(vovworld)- ຫນ້າເວັບ Trip Advisor ມີອິດທິພົນຊື່ສຽງໃນໂລກ ຕີລາຄາຄຸນນະພາບການທ່ອງທ່ຽວ- ຫາກໍ່ມອບຫນັງສືຢັ້ງຢືນສະຖານທີ່ທ່ອງທ່ຽວທີ່ດູດດືມຄັ້ງທີ 2 ໃຫ້ແກ່ຫໍພິພິດທະພັນຊົນເຜົ່າວິທະຍາຫວຽດນາມ. ຕາມນັ້ນແລ້ວ, ຫໍພິພິດທະພັນຊົນເຜົ່າວິທະຍາ ຫວຽດນາມ ຖືກຈັດອັນດັບທີ 6 ໃນຈຳນວນ ຫໍພິພິດທະພັນດູດດື່ມກວ່າໝູ່ຢູ່ ໃນອາຊີ 25 ແຫ່ງ. ຫໍພິພິດທະພັນຊົນເຜົ່າວິທະຍາ ກາຍເປັນສະຖານທີ່ດຶງດູດນັກທ່ອງທ່ຽວມາຢ້ຽມຢາມ, ພັກຜ່ອນຢ່ອນອາລົມ, ຮັບຊົມສິລະປະ ແລະ ຂຸດຄົ້ນກ່ຽວກັບວັດທະນະທຳຫວຽດນາມເປັນຈຳນວນຫລວງຫລາຍ.
ຫໍພິພິດທະພັນຊົນເຜົ່າວິທະຍາ ຫວຽດນາມ
photo:internet
|
ຫໍພິພິດທະພັນຊົນເຜົ່າວິທະຍາ ຫວຽດນາມ ຕັ້ງຢູ່ຖະຫນົນ ຫງວຽນວັນຮວຽນ ຫ່າງຈາກໃຈກາງນະຄອນຫລວງ ຮ່າໂນ້ຍ ປະມານ 8 ກິໂລແມັດ. ໂດຍໄດ້ຮັບການກໍ່ສ້າງຂຶ້ນແຕ່ປີ 1997, ມາຮອດປະຈຸບັນ ຫໍພິພິດທະພັນຊົນເຜົ່າວິທະຍາ ໄດ້ກາຍເປັນສະຖານທີ່ດຶງດູດນັກທ່ອງທ່ຽວທັງພາຍໃນ ແລະ ຕ່າງປະເທດເປັນຈຳນວນຫລວງຫລາຍ ຜ່ານ ບັນດາວັດຖຸພັນທຳມະດາສາມັນ, ສ່ອງແສງໃຫ້ເຫັນທຸກດ້ານຂອງວັດທະນະທຳມີຮູບຮ່າງ ແລະ ບໍ່ມີຮູບຮ່າງ, ບັນດາຈຸດພົ້ນດີເດັ່ນໃນຊີວິດ ແລະ ຫົວຄິດປະດິດສ້າງຂອງບັນດາເຜົ່າຢູ່ ຫວຽດນາມ. ຕາມ ດຣ ລືວຮຸ່ງ, ຮອງຜູ້ອຳນວຍການ ຫໍພິພິດທະພັນຊົນເຜົ່າວິທະຍາ ແລ້ວ, ນີ້ແມ່ນຄວາມເອກອ້າງທະນົງໃຈ, ເປັນຕົ້ນໃນເມື່ອ ຫໍພິພິດທະພັນຊົນເຜົ່າ ຢູ່ພາຍໃນປະເທດປະຈຸບັນ ສ່ວນຫລາຍ ດຶງດູດນັກທ່ອງມາຢ້ຽມຊົມບໍ່ໄດ້ຫລາຍປານໃດ.
“ຫໍພິພິດທະພັນຊົນເຜົ່າວິທະຍາຫວຽດນາມ ໄລຍະຫາກໍ່ສ້າງຕັ້ງຂຶ້ນກໍຢືນຢູ່ຕໍ່ຫນ້າສິ່ງທ້າທາຍ ເພາະໄລຍະນັ້ນ ຫໍພິພິດທະພັນຫລາຍແຫ່ງພາຍ, ພວມກ້າວເຂົ້າສູ່ໄລຍະຫຍູ້ງຍາກ. ຫໍພິພິດທະພັນຊົນເຜົ່າວິທະຍາ ທັງເຄື່ອນໄຫວທັງຮັບເອົາບົດຮຽນ, ຫັນການເຄື່ອນໄຫວເປັນຫລາຍຮູບຫລາຍແບບ. ນັ້ນແມ່ນເສັ້ນທາງພັດທະນາບັນດາຮູບການເຄື່ອນໄຫວໃຫມ່ ຊື່ງກ່ອນນີ້ ຫໍພິພິດທະພັນຊົນເຜົ່າວິທະຍາບໍ່ທັນຮູ້ຈັກເຖິງ ແລະ ບໍ່ເຄີຍເຮັດຈັກເທື່ອ.”
ເຂດວາງສະແດງຂອງ ຫໍພິພິດທະພັນຊົນເຜົ່າວິທະຍາ ແມ່ນອາຄານຮູບກອງທອງ ມີເນື້ອທີ່ 2500 ຕາລາງແມັດ. ອາຄານຫລັງນີ້ ໄດ້ຮັບການອອກແບບພິເສດດ້ວຍສະຖາປັດຕະຍະກຳທີ່ເປັນເອກະລັກສະເພາະ. ຂັ້ນໄດໃນຕືກອາຄານນີ້ຖືກອອກແບບຕາມຂັ້ນໄດຂຶ້ນເຮືອນຮ້ານຂອງຊາວເຜົ່າສ່ວນຫນ້ອຍ. ການວາງສະແດງ ຢູ່ຫໍພິພິດທະພັນ ແມ່ນອີງຕາມໝວດພາສາຄື: ເຂດແນະນຳຊົນເຜົ່າກີງ, ເຂດແນະນຳບັນດາຊົນເຜົ່າທີ່ຈັດໃນໝວດພາສາ ໄຕ, ໄທ ແລະ ກາຢາຍ, ໝວດພາສາ ມົນ- ຂະແມ, ໝວດພາສາ ນາມດ໋າວ, ເຜົ່າຈຳ, ຈີນ, ຂະແມ…
ຫໍພິພິດທະພັນຊົນເຜົ່າວິທະຍາ ໄດ້ຮັບການຮັກສາ ແລະ ວາງສະແດງວັດຖຸພັນວັດທະນະທຳຫລາຍຢ່າງຂອງ 54 ຊົນເຜົ່າຫວຽດນາມ ຊື່ງລວມ ມີວັດຖຸພັນ 27.000 ຢ່າງ, ໃນນັ້ນ 23.000 ຢ່າງກ່ຽວກັບວົງຄະນາຍາດຊົນເຜົ່າຫວຽດນາມ, ສ່ວນຍັງເຫລືອແມ່ນບັນດາວັດຖຸພັນກ່ຽວກັບບັນດາເຜົ່າຢູ່ອາຊີຕາເວັນອອກສຽງໃຕ້ ແລະ ບັນດາປະເທດອື່ນໆ. ໃນນັ້ນ ຈຳນວນອຸປະກອນຟັງຊົມ ລວມມີຮູບຖ່າຍເອກະສານ 11.000 ແຜ່ນກ່ຽວກັບບັນດາຫົວເລື່ອງທີ່ແຕກຕ່າງກັນ. ໃນອາຄານຫລັງນີ້ ບັນດາວັດຖຸພັນໄດ້ຮັບການຈັດແບ່ງ ແລະ ວາງສະແດງຕາມແຕ່ລະເນື້ອໃນຕ່າງກັນ, ນັກທ່ອງທ່ຽວສາມາດຊອກຮູ້ຊີວິດການເປັນຢູ່ຂອງປະຊາຊົນບັນດາເຜົ່າຜ່ານອຸປະກອນນຳໃຊ້ປະຈຳວັນຂອງເຂົາເຈົ້າ ແລະ ສ່ອງແສງໃຫ້ເຫັນຈຸດວັດທະນະທຳທີ່ເປັນເອກະລັກສະເພາະຂອງບັນດາເຜົ່າ.
ສຽງຜູ້ແນະນຳ: ຢູ່ ຫວຽດນາມ ມີ 54 ຊົນເຜົ່າ ແລະ ຖືກແບ່ງເປັນ 11 ໝວດພາສາແຕກຕ່າກງັນ, ລວມມີ: ເມື່ອງ, ໄທ, ຂະແມ, ໄຕ, ນຸ່ງ… ແລະແຕ່ລະໝວດພາສາກໍ່ມີສີສັນພິເສດສະເພາະ. ຊາວຫວຽດນາມ ດຳລົງຊີວິດຢູ່ບັນດາແຂວງ, ນະຄອນ ໃນເຂດພູພຽງ, ພູດອຍ ຕະຫລອດຮອດພູສູງ, ເປັນຕົ້ນແມ່ນເຂດແຄມທະເລ.”
ເມື່ອເຂົ້າຊົມເຂດວາງສະແດງ, ແນະນຳກ່ຽວກັບຊົນເຜົ່າຊື່ງກວມເກືອບ 90% ຍອດຈຳນວນພົນລະເມືອງຂອງຫວຽດນາມ ເຮັດໃຫ້ນັກທ່ອງທ່ຽວລ້ວນແຕ່ຮູ້ສຶກປະທັບໃຈທີ່ສຸດ. ດ້ວຍການປະດັບປະດາ, ວາງສະແດງວັດຖຸພັນຢ່າງມີວິທະຍາສາດ, ສົມທົບກັບການເຄື່ອນໄຫວຕ່າງໆຄື: ການສະແດງລະຄອນຕຸກກະຕານ້ຳ, ການຜະລິດເຄື່ອງຫັດຖະກຳສິລະປະກຳ, ຈັດຕັ້ງງານບຸນຕ່າງໆຂອງບັນດາເຜົ່າຢູ່ຫວຽດນາມ ແລະອື່ນໆ ໄດ້ສ້າງຄວາມຮູ້ສຶກໃຫມ່ໃຫ້ແກ່ແຂກເຂົ້າຊົມ. ນາງ ເລືອງງອກເຮືອງ ຜູ້ມາຊົມຫໍພິພິດທະພັນຊົນເຜົ່າວິທະຍາເປັນຫລາຍຄັ້ງໃຫ້ຮູ້ວ່າ:
“ຢູ່ທີ່ນີ້ ຂ້າພະເຈົ້າສາມາດເຂົ້າໃຈໄດ້ຫລາຍຢ່າງກ່ຽວກັບດ້ານສະຖາປັດຕະຍະກຳ, ແບບແຜນການດຳລົງຊີວິດຂອງປະຊາຊົນບັນດາເຜົ່າຢູ່ຫວຽດນາມ. ພິເສດ ຫໍພິພິດທະພັນຊົນເຜົ່າວິທະຍາຈັດບັນດາລາຍການຂ້າພະເຈົ້າຊອກຮູ້ໄດ້ຫລາຍກວ່າ ເພາະວ່າ ຂ້າພະເຈົ້າບໍ່ທັນມີໂອກາດໄປຢ້ຽມຢາມຫລາຍແຫ່ງ. ”
ອອກຈາກອາຄານກອງທອງ, ນັກທ່ອງທ່ຽວສືບຕໍ່ໄປຢ້ຽມຊົມຫໍພິພິດທະພັນກ່າງແຈ້ງ. ບັນດາຫລັງຄາເຮືອນຂອງຊາວເຜົ່າ ເອເດ, ຮ່າຍີ່, ເຮືອນຣົງຂອງປະຊາຊົນບັນດາເຜົ່າ ຢູ່ເຂດໄຕງວຽນ, ຊາວເຜົ່າກີງ ໄດ້ສ້າງຄວາມປະທັບໃຈໃຫ້ແກ່ນັກທ່ອງທ່ຽວ. ໃນບໍລິເວນທີ່ກວ້າງໃຫຍ່, ຕົ້ນໄມ້ໄບຫຍ້າຂຽວສົດງົດງາມ ດ້ວຍບັນດາສວນປູກຜັກ, ທົ່ງຫຍ້າຂຽວອ່ອນ, ເສັ້ນທາງໃນໝູ່ບ້ານ…ທັງໝົດເຫົຼ່ານັ້ນໄດ້ເຮັດໃຫ້ຫໍພິພິດທະພັນມີຄວາມງາມຍາກທີ່ພັນລະນາໄດ້. ດຣ ລືວຮຸ່ງ ໃຫ້ຮູ້ວ່າ:
“ຫໍພິພິດທະພັນຊົນເຜົ່າວິທະຍາດຫວຽດນາມ ແມ່ນຫໍພິພິດທະພັນແຫ່ງທຳອິດຂອງຫວຽດນາມ ທີ່ມີເຂດວາງສະແດງກ່າງແຈ້ງ, ກິດຈະກຳສະຖາປັດຕະຍະກຳທັງໝົດຢູ່ທີ່ນີ້ ລ້ວນແຕ່ແມ່ນຊາວຊົນເຜົ່າເປັນຜູ້ກໍ່ສ້າງຂຶ້ນ. ບັນດາຫລັງຄາເຮືອນຢູ່ທີ່ນີ້ ມີຕົ້ນກຳເນີດຂອງມັນ, ຜ່ານທັດສະນະ, ວິທີສຳພັດໃຫມ່ທີ່ກ້າວຫນ້າ, ເໝາະສົມກັບສັງຄົມ, ຄວາມຮຽກຮ້ອງການພັດທະນາຂອງຫໍພິພິດທະພັນກໍຄືຄວາມນິຍົມຂອງຜູ້ຊົມນັ້ນແມ່ນທິດທາງທີ່ຖືກຕ້ອງ, ເຮັດໃຫ້ບັນດາຜູ້ເຂົ້າຮ່ວມການສ້າງຕັ້ງຫໍພິພິດທະພັນຊົນເຜົ່າວິທະຍາຫວຽດນາມມີຄວາມປິຕິຊົມຊື່ນຫລາຍ.”
ໃນ 6 ເດືອນຕົ້ນປີ 2013 ມີແຂກເຂົ້າຊົມ ຫໍພິພິດທະພັນ ເກືອບ 250.000 ເທື່ອຄົນ, ເພີ່ມຂຶ້ນ 6% ເມື່ອທຽບໃສ່ປີ 2012. ພາຍຫລັງມາຢ້ຽມຢາມ ຫໍພິພິດທະພັນ ນັກທ່ອງທ່ຽວຫລາຍຄົນລ້ວນແຕ່ຮູ້ສຶກປະທັບໃຈ. ດັ່ງນັ້ນ ຫໍພິພິດທະພັນຊົນເຜົ່າວິທະຍາຫວຽດນາມ ໄດ້ກາຍເປັນສະຖານທີ່ທ່ອງທ່ຽວຂາດບໍ່ໄດ້ໃນລາຍການທ່ອງທ່ຽວຢູ່ ຮ່າໂນ້ຍ.