(vovworld)- ໂດຍແມ່ນໜຶ່ງໃນຈຳນວນວັດທີ່ເກົ່າແກ່ກ່ວາໝູ່ຢູ່ຫວຽດນາມ, ວັດເຢົາຕັ້ງຢູ່ຕາແສງແທງເຄືອງ, ເມືອງທ້ວນແທ່ງ, ແຂວງບັກນິງ ຊື່ງມີຄຸນຄ່າດ້ານປະຫວັດສາດ, ສະຖາປັດຕະຍາກຳ, ສິລະປະແກະຄວັດສະຫລັກ ແລະ ວັດເຢົາຍັງແມ່ນແຫຼ່ງກຳເນີດຂອງສາສະໜາພຸດອີກດ້ວຍ. ນີ້ແມ່ນໜຶ່ງໃນບັນດາກິດຈະກຳປູສະນີຍະສະຖານແຫ່ງການເຫຼື້ອມໃສທີ່ພົ້ນເດັ່ນ, ອັນໄດ້ດຶງດູດແຂກທ່ອງທ່ຽວພາຍໃນ ແລະ ຕ່າງປະເທດມາຢ້ຽມຢາມ, ຊອກຮູ້ຄຸນຄ່າປະຫວັດສາດເປັນຈຳນວນຫຼາຍ. ໃນລາຍການຄົ້ນຫາຫວຽດນາມ ພາກນີ້, ເຊີນທ່ານມາຢ້ຽມຢາມວັດເຢົາຜ່ານບົດຂຽນທີ່ມີຫວົຂໍ້ວ່າ: “ວັດເຢົາ-ຄວາມເອກອ້າງທະນົງໃຈຂອງຊາວພາກເໜືອ“.
ທາດຮ່ວາຟອງ-ວັດເຢົາ
(ພາບ: vov.vn)
ຕາມປຶ້ມປະຫວັດສາດ ແລະ ແຜ່ນສີລາໃນວັດແລ້ວ, ວັດເຢົາໄດ້ຮັບການກໍ່ສ້າງຂຶ້ນນັບແຕ່ສັດຕະວັດທີ 2 ຫຼັງ ຄສ, ເລິ່ມກໍ່ສ້າງນັບແຕ່ປີ 187 ແລະ ສຳເລັດໃນປີ 226. ວັດເຢົາໃນປະຈຸບັນ ແມ່ນສະຖາປັດຕະຍາກຳທີ່ໄດ້ຮັບການບູລະນະປະຕິສັງຂອນນັບແຕ່ສະໄໝລາຊະວົງເລ (ໃນສັດຕະວັດທີ 17-18), ເຊິ່ງລວມມີ: ເຮືອນ 4 ຫຼັງຕິດກັນອ້ອມຮອບເຮືອນຕົ້ນຕໍ່ 3 ຫຼັງ. ເມື່ອທຽບໃສ່ວັດແຫ່ງຕ່າງໆຢູ່ພາກເໜືອຫວຽດນາມ, ວັດເຢົາແມ່ນ 1 ໃນຈຳນວນວັດຍັງຄົງຮັກສາບັນດາພະພຸດທະຮູບ ຕາມປະເພນີເຫຼື້ອມໃສບູຊາຂອງສາດສະໜາພຸດສະໄໝລາຊະວົງເລ…ຜ່ານການບູລະນະປະຕິສັງຂອນຫຼາຍເທື່ອ, ວັດເຢົາຍັງຄົງຮັກສາບັນດາວັດຖຸພັນທີ່ມີຄ່າຫຼາຍຢ່າງໄວ້ໄດ້, ພິເສດແມ່ນແຜ່ນພິມດ້ວຍໄມ້ທີ່ມີມາແຕ່ປີ 1752 ແລະ ໜັງສືປະດັບຍົດ 6 ສະບັບທີ່ມີຄຸນຄ່າປະຫວັດສາດນັບແຕ່ສະໄໝເຈົາຊີວິດ ມິງມ້າງ (1791-1842), ຕຶດຶກ (1829-1893) ແລະ ເຈົ້າຊີວິດຂາຍດິງ (1885-1925). ຜ່ານການຄົ້ນຄ້ວາ, ບັນດານັກປະຫວັດສາດ ແລະ ພຸດທະສາສະໜາວິທະຍາ ໄດ້ຢັ້ງຢືນວ່າ: ວັດເຢົາ ແມ່ນກົກເຄົ້າຂອງສາສະໜາພຸດຫວຽດນາມ.
ໃນເດືອນ 12/2013 ຜ່ານມາ, ວັດເຢົາໄດ້ຮັບການຮັບຮອງວ່າແມ່ນປູສະນີຍະສະຖານລະດັບຊາດພິເສດ. ທ່ານ ເຈິ່ນດິ່ງລ້ວຽນ, ຮອງປະທານປະຈຳສະມາຄົມວິທະຍາສາດປະຫວັດສາດແຂວງບັກນິງ ເວົ້າວ່າ:
“ຂ້າພະເຈົ້າຖືວ່າ, ເລື່ອງວັດເຢົາ ແລະ ເຂດປູສະນີຍະສະຖານສະຖາປັດຕະຍາກຳສິລະປະ ວັດບຸດທາບ ຂອງແຂວງບັກນິງ ໄດ້ຮັບການຮັບຮອງວ່າແມ່ນປູສະນີຍະສະຖານລະດັບຊາດພິເສດ ແມ່ນເໝາະສົມ. ພວກເຮົາຕອ້ງໂຄສະນາໃຫ້ ປະຊາຊົນເຂົ້າໃຈໄດ້ຄຸນຄ່າຂອງ ປູສະນີຍະສະຖານແຫ່ງນີ້ ແລະ ຕ້ອງມີແຜນການເພື່ອອະນຸລັກຮັກສາ“
(ພາບ: vov.vn)
ຜ່ານການເວລາ, ວັດເຢົາຍັງແມ່ນແຫ່ງທີ່ດຶງດູດແຂກທ່ອງທ່ຽວພາຍໃນ ແລະ ຕ່າງປະເທດ ກໍ່ຄືຊາວຫວຽດນາມ ອາໄສຢູ່ຕ່າງປະເທດເປັນຈຳນວນຫຼາຍມາຢ້ຽມຊົມ, ຊອກຮູ້ກ່ຽວກັບສະຖາປັດຕະຍາກຳສິລະປະທີ່ເປັນເອກລັກສະເພາະ ກໍ່ຄືຊອກຫາກົກເຄົ້າຂອງສາດສະໜາດພຸດຫວຽດນາມ. ນີ້ແມ່ນຄວາມເອກອ້າງທະນົງໃຈບໍ່ແມ່ນໜ້ອຍສຳລັບຜູ້ທີ່ໄດ້ຮັບການກຳເນີດ ແລະ ເຕີບໃຫ່ຍຢູ່ເຂດດິນແດນສັກກະລະບູຊາແຫ່ງນີ້ແຕ່ລະຄົນ. ປ້າບຸ່ຍທິເລີ້ຍ, ຢູ່ບ້ານເຄືອງຕຶ້, ຕາແສງແທງເຄືອງ, ເມືອງທ້ວນແທ່ງ, ແຂວງບັກນິງ. ໃຫ້ຮູ້ວ່າ:
“ໂດຍແມ່ນຊາວທ້ອງຖິ່ນຜູ້ໜຶ່ງ, ຂ້າພະເຈົ້າມີຄວາມເອກອ້າງທະນົງໃຈທີ່ສຸດຕໍ່ວັດບູຮານແຫ່ງນີ້. ນີ້ແມ່ນວັດແຫ່ງທີ່ມີຄວາມໝາຍປະຫວັດສາດຕິດພັນກັບສາດສະໜາພຸດ ແລະ ແມ່ນວັດທີ່ເປັນເອກະລັກສະເພາະອັນດັບໜຶ່ງໃນພາກພື້ນອາຊີຕາເວັນອອກສ່ຽງໃຕ້“.
ພະອໍລະຫັນ 18 ອົງໃນວັດເຢົາ
(ພາບ: vov.vn)
ທ່ານຫງວຽນຢຸຍຄວາ ຫົວໜ້າຄະນະວັດທະນະທຳຕາແສງແທງເຄືອງ, ເມືອງທ້ວນແທ່ງ, ແຂວງບັກນິງ ໃຫ້ຮູ້ວ່າ:
“ຂ້າພະເຈົ້າຮູ້ສຶກເອກອ້າງທະນົງໃຈທີ່ສຸດຍ້ອນວ່າ: ນີ້ແມ່ນບ້ານເກີດເມືອງນອນ ບ່ອນທີ່ຂ້າພະເຈົ້າໄດ້ກຳເນີດ ແລະ ເຕີບໃຫ່ຍຂຶ້ນ ແລະ ນີ້ກໍ່ແມ່ນກົກເຄົ້າຂອງສາດສະໜາພຸດຫວຽດນາມ. ຊາວທ້ອງຖິ່ນຫຼາຍຄົນເຖິງວ່າຈະໄປໃສ, ເຮັດວຽກງານຢູ່ບ່ອນໃດ, ຮອດວັນທີ 8/4 ໄລ່ຕາມຈັນທະປະຕິທິນຂອງທຸກປີ ກໍ່ ກັບເມືອບ້ານເຂົ້າຮ່ວມງານບຸນວັດເຢົາ “.
ດ້ວຍຄວາມໝາຍແມ່ນພາວະນາຂໍໃຫ້ດິນຟ້າເອື້ອຍອຳນວຍຄວາມສະດວກ, ລະດູການເກັບກ່ຽວໄດ້ຮັບຜົນດີນັ້ນ, ງານບຸນວັດເຢົາຖືກຈັດຂຶ້ນໃນວັນທີ 8/4 ໄລ່ຕາມຈັນທະປະຕິທິນຂອງແຕ່ລະປີ ດ້ວຍຫຼາຍພິທີການ ແລະ ລາຍການສະແດງສິລະປະທີ່ອຸດົມສົບບູນ, ໄດ້ສ້າງຄວາມດຶງດູດແຂກທ່ອງທ່ຽວມາຈາກທຸກສາລະທິດ, ພະສົງສາມະເນັນ, ພຸດທະສາຊະນິກກະຊົນ…ມາຖະຫວາຍທູບທຽນ, ໄຫວ້ບູຊາ ແລະ ເຂົ້າຮ່ວມງານບຸນ ເປັນຈຳນວນຫຼວງຫຼາຍ. ນີ້ຖືກຖືວ່າແມ່ນງານບຸນສາດສະໜາພຸດໃຫ່ຍກ່ວາໝູ່ຢູ່ພາກເໜືອຫວຽດນາມ, ຜ່ານນັ້ນ, ສະແດງໃຫ້ເຫັນຄວາມງາມ, ຄຸນຄ່າວັດທະນະທຳກ່ຽວກັບການເຫຼື້ອມໃສຂອງເຂດແດນແດນບູຮານໃນເມື່ອກ່ອນ./.