຫ້ແກ່ຊາວທ້ອງຖິ່ນ.
ແກ້ວມະນີຫລາຍຊະນິດຢູ່ ຕະຫລາດນັດ ລຸກອຽນ
ພາບ:internet
|
ທຳມະຊາດໄດ້ດົນບັນດານໃຫ້ເມືອງ ລຸກອຽນ ໂລຫະປະເພດຫນຶ່ງຫາຍາກທີ່ສຸດ, ນັ້ນແມ່ນ ແກ້ວມະນີ. ເມື່ອຢ້ຽມຢາມເທດສະບານ ອຽນເທ, ນັກທ່ອງທ່ຽວຈະພົບເຫັນຕະຫລາດນັດທີ່ແຕກຕ່າງກັບບັນດາຕະຫລາດນັດຄື ຕະຫລາດຂາຍຜັກ, ຂາຍປາທຳມະດາ, ນັ້ນແມ່ນຕະຫລາດແກ້ວມະນີ. ຕະຫລາດແຫ່ງນີ້ ມີ ຮ້ານຂາຍເຄື່ອງກວ່າ 20 ຮ້ານ ແລະ ຂາຍແກ້ວມະນີທຸກປະເພດ ມີລາຄາແຕ່ 200.000- 200 ລ້ານດົ່ງ, ດ້ວຍສີຫລາກຫລາຍຄື: ສີຟ້າ, ສີແດງ, ສີບົວ…. ໃນນັ້ນ ruby ແດງ ແມ່ນລ້ຳຄ່າກວ່າໝູ່ ແລະ ມີລາຄາສູງກວ່າໝູ່. ນັບແຕ່ເວລາ 7 – 10 ໂມງເຊົ້າ, ພໍ່ຄ້າຊາວຂາຍໄດ້ແລກປ່ຽນຄ້າຂາຍນຳກັນຢ່າງຫນາແຫນ້ນ. ບັນດາຮ້ານຂາຍພາບແກ້ວມະນີກໍດຶງດູດລູກຄ້າ ແລະ ນັກທ່ອງທ່ຽວມາຢ້ຽມຊົມເປັນຈຳນວນຫລວງຫລາຍ. ອ້າຍ ເລງວຽນດືກ, ນັກທ່ອງທ່ຽວມາຈາກ ຮ່າໂນ້ຍ ໃຫ້ຮູ້ວ່າ:
“ເມື່ອມາຢ້ຽມຢາມ ລຸກອຽນ, ໂດຍສະເພາະເມື່ອເຂົ້າຢ້ຽມຮ້ານຂາຍພາບແກ້ວມະນີ ຂ້າພະເຈົ້າເຫັນວ່າ ພາບແບບນີ້ງາມຫລາຍ ພິເສດແມ່ນບັນດາພາບແກ້ວມະນີ ກ່ຽວກັບໂຕມ້າ, ພາບບ້ານເກີດເມືອງນອນ. ຂ້າພະເຈົ້າກໍໄດ້ເລືອກເຟັ້ນຊື້ໃຫ້ຕົນເອງພາບບາງແຜ່ນເພື່ອເປັນເຄື່ອງທີ່ລະນຶກ.”
ນັບສິບປີມານີ້, ປະຊາຊົນ ລຸກອຽນ ທຳມາຫາກິນດ້ວຍອາຊີບຜະລິດພາບແກ້ວມະນີ. ວຽກງານປະຈຳວັນຂອງຜູ້ເຮັດພາບແກ້ວມະນີເບິ່ງຄືວ່າແມ່ນງາຍດ່າຍ ແຕ່ພັດສັບສົນທີ່ສຸດ. ອາຊີບຜະລິດພາບແກ້ວມະນີ ແມ່ນປະກົດມີມາແຕ່ຊຸມປີ 90 ຂອງສັດຕະວັດທີ 20, ຜ່ານສີມືອັນຄ່ອງແຄ້ວຂອງບັນດານາຍຊ່າງ ແລະ ຜ່ານຫລາຍຂັ້ນຕອນການຜະລິດຄື: ເລືອກແກ້ວມະນີ, ຕຳແກ້ວມະນີໃຫ້ແຫລກ ແລະ ເອົາແຕ່ລະເມັດຕໍ່ໃສ່ກັນແບບລະອຽດທີ່ສຸດ ເພື່ອສ້າງເປັນພາບແກ້ວມະນີດ້ວຍເຄື່ອງໝາຍການຄ້າທີ່ມີຊື່ສຽງຄືປະຈຸບັນ. ຢູ່ເມືອງ ລຸກອຽນ ປະຈຸບັນ ມີຮາກຖານຜະລິດແກ້ວມະນີນັບ
ຮ້ອຍແຫ່ງ ໄດ້ສ້າງວຽກເຮັດງານທຳ ແລະ ເພີ່ມລາຍຮັບໃຫ້ຄົນງານນັບພັນໆຄົນ. ນອກຈາກບັນດາຮາກຖານຢູ່ເທດສະບານ ອຽນເທແລ້ວ, ຍັງມີຮາກຖານ, ໝູ່ບ້ານອາຊີບຫລາຍແຫ່ງຜະລິດພາບແກ້ວມະນີຢູ່ບັນດາຕາແສງອື່ນຄື: ມີງຊວນ, ອຽນທັງ, ຫລຽວໂດ, ເຕີນຫລີງ… ຢູ່ບັນດາຮາກຖານຜະລິດນັ້ນ, ຄົນງານຖືກຈັດແບ່ງຕາມລະດັບສີມື, ຮັບປະກັນຈາກຂອດສ້າງແນວຄວາມຄິດຕະຫລອດຮອດຂອດແບ່ງປະເພດແກ້ວມະນີ, ແຕ້ມຮູບ, ເອົາເມັດແກ້ວມະນີຕໍ່ໃສ່ກັນ.. ທັງໝົດເຫລົ່ານັ້ນລ້ວນແຕ່ຕ້ອງປະຕິບັດຢ່າງຊັດເຈນ ເພື່ອຜະລິດໃຫ້ມີຮູບພາບທີ່ສວຍງາມແຕກຕ່າງກັບຮູບພາບສິລະປະອື່ນ. ນາງ ຫງວຽນທິຮັ່ງ, ເຈົ້າຂອງຮາກຖານຜະລິດພາບແກ້ວມະນີ ຮົ່ງງອກ ເມືອງ ລຸກອຽນ ໃຫ້ຮູ້ວ່າ:
“ເພື່ອຜະລິດພາບແກ້ວມະນີໃຫ້ສວຍງາມ ກ່ອນອື່ນຕ້ອງເລືອກເຟັ້ນປະເພດແກ້ວມະນີງາມ, ມີຄຸນນະພາບສູງ. ຜ່ານສີມືອັນຄ່ອງແຄ້ວຂອງບັນດານັກສິລະປະການ ຈະເອົາແກ້ວມະນີຕໍ່ເຂົ້າກັນຢ່າງສວຍງາມ. ບັນດານາຍຊ່າງຜະລິດພາບແກ້ວມະນີ ເພື່ອຮັບໃຊ້ລູກຄ້າໃນໂອກາດອວຍພອນຂຶ້ນເຮືອນໃຫມ່ ຫລືມອບເປັນຂອງຂວັນ. “
ພາບແກ້ວມະນີ
ພາບ: dantri.com
|
ປະຈຸບັນ, ບັນດາຜະລິດຕະພັນພາບແກ້ວມະນີ ລຸກອຽນ ນອກຈາກຂາຍຢູ່ທ້ອງຖິ່ນແລ້ວ ເຂົາເຈົ້າຍັງຂາຍໃຫ້ລູກຄ້າຢູ່ພາຍໃນປະເທດຕາມໃບສັ່ງຊື້ ແລະ ສົ່ງໄປຂາຍຢູ່ຕ່າງປະເທດ. ບັນດາຜະລິດຕະພັນຊື່ງລູກຄ້ານິຍົມທີ່ສຸດນັ້ນແມ່ນ ພາບກ່ຽວກັບສັດ, ບ້ານເກີດເມືອງນອນ, ທິວທັດທຳມະຊາດ…. ແລະພາບແກ້ວມະນີນີ້ເປັນຫລາຍຮູບຫລາຍແບບ, ລາຄາກໍແຕກຕ່າງກັນ. ນາງຫງວຽນທີຮ່າ ໃຫ້ຮູ້ວ່າ: ເຮັດອາຊີບນີ້ທຳອິດຕ້ອງຮັກອາຊີບ, ເມື່ອຮັກອາຊີບແລ້ວເຮົາຈຶ່ງສາມາດເອົາເມັດແກ້ວມະນີທີ່ນ້ອຍໆເຂົ້າໃສ່ຖືກທີ່ຕັ້ງຊື່ງໄດ້ແຕ້ມໄວ້ແລ້ວເພື່ອໃຫ້ມີພາບທີ່ງາມຕາ.
“ໄລຍະທຳອິດ ຂ້າພະເຈົ້າຄິດວ່າ ເຮັດອາຊີບນີ້ແມ່ນຍາກຫລາຍ ແຕ່ເມື່ອມາ ທົດລອງເຮັດວຽກ ເຫັນວ່າຕົນເອງສາມາດເຮັດໄດ້. ເຮັດອາຊີບນີ້ ບໍ່ລຳບາກປານໃດແຕ່ໃນການເຮັດວຽກຕ້ອງລະອຽດລະອໍ, ຮອບຄອບ ແລະ ມີຫົວຄິດປະດິດສ້າງຈຶ່ງເຮັດອາຊີບນີ້ໃນໄລຍະຍາວໄດ້.”
ຍາດເວລາມື້ຫນຶ່ງໄປຢ້ຽມຊົມເຂດດິນທີ່ໄດ້ຮັບການຂະຫນານນາມວ່າ “ເຂດດິນແຫ່ງແກ້ວມະນີ”, ນັກທ່ອງທ່ຽວບໍ່ພຽງແຕ່ໄດ້ຮັບຊົມທິວທັດທຳມະຊາດ ທີ່ໃຫຍ່ໂຕມະໂຫຖານເທົ່ານັ້ນ ຫາກຍັງໄດ້ຊົມບັນດາພາບແກ້ວມະນີທີ່ສວຍງາມຜ່ານສີມືທີ່ຄ່ອງແຄ້ວຂອງປະຊາຊົນ ລຸກອຽນ ອີກດ້ວຍ.