ໝູ່ບ້ານເຮື້ຍທີ່ຂຶ້ນກັບຕາແສງເຕີນເລ້, ເມືອງຮຶງຮ່າ, ແຂວງທ້າຍບີງ ແມ່ນໝູ່ບ້ານປະກອບອາຊີບຜະລິດສາດທີ່ມີມາແຕ່ດົນນານ. ເມື່ອເວົ້າເຖິງ ສາດຂອງ ໝູ່ບ້ານເຮື້ອ ກໍເວົ້າເຖິງການເຕົ້າໂຮມບັນດາສິ່ງທີ່ລະອຽດອ່ອນທີ່ສຸດໃນສາດຜືນໜຶ່ງ, ຈາກຄວາມລະອຽດລະອໍທາງດ້ານວັດຖຸດິບ ຕະຫຼອດຮອດການເລືອກເອົາຜື ແລ້ວກໍຮອດກີ່ຕ່ຳສາດ. ສາດຂອງ ໝູ່ບ້ານເຮື້ຍ ກໍແມ່ນຜະລິດຕະພັນທີ່ມີມາແຕ່ດົນນານຂອງໝູ່ບ້ານແຫ່ງນີ້ ແລະ ກໍແມ່ນຜະລິດຕະພັນຫັດຖະກຳສິລະປະທີ່ມີຊື່ສຽງທີ່ສຸດໃນເຂດ ກໍຄືໃນທົ່ວປະເທດ.
ສາດຂອງໝູ່ບ້ານເຮື້ຍໃນແຂວງທ້າຍບີງ
|
ໂດຍຜ່ານໄລຍະທາງ 40 ກມ ຈາກນະຄອນທ້າຍບີງ ໄປຕາມເສັ້ນທາງນ້ອຍໃນທ່າມກາງທົ່ງໄຮ່ທົ່ງນາທີ່ສຸກເຫຼືອງອາຮາມ, ແຂກທ່ອງທ່ຽວກໍຈະຮອດ ໝູ່ບ້ານເຮື້ຍຊຶ່ງແມ່ນໝູ່ບ້ານທີ່ມີຊື່ສຽງຂອງແຂວງທ້າຍບີງດ້ວຍຜະລິດຕະພັນສາດທີ່ມີຄຸນນະພາບສູງ.
ຢູ່ພະວິຫານບູຊາ ຝ້າມດົນເລ້ , ແຂກທ່ອງທ່ຽວຈະໄດ້ຮັບຟັງເລື່ອງລາວກ່ຽວກັບຜູ້ກໍ່ຕັ້ງອາຊີບຕ່ຳສາດນີ້. ເມື່ອກ່ອນນີ້, ໝູ່ບ້ານເຮື້ຍກໍໄດ້ປະກອບອາຊີບຕ່ຳສາດມາແຕ່ດົນນານແລ້ວ, ແຕ່ໃຊ້ກີ່ຕ່ຳສາດຕັ້ງຊື, ດັ່ງນັ້ນສາດເມື່ອຕ່ຳມາກໍບໍ່ງາມ ແລະ ບໍ່ແໜ້ນ. ໃນເມື່ອພໍ່ຕູ້ ຝ້າມດົນເລ້ ຢູ່ບ້ານເຮື້ອສາມາດເສັງໄດ້ລະດັບປະລິນຍາເອກໃນສະໄໝເຈົ້າຊີວິດ ເລແທ້ງຕົງ ປີ 1481. ພໍ່ຕູ້ໄດ້ຮັບແຕ່ງຕັ້ງໄປເປັນທູດຢູ່ຈີນ. ໄລຍະຢູ່ຈີນ ພໍ່ຕູ້ໄດ້ຮຽນເອົາເຕັກນິກການຕ່ຳສາດທີ່ກ້າວໜ້າຂອງຈີນ, ແລ້ວມາຖ່າຍທອດໃຫ້ຊາວບ້ານ. ນັບແຕ່ນັ້ນເປັນຕົ້ນມາ, ຜະລິດຕະພັນສາດຂອງໝູ່ບ້ານມີຄວາມງາມກ່ວາເກົ່າ, ເສັ້ນຜືກໍຖືກຕ່ຳຢ່າງສະໝ່ຳສະເໝີກວ່າ. ຜະລິດຕະພັນນີ້ ນັບມື້ນັບໄດ້ຮັບຄວາມນິຍົມຊົມໃຊ້ຈາກປະຊາຊົນ. ຍ້ອນຄຸນງາມຄວາມດີນີ້, ຊາວບ້ານໄດ້ເຊີດຊູ ພໍ່ຕູ້ ຝ້າມດົນເລ້ເປັນຜູ້ກໍ່ຕັ້ງອາຊີບຕ່ຳສາດ ແລະ ໄດ້ໃຫ້ກໍ່ຕັ້ງວິຫານເພື່ອບູຊາ.
ດ້ວຍມູນເຊື້ອທີ່ມີມາແຕ່ດົນນານ, ໝູ່ບ້ານເຮື້ຍໃນວັນນີ້ ຍັງຄົງສາມາດຮັກສາອາຊີບໄວ້ໄດ້, ອັນໄດ້ຜະລິດອອກບັນດາຜະລິດຕະພັນສາດທີ່ມີຊື່ສຽງເພື່ອສະໜອງໃຫ້ແກ່ລູກຄ້າ. ລຸງ ໂງຢີລຽນ ຜູ້ປະກອບອາຊີບຕ່ຳສາດມາແຕ່ດົນນາຢູ່ ໝູ່ບ້ານເຮື້ຍ ໃຫ້ຮູ້ວ່າ ຢູ່ຕາແສງ ເຕີນເລ້ມີປະມານ 3.200 ຄອບຄົວ, ໃນນັ້ນມີ 80% ຈຳນວນຄອບຄົວປະກອບອາຊີບຕ່ຳສາດ, ແຕ່ລະປີສາມາດສະໜອງສາດນັບລ້ານຜືນໃຫ້ແກ່ຕະຫຼາດ. ຜ່ານບັນດາໄລຍະເວລາແຫ່ງປະຫວັດສາດ, ຊາວບ້ານຍັງຄົງສາມາດຮັກສາອາຊີບຕ່ຳສາດໄວ້ໄດ້. ລຸງ ໂງຢີລຽນ ເວົ້າວ່າ:
“ໄລຍະທີ່ຈະເລີນຮຸ່ງເຮືອງທີ່ສຸດແມ່ນໃນຊຸມປີ 60, 70 ຂອງສະຕະວັດກ່ອນ, ບໍ່ວ່າຜູ້ໃດ ຢູ່ແຫ່ງຫົນໃດກໍຕາມ ກໍລ້ວນແຕ່ນຳໃຊ້ສາດ. ສາດຂອງໝູ່ບ້ານເຮື້ຍແມ່ນງາມທີ່ສຸດ ແລະ ທົນທານດີ. ດັ່ງນັ້ນ, ປະຊາຊົນຈາກສາລະທິດ, ຜູ້ຢູ່ໃກ້ ແລະ ໄກຕ່າງກໍເຄີຍມາຊື້ສາດຢູ່ບ້ານຂ້າພະເຈົ້າເມືອໃຊ້. ຊື່ສຽງຮຽງນາມຂອງໝູ່ບ້ານເຮື້ຍໄດ້ດົງດັງໄປທົ່ວປະເທດ ”
ສາດຂອງໝູ່ບ້ານເຮື້ຍແມ່ນຖືກຜະລິດດ້ວຍຫຼາຍຮູບແບບຜະລິດຕະພັນ ແລະ ມີຫຼາຍຂະໜາດທີ່ແຕກຕ່າງກັນ. ຢູ່ໝູ່ບ້ານເຮື້ອ, ໃນແຕ່ລະປີ, ບັນດາຄອບຄົວໃນບ້ານເຄີຍຕ່ຳສາດເປັນເວລາ 8 ເດືອນ. ສ່ວນເວລາທີ່ຍັງເຫຼືອ, ແມ່ນເຂົາເຈົ້າລົງເຮັດໄຮ່ໄຖນາ. ກ່ອນໜ້ານັ້ນ, ຊາວບ້ານເຄີຍຕ່ຳສາດດ້ວຍມື. ເມື່ອເຮັດດ້ວຍມືນັ້ນ, ກໍສາມາດຜະລິດອອກບັນດາຜະລິດຕະພັນສາດທີ່ລະອຽດລະອໍກວ່າ. ແຕ່ຜະລິດຕະພັນແບບນີ້ເມື່ອຜະລິດອອກແມ່ນບໍ່ຫຼາຍ. ນາງ ຫງວຽນທູ ລົ້ວ ໃຫ້ຮູ້ວ່າ ປະຈຸບັນ, ຊາວບ້ານສ່ວນຫຼາຍໄດ້ຫັນໄປສູ່ການຕ່ຳສາດດ້ວຍເຄື່ອງຈັກຊຶ່ງໄດ້ໃຫ້ສະມັດຕະພາບສູງກວ່າ, ລາຍຮັບຂອງຜູ້ຜະລິດກໍຖືກຍົກສູງຂຶ້ນຫຼາຍພໍສົມຄວນ ແຕ່ສຳຄັນທາງດ້ານຄຸນນະພາບແມ່ນຍັງຄົງໄດ້ຮັບປະກັນ. ນາງ ຫງວຽນທູ ລົ້ວ ເວົ້າວ່າ :
“ ເມື່ອກ່ອນນີ້, ເຄີຍຕ່ຳສາດດ້ວຍມື, ດັ່ງນັ້ນ ຜະລິດຕະພັນສາດກໍບໍ່ໄດ້ຫຼາຍ ຄື 2 ຄົນເຮັດໄດ້ສາດ 2 ຄູ່ຕໍ່ວັນ. ປະຈຸບັນ, ໄດ້ຫັນໄປສູ່ການຕ່ຳສາດດ້ວຍເຄື່ອງຈັກ, ກໍສາມາດຜະລິດໄດ້ຜະລິດຕະພັນສາດຫຼາຍກວ່າ, ໃນມື້ໜຶ່ງຄົນໜຶ່ງກໍສາມາດຜະລິດໄດ້ສາດ 20 ຄູ່, ລາຍຮັບກໍຖືກຍົກສູງຂຶ້ນ. ຊາວບ້ານກໍດີໃຈຫຼາຍ, ຜູ້ໃດກໍຫ້າວຫັນຕ່ຳສາດ ”
ໂດຍຖືກຕັ້ງຢູ່ບໍລິເວນໃກ້ກັບແມ່ນ້ຳແດງ ແລະ ແມ່ນ້ຳຫຼວກ, ໝູ່ບ້ານເຮື້ຍມີເງື່ອນໄຂສະດວກໃນການປູກຜື ເພື່ອໃຊ້ເປັນວັດຖຸດິບເພື່ອຕ່ຳສາດ. ເສີມຂະຫຍາຍທ່າແຮງເປັນເຂດມີວັດຖຸດິບຫຼວງຫຼາຍ ພ້ອມກັບເຕັກນິກການຕ່ຳສາດ, ໝູ່ບ້ານເຮື້ຍສາມາດຜະລິດອອກບັນດາຜະລິດຕະພັນທີ່ເປັນເອກະລັກສະເພາະ ຊຶ່ງບໍ່ມີຢູ່ແຫ່ງໃດໃນເຂດທົ່ງພຽງແມ່ນ້ຳແດງສາມາດຜະລິດໄດ້. ສາດຂອງໝູ່ບ້ານເຮື້ອຖືກຍ້ອມສີຫຼາກຫຼາຍທີ່ແຕກຕ່າງກັນ ຊຶ່ງຂຶ້ນກັບການສັ່ງຊື້ ແລະ ຄວາມນິຍົມຂອງລູກຄ້າ. ຈຸດພິເສດຂອງສາດຂອງໝູ່ບ້ານເຮື້ຍ ແມ່ນນາຍຊ່າງຢູ່ນີ້ເຄີຍຕ່ຳເປັນຮູບດອກບົວ, ດອກກຸຫຼາບ ແລະ ຕາມຕົວໜັງສືຕ່າງໆ. ນີ້ແມ່ນວິທີຕ່ຳສາດທີ່ຕ້ອງການມີປະສົບການ ແລະ ຫົວຄິດປະດິດສ້າງຂອງນ່າຍຊາງ, ທັງນີ້ໄດ້ສ້າງຄວາມເປັນເອກະລັກສະເພາະໃຫ້ສາດຜືຂອງໝູ່ບ້ານເຮື້ຍ ແລະ ເປັນທີ່ຮູ້ຈັກກັນດີຂອງລູກຄ້າທັງຫຼາຍ.