ຫນອງ ໂຮ່ໄຕ ໃນຊີວິດດ້ານຈິດໃຈຂອງຊາວຮ່າໂນ້ຍ
To Tuan -
(vovworld)- ຫນອງ ໂຮ່ໄຕ ແມ່ນຫນຶ່ງໃນບັນດາທັດສະນີຍະພາບສວຍງາມຢູ່ນະຄອນຫລວງ ຮ່າໂນ້ຍ, ຊື່ງແມ່ນສະຖານທີ່ມີປູຊະນີຍະສະຖານປະຫວັດສາດວັດທະນະທຳ ຫລາຍແຫ່ງທີ່ຕິດພັນກັບປະຫວັດຄວາມເປັນມາ ແລະ ພັດທະນາຂອງ ພະລາຊະວັງ ທັງລອງ ໃນເມື່ອກ່ອນ ແລະ ຮ່າໂນ້ຍ ໃນປະຈຸບັນ. ຄວາມງາມຂອງ ຫນອງໂຮ່ໄຕ ແມ່ນຈຸດພົ້ນເດັ່ນໃນຮູບພາບກ່ຽວກັບ ຮ່າໂນ້ຍ, ຊື່ງແມ່ນບ່ອນພົບປະ, ມີອະນຸສອນຫລາຍຢ່າງສຳລັບຊາວຮ່າໂນ້ຍຫລາຍຄົນ ແລະ ກໍແມ່ນສະຖານທີ່ດຶງດູດນັກທ່ອງທ່ຽວເປັນຈຳນວນຫລວງຫລາຍເມື່ອເຂົາເຈົ້າມາຢ້ຽມຢາມນະຄອນຫລວງຮ່າໂນ້ຍ.
ຫນອງໂຮ່ໄຕ
|
ຫນອງ ໂຮ່ໄຕ ແມ່ນຫນອງນ້ຳທຳມະຊາດ ຖືກຕັ້ງຢູ່ທາງທິດຕາເວັນຕົກສ່ຽງເຫນືອຂອງນະຄອນຫລວງ ຮ່າໂນ້ຍ ດ້ວຍເນື້ອທີ່ປະມານ 500 ເຮັກຕາ, ມີເສັ້ນທາງອ້ອມຮອບຫນອງດ້ວຍຄວາມຍາວເກືອບ 20 ກີໂລແມັດ. ບັນດາເອກະສານປະຫວັດສາດສະແດງໃຫ້ເຫັນວ່າ ກ່ອນນີ້ນັບພັນປີ, ຫນອງໂຮ່ໄຕ ແມ່ນຕອນທີ່ຍັງເຫລືອຈາກວິວັດການຫັນປ່ຽນກະແສນ້ຳຂອງແມ່ນ້ຳແດງ. ປະຈຸບັນ ທາງທິດຕາເວັນຕົກຂອງຫນອງ ໂຮ່ໄຕ ຍັງມີຮ່ອງຮອຍຂອງໝູ່ບ້ານບູຮານຫລາຍແຫ່ງ. ໝູ່ບ້ານແຕ່ລະແຫ່ງລ້ວນແຕ່ຕິດພັນກັບປະຫວັດສາດ. ໝູ່ບ້ານ ງີຕາມ ບ້ານເກີດເມືອງນອນຂອງນັກກະວີ “ບ່າຮ້ວຽນແທງກວານ”. ໝູ່ບ້ານ ຊວນຕ໋າວ ມີວິຫານ ຊອກ ທີ່ບູຊາ ແທງຢອງ. ໝູ່ບ້ານ ຈີກຊ່າຍ ມີວັດ ທຽນນຽນ ບູຊາ ຜູ້ທີ່ກໍ່ຕັ້ງອາຊີບຕຳ່ແຜ່ນ. ໝູ່ບ້ານ ຖູ້ຍເຄ ມີວັດ ບາແດງ. ໝູ່ບ້ານ ເຍີດເຕີນ ດ້ວຍສວນດອກຄາຍສວຍງາມທີ່ມີຊື່ສຽງ. ນອກນັ້ນ ມີວັດແຫ່ງຫນຶ່ງທີ່ນັກທ່ອງທ່ຽວຫລາຍຄົນເຄີຍມາຢ້ຽມຢາມ ນັ້ນແມ່ນວັດ ເຈີນກວກ. ວັດ ເຈີນກວກ ຖືກຕັ້ງຢູ່ແຫລມນ້ອຍໃກ້ກັບຖະຫນົນ ແທງນຽນ, ຊື່ງແມ່ນເສັ້ນທາງທີ່ສວຍງາມ ເປັນຂັ້ນແບ່ງລະຫວ່າງຫນອງໂຮ່ໄຕ ແລະ ຫນອງ ຈຸກແບກ. ນີ້ແມ່ນວັດແຫ່ງເກົ່າແກ່ກວ່າໝູ່ຢູ່ຫວຽດນາມ ຊື່ງໄດ້ຮັບການກໍ່ສ້າງແຕ່ສັດຕະວັດທີ VI ສະໄຫມລາຊະວົງ ຫລີນາມເດ. ພະອາຈານ ທີກແທງຫຍ໋າ ເຈົ້າອະທິການວັດ ເຈີນກວກ ໃຫ້ຮູ້ວ່າ:
“ເມື່ອປີ 541-548 ໄລຍະທຳອິດວັດແຫ່ງນີ້ຖືກເອີ້ນວ່າ ວັດຄາຍກວກ ແລະ ໄດ້ຮັບການກໍ່ສ້າງຢູ່ແຄມແມ່ນ້ຳແດງ ຫລັງຈາກນັ້ນ ໃນທ້າຍສະໄຫມລາຊະວົງ ເລ (ໃນສັດຕະວັດທີ 17) ຖືກຍ້າຍມານີ້. ວັດ ເຈີນກວກ ມີປະຫວັດສາດ 1440 ປີ. ສຳລັບ ນະຄອນຫລວງ, ນີ້ແມ່ນວັດເກົ່າແກ່ກວ່າໝູ່.”
ຢູ່ນະຄອນຫລວງ ຮ່າໂນ້ຍ, ຫນອງໂຮ່ໄຕ ແມ່ນເຂດມີລະບົບມໍລະດົກ, ມີປູຊະນີຍະສະຖານຫລາຍແຫ່ງ. ສະເພາະເຂດຫນອງ ໂຮ່ໄຕ ກໍມີປູສະນີຍະສະຖານປະຫວັດສາດ 62 ແຫ່ງ, ໃນນັ້ນ ມີ 22 ແຫ່ງຖືກຈັດເຂົ້າບັນຊີລາຍຊື່ປູຊະນີຍະສະຖານລະດັບຊາດ ແລະ 7 ແຫ່ງແມ່ນລະດັບນະຄອນ. ເມື່ອລະດູບານໃຫມ່ວຽນມາ, ບັນດາເຂດວັດວາອາຮາມດັ່ງກ່າວ ໄດ້ດຶງດູດແຂກມາຈາກທຸກສາລະທິດພາຍໃນ ແລະ ຕ່າງປະເທດ ເປັນຈຳນວນຫລວງຫລາຍ. ດ້ວຍທ່າໄດ້ປຽບແມ່ນມີທີ່ຕັ້ງພິເສດ, ຫນອງໂຮ່ໄຕ ກວມເອົາດ້ານວັດທະນະທຳປະຫວັດສາດ ເກືອບທັງໝົດ, ໃນນັ້ນ ມີກິດຈະກຳສິລະປະສະຖາປັດຕະຍະກຳສາສະຫນາທີ່ພົ້ນເດັ່ນ ຜ່ານບັນດາໄລຍະແຫ່ງການກໍ່ສ້າງຢ່າງກົມກຽວ ດ້ວຍທິວທັດທຳມະຊາດສວຍງາມຂອງຫນອງໂຮ່ໄຕ ໄດ້ສ້າງເປັນຄວາມດູດດື່ມສະເພາະ. ນີ້ກໍແມ່ນສາຍເຫດທີ່ເຮັດໃຫ້ນັກທ່ອງທ່ຽວຫລາຍຄົນມາຢ້ຽມຢາມແຫ່ງນີ້ ເພື່ອຄົ້ນຫາຫນອງໂຮ່ໄຕ. ສຳລັບນັກທ່ອງທ່ຽວຫລາຍຄົນແລ້ວ, ສິ່ງທີ່ສ້າງຄວາມປະທັບໃຈນັ້ນແມ່ນໄດ້ໄປຢ້ຽມຢາມຫນອງໂຮ່ໄຕ ດ້ວຍລົດໄຟຟ້າແລ່ນອ້ອມແອ້ມຫນອງໂຮ່ໄຕ. ທ່ານ ຫງວຽນກວາງໂລກ, ຢູ່ເມືອງ ຮາຍບາຈືງ ຮ່າໂນ້ຍ ໃຫ້ຮູ້ວ່າ:
“ກ່ອນນີ້ ຂ້າພະເຈົ້າພຽງແຕ່ໄດ້ຍິນວ່າ ຫນອງໂຮ່ໄຕ ກວ້າງໃຫຍ່ເທົ່ານັ້ນ ຫາກບໍ່ທັນໄປຢ້ຽມຢາມເທື່ອ. ແຕ່ປະຈຸບັນ ເມື່ອນັ່ງເທິງລົດໄຟຟ້າໄປຢ້ຽມຢາມຫນອງໂຮ່ໄຕ ຂ້າພະເຈົ້າຈຶ່ງຮູ້ຈັກໄດ້ຫລາຍສິ່ງຫລາຍຢ່າງ, ແລະເຂົ້າໃຈຕື່ມອີກກ່ຽວກັບບັນດາໝູ່ບ້ານອາຊີບ, ບັນດາປູຊະນີຍະສະຖານ, ວັດວາອາຮາມຢູ່ອ້ອມຫນອງໂຮ່ໄຕ.”
ວັດເຈີນກວກ
ພາບ:eva.vn
|
ຫນອງໂຮ່ໄຕ ປະຈຸບັນ ບໍ່ພຽງແຕ່ສວຍງາມຍ້ອນຫນ້ານຳ້ຂຽວແລະກວ້າງໃຫຍ່ເທົ່ານັ້ນ ຫາກຍັງມີຄວາມງາມດ້ວຍສີສັນຫລາກຫລາຍຂອງດອກໄມ້ນາໆຊະນິດ. ອາກາດຢູ່ຫນອງ ໂຮ່ໄຕ ຍາມໃດກໍປອດໂປ່ງເຢັນສະບາຍ ເຮັດໃຫ້ຈິດໃຈຂອງທ່ານຍິ່ງສະຫວາດສະເຫວີຍກວ່າ. ແຕ່ລະເຊົ້າ ບໍ່ພຽງແຕ່ຊາວຮ່າໂນ້ຍເທົ່ານັ້ນ ຫາກຍັງມີຊາວຕ່າງປະເທດພວມດຳລົງຊີວິດ ແລະ ເຮັດວຽກຢູ່ ຮ່າໂນ້ຍ ຫລາຍຄົນ ກໍມັກຍ່າງເລາະຫລິ້ນ ຫລືອອກກຳລັງກາຍຢູ່ອ້ອມຫນອງໂຮ່ໄຕ ເພື່ອສູບອາກາດປອດໂປ່ງໃນຍາມເຊົ້າ. ສ່ວນໃນຍາມສາຍັນ ຫນອງໂຮ່ໄຕ ແມ່ນສະຖານທີ່ເພື່ອໃຫ້ຫລາຍຄົນພົບປະໂອ້ລົມນຳກັນ ຫລືແບ່ງປັນບັນດາອະນຸສອນ, ວຽກງານ. ບາງຄົນນັ່ງດື່ມກາເຟກັບໝູ່ເພື່ອນຢູ່ຮ້ານຂາຍກາເຟອ້ອມຫນອງໂຮ່ໄຕ. ໃນຊຸມມື້ວັນບຸນ ຫລື ວັນທ້າຍອາທິດ, ຊາວຮ່າໂນ້ຍ ເຄີຍເຕົ້າໂຮມກັນຢູ່ຫນອງໂຮ່ໄຕ ເພ່ືອພົບປະກັນ, ຫລືຮັບປະທານອາຫານຢູ່ຮ້ານອາຫານ… ຍ້ອນບັນດາສິ່ງທີ່ສ້າງຄວາມປະທັບໃຈດັ່ງກ່າວໄດ້ເຮັດໃຫ້ຫນອງໂຮ່ໄຕ ກາຍເປັນສະຖານທີ່ຕິດພັນກັບຊີວິດທາງດ້ານຈິດໃຈຂອງຊາວຮ່າໂນ້ຍ.
To Tuan