(vovworld)- ໂດຍນອນຢູ່ຫ່າງຈາກນະຄອນຫຼວງຮ່າໂນ້ຍປະມານ 60 ກມ, ນັບແຕ່ດົນນານແລ້ວ, ໝູ່ບ້ານອາຊີບຜະລິດເຄື່ອງປັ້ນດິນເຜົາຟູ່ລ້າງ, ເມືອງເກວຫວໍ້ ແຂວງບັກນິງ ໄດ້ຮັບການເຊີດຊູແມ່ນໜຶ່ງໃນບັນດາສູນຜະລິດເຄື່ອງປັ້ນດິນເຜົາຂອງເຂດດິນພາກເໜືອຫວຽດນາມ ໃນເມື່ອກ່ອນ. ບັນດາຜະລິດຕະພັນເຄື່ອງປັ້ນດິນເຜົາສີໜັງອຽນທີ່ເປັນເອກະລັກສະເພາະຂອງໝູ່ບ້ານຜະລິດເຄື່ອງປັ້ນດິນເຜົາຟູ່ລ້າງ ມີຊື່ສຽງໃນທົ່ວປະເທດ. ໃນລາຍການຄົ້ນຫາຫວຽດນາມ ພາກນີ້, ວິ້ງຟອງ, ນັກຂ່າວ VOV ຂໍເຊີນພວກທ່ານມາຢ້ຽມຢາມ ໝູ່ບ້ານອາຊີບຜະລິດເຄື່ອງປັ້ນດິນເຜົາຟູ່ລ້າງ ແຫ່ງທີ່ຖືກຖືວ່າແມ່ນໜຶ່ງໃນສູນຜະລິດເຄື່ອງປັ້ນດິນເຜົາເກົ່າແກ່ 3 ແຫ່ງຂອງເຂດທົ່ງພຽງທາງພາກເໜືອຫວຽດນາມ.
(ພາບ: baomoi.com)
ໂດຍນອນຢູ່ແຄມແມ່ນ້ຳ ເກົາ ທີ່ສວຍງາມ, ໝູ່ບ້ານຜະລິດເຄື່ອງປັ້ນດິນເຜົາຟູ່ລ້າງ ບໍ່ມີຄວາມຄຶກຄື້ນຄືໝູ່ບ້ານຜະລິດເຄື່ອງປັ້ນດິນເຜົາບາດຈ່າງ ທີ່ຮ່າໂນ້ຍ, ໃນສາຍຕາຂອງແຂກທ່ອງທ່ຽວ, ໝູ່ບ້ານຜະລິດເຄື່ອງປັ້ນດິນເຜົາຟູ່ລ້າງ ມີຄວາມລຽບງ່າຍດ້ວຍເຮືອນກໍ່ດ້ວຍດິນຈິ່ສີແດງ, ມຸງດ້ວຍດິນຂໍສີແດງເກົ່າແກ່ຕາມການເວລາ, ຢູ່ລຽບຕາມສອງຝາກທາງໃນໝູ່ບ້ານແມ່ນໄຫ, ເຄື່ອງປັ້ນດິນເຜົາໃຊ້ໃນຄອບຄົວຖືກຈັດວາງເປັນແຖວງາມຕາ. ຄອບຄົວ ເກືອບທັງໝົດໃນໝູ່ບ້ານຜະລິດເຄື່ອງປັ້ນດິນເຜົາຟູ່ລ້າງ ໄດ້ເຮັດອາຊີບນີ້ ແລະ ໄປຮອດໃສກໍ່ສາມາດໄດ້ຍິນສຽງເນື່ອງນັນຈາກການເຮັດເຄື່ອງປັ້ນດິນເຜົາ….ພ້ອມກັບບັນດານາຍຊ່າງເຮັດວຽກຢ່າງດຸໝັ່ນຂະຫຍັນພຽນ.
ແມ່ຕູ້ເຈິ່ນທິຢາງ, ອາຍຸ 70 ປີ ໃຫ້ຮູ້ວ່າ: ນັບແຕ່ຄາວຍັງນ້ອຍ, ລາວກໍ່ເຫັນທັງໝູ່ບ້ານເຮັດອາຊີບຜະລິດເຄື່ອງປັ້ນດິນເຜົາແລ້ວ ແລະ ໄດ້ໄປຂາຍຢູ່ທົ່ວທຸກແຫ່ງ. ຄອບຄົວຂອງແມ່ຕູ້ມີຮາກຖານເຮັດເຄື່ອງປັ້ນດິນເຜົາມາກ່ວາ 100 ປີແລ້ວ:
“ຂ້ອຍໄດ້ເຮັດອາຊີບຜະລິດເຄື່ອງປັ້ນດິນເຜົາແຕ່ຄາວອາຍຸ 13 ປີ, ຄາວນັ້ນກໍ່ຮູ້ປັ້ນດິນ ແລະ ສ້າງເປັນຮູບຮ່າງແລ້ວ. ແຕ່ກ່ອນຄອບຄົວຂ້ອຍເຮັດໄຫ, ຕ້ອງເຮັດວຽກລຳບາກກ່ວາ, ປະຈຸບັນ, ມີໂຕະປີ້ນເຄື່ອງປັ້ນໃຊ້ໄຟຟ້າ, ກ່ອນນີ້ຕ້ອງປີ້ນ ແລະ ເຮັດດິນດ້ວຍມື“.
ຮາກຖານການຜະລິດເຄື່ອງປັ້ນດິນເຜົາແຫ່ງ 1
(ພາບ: http://vtv.vn)
ຜະລິດຕະພັນເຄື່ອງປັ້ນດິນເຜົາຟູ່ລ້າງ ມີສີບົວແດງ ຈາກດິນແດງເອົາມາຈາກທ້ອງຖິ່ນຕົນ. ອ້າຍຟ້າມວັນແທ່ງ, ນັກສິລະປະການຢູ່ບ້ານຈົ່ວ, ຕາແສງຟູ່ລ້າງ ໃຫ້ຮູ້ວ່າ: ຜະລິດຕະພັນເຄື່ອງປັ້ນດິນເຜົາຟູ່ລ້າງ ລວມມີ 3 ປະເພດ: ເຄື່ອງປັ້ນດິນເຜົາຮັບໃຊ້ໃນເຫຼື້ອມໃສ, ເຄື່ອງປັ້ນດິນເຜົາໃຊ້ໃນຄອບຄົວ, ໃຊ້ໃນຊີວິດປະຈຳວັນຂອງປະຊາຊົນ ແລະ ເຄື່ອງປັ້ນດິນເຜົາປະດັບ:
“ຈຸດພິເສດສະເພາະຂອງຜະລິດຕະພັນເຄື່ອງປັ້ນດິນເຜົາຟູ່ລ້າງ ແມ່ນ ເຄື່ອງປັ້ນດິນເຜົາດິບ ແລະ ບໍ່ໃຊ້ເຄື່ອງຈັກ, ທຸກສິ່ງທຸກຢ່າງລ້ວນແຕ່ໄດ້ເຮັດດ້ວຍມື ແລະ ນ້ຳເຄືອບໂດຍເຮົາເຮັດເອງ ແລະ ຍ້ອນຄວາມຮ້ອນຂອງປະລິມານຟືນຈູດເຜົາ “.
ແຕ້ມ ແລະ ທາສີໃຫ້ຜະລິດຕະພັນ
(ພາບ: http://vtv.vn)
ຂອດສຳຄັນທີ່ສຸດເພື່ອໃຫ້ຜະລິດຕະພັນເຄື່ອງປັ້ນດິນເຜົາຟູ່ລ້າງ ບັນລຸຄວາມຮຽກຮ້ອງແມ່ນເຕັກນິກການຈູດເຜົາ ແລະ ຈຸດດີເດັ່ນທີ່ສຸດຂອງ ເຄື່ອງປັ້ນດິນເຜົາຟູ່ລ້າງ ແມ່ນໄດ້ເຮັດແບບປະຖົມປະຖານ, ລຽບງ່າຍຂອງນ້ຳເຄືອບສີໜັງອຽນ. ມາຮອດປະຈຸບັນ, ຜະລິດຕະພັນເຄື່ອງປັ້ນດິນເຜົາຟູ່ລ້າງ ໄດ້ພັດທະນາເປັນຫຼາຍຮູບຫຼາຍສີດ້ວຍຜະລິດຕະພັນປະເພດຕ່າງໆ ແລະ ໄດ້ຮັບຄວາມນີຍົມຈາກຜູ້ໃຊ້ສອຍທັງຢູ່ພາຍໃນ ແລະ ຕ່າງປະເທດ. ປະຈຸບັນ, ບັນດາວິສາຫະກິດຍີ່ປຸ່ນ, ສເກົາຫຼີ, ການາດາ, ອີຕີລີ....ໄດ້ສັ່ງຊື້ຜະລິດຕະພັນເຄື່ອງປັ້ນດິນເຜົາວິຈິດຕະກຳຂອງຟູ່ລ້າງ ດ້ວຍປະລິມານບໍ່ແມ່ນໜ້ອຍ. ພິເສດ, ຜະລິດຕະພັນເຄື່ອງປັ້ນດິນເຜົາປະດັບຟູ່ລ້າງ ໄດ້ຮັບຄວາມນີຍົມທີ່ສຸດຈາກແຂກຕ່າງປະເທດ ຍ້ອນມີຈຸດເອກະລັກສະເພາະກ່ຽວກັບຮູບໂຕມັງກອນ, ໂຕສິງ, ເຕົ່າ, ນົກຫົງ, ຮູບທິວທັດທຳມະຊາດເຂດບ້ານນາ….ຍ້ອນເຫດນັ້ນ, ຊີວິດການເປັນຢູ່ຂອງຊາວຟູ່ລ້າງ ມີການປ່ຽນແປງຢ່າງເຫັນໄດ້ຊັດ, ປະຈຸບັນ, ລາຍຮັບຂອງປະຊາຊົນບັນລຸກ່ວາ 15 ລ້ານດ່ົງ/ຄົນ/ປີ.
ເພື່ອຮັກສາ ແລະ ພັດທະນາອາຊີບຫັດຖະກຳທີ່ມີມາແຕ່ດົນນານຂອງຕົນ, ຍາມໃດ, ບັນດາຄອບຄົວຢູ່ຟູ່ລ້າງ ກໍ່ເອົາໃຈໃສ່ເປັນພິເສດເຖິງການສອນວິຊາຊີບໃຫ້ແກ່ລຸ້ນໜຸ່ມ ແລະ ສົ່ງເສີມລູກຫຼານໄປຮຽນຢູ່ບັນດາໂຮງຮຽນວິຈິດສິນເພື່ອເສີມຂະຫຍາຍສິ່ງຍອດຍິ່ງຂອງໝູ່ບ້ານອາຊີບກ່ວາອີກ, ກໍ່ຄືມີຫົວຄິດປະດິດສ້າງໃນການຜະລິດເຄື່ອງປັ້ນດິນເຜົາ. ຟ້າມວັນຮ່ວາງ, ອາຍຸ 24 ປີ, ຮຽນຈົບຈາກມະຫາວິທະຍາໄລວິຈິດສິນຮ່າໂນ້ຍ, ເຄີຍເຮັດອາຊີບຜະລິດເຄື່ອງປັ້ນດິນເຜົາເປັນເວລາ 11 ປີແລ້ວ ໃຫ້ຮູ້ວ່າ:
“ຂ້າພະເຈົ້າໄດ້ກຳເນີດ ແລະ ເຕີບໃຫ່ຍຢູ່ທີ່ນີ້, ສະນັ້ນ, ຮັກອາຊີບຜະລິດເຄື່ອງປັ້ນດິນເຜົານີ້ທີ່ສຸດ, ຍ້ອນວ່າ, ນີ້ກໍ່ແມ່ນອາຊີບທີ່ລຸ້ນພໍ່ລຸ້ນອ້າຍໄດ້ປະໄວ້ໃຫ້. ຂ້າພະເຈົ້າຈະພະຍາຍາມຮັກສາອາຊີບຂອງຄອບຄົວ ແລະ ບ້ານເກີດເມືອງນອນ ແລະ ພັດທະນາອາຊີບຜະລິດເຄື່ອງປັ້ນດິນເຜົາຂອງຟູ່ລ້າງ ກ່ວາອີກ “.
ຟູລ້າງ ໄດ້ ແລະ ພວມກາຍເປັນຈຸດນັບພົບຂອງແຂກທ່ອງທ່ຽວພາຍໃນ ແລະ ຕ່າງປະເທດຫຼາຍຄົນ ພ້ອມດ້ວຍຊາວຫວຽດນາມ ອາໄສຢູ່ຕ່າງປະເທດເມື່ອມາຫວຽດນາມ, ຍ້ອນວ່າຢູ່ທີ່ນີ້ໄດ້ເຕົ້າໂຮມບັນດາປັດໄຈວັດທະນະທຳ, ປະຫວັດສາດກໍ່ຄືທັດສະນີສະພາບເຂດບ້ານນາທີ່ສະຫງົບງຽບຢູ່ແຄມແມ່ນ້ຳເກົາ. ທ່ານຈົ່ງມາຢ້ຽມຢາມຟູ່ລ້າງ ເພື່ອຮັບຟັງກ່ຽວກັບໝູ່ບ້ານເຮັດອາຊີບຜະລິດເຄື່ອງປັ້ນດິນເຜົາທີ່ມີມານັບຮ້ອຍປີ ຫລືວ່າພ້ອມກັບຊາວບ້ານລອງປັ້ນດິນ, ເຜົາເຄື່ອງເປັນທີ່ລະນຶກ, ແລ້ວເອົາເມືອມອບໃຫ້ໝູ່ເພື່ອນ, ຍາດຕິພີ່ນ້ອງ. ຊາວບ້ານຟູ່ລ້າງ ຍາມໃດກໍ່ຕ້ອນຮັບທ່ານດ້ວຍຄວາມຮັກແພງແຂກຄົນ, ຮອຍຍີ້ມທີ່ສະໜີດສະໜົມເໝືອນກັບຄວາມງາມທີ່ລຽບງ່າຍຂອງຜະລິດຕະພັນເຄື່ອງປັ້ນດິນເຜົາຢູ່ແຫ່ງນີ້./.