(vovworld)- ເມື່ອມາຢ້ຽມຢາມນະຄອນຫລວງ ຮ່າໂນ້ຍ, ຫນຶ່ງໃນບັນດາສະຖານທີ່ຊື່ງນັກທ່ອງທ່ຽວສາກົນເລືອກເຟັ້ນມາຢາມຫລາຍກວ່າໝູ່, ນັ້ນແມ່ນຫໍພິພິດທະພັນວິຈິດສິນ ຫວຽດນາມ ຕັ້ງຢູ່ເລກທີ 66 ຖະຫນົນ ຫງວຽນທາຍຫອກ, ເມືອງ ບາດີງ, ນະຄອນຮ່າໂນ້ຍ. ຫໍພິພິດທະພັນວິຈິດສິນ ຫວຽດນາມ ບໍ່ພຽງແຕ່ແມ່ນກິດຈະກຳສະຖາປັດຕະຍະກຳທີ່ສວຍງາມເທົ່ານັ້ນ, ຫາກຍັງແມ່ນສະຖານທີ່ຮັກສາ, ແນະນຳບັນດາຜະລິດຕະພັນສິລະປະພົ້ນເດັ່ນ ຊື່ງແມ່ນບັນດາພະຍານຫລັກຖານທີ່ມີຊີວິດຊີວາກ່ຽວກັບວິວັດແຫ່ງການພັດທະນາຂອງພື້ນຖານວິຈິດສິນຫວຽດນາມທີ່ອຸດົມສົມບູນ ແລະ ເຂັ້ມຂົ້ນໄປດ້ວຍສີສັນຊາດ.
ຫໍພິພິດທະພັນວິຈິດສິນໄດ້ວາງສະແດງວັດຖຸພັນຫລາຍຢ່າງ
photo:internet
|
ປະຈຸບັນ ຫໍພິພິດທະພັນວິຈິດສິນ ຫວຽດນາມ ພວມວາງສະແດງ ແລະ ຮັກສາບັນດາຜະລິດຕະພັນວິຈິດສິນທີ່ລ້ຳຄ່າ ດ້ວຍວັດຖຸພັນກວ່າ 20.000 ຢ່າງ, ສະແດງໃຫ້ເຫັນສິ່ງຍອດຢ້ຽມຂອງພື້ນຖານວິຈິດສິນ ຫວຽດນາມ. ຫໍພິພິດທະພັນວິຈິດສິນ ຫວຽດນາມ ປະກອບດ້ວຍອາຄານທີ່ສວຍງາມ 2 ຫລັງ ແລະ ໄດ້ຮັບການອອກແບບຕາມສະຖາປັດຕະຍະກຳຂອງ ຝລັ່ງ ເປັນຮູບຕົວຫນັງສື L ໃນເນື້ອທີ່ກວ້າງຂວາງ ດ້ວຍທິວທັດທຳມະຊາດສວຍງາມ. ຫໍພິພິດທະພັນວິຈິດສິນ ມີເນື້ອທີ່ 4.737 ຕາລາງແມັດ, ໃນນັ້ນ ເຂດວາງສະແດງໄດ້ຮັບການສັບຊ້ອນຕາມໄລຍະປະຫວັດສາດ, ຈາກສະໄໝປະຖົມບູຮານຕະຫລອດຮອດຍຸກປະຈຸບັນ. ພິເສດ ຫໍພິພິດທະພັນ ໄດ້ວາງສະແດງວັດຖຸພັນຫລາຍຢ່າງ ທີ່ເປັນມໍລະດົກວິຈິດສິນອັນລຳ້ຄ່າຄື: ຮູບຫນ້າຄົນ ແລະ ສັດຢູ່ເທິງຝາຫິນໃນຖຳ້ ດົງໂນ້ຍ, ເມືອງ ລາກຖູຍ ແຂວງ ຮ່ວາບີງ, ເຊິ່ງມີມາກ່ອນນີ້ປະມານ 10.000 ປີ ແລະ ໄດ້ຮັບຖືວ່າແມ່ນຂີດໝາຍທຳອິດຂອງສິລະປະສ້າງພາບຫວຽດນາມ ຫລື ຖັງທອງ ດາວທີ້ງ ຊື່ງແມ່ນວັດຖຸພັນອັນລ້ຳຄ່າຂອງປະເທດຊາດ ທີ່ມີມາກ່ອນນີ້ 2.500 ປີ. ນອກນັ້ນ ຍັງມີຜະລິດຕະພັນວິຈິດສິນພົ້ນເດັ່ນຫລາຍຢ່າງຂອງສິລະປະ ປະຕິມາກຳສະໄຫມ ຫລີ - ເຈີນ(ສັດຕະວັດທີ XI-XV), ປະຕິມາກຳຈຳ, ບັນດາຮູບແກະສະຫຼັກດ້ວຍຫິນ, ດ້ວຍໄມ້ຢູ່ ສາລາ, ວັດວາອາຮາມ … ໃນນັ້ນ ມີຮູບ “ເຈົ້າແມ່ກວນອີນພັນຕາພັນມື” ແຕ່ສັດຕະວັດທີ XVIII) ຢູ່ ວັດບຸດທາບ ແຂວງ ບັກນີງ ທີ່ຕັ້ງຢູ່ຫ້ອງໂຖງຂອງຫໍພິພິດທະພັນຊື່ງໄດ້ຮັບຖືວ່າ ແມ່ນສິ່ງຍອດຢ້ຽມຂອງສິລະປະຕິມາກຳດ້ວຍໄມ້ຢູ່ຫວຽດນາມ. ຢູ່ຫໍພິພິດທະພັນຍັງວາງສະແດງບັນດາພາບພື້ນເມືອງຄື: ພາບດົງໂຮ່, ພາບຮ່າງຈົງ, ບັນດາຜະລິດຕະພັນວິຈິດສິນຜ່ານໄລຍະປະຫວັດສາດຕ່າງໆຄື: ໄລຍະຂອງບັນດາຈິດຕະກອນຢູ່ວິທະຍາໄລວິຈິດສິນ ອິນດູຈີນ (1925-1945), ໄລຍະຕໍ່ຕ້ານຕ້ານພວກລ່າເມືອງຂຶ້ນ ຝລັ່ງ (1945-1954), ໄລຍະຕໍ່ຕ້ານຕ້ານຈັກກະພັດອາເມລິກາ (1954-1975), ໄລຍະສ້າງສາປະເທດຊາດໃນສັນຕິພາບ (1975- ມາຮອດປະຈຸບັນ). ບັນດາຜະລິດຕະພັນວິຈິດສິນຢູ່ ຫໍພິພິດທະພັນ ໄດ້ປະກອບສ່ວນຢັ້ງຢືນພື້ນຖານສິລະປະວິຈິດສິນ ຫວຽດນາມ ແມ່ນພັດທະນາຢ່າງລຽນຕິດຜ່ານໄລຍະຕ່າງໆ. ອ້າຍ ຫງວຽນວັນຟອງ, ຜູ້ເຂົ້າຊົມຫໍພິພິດພັນ ເວົ້າວ່າ:
“ວັດຖຸພັນຢູ່ທີ່ນີ້ແມ່ນອຸດົມສົມບູນທີ່ສຸດ, ຂ້າພະເຈົ້າມັກຮູບປະຕິມາກຳເກົ່າແກ່ຢູ່ທີ່ນີ້, ເພາະມັນມີຫລາຍຮູບຫລາຍແບບ. ບັນດາຜະລິດຕະພັນດັ່ງກ່າວຕ້ອງມີສີໄມ້ລາຍມືດີຈຶ່ງສາມາດເຮັດໄດ້.”
ຢູ່ຫໍພິພິດທະພັນ, ໃນເຂດວາງສະແດງຂອງບັນດາຈິດຕະກອນໂຮງຮຽນວິທະຍາໄລວິຈິດສິນ ອິນດູຈີນ ຍາມໃດກໍມີຜູ້ເຂົ້າຊົມເປັນຈຳນວນຫລວງຫລາຍ. ບັນດາຜະລິດຕະພັນໄດ້ຮັບຖືວ່າແມ່ນສິ່ງຍອດຢ້ຽມຂອງຂະແຫນງວິຈິດສິນຫວຽດນາມ ແມ່ນຕິດພັນກັບຊື່ສຽງຂອງບັນດາຈິດຕະກອນຄື: ຫງວຽນຢາຈີ, ຫງວຽນຕືງຽມ, ໂຕງອກເວີນ, ເຈີນວັນເກີນ. ບັນດາຜະລິດຕະພັນຂອງເຂົາເຈົ້າໃນໄລຍະນີ້ເປັນຂີດໝາຍແຫ່ງການຊອກຫາວັດຖຸ, ສ້າງຂີດໝາຍສະເພາະໃນພື້ນຖານສິລະປະຂອງຍຸກໃກ້ປະຈຸບັນ ແລະ ປະຈຸບັນຂອງຫວຽດນາມ. ທ່ານນາງ ດາວມີງງວຽດ, ພະນັກງານຫ້ອງວາງສະແດງ, ສຶກສາອົມຮົມ ຫໍພິພິດທະພັນ ຫວຽດນາມ ໃຫ້ຮູ້ວ່າ:
“ໃນຂົງເຂດວິຈິດສິນເກົ່າແກ່, ປະຕິມາກຳເດີມໄດ້ດຶງດູດແຂກມາຊອກຮູ້ຫຼາຍທີ່ສຸດ. ແຕ່ທ່າແຮງຂອງ ຫໍພິພິດທະພັນ ແມ່ນວາງສະແດງຜະລິດຕະພັນວິຈິດສິນຍຸກປະຈຸບັນ. ນັ້ນແມ່ນບັນດາຜະລິດຕະພັນທີ່ເຮັດດ້ວຍວັດຖຸທີ່ເປັນມູນເຊື້ອຄື: ພາບສີຂັດມັນ. ນີ້ແມ່ນຜະລິດຕະພັນຊື່ງນັກທ່ອງທ່ຽວຕ່າງປະເທດມັກຊົມທີ່ສຸດ, ເພາະມັນແມ່ນຮູບການທີ່ເປັນເອກະລັກສະເພາະ ມີພຽງຢູ່ຫວຽດນາມເທົ່ານັ້ນ.”
ເພື່ອດຶງດູດຜູ້ຊົມມາຢ້ຽມຢາມ. ປີ 2012, ຫໍພິພິດທະພັນ ໄດ້ເປີດຫ້ອງວາງສະແດງໃຫມ່, ນັ້ນແມ່ນຫ້ອງຄົ້ນຫາ. ຫ້ອງນີ້ເປີດປະຕູໂດຍບໍ່ເກັບຄ່າເພື່ອຮັບໃຊ້ນັກຮຽນ, ນັກສຶກສາເຂົ້າຊົມແລະ ຊອກຮູ້ກ່ຽວກັບສິລະປະນີ້. ທ່ານ ຟານວັນຕຽນ, ຜູ້ອຳນວຍການ ຫໍພິພິດທະພັນວິຈິດສິນ ຫວຽດນາມ ໃຫ້ຮູ້ວ່າ:
“ຈີນຕະນາການໃຫມ່ຂອງ ຫໍພິພິດທະພັນໂລກໄດ້ມີການປ່ຽນແປງຫລາຍແລ້ວ, ຫາກບໍ່ຄືກ່ອນນີ້, ບັນດາ ຫໍພິພິດທະພັນ ພຽງແຕ່ແມ່ນສະຖານທີ່ຄົ້ນຄ້ວາໃຫ້ເປົ້າໝາຍໃດຫນຶ່ງ. ປະຈຸບັນ ຫໍພິພິດທະພັນ ວິຈິດສິນ ຫວຽດນາມ ໄດ້ຮັບການເປີດກວ້າງເພື່ອໃຫ້ທຸກຄົນເຂົ້າຊົມ, ມັນບໍ່ພຽງແຕ່ແມ່ນສະຖານທີ່ເພື່ອຄົ້ນຄ້ວາ, ຮຳ່ຮຽນ ເທົ່ານັ້ນ ຫາກຍັງແມ່ນສະຖານທີລະຫຼິ້ນໃຫ້ທຸກເປົ້າໝາຍອີກດ້ວຍ.”
ໃນຫລາຍປີຜ່ານມາ, ຄຽງຄູ່ກັບການຮຽບຮຽງຄົ້ນຄ້ວາ, ເພີ່ມເຕີມວັດຖຸພັນ, ສຳເນົາເອກະສານເປັນປະຈຳແລ້ວ, ຫໍພິພິດທະພັນ ຍັງຖືເປັນສຳຄັນການຟື້ນຟູພາບ, ຮູບປັ້ນ, ບັນດາວັດຖຸພັນທີ່ມີຄຸນຄ່າອີກ. ຫໍພິພິດທະພັນ ກໍຈັດຕັ້ງການເຄື່ອນໄຫວພົບປະແລກປ່ຽນຫລາຍຄັ້ງກັບບັນດາສູນສີລະປະ, ຫໍພິພິດທະພັນ ວິຈິດສິນໃຫຍ່ກວ່າໝູ່ໃນໂລກຄື: ສິງກະໂປ, ຍີ່ປຸ່ນ, ສເກົາຫລີ, ຝລ່ັງ, ອີຕາລີ, ແອສະປາຍ. ປະຈຸບັນ, ຫໍພິພິດທະພັນ ພວມສືບຕໍ່ສ້າງລະບົບວາງສະແດງໃຫ້ສົມບູນແບບກວ່າ, ສ້າງຄວາມໃຫມ່ອ່ຽມໃຫ້ແກ່ຜູ້ຊົມດ້ວຍການສ້າງຫ້ອງຊົມຟັງທີ່ທັນສະໄຫມ, ຊ່ວຍໃຫ້ຜູ້ຊົມເຂົ້າໃຈຕື່ມກ່ຽວກັບບັນດາການເຄື່ອນໄຫວຂອງ ຫໍພິພິດທະພັນ. ດ້ວຍບັນດາຄວາມມານະພະຍາຍາມດັ່ງກ່າວ, ຫໍພິພິດທະພັນວິຈິດສິນ ຫວຽດນາມ ສືບຕໍ່ຢືນຢັນວ່າເປັນແຫ່ງທີ່ສ້າງຄວາມດຶງດູດນັກທ່ອງທ່ຽວພາຍໃນ ແລະ ເພື່ອນມິດສາກົນ.