(vovworld)- ຢູ່ ນະຄອນໂຮ່ຈິມີນ ນອກຈາກບັນດາສະຖານທີ່ທ່ອງທ່ຽວວັດທະນະທຳສິລະປະແລ້ວ ຍັງມີສະຖານທີ່ທ່ອງທ່ຽວຫລາຍແຫ່ງເພື່ອໃຫ້ນັກທ່ອງທ່ຽວມາຊອກຮູ້ກ່ຽວກັບປະຫວັດສາດ, ປະເທດຊາດ, ຊາວຫວຽດນາມ. ໃນນັ້ນ ຫໍພິພິດທະພັນຮ່ອງຮອຍສົງຄາມ ຊື່ງແມ່ນສະຖານທີ່ຂາດບໍ່ໄດ້ຂອງນັກທ່ອງທ່ຽວເມື່ອມາຢ້ຽມຢາມນະຄອນໂຮ່ຈິມີນ.
ຫໍພິພິດທະພັນຮ່ອງຮອຍສົງຄາມ
ພາບ:internet
|
ຫໍພິພິດທະພັນຮ່ອງຮອຍສົງຄາມ ຖືກຕັ້ງຢູ່ເຮືອນເລກທີ 28 ຖະຫນົນ ຫວໍວັນເຕີນ ເມືອງ 6 ແມ່ນບ່ອນວາງສະແດງບັນດາຮ່ອງຮອຍສົງຄາມຂອງ ຝລັ່ງ ແລະ ອາເມລິກາຕໍ່ປະຊາຊົນຫວຽດນາມ ໃນ 21 ປີ ແຕ່ປີ 1954-1975. ຫໍພິພິດທະພັນແຫ່ງນີ້ ໄດ້ຮັບການສ້າງຕັ້ງຂຶ້ນໃນວັນທີ 4/9/1975, ໃນຄາວນັ້ນ ເອີ້ນວ່າ ຫໍວາງສະແດງໂທດກຳສົງຄາມ ຫລັງຈາກນັ້ນ ຖືກປ່ຽນຊື່ຢ່າງເປັນທາງການແມ່ນ ຫໍພິພິດທະພັນຮ່ອງຮອຍສົງຄາມ. ປີ 2002, ຫໍພິພິດທະພັນຮ່ອງຮອຍສົງຄາມ ໄດ້ຮັບການກໍ່ສ້າງໃຫມ່ຕາມສະຖາປັດຕະຍະກຳຂອງຫໍພິພິດທະພັນທັນສະໄຫມ ເພື່ອສ້າງຄວາມສະດວກໃນການວາງສະແດງເອກະສານ, ວັດຖຸພັນ. ດ້ວຍການປະສານສົມທົບລະຫວ່າງການວາງສະແດງບັນດາວັດຖຸພັນ ແລະ ການຈັດຕັ້ງເຄື່ອນໄຫວທີ່ເປັນຫລາຍຮູບຫລາຍແບບ, ຫໍພິພິດທະພັນຮ່ອງຮອຍສົງຄາມ ນັບມື້ນັບດຶງດູດນັກທ່ອງທ່ຽວມາຢ້ຽມຢາມເປັນຈຳນວນຫລວງຫລາຍ. ທ່ານນາງ ຮີ່ງງອກເວີນ, ຜູ້ອຳນວຍການ ຫໍພິພິດທະພັນຮ່ອງຮອຍສົງຄາມໃຫ້ຮູ້ວ່າ:
“ປະຈຸບັນ ແຕ່ລະມື້ ຫໍພິພິດທະພັນຮ່ອງຮອຍສົງຄາມ ຕ້ອນຮັບນັກທ່ອງທ່ຽວມາຢ້ຽມຢາມປະມານ 2000 ເທື່ອຄົນ, ໃນນັ້ນ ສ່ວນຫລາຍແມ່ນນັກທ່ອງທ່ຽວສາກົນ, ສ່ວນນັກທ່ອງທ່ຽວພາຍໃນປະເທດເຄີຍມາຢ້ຽມຢາມໃນວັນທ້າຍອາທິດ. ລະດູຮ້ອນ ນັກທ່ອງທ່ຽວມາຢ້ຽມຢາມເປັນ ຈຳນວນ ຫລາຍກວ່າ.”
ຫໍພິພິດທະພັນຮ່ອງຮອຍສົງຄາມ ລວມມີ 2 ເຂດ: ເຂດກ່າງແຈ້ງ ແລະ ໃນຮົ່ມ. ຈາກປະຕູເຂົ້າຫໍພິພິດທະພັນແມ່ນເຂດວາງສະແດງບັນດາປະເພດອາວຸດ, ພາຫະນະການທະຫານຂອງອາເມລິກາ ຊື່ງລວມມີບັນດາປະເພດເຮືອບິນ, ລົດຖັງ, ລູກປືນ, ລູກລະເບີດ. ເຂດວາງສະແດງໃນຮົ່ມ ດ້ວຍວັດຖຸພັນ 15.000 ຢ່າງ ແລະ ຮູບຖ່າຍພ້ອມກັບຟິມຮູບເງົາເອກະສານກ່ຽວກັບໄລຍະຕໍ່ຕ້ານຕ້ານພວກລ່າເມືອງຂຶ້ນຝລັ່ງ ແລະ ຈັກກະພັດອາເມລິກາ, ກ່ຽວກັບສົງຄາມຢູ່ເຂດຊາຍແດນທາງທິດຕາເວັນຕົກສຽງໃຕ້, ສົງຄາມປົກປັກຮັກສາເຂດຊາຍແດນທາງພາກເຫນືອ. ບັນດາຮູບຖ່າຍກ່ຽວກັບສົງຄາມ, ພົ້ນເດັ່ນແມ່ນເຫດການເຂັ່ນຂ້າສາມັນຊົນ, ຮູບຫວ່ານທາດພິດເຄມີຢູ່ພາກໃຕ້, ຖີ້ມລູກລະເບີດທຳລາຍພາກເຫນືອ, ບັນດາວັດຖຸພັນຕ່າງໆຄື: ຮູບແບບ ຄຸກ ຄອກເສືອ, ເຄື່ອງຕັດຄໍອຸປະກອນທໍລະມານ.. ໄດ້ສ້າງຄວາມສະເທືອນໃຈຕໍ່ຜູ້ຊົມ.
ຫໍພິພິດທະພັນ ມີຫ້ອງວາງສະແດງພິເສດທີ່ມີຊື່ວ່າ: “ຫວນຄືນອະດີດຕະການ " ນີ້ກໍແມ່ນຫ້ອງວາງສະແດງດຶງດູດນັກທ່ອງທ່ຽວມາຢ້ຽມຢາມເປັນຈຳນວນຫລວງຫລາຍ, ເປັນຕົ້ນແມ່ນນັກທ່ອງທ່ຽວສາກົນ. ເອື້ອຍ ທູເຊືອງ, ຜູ້ນຳທ່ຽວຢູ່ ຫໍພິພິດທະພັນ ໃຫ້ຮູ້ວ່າ:
“ ຫ້ອງວາງສະແດງ ຫວນຄືນອະດີດຕະການ ນີ້ ໂດຍ ຊາວ ອັງກິດ ຜູ້ຫນຶ່ງ ແລະ ຊາວ ເຢຍລະມັນຜູ້ຫນຶ່ງ ປະຕິບັດ ດ້ວຍຈຸດປະສົງແມ່ນຄິດເຖິງບັນດາເພື່ອນມິດຂອງເຂົາເຈົ້າ. ມີຮູບຖ່າຍ 2 ແຜ່ນ ເຮັດໃຫ້ຜູ້ຊົມເຂົ້າໃຈກ່ຽວກັບເຈດຈຳນົງ, ກຳລັງແຮງແຫ່ງຄວາມເປັນທຳໃນການຕໍ່ຕ້ານຕ້ານຈັກກະພັດອາເມລິກາກູ້ຊາດຂອງຊາວຫວຽດນາມ. ເມື່ອ ຊາວອາເມລິກາ ດຳເນີນສົງຄາມຢູ່ ຫວຽດນາມ ເຂົາເຈົ້ານຳໃຊ້ບັນດາພາຫະນະການທະຫານທັນສະໄຫມຄື: ບັນດາປະເພດເຮຶອບິນຂົນສົ່ງທະຫານ. ສ່ວນກອງທັບຫວຽດນາມ ຢູ່ ພາກເຫນືອ ເມື່ອລຳລຽງໜູນຊ່ວຍໃຫ້ແກ່ສະຫນາມຮົບພາກໃຕ້ ລ້ວນແຕ່ຕ້ອງຍ່າງ ແລະ ໃຊ້ອາວຸດຫລ້າຫລັງ. ບັນດາຮູບຖ່າຍເຫລົ່ານັ້ນແມ່ນສະແດງໃຫ້ເຫັນວ່າ ກອງທັບຫວຽດນາມ ເຖິງວ່າ ໃຊ້ອາວຸດຫລ້າຫລັງ ແຕ່ສຸດທ້າຍກໍສາມາດ ຍາດໄດ້ໄຊຊະນະ”
ແຕ່ລະມື້ນັກທ່ອງທ່ຽວຕ່າງປະເທດມາຢ້ຽມຢາມຫໍພິພິດທະພັນ
ເປັນຈຳນວນຫລວງຫລາຍ
ພາບ:internet
|
ຢູ່ຊັ້ນ 2 ຂອງຫໍພິພິດທະພັນຮ່ອງຮອຍສົງຄາມຍັງມີຫ້ອງວາງສະແດງພາບແຕ້ມເຍົາວະຊົນ ດ້ວຍຊື່ວ່າ: “ນົກກາງແກຂາວ”. ນີ້ແມ່ນບ່ອນວາງສະແດງບັນດາພາບແຕ້ມໂດຍພວກນ້ອງເຍົາວະຊົນແຕ້ມ ຜ່ານຫລາຍຫົວເລື່ອງກ່ຽວກັບ ຄວາມຮັກຕໍ່ບ້ານເກີດເມືອງນອນ, ປະເທດຊາດ, ພໍ່ແມ່, ປູ່ຍ່າຕາຍາຍ.. ບັນດາພາບແຕ້ມນີ້ແມ່ນສະແດງໃຫ້ເຫັນຄວາມໄຝ່ຝັນຂອງເດັກນ້ອຍ ຫວັງຢາກໄດ້ດຳລົງຊີວິດໃນປະເທດສັນຕິພາບ, ໄດ້ໄປໂຮງຮຽນ ໄດ້ເຮັດວຽກທີ່ຕົນເອງມັກ.
ໃນຈຳນວນນັກທ່ອງທ່ຽວມາຢ້ຽມຢາມ ຫໍພິພິດທະພັນ ມີ 70% ແມ່ນຊາວຕ່າງປະເທດ. ເຂົາເຈົ້າມານີ້ ເພື່ອຊອກຮູ້ກ່ຽວກັບສົງຄາມຢູ່ ຫວຽດນາມ, ເຂົ້າໃຈຕື່ມອີກກ່ຽວກັບຄວາມສູນເສຍ, ການເສຍສະຫລະ ແລະ ຄວາມເສຍຫາຍບໍ່ສາມາດທົດແທນໃຫ້ປະຊາຊົນຫວຽດນາມ ໄດ້. ຄວາມຮູ້ສຶກລວມຂອງນັກທ່ອງທ່ຽວ ແມ່ນຄວາມເຫັນອົກເຫັນໃຈ ແລະ ສະເທືອນໃຈ. ປື້ມບັນທຶກຄວາມຮູ້ສຶກຂອງນັກທ່ອງທ່ຽວນັບ ສິບຫົວ ຢູ່ ຫໍພິພິດທະພັນນີ້ ກໍແມ່ນວັດຖຸພັນອັນລ້ຳຄ່າ ແລະ ມີຄວາມໝາຍ. ໃນຈຳນວນນັກທ່ອງທ່ຽວນັບພັນຄົນນັ້ນ, ມີຜູ້ຫນຶ່ງມາຈາກ ສະວິດໄດ້ຂຽນວ່າ: “ຂ້າພະເຈົ້າມາຈາກປະເທດສວຍງາມ ບໍ່ຮູ້ຫຍັງກ່ຽວກັບສົງຄາມ, ຂ້າພະເຈົ້າມີຄຳເຫັນດັ່ງນີ້: ບັນດານັກການເມືອງທັງໝົດ ແລະ ການນຳພວມມີເຈດຈຳນົງດຳເນີນສົງຄາມ ແລະ ບັນດາຜູ້ມີສ່ວນກ່ຽວຂ້ອງເຖິງສົງຄາມ ຄວນມາຢ້ຽມຢາມຫໍພິພິດທະພັນແຫ່ງນີ້. ຫວັງວ່າ ເຂົາເຈົ້າຄວນພິຈາລະນາຄືນ! ເພື່ອ ສັນຕິພາບ, ສັນຕິພາບ, ສັນຕິພາບ.”
ຫໍພິພິດທະພັນຮ່ອງຮອຍສົງຄາມແມ່ນຫນຶ່ງໃນບັນດາສະຖານທີ່ທ່ອງທ່ຽວພົ້ນເດັ່ນ 10 ແຫ່ງ ໃນລາຍການທ່ອງທ່ຽວ ນະຄອນໂຮ່ຈິມີນ 100 ສິ່ງທີ່ຈັບອົກຈັບໃຈ. ນີ້ກໍແມ່ນ ຫໍພິພິດທະພັນຫນຶ່ງດຽວຢູ່ ຫວຽນາມ ໄດ້ນຳເຂົ້າລະບົບ ຫໍພິພິດທະພັນ ເພື່ອສັນຕິພາບ ກວ່າ 60 ແຫ່ງ ຂອງ ອົງການວັດທະນະທຳ ວິທະຍາສາດ ແລະ ສຶກສາ ສປຊ UNESCO. ຫໍພິພິດທະພັນຮ່ອງຮອຍສົງຄາມ ແມ່ນສະຖານທີ່ຮຽກຮ້ອງໃຫ້ສ້າງໂລກສັນຕິພາບ.