(vovworld) - ກ່ອນນີ້ 3 ປີ, ຫຼວງພໍ່ Thich Chuc Tiep ແມ່ນ ເຈົ້າອະທິການວັດ ຮ໋ວງ ຂຶ້ນກັບຕາແສງ ຮ໋ວງເທື້ອງ, ເມືອງດົ່ງຫີ, ແຂວງ ທ້າຍງວຽນ. ນັບແຕ່ນັ້ນມາຮອດປະຈຸບັນ, ວັດ ຮ໋ວງ ໄດ້ກາຍເປັນຄອບຄົວ, ແມ່ນບ່ອນເພິ່ງພາອາໄສຂອງເດັກນ້ອຍພະເນຈອນ. ການເອົາໃຈໃສ່ເບິ່ງແຍງຂອງຫຼວງພໍ່ໄດ້ຊ່ວຍໃຫ້ພວກເດັກນ້ອຍຮັບຮູ້ໄດ້ຄວາມເອົາໃຈໃສ່ເບິ່ງແຍງ, ຄວາມຮັກໄຄ່ຂອງຄອບຄົວ. ວຽກງານຂອງຫຼວງພໍ່ Thich Chuc Tiep ແມ່ນການກະທຳອັນສູງສົ່ງຂອງພະສົງທີ່ມີຕໍ່ເດັກອາພັບ.
ວັດ ຮ໋ວງ ຢູ່ຕາແສງ ຮ໋ວງເທື້ອງ, ເມືອງດົ່ງຫີ, ແຂວງ ທ້າຍງວຽນ
(ພາບ: google.com.vn)
ເມື່ອຕ້ອນຮັບພວກຂ້າພະເຈົ້າໃນວັດ ຮ໋ວງ ເຊິ່ງຕັ້ງເທິງໂນນພູສູງທີ່ຂຶ້ນກັບຕາແສງ ຮ໋ວງເທື້ອງ, ເມືອງດົ່ງຫີ, ແຂວງທ໋າຍງວຽນ ນັ້ນ. ຫຼວງພໍ່ Thich Chuc Tiep ແບ່ງປັນວ່າ, ກ່ອນທີ່ເປັນອະທິການຢູ່ວັດແຫ່ງນີ້, ຫຼວງພໍ່ແມ່ນຄູສອນຢູ່ໂຮງຮຽນຊັ້ນກາງສົງແຂວງ ນິງທ້ວນ. ປີ 2010, ໂດຍຮັບຄຳເຊີນຂອງສະພາບໍລິຫານພຸດທະສາສະໜາແຂວງ ທ໋າຍງວຽນ, ຫຼວງພໍ່ໄດ້ໄປ ທ໋າຍງວນ ຮັບໜ້າທີ່ເປັນອະທິການວັດ. ດ້ວຍນ້ຳໃຈກຸສົນ, ຮັກແພງມະນຸດ, ພ້ອມກັບຄວາມມຸ້ງຫວັງຢາກຊ່ວຍເຫຼືອພວກເດັກນ້ອຍອາພັບທີ່ປະສົບກັບຄວາມຫຍຸ້ງຍາກໄດ້ຮຳ່ຮຽນ ແລະ ມີຊີວິດອິ່ມໜຳສຳລານ. ພໍ່ຫຼວງໄດ້ຮັບເອົາເດັກນ້ອຍ 15 ຄົນມາລ້ຽງ.
”ໃນຄອບຄົວລ້ຽງລູກໜຶ່ງຄົນໄດ້ປະສົບກັບຄວາມຫຍຸ້ງຍາກແລ້ວ, ລ້ຽງລູກຫຼາຍຄົນຢູ່ໃນວັດຍິ່ງປະສົບກັບຄວາມຫຍຸ້ງຍາກກວ່າ. ດັ່ງນັ້ນອາດຕະມາຈຶ່ງນຳໃຊ້ວິທີປຸກລະດົມ, ໄກ້ສິດຕິດແທດກັບພວກນ້ອງ, ຮັບຟັງແນວຄິດຈິດໃຈ ກໍ່ຄືຄວາມມຸ້ງມາດປາຖະໜາຂອງພວກນ້ອງ ເພື່ອຕອບສະໜອງຄວາມຕ້ອງການສ່ວນໃດສ່ວນໜຶ່ງໃຫ້ແກ່ພວກນ້ອງ, ຜ່ານນັ້ນໄດ້ສ້າງຄວາມເຊື່ອໝັ້ນຕໍ່ຊີວິດແລະຄວາມເບິກບານມ່ວນຊື່ນໃຫ້ແກ່ເຂົາເຈົ້າ”
ຫຼວງພໍ່ Thich Chuc Tiepແລະພວກເດັກອາພັບ
ເມື່ອເຫັນພວກເດັກນ້ອຍລະຫຼິ້ນຕໍ່ໜ້າປະຕູວັດ, ບໍ່ມີໃຜຄິດໄດ້ວ່າເຂົາເຈົ້າພັດແມ່ນເດັກອາພັບ. ມີບາງຄົນກຳພ້າທັງພໍ່ ແລະ ແມ່, ບາງຄົນພໍ່ແມ່ຍັງມີຊີວິດຢູ່ແຕ່ຄອບຄົວທຸກຍາກຫຼາຍ, ບາງຄົນຄອບຄົວບໍ່ມີຄວາມສຸກ, ຫຼືພໍ່ແມ່ຖືກຈຳຄຸກ…ແຕ່ເມື່ອຫຼວງພໍ່ຮັບມາລ້ຽງໃນວັດ, ພວກຫຼານໄດ້ດຳລົງຊີວິດໃນຄວາມຮັກໄຄ່ຂອງຫຼວງພໍ່ ແລະ ພວກເພື່ອນທີ່ມີຊາຕາດຽວກັນ ປຽບເໝືອນໃນຄອບຄົວດຽວຢ່າງແທ້ຈິງ. ນ້ອງ Tran Hai Long ຜູ້ທີ່ຫຼວງພໍ່ໄດ້ຮັບມາລ້ຽງໃນວັດເປັນເວລາ 2 ປີ ແບ່ງປັນວ່າ, ພໍ່, ແມ່ນ້ອງຍັງມີຊີວິດຢູ່, ແຕ່ຄອບຄົວທຸກຍາກຫຼາຍບໍ່ມີເງື່ອນໄຂໃຫ້ນ້ອງໄປຮຽນ, ແຕ່ເມື່ອໄດ້ຮັບເຂົ້າວັດ, ຫຼວງພໍ່ໄດ້ເອົາໃຈໃສ່ເບິ່ງແຍງທຸກຢ່າງ ແລະ ສ້າງເງື່ອນໄຂໃຫ້ນ້ອງໄດ້ຮຳ່ຮຽນ.
”ຫຼວງພໍ່ເອົາໃຈໃສ່ເບິ່ງແຍງທຸກສິ່ງທຸກຢ່າງໃຫ້ພວກນ້ອງ. ອັນໃດທີ່ພວກນ້ອງຕ້ອງການຫຼວງພໍ່ກໍ່ພະຍາຍາມຕອບສະໜອງໃຫ້ ເພື່ອຊ່ວຍພວກນ້ອງມີຄວາມເບີກບານມ່ວນຊື່ນໃນຊີວິດປະຈຳວັນ, ບາງເທື່ອຫຼວງພໍ່ກໍ່ໃຫ້ພວກຫຼານໄປຫຼິ້ນ. ດ້ວຍຄວາມເອົາໃຈໃສ່ເບິ່ງແຍງຂອງຫຼວງພໍ່ໄດ້ເຮັດໃຫ້ພວກນ້ອງຮູ້ສຶກມ່ວນຊື່ນ ແລະ ອຸ່ນອ່ຽນໃຈກວ່າ”
ພວກເດັກອາພັບໃນວັດຮ໋ວງ
ໂດຍແມ່ນສາສະນີກະຊົນຜູ້ໜຶ່ງທີ່ດຳລົງຊີວິດຢູ່ໄກ້ວັດ, ແຕ່ລະມື້, ທ່ານ Dong Van Minh ໄດ້ເຫັນປະຈັກຕາການກະທຳອັນດີງາມຂອງຫຼວງພໍ່ Thich Chuc Tiep. ທ່ານ Minh ໃຫ້ຮູ້ວ່າ ປະຊາຊົນທັງໝົດຢູ່ທີ່ນີ້ລ້ວນແຕ່ສະໜັບສະໜູນວຽກງານກຸສົນຂອງຫຼວງພໍ່.
”ມາຮອດປະຈຸບັນມີເດັກນ້ອຍແຕ່ຊັ້ນປະຖົມ ເຖິງ ຊັ້ນມັດທະຍົມຕອນປ່າຍທັງໝົດສິບກວ່າຄົນພວມຢູ່ໃນວັດ. ຫຼວງພໍ່ໄດ້ຊີ້ລົດຖີບໃຫ້ເດັກນ້ອຍຜູ້ລະຄັນເພື່ອໄປຮຽນ ແລະ ຈັດເວລາຮຽນ, ກິນເຂົ້າ, ສວດມົນຢ່າງລະອຽດໃຫ້ພວກຫຼານ. ຫຼວງພໍ່ເວົ້າວ່າເມື່ອເຕີບໃຫຍ່ແລ້ວພວກຫຼານຢາກເຮັກວຽກຫຍັງກໍ່ໄດ້ຕາມໃຈມັກ. ນີ້ແມ່ນການກະທຳດີທີ່ສຸດ. ປະຊາຊົນຢູ່ທີ່ນີ້ຜູ້ໃດກໍ່ເຄົາລົບ ແລະ ຮັກແພງຫຼວງພໍ່”
ເຖິງວ່າຊີວິດຍັງປະສົບກັບຄວາມຫຍຸ້ງຍາກຫຼາຍ, ແຕ່ສຳຫຼັບຫຼວງພໍ່ Thich Chuc Tiep ແລ້ວ, ຄວາມເບິກບານທີ່ສຸດຂອງຫຼວງພໍ່ນັ້ນແມ່ນໄດ້ເຫັນພວກ ”ລູກ” ຂອງຕົນມີຄວາມມ່ວນຊື່ນ ແລະ ຮຳ່ຮຽນເກັ່ງ. ຫຼວງພໍ່ Thich Chuc Tiep ແບ່ງປັນວ່າ:
”ອາດຕະມາຫວັງວ່າ, ເມື່ອມາດຳລົງຊີວິດໃນວັດພວກຫຼານຈະໄດ້ຮຳ່ຮຽນ, ໄດ້ຖືສິນກິນບວດ ເພື່ອມີຄວາມຮູ້, ພິເສດແມ່ນມີຄວາມຮູ້ໂດຍພື້ນຖານ ພາຍຫຼັງເຕີບໃຫຍ່ຈະປະກອບສ່ວນຮັບໃຊ້ໃຫ້ແກ່ປະເທດຊາດ. ອາດຕະມາຫວັງວ່າວັດຈະມີເງື່ອນໄຂດີກວ່າອີກ ເພື່ອສາມາດຮັບເອົາເດັກນ້ອຍອາພັບມາລ້ຽງໄດ້ຫຼາຍກວ່າ”
ການເວລາລ່ວງເລີຍໄປ, ບັນດາເດັກນ້ອຍກຳພ້າ, ເດັກພະເນຈອນ ທີ່ປະສົບກັບຄວາມຫຍຸ້ງຍາກ ກໍ່ໄດ້ເຕີບໃຫຍ່ໃນຄວາມເອົາໃຈໃສ່ເບິ່ງແຍງຂອງຫຼວງພໍ່ Thich Chuc Tiep. ຢູ່ວັດແຫ່ງນີ້ພວກນ້ອງໄດ້ດຳລົງຊີວິດໃນຄວາມຮັກແພງ ແລະ ໄດ້ໄປຮຳ່ຮຽນ.