(vovworld)- ໂດຍຫ່າງຈາກ ນະຄອນຫລວງ ຮ່າໂນ້ຍ ປະມານ 20 km, ໝູ່ບ້ານ ດົ່ງກີ້ ຂຶ້ນກັບ ເທດສະບານ ຕືເຊີນ ແຂວງ ບັກນີງ ຕັ້ງຢູ່ແຄມແມ່ນ້ຳ ຫງູຮ້ວຽນເຄ ທີ່ສະຫງົບສຸກ. ມາຢ້ຽມຢາມ ແຫ່ງນີ້ ນັກທ່ອງທ່ຽວຈະເຫັນປະຈັກຕາບັນດາຜະລິດຕະພັນໄມ້ທີ່ມີຄຸນຄ່າດ້ານສິລະປະກຳ ໂດຍບັນດາຊ່າງໄມ້ ແລະ ນັກສິລະປະການທີ່ມີສີມືດີຂອງ ດົ່ງກີ້ ຜະລິດ, ຊື່ງໄດ້ຮັບຄວາມ ນິຍົມທີ່ສຸດຈາກຜູ້ໃຊ້ສອຍທັງພາຍໃນ ແລະ ຕ່າງປະເທດ.
ເຄື່ອງເຟີນີເຈີສິລະປະກຳຢູ່ ດົ່ງກີ້ ມີຫລາຍຮູບແບບ
ພາບ: bacninh.com
|
ເມື່ອຍ່າງເຂົ້າໝູ່ບ້ານ ດົ່ງກີ້, ຢູ່ສອງຟາກທາງ ທ່ານຈະພົບເຫັນບັນດາຮ້ານວາງສະແດງ ເຄື່ອງເຟີນີເຈີສິລະປະກຳທີ່ອຸດົມສົມບູນ ແລະ ເຮືອນເດີມບາງຫລັງມີອາຍຸນັບ 100 ປີ.
ຍາກທີ່ມີໝູ່ບ້ານແຫ່ງໃດຊື່ງປະຊາຊົນເກືອບທັງໝົດໃນໝູ່ບ້ານ ຈາກຜູ້ເຖົ້າຜູ້ແກ່ຕະຫລອດຮອດໄວຫນຸ່ມລ້ວນແຕ່ເຂົ້າຮ່ວມການຜະລິດເຄື່ອງເຟີນີເຈີສິລະປະກຳ. ປະຊາຊົນໃນໝູ່ບ້ານຖືວ່າ ສີມືທີ່ຄ່ອງແຄ້ວໃນການຜະລິດເຄື່ອງເຟີນີເຈີນີ້ ແມ່ນໄດ້ຮັບການສືບທອດຈາກຫລາຍລຸ້ນຄົນແລ້ວ. ເພາະສະນັ້ນເມື່ອເດັກນ້ອຍກຳເນີດແລະ ເຕີບໃຫຍ່ໃນເກັນອາຍຸໃດກໍສາມາດເຂົ້າຮ່ວມຂັ້ນຕອນໃດຫນຶ່ງຂອງການຜະລິດເຄື່ອງເຟີນີເຈີໄດ້. ເພື່ອນ ຫງວຽນວັນເຊີນ, ຊ່າງໄມ້ຫນຸ່ມ ອາຍຸບໍ່ທັນຮອດ 20 ປີ ແຕ່ມີປະສົບການໃນການຜະລິດເຄື່ອງເຟີນີເຈີມາເປັນເວລາ 10 ປີ ແລ້ວໃຫ້ຮູ້ວ່າ: ໃນຄາວຍັງນ້ອຍ, ພາຍຫຼັງເລີກຮຽນກັບເມືອບ້ານ, ຂ້າພະເຈົ້າກໍ່ເຂົ້າຮ່ວມບາງຂັ້ນຕອນຂອງການຜະລິດເຄື່ອງເຟີນີເຈີ ພ້ອມກັບຄອບຄົວ ຄື: ກົບໄມ້, ຄວັດ, ທາແວກນີ ແລະ ເມື່ອມີອາຍຸ 15,16 ປີ ສາມາດຄວັດແກະສະຫລັກບັນດາລວຍລາຍທີ່ງ່າຍດ່າຍ, ປະຈຸບັນ ສາມາດຜະລິດເຄື່ອງເຟີນີເຈີ ດ້ວຍຕົນເອງໄດ້ແລ້ວ.
ສຳລັບອາຊີບຊ່າງໄມ້ຢູ່ດົ່ງກີ້, ຮຽກຮ້ອງໃຫ້ນາຍຊ່າງຕ້ອງມີຄວາມຄ່ອງແຄ້ວ ເພາະວ່າ ບັນດາລວດລາຍເທິງຜະລິດຕະພັນໄມ້ຂອງດົ່ງກີ້ ແມ່ນລະອຽດລະອໍທີ່ສຸດ. ທ່ານ ຫງວຽນຢີຕວານ, ຫົວຫນ້າສະຫະກອນເຄື່ອງຫັດຖະກຳສິລະປະກຳ ຕວານໂລກ ໃຫ້ຮູ້ວ່າ: ເຄື່ອງເຟີນີເຈີສິລະປະກຳ ດົ່ງກີ້ ໄດ້ຮັບຄວາມນິຍົມຈາກລູກຄ້າພາຍໃນ ແລະ ຕ່າງປະເທດເປັນຈຳນວນຫລາຍ, ເພາະວ່າ ເຄື່ອງເຟີນີເຈີສິລະປະກຳ ດົ່ງກີ້ ແມ່ນຜະລິດດ້ວຍມື, ຜ່ານສີມືດີຂອງຊ່າງໄມ້, ແລະ ເໝາະສົມກັບຄວາມຕ້ອງການຂອງລູກຄ້າ.
“ສຳລັບການຜະລິດຕຽງ, ຕູ້. ກົນຈັກແມ່ນອຸປະກອນຫນູນຊ່ວຍຊ່າງໄມ້ດີທີ່ສຸດ, ແຕ່ ຜະລິດຕະພັນຄວັດແກະສະຫລັກ, ກົນຈັກຫນູນຊ່ວຍພຽງສ່ວນໃດຫນຶ່ງເທົ່ານັ້ນ, ສ່ວນຫລາຍແມ່ນຕ້ອງເຮັດດ້ວຍມື . ບໍ່ມີກົນຈັກໃດສາມາດຕອບສະຫນອງ ຫລື ຜະລິດແທນຊ່າງໄມ້ຂອງດົ່ງກີ້ໄດ້.”
ນັບແຕ່ເມື່ອເປີດປະຕູຕະຫລາດ, ກຳລັງຊື້ ເຄື່ອງເຟີນີເຈີສິລະປະກຳ ນັບມື້ນັບເພີ່ມຂຶ້ນ, ອຸປະກອນ, ວັດຖຸດິບມີຫລາຍຮູບຫລາຍແບບກວ່າ. ຍ້ອນການແກ່ງແຍ້ງຂອງຕະຫລາດເຄື່ອງເຟີນີເຈີ, ສະນັ້ນ ເພື່ອຢັ້ງຢືນເຄື່ອງໝາຍການຄ້າ, ບັນດາຜະລິດຕະພັນເຄື່ອງເຟີນີເຈີ ໂດຍໝູ່ບ້ານ ດົ່ງກີ້ ຜະລິດ ຕ້ອງລະອຽດລະອໍ ແລະ ມີຄຸນນະພາບສູງ.
ອາຊີບຊ່າງໄມ້ຊ່ວຍໃຫ້ຊີວິດການເປັນຢູ່ຂອງປະຊາຊົນດົ່ງກິ້
ນັບມື້ນັບ ຮັ່ງມີຂຶ້ນ
ພາບ:bacninh.com
|
ປະຈຸບັນ ໝູ່ບ້ານ ດົ່ງກີ້ ມີເກືອບ 200 ຄອບຄົວ ແລະ ວິສາຫະກິດ ດຳເນີນທຸລະກິດ ເຄື່ອງເຟີນີເຈີສິລະປະກຳ, ອັນໄດ້ດຶງດູດຄົນງານນັບພັນໆຄົນໃນໝູ່ບ້ານ ແລະ ບັນດາແຂວງໃກ້ຄຽງມາເຮັດວຽກ. ອາດ ເວົ້າໄດ້ວ່າ ອາຊີບຊ່າງໄມ້ ໄດ້ເຮັດໃຫ້ ໂສມຫນ້າຂອງໝູ່ບ້ານດົ່ງກີ້ ປ່ຽນແປງຫລາຍຢ່າງ ແລະ ຊ່ວຍໃຫ້ຊີວິດການເປັນຢູ່ຂອງປະຊາຊົນຢູ່ທີ່ນີ້ນັບມື້ນັບພັດທະນາ ແລະ ຮັ່ງມີຂຶ້ນ. ປະຈຸບັນ ບັນດາຜະລິດຕະພັນເຄື່ອງເຟີນີເຈີຂອງ ດົ່ງກີ້ ໄດ້ນຳໄປຂາຍຢູ່ທຸກແຂວງ, ນະຄອນໃນທົ່ວປະເທດ ແລະ ສົ່ງໄປຂາຍຢູ່ຫລາຍປະເທດໃນພາກພື້ນ, ຕະຫລາດເອີລົບ, ອາຟຼິກາ, ທະວີບອາເມລິກາອີກ. ທ່ານ ຫວູກວກເວືອງ, ປະທານ ສະມາຄົມຜະລິດດຳເນີນທຸລະກິດ ເຄື່ອງເຟີນີເຈີສິລະປະກຳ ດົ່ງກີ້ ໃຫ້ຮູ້ວ່າ:
“ເພື່ອເສີມຂະຫຍາຍມູນເຊື້ອຂອງໝູ່ບ້ານອາຊີບຫັດຖະກຳ, ກໍຄືຮັກສາເຄື່ອງໝາຍການຄ້າດົ່ງກີ້ໄວ້, ພວກຂ້າພະເຈົ້າຈະຕິດກາໝາຍສິນຄ້າເພື່ອປົກປ້ອງບັນດາຜະລິດຕະພັນ ແລະກວດກາຄຸນນະພາບຜະລິດຕະພັນກ່ອນທີ່ຈະສົ່ງໄປຂາຍຢູ່ຕະຫລາດຢ່າງລະອຽດ, ຖ້າບັນລຸມາດຖານຈຶ່ງສົ່ງໄປຂາຍຢູ່ຕະຫຼາດໄດ້. ປີນີ້ ພວກຂ້າພະເຈົ້າເປີດຮ້ານວາງສະແດງບັນດາຜະລິດຕະພັນເຟີນີເຈີເພື່ອໃຫ້ຜູ້ມາຊົມມີຄວາມເຂົ້າໃຈຕື່ມອີກກ່ຽວກັບໝູ່ບ້ານດົ່ງກີ້ກວ່າ.”
ບໍ່ພຽງແຕ່ມີຊື່ສຽງດ້ວຍ ເຄື່ອງເຟີນີເຈີສິລະປະກຳເທົ່ານັ້ນ ຫາກໝູ່ບ້ານ ດົ່ງກີ້ ຍັງໄດ້ຮັບການຮູ້ຈັກກັນດີດ້ວຍບັນດາວັດວາອາຮານທີ່ເກົ່າແກ່ດັ້ງເດີມ ນຳມາເຊິ່ງບັນດາຄຸນຄ່າດ້ານສິລະປະສະຖາປັດຕະຍະກຳ ແລະ ຕິດພັນກັບມູນເຊື້ອວັດທະນະທຳຢູ່ທີ່ນີ້ອີກດ້ວຍ. ງານບຸນໝູ່ບ້ານ ດົ່ງກີ້ ໄດ້ຮັບການຈັດຕັ້ງຂຶ້ນໃນວັນທີ 4 ເດືອນຈຽງ ຕາມຈັນທະປະຕິທິນປະຈຳປີ ດ້ວຍຫລາຍພິທີການທີ່ເປັນເອກະລັກສະເພາະ.
ຊີວິດທາງດ້ານເສດຖະກິດນັບມື້ນັບປ່ຽນໃຫມ່ ແລະ ພັດທະນາ, ແຕ່ໝູ່ບ້ານ ດົ່ງກີ້ ຍັງຄົງຮັກສາວັດທະນະທຳພິເສດສະເພາະທີ່ມີມາແຕ່ດົນນານໄວ້ໄດ້.