(vovworld) – ເດີນທາງອອກຈາກຊາຫວີ, ບ່ອນເລີ່ມຕັ້ງຟອຍແຕ້ມແຜ່ນທີ່ປະເທດຫວຽດນາມ, ເຊີນທ່ານໄປຢ້ຽມຢາມສາລາບ້ານຈ່າໂກ ຕັ້ງຢູ່ໃຈກາງບ້ານໃນຕາແສງຈ່າໂກ, ນະຄອນມ໋ອງກ໋າຍ, ແຂວງກວາງນິງ. ເຊິ່ງມີມານັບແຕ່ດົນນານແລ້ວ ຄືດັ່ງຫຼັກໝາຍຢັ້ງຢືນອະທິປະໄຕວັດທະນະທຳຂອງຫວຽດນາມ.
ສາລາບ້ານຈ່າໂກ
(ພາບ: ອິນເຕີແນດ)
“ອາກາດຢູ່ທີ່ນີ້ກໍ່ມີ 4 ລະດູຄືກັນກັບອາກາດລວມຂອງພາກເໜືອ, ແຕ່ພັດເຢັນສະບາຍກວ່າຍ້ອນຕິດກັບທະເລ. ຮອດລະດູຮ້ອນ, ນັກທ່ອງທ່ຽວມາພັກຜ່ອນຢູ່ແຫ່ງນີ້ຈະໄດ້ສູບອາກາດທີ່ປອດໂປ່ງ ແລະ ເຢັນສະບາຍ”.
ເລີ່ມກ້າວເຂົ້າສູ່ລະດູຮ້ອນ, ແສງແດດບໍ່ຮ້ອນປານໃດ, ເຮັດໃຫ້ທີວທັດທຳມະຊາດຢູ່ທີ່ນີ້ສວຍງາມກວ່າ. ບົນເສັ້ນທາງໄປຍັງສາລາບ້ານຈ່າໂກ, ອ້າຍຈູງ, ພະນັກງານຄະນະກຳມະການປະຊາຊົນນະຄອນມ໋ອງກ໋າຍ ໄດ້ແນະນຳກ່ຽວກັບອາກາດຢູ່ມ໋ອງກ໋າຍໃຫ້ພວກຂ້າພະເຈົ້າຮູ້ຄືແນວນັ້ນ. ລົດໃຫຍ່ 7 ທີ່ນັ່ງຂົນສົ່ງພວກຂ້າພະເຈົ້າບົນເສັ້ນທາງປູຢາງທີ່ຮາບພຽງ ແລະ ສະອາດຈາກນະຄອນມ໋ອງກ໋າຍເຖິງສາລາບ້ານຈ່າໂກ ດ້ວຍໄລຍະທາງກວ່າ 10 ກມ ໃນເວລາ 15 ນາທີ
ສາລາບ້ານຈ່າໂກ
(ພາບ: ອິນເຕີແນດ)
ສາລາບ້ານຈ່າໂກ ຕັ້ງຢູ່ໃຈກາງບ້ານ. ຈາກເສັ້ນທາງຕົ້ນຕໍ່ໃນບ້ານໄປຍັງສາລາ, ເມື່ອຜ່ານບັນດາເຮືອນນ້ອຍຂອງຊາວປະມົງຈ່າໂກ ເຫັນຮູບພາບປະຊາຊົນດຸໝັ່ນເກັບປາຈາກແຫ, ເຊິ່ງແມ່ນຜົນງານທີ່ໄດ້ຮັບພາຍຫຼັງການໄປຫາປາຢູ່ທະເລກໍ່ຮູ້ສຶກໄດ້ຄວາມສະຫງົບສຸກຢູ່ທີ່ນີ້. ປະຈຸບັນ, ສາລາຈ່າໂກ ພວມໄດ້ຮັບການບຸລະນະປະຕິສັງຂອນ. ທ່ານ ຫງວຽນຢາວເຕ໋, ປະທານສະມາຄົມຜູ້ອາຍຸສູງຕາແສງຈ່າໂກ, ໃຫ້ຮູ້ວ່າ, ສາລາຈ່າໂກ ແມ່ນແຫ່ງຮັກສາຮ່ອງຮອຍປະຫວັດສາດຫຼາຍຢ່າງ, ດັ່ງນັ້ນ, ປະຊາຊົນຈຶ່ງຢາກກໍ່ສ້າງສາລາໃຫ້ໃຫຍ່ໂຕໂອໂຖງ ແລະ ຍືນຍົງຄົງຕົວໃນທຸກສະໄໝ.
“ເມື່ອມາຢ້ຽມຢາມແຫ່ງນີ້, ລຸງຟ້າມວັນດົ່ງ (ອະດີດນາຍົກລັດຖະມົນຕີຫວຽດນາມ) ໄດ້ເວົ້າວ່າ: ສາລາຈ່າໂກ ປຽບເໝືອທະຫານປ້ອງກັນຊາຍແດນຂອງປະເທດຊາດ. ດັ່ງນັ້ນຕ້ອງຮັກສາສາລານີ້ໄວ້. ຍ້ອນເຫດນັ້ນ, ນັບແຕ່ສັນຕິພາບຕ່າວຄືນມາ, ສາລາໄດ້ຮັບການບຸລະນະປະຕິສັງຂອນເຖິງ 4 ເທື່ອ, ແຕ່ຍັງຄົງຮັກສາຮູບເດີມໄວ້ຄືເກົ່າ”.
ສາລາບ້ານຈ່າໂກ
(ພາບ: ອິນເຕີແນດ)
ທ່ານ ຫງວຽນຢາວເຕ໋ ແນະນຳວ່າ, ເຖິງວ່າຕັ້ງຢູ່ເຂດຊາຍແດນຕິດກັບຈີນ, ແຕ່ສາລາຈ່າໂກ ພັດໄດ້ຮັບການກໍ່ສ້າງຕາມຮູບແບບສະຖາປັດຕະຍະກຳຂອງຫວຽດນາມ ແລະ ເຂັ້ມຄົ້ນໄປດ້ວຍສີສັນວັດທະນະທຳຫວຽດນາມ ບໍ່ຊອດແບບສະຖາປັດຕະຍະກຳຂອງຈີນ. ສິ່ງດັ່ງກ່າວສະແດງໃຫ້ເຫັນວ່າ, ບັນພະບຸລຸດຂອງພວກເຮົາໃນເມື່ອກ່ອນໄດ້ຖືເປັນສຳຄັນສີສັນວັດທະນະທຳຂອງຊາດທີ່ສຸດ.
“ສາລາຈ່າໂກ ແມ່ນໜຶ່ງໃນບັນດາສາລາວັດທະນະທຳ. ທັງແມ່ນສາລາທີ່ມີມາແຕ່ດົນນານທີ່ສຸດຂອງຫວຽດນາມ (ແຕ່ສະຕະວັດທີ 16). ພິທີບູຊາເທວະດາຟ້າແຖນ, ກໍ່ຄືເຄື່ອງບູຊາກໍ່ລ້ວນແຕ່ຕາມຮີດຄອງປະເພນີຂອງຫວຽດນາມ. ປີ 1979, ເມື່ອເກີດສົງຄາມຢູ່ເຂດຊາຍແດນ, ປະຊາຊົນໄດ້ນຳເອົາເຄື່ອງບູຊາທັງໝົດໃນສາລາໄປຮັກສາໄວ້ຢູ່ບ່ອນອື່ນ. ນັບແຕ່ປີ 1979 – 1992, ເຄື່ອງບູຊາຊຸດນີ້ຖືກນຳໄປວາງສະແດງຢູ່ອີຕາລີ. ສິ່ງດັ່ງກ່າວສະແດງໃຫ້ເຫັນວ່າ ນີ້ແມ່ນເຄື່ອງບູຊາຂອງຫວຽດນາມ”.
ສາລາບ້ານຈ່າໂກ
(ພາບ: ອິນເຕີແນດ)
ສະຖາປັດຕະຍະກຳຂອງສາລາໝູ່ບ້ານທະເລນີ້ ໄດ້ສ້າງຄວາມປະທັບໃຈໃຫ້ແກ່ນັກທ່ອງທ່ຽວ ດ້ວຍສິລະປະແກະຄວັດສະຫລັກຢ່າງລະອຽດລະອໍ. ຮູບແກະຄວັດສະຫລັກຢູ່ທີ່ນີມີ: ສັດ tu linh, ມັງກອນສອງໂຕເຝົ້າພະຈັນ, ປາໄນກາຍເປັນມັງກອນ, ກ້ອນເມກ… ຈຸດພິເສດຢູ່ສາລານີ້ແມ່ນປະຕູໃຫຍ່ທີ່ແກະຄວັດສະຫລັກຮູບເທວະດາຂີ່ມັງກອນຂ້າມທະເລ.
“ນີ້ແມ່ນບັນລັງທີ່ນັ່ງໃຫຍ່ກວ່າໝູ່ປຽບເໝືອລາດຊະວັງຂອງເຈົ້າຊີວິດ. ສ່ວນບັນດາຮູບປັ້ນນີ້ ແມ່ນຮູບອໍລະຫັນ 6 ອົງ, ຢູ່ເບື້ອງຂວາ ແລະ ເບື້ອງຊ້າຍນີ້ແມ່ນຮູບປັ້ນຜູ້ປ້ອງກັນບັນດາອໍລະຫັນເຫຼົ່ານັ້ນ”.
ຜ່ານການເວລາ ແລະ ການຜັນແປຂອງປະຫວັດສາດ, ສາລາຄືດັ່ງຂີດໝາຍວັດທະນະທຳ ປະຫວັດສາດ, ຢືນຢັນອະທິປະໄຕຜືນແຜ່ນດິນຂອງຫວຽດນາມ. ທ່ານ ຫວູດິ່ນດົ່ງ, ຊາວຈາໂກ ໃຫ້ຮູ້ວ່າ:
“ສາລານີ້ແມ່ນແຫ່ງຈາລຶກບຸນຄູນບັນພະບຸລຸດຜູ້ທີ່ມີຄຸນງາມຄວາມດີໃນການບຸກເບີດເນື້ອທີ່ດິນຢູ່ແຫ່ງນີ້, ທັງແມ່ນຫຼັກໝາຍຢັ້ງຢືນອະທິປະໄຕຂອງຫວຽດນາມ, ເຊິ່ງແມ່ນພະຍານຫຼັກຖານທີ່ບໍ່ອາດປະຕິເສດໄດ້. ສາລາແມ່ນຫຼັກໝາຍທີ່ໄດ້ຮັບການຮັບຮອງຈາກລັດ ແລະ ປະຊາຊົນຫວຽດນາມ ເພື່ອຊ່ວຍໃຫ້ໂລກເຂົ້າໃຈໄດ້ກ່ຽວກັບປະຫວັດສາດຂອງຫວຽດນາມ”.
ສາລາບ້ານຈ່າໂກ
(ພາບ: ອິນເຕີແນດ)
ປະຊາຊົນຈ່າໂກ ພວມລໍຖ້າວັນສາລາໄດ້ຮັບການບຸລະນະປະຕິສັງຂອນສຳເລັດ. ສາລາໝູ່ບ້ານທະເລຈ່າໂກ ກໍ່ເປັນແຫຼ່ງສະອອນໃຈ ເພື່ອໃຫ້ນັກປະພັນດົນຕີ ຫງວຽນເກື່ອງ ແຕ່ງບົດເພງ ສາລາໝູ່ບ້ານທະເລ. ຄື້ນທະເລຍັງຄົງທົບໃສ່ຟັ່ງຕະຫຼອດ ແລະ ເປັນສັກຂີພິຍານການຍື່ນຍົງຄົງຕົວຂອງສາລາບ້ານທະເລຈ່າໂກ.