(vovworld)-ມື້ນີ້ ຫວຽດນາມ ຕ້ອນຮັບປີໃຫມ່ 2014 ດ້ວຍການພັດທະນາເສດຖະກິດສັງຄົມຢ່າງມີສະຖຽນລະພາບ. ຄວາມໄວ້ເນື້ອເຊື່ອໃຈນີ້ແມ່ນເລີ່ມມາຈາກບັນດາຜົນງານຂອງຫວຽດນາມໃນຫລາຍຂົງເຂດ: ການເມືອງ, ການພົວພັນກັບຕ່າງປະເທດ, ເສດຖະກິດສັງຄົມ, ວັດທະນະທຳ… ໃນປີ 2013 ຜ່ານມາໄດ້ສະແດງໃຫ້ເຫັນຄວາມຕັດສິນໃຈປ່ຽນໃຫມ່, ເຊື່ອມໂຍງເຂົ້າກັບສາກົນຢ່າງເລິກເຊິ່ງກວ້າງຂວາງ ຂອງຫວຽດນາມ. ບົດຂຽນຂອງນັກຂ່າວເລເຟືອງທີ່ພາດຫົວເລື່ອງວ່າ: ຫວຽດນາມປີ 2014 ເສີມຂະຫຍາຍກຳລັງແຮງພາຍໃນເພື່ອພັດທະນາ.
ພາບປະກອບ
|
ມື້ທຳອິດຂອງປີໃຫມ່ 2014, ປະຊາຊົນຫວຽດນາມ ມີເວລາຫວນຄືນປີ 2013 ດ້ວຍບັນດາເຫດການລຽນຕິດ, ເປັນຕົ້ນແມ່ນຂ່າວດີໃນຊຸມມື້ທ້າຍປີ. ນັ້ນແມ່ນສະພາແຫ່ງຊາດຫວຽດນາມ ຫາກໍຮັບຮອງເອົາລັດຖະທຳມະນູນປີ 2013 ແລະ ປັບປຸງກົດໝາຍສຳຄັນບາງສະບັບ, ຂະນະທີ່ບັນດາຄະນະ, ຂະແຫນງການມີຫນ້າທີ່ຮັບຜິດຊອບຂອງຫວຽດນາມ ພວມດຳເນີນການເຈລະຈາບັນດາສັນຍາການຄ້າກັບບັນດາຄູ່ຮ່ວມມື ແລະ ພື້ນຖານເສດຖະກິດຊັ້ນນຳຂອງໂລກ ເພື່ອສຳເລັດການເຂົ້າຮ່ວມສັນຍາຄູ່ຮ່ວມມື, ການຮ່ວມມືເສດຖະກິດເຂດປາຊີຟີກ.ນີ້ແມ່ນບັນດາພື້ນຖານສຳຄັນເພື່ອໃຫ້ຫວຽດນາມປະຕິບັດຢ່າງແຂງແຮງກ່ຽວກັບການສ້າງລະບອບ, ສ້າງສະພາບແວດລ້ອມແຫ່ງການພັດທະນາແຫ່ງຊາດເພື່ອເຊື່ອມໂຍງເຂົ້າກັບສາກົນຢ່າງມີປະສິດທິຜົນ.
ສັນຍານເປັນຫນ້າຊື່ນຊົມຈາກບັນດາດັດຊະນີສຳຄັນ
ບັນດາດັດຊະນີສຳຄັນຊື່ງຫວຽດນາມ ບັນລຸໄດ້ໃນປີ 2013 ຈະແມ່ນພື້ນຖານເພື່ອໃຫ້ຫວຽດນາມພັດທະນາດີກວ່າໃນປີ 2014. ຫວຽດນາມ ຍັງຮັກສາເສດຖະກິດມະຫາພາກເປັນປົກກະຕິ ເມື່ອ GDP ບັນລຸປະມານ 5,42%, ເຖິງວ່າຕົວເລກນີ້ບໍ່ທັນບັນລຸຄາດໝາຍ 5,5% ທີ່ໄດ້ວາງອອກກໍຕາມ, ແຕ່ນີ້ແມ່ນດັດຊະນີພັດທະນາຢ່າງເໝາະສົມ, ສະແດງໃຫ້ເຫັນສັນຍານຂອງການຟື້ນຕົວ. ພ້ອມກັບການດຶງດູດການລົງທຶນຈາກຕ່າງປະເທດບັນລຸປະມານ 21,6 ຕື້ USD, ວົງເງິນສົ່ງອອກບັນລຸ 132,3 ຕຶ້ USD, ເປັນຫນ້າສົນໃຈແມ່ນອັດຕາສ່ວນການນຳເຂົ້າເກີນດຸນຫລຸດລົງ ສະແດງໃຫ້ເຫັນຈຸດເດັ່ນໃນຮູບພາບເສດຖະກິດຫວຽດນາມ. ບົນພື້ນຖານນັ້ນໃຫ້ເຫັນວ່າ ຫວຽດນາມ ສາມາດບັນລຸລະດັບເຕີບໂຕເປັນປົກກະຕິ ແລະ ໝັ້ນຄົງໃນປີ 2014. ທ່ານ ເລດັງຢວັນ ຜູ້ຊ່ຽວຊານເສດຖະກິດຖືວ່າ:
“ເສດຖະກິດຫວຽດນາມ ປີ 2013 ບັນລຸການເຕີບໂຕກວ່າ, ໄພເງິນເຟີ້ຫລຸດລົງ ແລະ ອັດຕາແລກປ່ຽນເງິນຕາເປັນປົກກະຕິ, ການຮັກສາເງິນຕາຕ່າງປະເທດເພີ່ມຂຶ້ນ, ນັ້ນແມ່ນການປົວແປງທີ່ເປັນຫນ້າຊ່ືນຊົມ. ແງ່ຫວັງເສດຖະກິດສອງປີຈະມາເຖິງແມ່ນອີງໃສ່ການປະຕິຮູບ, ການປ່ຽນໃຫມ່. ຂ້າພະເຈົ້າຫວັງວ່າມີການປ່ຽນແປງຢ່າງຕັ້ງຫນ້າ ເພາະວ່າ ລັດຖະບານໄດ້ກ້າວເດີນຢ່າງຖືກທິດແລ້ວ.”
ຫວຽດນາມ ຢືດໝັ້ນບັນດາຈຸດໝາຍພັດທະນາ
ເວທີປາໄສຫວຽດນາມ ແລະ ບັນດາຄູ່ຮ່ວມມືພັດທະນາເປັນຄັ້ງທຳອິດຈັດຂຶ້ນໃນຕົ້ນເດືອນ 12/2013 ເປັນຂີດໝາຍສຳຄັນໃນວິວັດທະນາການພັດທະນາຂອງຫວຽດນາມ, ຫັນໄລຍະຮ່ວມມືລະຫວ່າງລັດຖະບານຫວຽດນາມກັບບັນດານັກອຸປະຖຳພັດທະນາໄປສູ່ໄລຍະໃຫມ່: ຫວຽດນາມຈາກປະເທດ ຕ້ອງຮັບການຊ່ວຍເຫລືອຈາກຕ່າງປະເທດໄດ້ກາຍເປັນຄູ່ຮ່ວມມືຂອງບັນດານັກອຸປະຖຳ. ທີ່ເວທີປາໄສ, ທ່ານ ນາຍົກລັດຖະມົນຕີ ຫງວຽນເຕີນຢູງ ໄດ້ແນະນຳບັນດາຈຸດໝາຍ, ການກຳນົດທິດພື້ນຖານຂອງຫວຽດນາມໃນປີ 2014. ຕາມນັ້ນແລ້ວ, ຫວຽດນາມ ຈະຮັກສາເສດຖະກິດມະຫາພາກເປັນປົກກະຕິ,ຄວບຄຸມໄພເງິນເຟີ້, ຍູ້ແຮງການສົ່ງອອກ, ຄວບຄຸມການນຳເຂົ້າ, ຄຽງຄູ່ກັນນັ້ນ ສືບຕໍ່ຢືດໝັ້ນຍູ້ແຮງການສ້າງໂຄງປະກອບເສດຖະກິດຄືນໃຫມ່. ກ່ຽວກັບການສ້າງໂຄງປະກອບເສດຖະກິດຄືນໃຫມ່, ຈຸດສຸມແມ່ນສ້າງໂຄງປະກອບການລົງທຶນຄືນໃຫມ່, ໃນນັ້ນ ມີການລົງທຶນຂອງລັດ, ສ້າງໂຄງປະກອບທະນາຄານຄືນໃຫມ່. ພ້ອມກັບຫນ້າທີ່ພັດທະນາເສດຖະກິດ, ວຽກງານຮັບປະກັນຊີວິດສັງຄົມ ແລະ ປັບປຸງຊີວິດການເປັນຢູ່ຂອງປະຊາຊົນໄດ້ຮັບຖືວ່າແມ່ນຫນຶ່ງໃນບັນດາບຸລິມະສິດສຳຄັນຂອງລັດຖະບານຫວຽດນາມ ໃນປີ 2014. ທ່ານນາຍົກລັດຖະມົນຕີ ຫງວຽນເຕີນຢູງ ເນັ້ນຫນັກວ່າ:
“ໃນປີ 2014, ສຸມໃສ່ຮັບປະກັນຊີວິດສັງຄົມ ແລະ ສະຫວັດດີການສັງຄົມໃຫ້ດີກວ່າ. ລັດຖະບານຫວຽດນາມ ຈະສຸມໃສ່ເພື່ອສ້າງວຽກເຮັດງານທຳ, ຫລຸດຜ່ອນຄວາມທຸກຍາກແບບຍືນຍົງ, ພິເສດແມ່ນຫລຸດຜ່ອນຄວາມທຸກຍາກສຳລັບປະຊາຊົນບັນດາຊົນເຜົ່າສ່ວນຫນ້ອຍ ດ້ວຍບັນດານະໂຍບາຍແທດຈິງ, ມີປະສິດທິຜົນ.”
ຮັກສາສະພາບການເປັນປົກກະຕິເພື່ອພັດທະນາຈາກກຳລັງແຮງພາຍໃນທີ່ມີຢູ່ແລ້ວ
ວັນທີ 01/11/2013, ຫວຽດນາມ ໄດ້ຕ້ອນຮັບພົນລະເມືອງຜູ້ທີ 90 ລ້ານ ແລະ ຫວຽດນາມ ພວມໃນໄລຍະມີປະຊາກອນເປັນຈຳຫນວນຫລາຍ ດ້ວຍທ່າໄດ້ປຽບຫລາຍຢ່າງ ແລະ ຄວາມສາມາດບົ່ມຊ້ອນກ່ຽວກັບຄົນງານ. ນີ້ແມ່ນສິ່ງສະດວກ, ແມ່ນແຫລ່ງກຳລັງພາຍໃນ, ແມ່ນກາລະໂອກາດດີເພື່ອໃຫ້ຫວຽດນາມ ສືບຕໍ່ພັດທະນາແບບຍືນຍົງໃນປີຍູ້ແຮງວິວັດທະນາການຫັນປະເທດຊາດເປັນປະເທດອຸດສາຫະກຳ ແລະ ທັນສະໄຫມ. ພັດທະນາແຫລ່ງຊັບພະຍາກອນມະນຸດໄດ້ຮັບຖືວ່າ ແມ່ນຫນຶ່ງໃນ 3 ມາດຕະການບຸກທະລຸຍຸດທະສາດ ປະກອບສ່ວນສຳຄັນເຂົ້າໃນການຍົກສູງກຳລັງແກ້ງແຍ້ງລະຫວ່າງ ຫວຽດນາມ ກັບບັນດາປະເທດອື່ນໃນພາກພື້ນ ແລະ ໃນໂລກ. ແຫລ່ງຊັບພະຍາກອນມະນຸດອຸດົມສົມບູນ, ທັງມີພູມປັນຍາ, ສາມາດຮັບເອົາການປ່ຽນແປງໃຫມ່ຢ່າງວ່ອງໄວຈະສ້າງບັນດາບາດກ້າວອັນໝັ້ນແກ່ນຂອງຫວຽດນາມ ໃນປີ 2014 ແລະ ຊຸມປີຕໍ່ໄປ. ດຣ Franz Jessen , ຫົວຫນ້າຄະນະຜູ້ແທນ ອີຢູ ປະຈຳ ຫວຽດນາມ ຖືວ່າ:
“ຂ້າພະເຈົ້າຄິດວ່າ ຫວຽດນາມ ມີຄວາມສາມາດບົ່ມຊ້ອນຫລາຍຢ່າງ ແລະ ບັນດາຄວາມສາມາດບ່ົມຊ້ອນນີ້ຫວຽດນາມໄດ້ເສີມຂະຫຍາຍລະດັບສູງສຸດ. ຫວຽດນາມ ພວມປະຕິບັດຂົງເຂດການສຶກສາເປັນຢ່າງດີ. ເປັນຕົ້ນໝາກຜົນຂອງໂຄງການປະເມີນນັກຮຽນສາກົນ(PISA 2012) ຊື່ງຕາມຕາຕະລາງຈັດອັນດັບ ນັກຮຽນຫວຽດນາມ ຢືນອັນດັບສູງກວ່າເມື່ອທຽບໃສ່ຫລາຍປະເທດຮັ່ງມີໃນໂລກ. ປະຈຸບັນ ຫວຽດນາມ ມີພົນລະເມືອງຫນຸ່ມແຫນ້ນເປັນຈຳນວນຫລາຍ ແລະ ເຂົາເຈົ້າມີລະດັບຄວາມຮູ້. ນີ້ແມ່ນຄວາມສາມາດບົ່ມຊ້ອນຂອງຫວຽດນາມ.”
ເພື່ອປະຕິບັດບັນດາຄາດໝາຍຫນ້າທີ່ທີ່ວາງອອກໃນປີ 2014 ໃຫ້ໄດ້, ຄວນມີການເຂົ້າຮ່ວມຂອງທັງລະບົບການເມືອງ, ຈາກລັດຖະບານ, ບັນດາຂະແຫນງການຂັ້ນຕ່າງໆຕະຫລອດຮອດປະຊາຊົນເພື່ອເສີມຂະຫຍາຍແຫລ່ງກຳລັງພາຍໃນຂອງຫວຽດນາມ. ຄວາມຕັດສິນໃຈ, ຢືດໝັ້ນປະຕິບັດຈຸດໝາຍພັດທະນາທີ່ໄດ້ວາງອອກ ໃນປີ 2014 ຈະແມ່ນປີທີ່ພື້ນຖານເສດຖະກິດສັງຄົມຂອງຫວຽດນາມພັດທະນາຢ່າງດີງາມ.