(vovworld)- ຫ່າງຈາກນະຄອນຫລວງຮ່າໂນ້ຍທາງທິດໃຕ້ ປະມານ 120 ກິໂລແມັດ, ທັດສະນີຍະພາບ ຕາມກົກ ບີກດົ້ງ ແມ່ນສ່ວນຫນຶ່ງໃນກຸ່ມພູຫີນປູນ ຮວາລື. ຜ່ານໄລຍະນັບຮ້ອຍໆປີ, ຢູ່ທີ່ນີ້ຍັງຄົງຮັກສາຄວາມງາມແບບທຳມະຊາດໄວ້, ດຶງດູດນັກທ່ອງທ່ຽວທັງຢູ່ພາຍໃນ ແລະ ຕ່າງປະເທດມາຢ້ຽມຢາມເປັນຈຳນວນຫລວງຫລາຍ.
ເຮືອນອ້ຍພານັກທ່ອງທ່ຽວໄປຢ້ຽມຊົມຕາມກົກບີກດົ້ງ
ພາບ:ninhbinhtouris.com.vn
|
ເຂດທັດສະນີຍະພາບ ຕາມກົກ ລວມມີສະຖານທີ່ສອງແຫ່ງນັ້ນແມ່ນ ຕາມກົກ ແລະ ບີກດົ້ງ ທີ່ຂຶ້ນກັບບໍລິເວນ ວັນເລີມ ຕາແສງ ນີງຫາຍ ເມືອງ ຮວາລື ແຂວງ ນີງບີງ. ແຫ່ງນີ້ແມ່ນສະຖານທີ່ທ່ອງທ່ຽວຈຸດສຸມແຫ່ງຊາດ. ຕາມກົກ ຍັງໄດ້ຮັບການຂະຫນານນາມວ່າ ແມ່ນ ອ່າວຮ້າລອງເທິງແຜ່ນດິນ ຍ້ອນມີລະບົບຖ້ຳ, ພູຫີນປູນຕັ້ງເທິງຫນ້ານ້ຳ ແລະ ພິເສດ ຕາມກົກຍັງມີບັນດາເຂດປູຊະນີຍະສະຖານປະຫວັດສາດທີ່ກ່ຽວຂ້ອງເຖິງສະໄຫມລາຊະວົງເຈີນ(ສັດຕະວັດທີ 13-14). ຈາກທ່າເຮືອ ຕາມກົກ, ເຮືອນ້ອຍຈະພານັກທ່ອງທ່ຽວລ່ອງຕາມສາຍນ້ຳ ໂງຢາງ ແລດລອດຜ່ານພູຫີນທີ່ໃຫຍ່ໂຕໄປຫາຖ້ຳ. ນາງ ໂດທິນຸ, ຜູ້ພາຍເຮືອ ໄດ້ອະທິບາຍວ່າ:
“ຕາມພາສາຈີນແລ້ວ, ຕາມໝາຍຄວາມວ່າແມ່ນເລກ ສາມ, ກົກ ແມ່ນຖ້ຳ, ສະນັ້ນ ເອີ້ນວ່າ ຕາມກົກ. ສ່ວນຊາວທ້ອງຖິ່ນ ເອີ້ນວ່າ ສາມຖ້ຳ: ຖ້ຳກ໋າ, ຖ້ຳຮາຍ ແລະ ຖຳ້ບາ. ເມື່ອໄປຢ້ຽມຢາມ 3 ຖ້ຳດັ່ງກ່າວ ເວລາໄປ ແລະກັບຕ້ອງໃຊ້ເວລາ 2 ຊົ່ວໂມງ.”
ມາຢ້ຽມຢາມ ຕາມກົກ, ແຕ່ລະລະດູລ້ວນແຕ່ມີພາບທຳມະຊາດຕ່າງຫາກ ແລະ ລະດູໃດກໍມີຈຸດພິເສດສະເພາະ. ໃນລະດູບານໃຫມ່, ສອງຟາກລຽບຕາມແມ່ນ້ຳ ແມ່ນທົ່ງນາຂຽວສົດ, ມາຮອດເດືອນ 4 ໄລ່ຕາມຈັນທະປະຕິທິນ, ທົ່ງນານີ້ເປັນສີເຫລືອງ. ສ່ວນໃນລະດູຮ້ອນ, ກີ່ນຫອມຫວນຂອງດອກບົວຈະເຮັດໃຫ້ນັກທ່ອງທ່ຽວຮູ້ສຶກສະຫວາດສະເຫວີຍ. ນັ່ງເທິງເຮືອນລ່ອງຕາມສາຍນ້ຳ ໂງຢາງ, ນັກທ່ອງທ່ຽວຍັງໄດ້ຮັບຟັງຊາວທ້ອງຖິ່ນເລົ່າເລື່ອງກ່ຽວກັບປະຫວັດສາດ, ບັນດາເລື່ອງລາວຕິດພັນກັບຈອມພູ, ຜາຫີນ. ອີງຕາມຮູບຊົງຂອງຜາຫີນແຕ່ລະຫນ່ວຍ ຊາວທ້ອງຖິ່ນຈຶ່ງຕັ້ງຊື່ໃຫ້ມັນວ່າພູ ກີມກູຍ(ໂຕເຕົາ)ຫລື ພູຮ່າມຣົງ(ຫົວມັງກອນ). ແລະ ສິ່ງທີ່ສ້າງຄວາມປະທັບໃຈທີ່ສຸດສຳລັບນັກທ່ອງທ່ຽວ ນັ້ນແມ່ນ ຖ້ຳ. ນາງ ງວຽນ ໃຫ້ຮູ້ວ່າ:
“ຖ້ຳແຫ່ງທີຫນຶ່ງ ເອີ້ນວ່າ ຖ້ຳກ໋າ, ມີຄວາມຍາວປະມານ 127 ແມັດ, ກວ້າງ 20 ແມັດ. ເມື່ອເຂົ້າເລິກໃນຖ້ຳ ນັກທ່ອງທ່ຽວຈະພົບເຫັນນົມຜາເປັນຫລາຍຮູບຫລາຍແບບທີ່ສວຍງາມ. ຈຸດພິເສດຂອງຖ້ຳແຫ່ງນີ້ ນັ້ນແມ່ນຖ້າທ່ານຢືນຢູ່ນອກຫລຽວເບິ່ງເຂົ້າໄປໃນຖ້ຳຈະເຫັນວ່າມັນມືດມົວ ແຕ່ເມື່ອເຂົ້າໄປເລິກຈະມີແສງສະຫວ່າງຫລາຍກວ່າ.”
ຈຸດພິເສດສະເພາະຂອງ ຕາມກົກ ບີກດົ້ງ ແມ່ນຄວາມງາມແບບທຳມະຊາດຂອງຖ້ຳສາມແຫ່ງທະລຸຊອດພູ. ຖ້ຳແຕ່ລະແຫ່ງລ້ວນແຕ່ມີຫນອງນ້ຳ. ຢູ່ລຽບຕາມເສັ້ນທາງເຂົ້າໄປຖ້ຳຕາມກົກ ແມ່ນບັນດາສາຍພູຫີນປູນ. ຈຸດພິເສດ ຢູ່ ຕີນພູຈະພົບເຫັນຮ່ອງຮອຍທໍລະນີສາດ ດ້ວຍບັນດາຮ່ອງຮອຍຂອງທະເລທີ່ມີມາກ່ອນນີ້ນັບພັນປີ.
ທັດສະນີຍະພາບຕາມກົກ ບີກດົ້ງ
ພາບ:dulich.vn
|
ພາຍຫລັງໄປຢ້ຽມຢາມ ຕາມກົກ ບີກດ້ົ້ງ ໃນເວລາກວ່າ 2 ຊົ່ວໂມງ ຜ່ານພູຜາປ່າໄມ້ທີ່ໃຫຍ່ໂຕມະໂຫຖານ, ເຮືອນ້ອຍຈະພານັກທ່ອງທ່ຽວກັບຄືນເມືອ ຕາມກົກ. ຈາກນີ້ໄປປະມານ 2 ກິໂລແມັດ ທ່ານຈະໄປເຖິງ ບີກດົ້ງ, ຊື່ງແມ່ນສະຖານທີ່ໄດ້ຮັບການຂະຫນານນາມວ່າ ແມ່ນຖ້ຳສວຍງາມແຫ່ງທີ 2. ນອກນັ້ນ ນັກທ່ອງທ່ຽວຈະໄດ້ໄປຢ້ຽມຢາມວັດ ບີກດົ້ງ ຊື່ງໄດ້ຮັບການກໍ່ສ້າງເມື່ອປີ 1428 ພາຍໃຕ້ສະໄຫມເຈົ້າຊີວິດ ເລທາຍໂຕ. ວັດ ບີກດົ້ງແມ່ນທັດສະນີຍະພາບສວຍງາມທີ່ມີຊື່ສຽງຢູ່ແຂວງນີງບີງ. ນາງ ຫງວຽນຊວນງວຽນ ຜູ້ນຳທ່ຽວໄດ້ແນະນຳວ່າ:
“ວັດບີກດົ້ງໄດ້ຮັບການກໍ່ສ້າງ ຕາມຮູບແບບປະກອບດ້ວຍ 3 ວັດ ຢູ່ເທິງໂນນພູ. ແລະມີຊື່ເອີ້ນວ່າ ວັດຫ້າ, ວັດຈຸງ ແລະ ວັດເທື້ອງ. ປີ 1970 ເຈົ້າຊີວິດ ເລແກ໋ງຮືງ ຕັ້ງຊື່ໃຫ້ວັດນີ້ວ່າ: ແບກງອກແທກເຊີນດົງ, ໝາຍຄວາມວ່າວັດຫີນສວຍງາມຄືດັ່ງ ແກ້ວມະນີ.”
ພາຍຫລັງຢ້ຽມຢາມ ວັດບີກດົ້ງ, ນັກທ່ອງທ່ຽວຂຶ້ນຂັ້ນໄດຫີນ 21 ຂັ້ນເພື່ອໄປຫາ ຖ້ຳ ດົ້ງໂຕຍ. ໃນຖ້ຳແຫ່ງນີ້ ມີບັນດານົມຜາທຳມະຊາດທີ່ສວຍງາມເປັນຈຳນວນຫລວງຫລາຍ ດ້ວຍຫລາຍຮູບແຕກຕ່າງກັນ. ນອກນັ້ນ ຢາກໄປຢ້ຽມຢາມ ວັດເທື້ອງ, ນັກທ່ອງທ່ຽວຕ້ອງຂຶ້ນຂັ້ນໄດຫີນ 40 ຂັ້ນລຽບຕາມເນີນພູ. ວັດແຫ່ງນີ້ຕັ້ງໃນຄວາມສູງກວ່າໝູ່, ໃກ້ກັບຈອມພູ ບີກດົ້ງ ຊື່ງແມ່ນບອ່ນບູຊາພະແມ່ກວານອີນ. ເດີ່ນຂອງວັດເທື້ອງ ແມ່ນບ່ອນສ້າງຄວາມປະທັບໃຈນັກທ່ອງທ່ຽວ, ເພາະຢືນຢູ່ເດີ່ນ ວັດ ນັກທ່ອງທ່ຽວສາມາດເຫັນທິວທັດທຳມະຊາດສວຍງາມອ້ອມແອ້ມ ບີກດົ້ງ ໄດ້.
ນັກທ່ອງທ່ຽວຕ່າງປະເທດຫລາຍຄົນ ເມ່ືອມາຢ້ຽມຢາມ ຕາມກົກ ບີກດົ້ງ ລ້ວນແຕ່ຮູ້ສຶກແປກປະຫລາດຕໍ່ຄວາມງາມຢູ່ທີ່ນີ້. ທ່ານ Monttie Binotto, ນັກທ່ອງທ່ຽວມາຈາກ ສະວິດ ແບ່ງປັນວ່າ:
“ເປັນຄັ້ງທຳອິດ ຂ້າພະເຈົ້າມາຢ້ຽມຢາມຕາມກົກ ບີກດົ້ງ. ຂ້າພະເຈົ້າເຫັນວ່າ ນີ້ແມ່ນເຂດດິນເຕັມໄປດ້ວຍມູນເຊື້ອວັດທະນະທຳ ແລະ ປະຫວັດສາດ. ຕາມກົກ ບີກດົ້ງ ແມ່ນສະຖານທີ່ມີທິວທັດທຳມະຊາດສວຍງາມ. ຂ້າພະເຈົ້າຢາກຢູ່ທີ່ນີ້ 2,3 ມື້ ເພື່ອຄົ້ນຫາເຂດດິນນີ້. ສິ່ງທີ່ສ້າງຄວາມປະທັບໃຈທີ່ສຸດຕໍ່ຂ້າພະເຈົ້າ ນັ້ນແມ່ນຮູບພາບຜູ້ພາຍເຮືອ, ເຂົາເຈົ້າສາມາດພາຍເຮືອດ້ວຍຕີນຢ່າງຊຳນານ.”
ມາຢ້ຽມຢາມ ຕາມກົກ ບີກດົ້ງ, ນັກທ່ອງທ່ຽວແຕ່ລະຄົນໄດ້ເຊື່ອມຕົວເຂົ້າກັບທຳມະຊາດ, ໄດ້ສູບອາກາດປອດໂປ່ງສົດໃສ, ຮູ້ສຶກຈິດໃຈສະຫວາດສະເຫວີຍກວ່າ. ທັດສະນີສະພາບ ຕາມກົກ ບີກດົ້ງ ພໍ່ພຽງແຕ່ແມ່ນສະຖານທີ່ທ່ອງທ່ຽວທີ່ດູດດື່ມເທົ່ານັ້ນ ຫາກຍັງແມ່ນສະຖານທີ່ທ່ອງທ່ຽວຈິດວິນຍານທີ່ເປັນເອກະລັກສະເພາະຢູ່ ແຂວງ ນີງບີງ ອີກດ້ວຍ.