(vovworld)- ເລີ່ມຕົ້ນປີໃຫມ່ 2015 ດ້ວຍລາຍການທ່ອງທ່ຽວຂຶ້ນພູ Fansipan, ນັ້ນແມ່ນຄວາມໄຝ່ຝັນຂອງເພື່ອນຫນຸ່ມ ແລະ ຜູ້ນິຍົມທ່ອງທ່ຽວພະຈົນໄພ. Fansipan ແມ່ນຈອມພູສູງສຸດຂອງສາຍພູ ຮ່ວາງລຽນເຊີນ ທີ່ໃຫຍ່ໂຕມະໂຫຖານ ແລະ ກໍແມ່ນຈອມພູສູງສຸດຢູ່ ຫວຽດນາມ. ຂຶ້ນຈອມພູ Fansipan ກໍແມ່ນການທ່ອງທ່ຽວທີ່ບໍ່ອາດຂາດໄດ້ສຳລັບບໍ່ວ່າຜູ້ໃດນິຍົມທ່ອງທ່ຽວຄົ້ນຫາ.
ເພື່ອຂຶ້ນ ໄປເຖິງຈອມພູ Fansipan ດ້ວຍຄວາມສູງ 3.143 ແມັດ, ທ່ານຕ້ອງຜ່ານພູຫີນມື່ນ, ພູຕັ້ງສູງ, … ໄລຍະທາງຂຶ້ນ ໄປເຖິງຈອມພູ Fansipan ແມ່ນຫຍຸ້ງຍາກລຳບາກຄືແນວນັ້ນ ແຕ່ເປັນສິ່ງທີ່ດຶງດູດຜູ້ນິຍົມທ່ອງທ່ຽວເປັນຈຳນວນຫລວງຫລາຍ. ນາງ ເຢືອງທິຫວຽດອຽນ ພ້ອມກັບເພື່ອນຍິງຜູ້ຫນຶ່ງ ແລະ ຊາຍຄົນຫນຶ່ງທີ່ພວມດຳລົງຊີວິດ ແລະ ເຮັດວຽກຢູ່ ຮ່າໂນ້ຍ ໄດ້ເລືອກເຟັ້ນລາຍການທ່ອງທ່ຽວຕົ້ນປີ 2015 ແມ່ນຟິຊິດຈອມພູ Fansipan. ນາງ ຢ້ຽວລີງ ແມ່ນຫນຶ່ງໃນຈຳນວນ 3 ຄົນດັ່ງກ່າວ ແບ່ງປັນວ່າ:
“ຊື່ງແມ່ນໄວຫນຸ່ມຜູ້ຫນຶ່ງ ສະນັ້ນ ນ້ອງຢາກຟິຊີດ ສິ່ງໃດຫນຶ່ງ. ແລະຄັ້ງນີ້ ນ້ອງເລືອກເຟັ້ນລາຍການທ່ອງທ່ຽວຂຶ້ນຈອມພູ Fansipan. ເຖິງວ່າ ນີ້ແມ່ນການທ່ອງທ່ຽວພະຈົນໄພ ແລະ ບໍ່ເຄີຍມີບົດຮຽນໃນການຂຶ້ນພູກໍຕາມ ແຕ່ນ້ອງຈະພະຍາຍາມປະຕິບັດ ຄວາມໄຝ່ຝັນຂອງຕົນ.”
ພວກເພື່ອນຂອງ ເຢືອງທິຫວຽດອຽນ ເລີ່ມເດີນທາງຈາກ ຈ້າມໂຕນ, ປະຕູຂອງປ່າສະຫງວນແຫ່ງຊາດ ຮ່ວາງລຽນເຊີນ, ດ້ວຍຄວາມສູງ 1800 ແມັດເມື່ອທຽບໃສ່ຫນ້ານ້ຳທະເລ. ໄລຍະທາງແຕ່ຕີນພູຂຶ້ນໄປເຖິງ ຈອມພູ Fansipan ມີຄວາມຍາວປະມານ 16 ກິໂລແມັດ ແລະ ຕ້ອງໃຊ້ເວລາ 2 ວັນ ແລະ ຄືນຫນຶ່ງ. ການທ່ອງທ່ຽວແບບນີ້ສ່ວນຫລາຍແມ່ນການ ເລືອກເຟັ້ນຂອງນັກຂຶ້ນພູສະໝັກຫລິ້ນ, ນັກທ່ອງທ່ຽວ. ການເດີນທາງເຖິງຈອມພູ Fansipan ແມ່ນຫຍຸ້ງຍາກລຳບາກຫລາຍ ຍ້ອນພູມສັນຖານທຸລະກັນດານ ແຕ່ເມື່ອຂຶ້ນພູສູງ ພວກເພື່ອນຫນຸ່ມຜູ້ໃດກໍຮູ້ສຶກຈິດໃຈສະຫວາດສະເຫວີຍ, ຍ້ອນໄດ້ສູບອາກາດປອດໂປ່ງ, ທິວທັດທຳມະຊາດສວຍງາມ, ໄດ້ຍິນສຽງນົກຮ້ອງ ແລະສຽງນ້ຳໄຫລຜ່ານຫ້ວຍເປັນຈັງຫວະມ່ວນອ່ອນຊອນ. ແຕ່ເຖິງຢ່າງໃດກໍຕາມ, ຢາກຂຶ້ນຈອມພູ Fansipan, ບັນຫາສຳຄັນກວ່າໝູ່ ນັ້ນແມ່ນສຸຂະພາບຕ້ອງແຂງແຮງ. ນາງ ຫວຽດອຽນ ແບ່ງປັນວ່າ:
“ຂ້າພະເຈົ້າເຫັນວ່າ ສຸຂະພາບແມ່ນປັດໄຈສຳຄັນ ແຕ່ຈິດໃຈ ແລະ ເຈດຈຳນົງກໍແມ່ນສິ່ງທີ່ຈຳເປັນສຳລັບຜູ້ນິຍົມທ່ອງທ່ຽວຂຶ້ນພູ. ຮູບພາບຂອງຜູ້ຮ່ວມເດີນທາງກັບຂ້າພະເຈົ້າກໍແມ່ນແບບຢ່າງເພື່ອໃຫ້ຂ້າພະເຈົ້າຕັດສິນໃຈຂຶ້ນໄປເຖິງຈອມພູ Fansipan ໃຫ້ໄດ້. ເພາະວ່າ ຜູ້ນີ້ຈ່ອຍກວ່າຂ້າພະເຈົ້າ ແລະ ອາຍຸກໍສູງກວ່າ ແຕ່ນາງໄດ້ພະຍາຍາມຈົນສຸດຄວາມສາມາດຂອງຕົນເພື່ອຂຶ້ນ ໄປເຖິງ ຈອມພູ Fansipan.”
ສຳລັບ ເຈີນວັນເຫງ໋ຍ, ເຖິງວ່າຕົນເອງໄດ້ຫັດກາຍເປັນປະຈຳ ແຕ່ເມື່ອຂຶ້ນພູໃນເວລາມື້ຫນຶ່ງຮູ້ສຶກວ່າມັນແຕກຕ່າງກັບສິ່ງທີ່ຕົນເອງຄິດ.
“ຂ້າພະເຈົ້າເຫັນວ່າ ຂຶ້ນພູຕ້ອງມີສຸຂະພາບແຂງແຮງ, ຕອ້ງມີຈິດໃຈອົດທົນ ແລະ ການລະດົມກຳລັງໃຈຂອງໝູ່ເພື່ອນ. ເມື່ອເດີນທາງຈາກເນີນພູນີ້ໄປຍັງເນີນພູອື່ນ ນັກທ່ອງທ່ຽວຈະເຫັນທິວທັດທຳມະຊາດສວຍງາມຕ່າງກັນ, ບາງເທື່ອຄືວ່າເຮົາຢຽບເມກ. ເມື່ອຂຶ້ນພູຢູ່ຄວາມສູງ 2800 ແມັດ ຕົນເອງຮູ້ສຶກອິດເມື່ອຍ ແລະ ຍາມຄ່ຳຄືນອາກາດຫນາວຈັດ.”
ໃນມື້ທຳອິດ, ເຢືອງທິຫວຽດອຽນ ພ້ອມກັບໝູ່ເພື່ອນຮ່ວມເດີນທາງ ໄດ້ພັກຜ່ອນຢູ່ບ່ອນມີຄວາມສູງປະມານ 2800 ແມັດ. ຍາມຄ່ຳຄືນ ອາກາດຢູ່ທີ່ນີ້ຕ່ຳກວ່າ 5 ອົງສາ C, ຜູ້ໃດກໍຮູ້ສຶກຫນາວທີ່ສຸດ. ແຕ່ເມື່ອຄິດເຖິງມື້ຕໍ່ໄປໃນລາຍການທ່ອງທ່ຽວພະຈົນໄພນີ້ໃຜກໍມີຈິດໃຈຫ້າວຫັນກວ່າ. ມີຄວາມສູງອີກພຽງກວ່າ 300 ແມັດ ກໍຈະຮອດຈອມພູ Fansipan ແຕ່ໄລຍະທາງນີ້ແມ່ນຫຍຸ້ງຍາກກວ່າ, ເພາະອາກາດຫນາວກວ່າ ແລະ ຕ້ອງຜ່ານຜ່າພູສູງ, ຫ້ວຍມື່ນ. ນາງອຽນ ແບ່ງປັນວ່າ:
“ຂ້າພະເຈົ້າຮູ້ສຶກປິຕິຊົມຊື່ນທີ່ສຸດເມື່ອໄດ້ຊົມບັນຍາກາດຍາມຮຸ່ງເຊົ້າຢູ່ຈອມພູ Fansipan. ຂ້າພະເຈົ້າບໍ່ອາດຫລົງລືມຈຸດເວລານີ້ໄດ້. ຈາກຈອມພູ Fansipan ຫລຽວລົງໄປເບິ່ງ ເຫັນວ່າເທດສະບານຊາປາ ນ້ອຍທີ່ສຸດ. ຂ້າພະເຈົ້າຮູ້ສຶກເອກອ້າງທະນົງໃຈເມື່ອຕົນເອງໄດ້ຜ່ານຜ່າຄວາມຫຍຸ້ງຍາກ, ສິ່ງກີດຂວາງ.”
ຈອມພູ Fansipan
ພາບ:tourdulich.com
|
ຢືນຢູ່ເທິງຈອມພູ Fansipan, ລະຫວ່າງທ້ອງຟ້າທີ່ກວ້າງໃຫຍ່, ຜູ້ໃດກໍ່ຮູ້ສຶກເອກອ້າງທະນົງໃຈ ເພື່ອໄດ້ຟິຊີດ ຈອມພູສູງສຸດຢູ່ຫວຽດນາມ. ຄວາມອິດເມື່ອຍຫາຍໄປໝົດເພື່ອໄດ້ເຫັນປະຈັກຕາຫລັກໝາຍ 3.143 ແມັດ.