(vovworld)- ມີວັດຖຸພັນພຽງ 300 ຢ່າງ, ຫໍພິພິດທະພັນເຄື່ອງປັ້ນດິນເຜົາ ກີມລານ, ເມືອງຢາເລີມ ຮ່າໂນ້ຍ ອາດຈະແມ່ນຫໍພິພິດທະພັນທີ່ມີຂອບຂະຫນາດນ້ອຍກວ່າໝູ່ຢູ່ຫວຽດນາມ. ແຕ່ບັນດາວັດຖຸພັນຢູ່ຫໍພິພິດທະພັນແຫ່ງນີ້ພັດສະແດງໃຫ້ເຫັນຫລາຍສິ່ງຫລາຍຢ່າງກ່ຽວກັບປະຫວັດຄວາມເປັນມາຂອງເຄື່ອງປັ້ນດິນເຜົາຫວຽດນາມ ແລະ ອາລົມຈິດຄວາມຮັກແພງຂອງປະຊາຊົນທ້ອງຖິ່ນສະຫງວນໃຫ້ແກ່ທ່ານ Nisimura Manasaki, ນັກບູຮານຄະດີຍີ່ປຸ່ນ ທີ່ໄດ້ປະກອບກຳລັງເຫື່ອແຮງເພື່ອກໍ່ສ້າງຫໍພິພິດທະພັນແຫ່ງນີ້. ບົດຂຽນຂອງນັກຂ່າວໂຕຕວນທີ່ພາດຫົວເລື່ອງວ່າ: ຫໍພິພິດທະພັນເຄື່ອງປັ້ນດິນເຜົາກີມລານ, ຊື່ງແມ່ນຫໍພິພິດທະພັນບູຮານຄະດີວົງຄະນາຍາດແຫ່ງທຳອິດ.
ຫໍພິພິດທະພັນເຄື່ອງປັ້ນດິນເຜົາ ກີມລານ
ພາບ:internet
|
ເມື່ອເວົ້າເຖິງບັນດາໝູ່ບ້ານອາຊີບເຮັດເຄື່ອງປັ້ນດິນເຜົາບູຮານຢູ່ ຮ່າໂນ້ຍ, ຜູ້ຄົນທັງຫລາຍເຄີຍຄິດເຖິງໝູ່ບ້ານເຮັດເຄື່ອງປັ້ນດິນເຜົາ ບາດຈ່າງ ຢູ່ແຄມແມ່ນ້ຳແດງ ຫາກບໍ່ມີຫລາຍຄົນຮູ້ຈັກໝູ່ບ້ານເຮັດເຄື່ອງປັ້ນດິນເຜົາ ກີມລານ ທີ່ມີຊື່ສຽງໃນປະຫວັດສາດ ໂດຍຫ່າງຈາກໝູ່ບ້ານບາດຈາງບໍ່ໄກປານໃດ. ພາຍຫລັງນ້ຳຖວ້ມເກີດຂຶ້ນຄັ້ງຕ່າງໆ, ແຄມແມ່ນ້ຳແດງຖືກເສາະເຈືອນ, ປະຊາຊົນຢູ່ທີ່ນີ້ເກັບໄດ້ບັນດາຕອນເຄື່ອງປັ້ນດິນເຜົາບູຮານ, ຊຳ້ບໍ່ໜຳບາງຜະລິດຕະພັນມີຮູບຮ່າງຄືດັ້ງເດີມ. ຈາກນັ້ນ ນັກຄົ້ນຄ້ວາວັດທະນະທຳຈຶ່ງມີການສັງເກດຢ່າງເລິກເຊິ່ງກ່ຽວກັບໝູ່ບ້ານເຮັດເຄື່ອງປັ້ນດິນເຜົາແຫ່ງນີ້. ພ້ອມກັນນັ້ນ ປະຊາຊົນຜະລິດເຄື່ອງປັ້ນດິນເຜົາໃນໝູ່ບ້ານກໍໄດ້ເກັບໄດ້ບັນດາຕອນເຄື່ອງປັ້ນດິນເຜົາບູຮານມາຄົ້ນຄ້ວາຊອກຮູ້ວິທີຜະລິດເຄື່ອງປັ້ນດິນເຜົາຂອງຄົນລຸ້ນກ່ອນ. ຫລັງຈາກນັ້ນ ດ້ວຍການຮ່ວມມືຄົ້ນຄ້ວາກັບບັນດານັກວິທະຍາສາດຕ່າງປະເທດ, ບັນດາວັດຖຸພັນທີ່ຮຽບຮຽງມາໄດ້ນັ້ນ ໄດ້ປະກອບສ່ວນຢັ້ງຢືນການຄົ້ນພົບທີ່ສຳຄັນວ່າ: ບໍລິເວນໝູ່ບ້ານ ກີມລານ ແມ່ນຫນຶ່ງໃນບັນດາໝູ່ບ້ານອາຊີບເຮັດເຄື່ອງປັ້ນດິນເຜົາບູຮານ, ຊື່ງແມ່ນສະຖານທີ່ສະຫນອງບັນດາຜະລິດຕະພັນເຄື່ອງປັ້ນດິນເຜົາຕົ້ນຕໍໃຫ້ແກ່ພະລາຊະວັງ ທັງລອງ ໃນເມື່ອກ່ອນ. ທ່ານ ຫງວຽນວັນຍູງ, ນັກສິລະປະການອາຍຸສູງຢູ່ ໝູ່ບ້ານ ກີມລານ, ແມ່ນ ຜູ້ສຸດຈິດສຸດໃຈປະກອບບັນດາວັດຖຸພັນເພື່ອສ້າງຫໍພິພິດທະພັນເຄື່ອງປັ້ນດິນເຜົາ ກີມລານ ເລົ່າສູ່ຟັງວ່າ:
“ຄອບຄົວພວກຂ້າພະເຈົ້າດຳລົງຊີວິດຢູ່ແຄມແມ່ນຳ້. ກ່ອນນີ້ ບໍ່ທັນມີນຳ້ສ້າງຂຸດ, ການດຳເນີນຊີວິດປະຈຳວັນຂອງປະຊາຊົນໃນບ້ານສ່ວນຫລາຍແມ່ນອີງໃສ່ນຳ້ຢູ່ແມ່ນຳ້. ສະນັ້ນ ພາຍຫລັງນຳ້ຢູ່ແມ່ນຳ້ຫລຸດລົງ, ຊາວບ້ານຄົ້ນພົບເຄື່ອງປັ້ນດິນເຜົາບູຮານບາງຕອນ. ຍ້ອນແມ່ນຜູ້ເມົາມົວກັບອາຊີບເຮັດເຄື່ອງປັ້ນດິນເຜົາ, ສະນັ້ນ ຂ້າພະເຈົ້າຈຶ່ງເກັບຮັກສາບັນດາວັດຖຸພັນທີ່ມີຄ່ານັ້ນ.”
ບັ້ນຂຸດຄົ້ນຄັ້ງຕ່າງໆຂອງບັນດານັກບູຮານຄະດີໄດ້ປະຕິບັດໃນຫລາຍປີ ແລະ ເກັບມາໄດ້ວັດຖຸພັນນັບພັນຢ່າງຊ່ຶງໄດ້ຮັບການຜະລິດໃນ 10 ສັດຕະວັດ, ແຕ່ສັດຕະວັດທີ 7-17. ໃນນັ້ນເປັນຫນ້າສົນໃຈ ແມ່ນເຄື່ອງປັ້ນດິນເຜົາຜະລິດແຕ່ສະໄຫມເຈົ້າຊີວິດ ເຈີນ. ຈາກບັນດາວັດຖຸພັນທີ່ມີຄ່ານັ້ນ ແມ່ນເລີ່ມມີແນວຄວາມຄິດສ້າງຫໍພິພິດທະພັນເຄື່ອງປັ້ນດິນເຜົາ ກີມລານ. ແລະ ສຸດທ້າຍ ຫໍພິພິດທະພັນແຫ່ງນີ້ ໂດຍແມ່ນ ກຸ່ມຄົນທີ່ມີຊື່ວ່າ“ກັບຄືນເມືອກົກເຄົ້າເຫງົ້າກໍ”ຂອງບັນດາຜູ້ອາຍຸສູງໃນໝູ່ບ້ານ ກີມລານ ພ້ອມດ້ວຍ ດຣ Nishimura Masanari ຊາວຍີ່ປຸ່ນ ປະຕິບັດ ແລະ ນຳເຂົ້າເຄື່ອນໄຫວແຕ່ເດືອນ 3/2013.
 |
ປະຈຸບັນ ຫໍພິພິດທະພັນເຄື່ອງປັ້ນດິນເຜົາ ກີມລານ ຕັ້ງຢູ່ໃກ້ກັບສຳນັກງານ ຄະນະກຳມະການປະຊາຊົນຕາແສງ ກີມລານ ແລະ ເປີດປະຕູໃນວັນເສົາ,ວັນທິດປະຈຳອາທິດ. ຫໍພິພິດທະພັນແຫ່ງນີ້ ມີເນື້ອທີ່ປະມານ 200 ຕາລາງແມັດ, ຊື່ງລວມມີ ວັດຖຸພັນປະມານ 300 ຢ່າງ. ແລະ ບັນດາວັດຖຸພັນຢູ່ທີ່ນີ້ເປັນຕົວແທນໃຫ້ແກ່ປະຫວັດຄວາມເປັນມາຂອງເຄື່ອງປັ້ນດິນເຜົາຫວຽດນາມ, ດ້ວຍຜະລິດຕະພັນເຄື່ອງປັ້ນດິນເຜົາຫລາຍຊະນິດໄດ້ຮັບການຜະລິດແຕ່ສະໄຫມເຈົ້າຊີວິດ ລີ ຕະຫລອດຮອດໄລຍະທ້າຍສະໄຫມເຈົ້າຊີວິດ ເລ. ບັນດາຜະລິດຕະພັນເຄື່ອງປັ້ນດິນເຜົາເຫລົ່ານັ້ນລ້ວນແຕ່ໄດ້ຮັບການຜະລິດດ້ວຍເຕັກນິກສູງ ແລະ ກ່ອນນີ້ພຽງແຕ່ຜູ້ມີຍົດສັກຕຳແຫນ່ງ, ຜູ້ຮັ່ງມີນຳໃຊ້. ຜ່ານການວາງສະແດງ, ວິທີແນະນຳຂອງປະຊາຊົນຢູ່ທີ່ນີ້ ສະແດງໃຫ້ເຫັນວ່າ ໝູ່ບ້ານປັ້ນດິນເຜົາ ກີມລານ ແມ່ນສູນຜະລິດເຄື່ອງປັ້ນດິນເຜົາບູຮານ ແລະ ອາຊີບຜະລິດເຄື່ອງປັ້ນດິນເຜົາໄດ້ພັດທະນາຢ່າງແຮງແຕ່ສັດຕະວັດທີ 13-14.
ດ້ວຍຜົນສຳເລັດຈາກການເກັບຮັກສາຕອນເຄື່ອງປັ້ນດິນເຜົາບູຮານ, ຫໍພິພິດທະພັນເຄື່ອງປັ້ນດິນເຜົາ ກີມລານ ໄດ້ຮັບການເຊີດຊູທີ່ພິທີມອບລາງວັນ ບູ່ຍຊວນຝາຍ ເພື່ອຄວາມຮັກຕໍ່ນະຄອນ ຮ່າໂນ້ຍ ໃນວັນທີ 29/8/2013 ຫວ່າງແລ້ວນີ້ ໃນໝວດວຽກງານ, ແນວຄວາມຄິດມີຄຸນນະພາບວິທະຍາສາດ ແລະ ສິລະປະສູງ, ສະແດງໃຫ້ເຫັນຄວາມສະຫນິດຕິດພັນ ທຸກດ້ານຂອງຊີວິດການເປັນຢູ່ ແລະ ເຕັມໄປດ້ວຍຄວາມຮັກແພງຕໍ່ນະຄອນຮ່າໂນ້ຍ.
ຫໍພິພິດທະພັນເຄື່ອງປັ້ນດິນເຜົາ ກີມລານ ໄດ້ຮັບການເຊີດຊູບໍ່ພຽງແຕ່ແມ່ນຄວາມເປັນກຽດ, ຄວາມເອກອ້າງທະນົງໃຈຂອງຊາວບ້ານ ກີມລານ ເທົ່ານັ້ນ ຫາກຍັງສ້າງເງື່ອນໄຂເປີດທິດພັດທະນາໝູ່ບ້ານອາຊີບ ກີມລານອີກດ້ວຍ. ທ່ານ ເຈີນດືກຈີ, ຮອງປະທານຄະນະກຳມະການປະຊາຊົນ ຕາແສງ ກີມລານໃຫ້ຮູ້ວ່າ:
“ພວກຂ້າພະເຈົ້າເປີດບັນດາທິດທ່ອງທ່ຽວ ແລະ ພັດທະນາໝູ່ບ້ານອາຊີບ ເພື່ອໃຫ້ທຸກຄົນມີໂອກາດໄດ້ສຳພັດກັບ ຫໍພິພິດທະພັນເຄື່ອງປັ້ນດິນເຜົາ ກີມລານ, ຄຽງຄູ່ກັນນັ້ນ ພວກຂ້າພະເຈົ້າຢາກກໍ່ສ້າງເຂດວາງສະແດງບັນດາຜະລິດຕະພັນປັ້ນດິນເຜົາຊື່ງປະຈຸບັນພວມຜະລິດຢູ່ໝູ່ບ້ານ ກີມລານ ແລະ ເຂດສອນອາຊີບຜະລິດເຄື່ອງປັ້ນດິນເຜົາໃຫ້ຄົນລຸ້ນຫນຸ່ມ. ສະນັ້ນ ຫໍພິພິດທະພັນເຄື່ອງປັ້ນດິນເຜົາ ກີມລານ ແມ່ນຄວາມເອກອ້າງທະນົງໃຈ, ແມ່ນມໍລະດົກວັດທະນະທຳໄດ້ຮັບການເສີມຂະຫຍາຍ ແລະ ມີຄຸນຄ່າໃນການພັດທະນາວັດທະນະທຳ ແລະ ພັດທະນາເສດຖະກິດສັງຄົມ.”
ປະຈຸບັນ ຫວຽດນາມ ມີ ຫໍພິພິດທະພັນປະມານ 120 ແຫ່ງ ນັບທັງຂັ້ນ ແຂວງ, ນະຄອນ ແລະ ສະເພາະຂະແຫນງ, ແຕ່ ຫໍພິພິດທະພັນຂັ້ນຕາແສງ ມີພຽງແຕ່ ແມ່ນຫໍພິພິດທະພັນເຄື່ອງປັ້ນດິນເຜົາ ກີມລານ. ຫໍພິພິດທະພັນຂັ້ນຕາແສງແຫ່ງທຳອິດຢູ່ປະເທດຫວຽດນາມ ມີຄວາມໝາຍສຳຄັນ ຕັກເຕືອນໃຫ້ຊາວບ້ານມີຄວາມເອກອ້າງທະນົງໃຈກ່ຽວກັບໝູ່ບ້ານອາຊີບ, ໃນນັ້ນ ກຳລັງເຫ່ືອແຮງຂອງຄົນລຸ້ນກ່ອນປະໄວ້ຜ່ານບັນດາຜະລິດຕະພັນເຄື່ອງປັ້ນດິນເຜົາ.