ຢູ່ນະຄອນດາຫນັງ ມີສະຖານທີ່ທ່ອງທ່ຽວຫລາຍແຫ່ງດຶງດູດນັກທ່ອງທ່ຽວມາຢ້ຽມຢາມເປັນຈຳນວນຫລວງຫລາຍຄື: ບານາ, ຫງູແຫ່ງເຊີນ, ເຂດປູຊະນີຍະສະຖານ ໝີເຊີນ, ວັດ ລີງອືງ… ໃນນັ້ນມີສະຖານທີ່ທ່ອງທ່ຽວທີ່ຂາດບໍ່ໄດ້ໃນລາຍການທ່ອງທ່ຽວ ດາຫນັງ ນັ້ນແມ່ນຫໍພິພິດທະພັນປະຕິມາກຳຈຳ. ໃນລາຍການຄົ້ນຫາຫວຽດນາມ ພາກນີ້ ເຊີນທ່ານກັບນັກຂ່າວລານແອງມາຢ້ຽມຢາມ ຫໍພິພິດທະພັນປະຕິມາກຳ ຈຳຢູ່ດາຫນັງ
ຫໍພິພິດທະພັນປະຕິມາກຳຈຳ
ພາບ:internet
|
ນັກທ່ອງທ່ຽວມາຢ້ຽມຢາມຫໍພິພິດທະພັນປະຕິມາກຳຈຳ ສ່ວນຫລາຍມາຈາກທຸກແຖບຖິ່ນໃນທົ່ວປະເທດ ແລະ ປະເທດຕ່າງໆໃນໂລກ. ຫໍພິພິດທະພັນປະຕິມາກຳ ຈຳ ຢູ່ ດາຫນັງ ມີວັດຖຸພັນນ້ອຍ, ໃຫຍ່ເກືອບ 2000 ຢ່າງ, ໃນນັ້ນ ມີເກືອບ 500 ຢ່າງພວມວາງສະແດງ. ປີ 1915, ຫໍພິພິດທະພັນແຫ່ງນີ້ໂດຍຊາວຝລັ່ງກໍ່ສ້າງ, ຮຽບຮຽງ, ຮັກສາ, ວາງສະແດງບັນດາວັດຖຸພັນກ່ຽວກັບສິລະປະປະຕິມາກຳຂອງລາຊະອານາຈັກ ຈຳປາ ຊື່ງຊອກເຫັນຢູ່ບັນດາທາດ, ກຳແພງຈຳໃນເຂດແຄມທະເລທາງທາງທິດໃຕ້ພາກກາງ ແລະ ບັນດາແຂວງເຂດໄຕງວຽນ. ໂດຍມີວັດຖຸພັນທີ່ມີຄຸນຄ່າ ເປັນຈຳນວນຫລວງຫລາຍກ່ຽວກັບພື້ນຖານວັດທະນະທຳຈຳ ສະນັ້ນ ວິການວາງສະແດງກໍໄດ້ແບ່ງອອກເປັນແຕ່ລະເຂດທີ່ເໝາະສົມກັບພູມີປະເທດ, ບ່ອນທີ່ຊອກເຫັນບັນດາວັດຖຸພັນຄື: ໝີເຊີນ, ຈາກ້ຽວ, ດົງເຢືອງ, ທາດເໝີນ. ດ້ວຍການຈັດວາງສະແດງຄືແນວນັ້ນໄດ້ຊ່ວຍໃຫ້ນັກທ່ອງທ່ຽວເຫັນໄດ້ຈຸດພິເສດສະເພາະກ່ຽວກັບສະຖາປັດຕະຍະກຳຈຳຂອງແຕ່ລະທ້ອງຖິ່ນ. ນັກທ່ອງທ່ຽວຜູ້ຫນຶ່ງທີ່ມາຈາກ ເຢຍລະມັນໃຫ້ຮູ້ວ່າ:
“ເມື່ອຢ້ຽມຊົມຫໍພິພິດທະພັນແຫ່ງນີ້ ຂ້າພະເຈົ້າຮູ້ສຶກປະທັບໃຈຫລາຍເມື່ອໄດ້ຮັບຟັງແນະນຳກ່ຽວກັບບັນດາວັດຖຸພັນປະຫວັດສາດທີ່ວາງສະແດງຢູ່ທີ່ນີ້. ຫວັງວ່າໃນໄລຍະຈະມາເຖິງ, ຖ້າມີໂອກາດມາຢ້ຽມຢາມຫໍພິພິດທະພັນແຫ່ງນີ້ອີກ ພວກຂ້າພະເຈົ້າຈະໄດ້ຮັບຟັງແນະນຳຕື່ມອີກກ່ຽວກັບວັດທະນະທຳຈຳ.”
ເມື່ອຢ້ຽມຊົມບັນດາຫ້ອງວາງສະແດງວັດຖຸພັນ, ນັກທ່ອງທ່ຽວໄດ້ເຫັນປະຈັກຕາຮູບເທວະດາ Shiva, Brahma, ແທ່ນບູຊາ ຫມີເຊີນ ທີ່ໄດ້ຮັບການແກະຄວັດສະຫລັກຢ່າງລະອຽດລະອໍ. ເຖິງວ່າໄດ້ຜ່ານການເວລາຫຼາຍປີແລ້ວກໍຕາມ ແຕ່ມາຮອດປະຈຸບັນ ບັນດາວັດຖຸພັນດັ່ງກ່າວຍັງຄົງຮັກສາຮູບເດີມໄວ້ຄືເກົ່າ. ບັນດາຜະລິດຕະພັນປະຕິມາກຳຢູ່ຫໍພິພິດທະພັນຈຳມີຫລາຍຮູບຫລາຍແບບ. ໃນນັ້ນສ່ວນຫລາຍແມ່ນຮູບປັ້ນດ້ວຍດິນ, ຫຼໍ່ດ້ວຍທອງ ແລະ ຄວັດດ້ວຍຫີນຊາຍແຕ່ສັດຕະວັດທີ VII - XV. ທ່ານ ຫວໍວັນທັງ, ຜູ້ອຳນວຍການຫໍພິພິດທະພັນຈຳ ດາຫນັງ ໃຫ້ຮູ້ວ່າ:
“ໃນຊຸມປີມໍ່ໆມານີ້, ຫໍພິພິດທະພັນໄດ້ດຳເນີນວຽກງານຊອກຫາວັດຖຸບູຮານ, ບໍ່ພຽງແຕ່ເພື່ອຄົ້ນຄ້ວາເທົ່ານັ້ນ ຫາກຍັງເກັບຮັກສາໄວ້ອີກດ້ວຍ. ການຊອກຫາວັດຖຸບູຮານໃນ 2 ປີຜ່ານມາໄດ້ຮັບໝາກຜົນດີພໍສົມຄວນ ແລະ ເພີ່ມຈຳນວນວັດຖຸພັນ ໃຫ້ແກ່ຫໍພິພິດທະພັນຕື່ມອີກ.”
ໃນບັນຍາກາດສະຫງົບງຽບ, ເກົ່າແກ່ຂອງຫໍພິພິດທະພັນ, ຜະລິດຕະພັນສິລະປະແຕ່ລະຢ່າງທີ່ວາງສະແດງຢູ່ທີ່ນີ້ ລ້ວນແຕ່ມີຄວາມໝາຍດ້ານວັດທະນະທຳຂອງຊົນເຜົ່າຈຳ. ເຖິງວ່າຜ່ານໄລຍະເວລາອັນຍາວນານ ຖືກຜົນສະທ້ອນຈາກທຳມະຊາດກໍຕາມ ແຕ່ຄວາມງາມ ແລະ ຄຸນຄ່າເດີມຂອງບັນດາວັດຖຸພັນເຫົ່ຼ່ານັ້ນຍັງຄົງໄດ້ຮັບການຮັກສາໄວ້ຢູ່ . ນັ້ນກໍແມ່ນສິ່ງທີ່ດຶງດູດນັກທ່ອງທ່ຽວມາຢ້ຽມຊົມຫໍພິພິດທະພັນນັບມື້ນັບຫລາຍ. ອ້າຍເລຫວູບາວ, ຜູ້ນຳທ່ຽວ ຢູ່ ແຂວງ ເທື່ອທຽນເຫ້ວ ໃຫ້ຮູ້ວ່າ:
“ເມື່ອມາຢ້ຽມຢາມ ດາຫນັງ, ເຂົ້າຢ້ຽມຊົມຫໍພິພິດທະພັນວັດທະນະທຳຈຳ, ຂ້າພະເຈົ້າໄດ້ແນະນຳໃຫ້ນັກທ່ອງທ່ຽວໄດ້ຮັບຊາບບັນດາຈຸດພິເສດສະເພາະຂອງສະຖາປັດຕະຍະກຳ, ວິຈິດສິນກໍຄືປະຫວັດຄວາມເປັນມາຂອງຫໍພິພິດທະພັນຜ່ານໄລຍະເວລາ. ຜ່ານນັ້ນ ຊ່ວຍໃຫ້ເຂົາເຈົ້າມີຄວາມເຂົ້າໃຈຕື່ມອີກກ່ຽວກັບວັດທະນະທຳຂອງຫວຽດນາມ ແລະ ຂ້າພະເຈົ້າຮູ້ສຶກເອກອ້າງທະນົງໃຈທີ່ສຸດກ່ຽວກັບສິ່ງດັ່ງກ່າວ.”
ຫໍພິພິດທະພັນຈຳ ດາຫນັງ ໄດ້ຮັບການກໍ່ສ້າງຕາມຮູບແບບສະຖາປັດຕະຍະກຳ Gothic. ໂດຍຕັ້ງຢູ່ລະຫວ່າງຖະຫນົນ 2 ສາຍທີ່ສວຍງາມຂອງນະຄອນ ດາຫນັງ ແມ່ນ ຖະຫນົນ 2/9 ແລະ ຖະຫນົນ ຈືງຫນືເວືອງ. ນີ້ແມ່ນສະຖານທີ່ດຶງດູດຜູ້ນິຍົມວັດທະນະທຳຈຳມາຢາມເປັນຈຳນວນຫຼວງຫຼາຍ