ແຂວງຫາຍເຢືອງ ນອນຢູ່ໃຈກາງເຂດທົ່ງພຽງແມ່ນນ້ຳແດງ, ໄດ້ຮັບຖືວ່າ ແມ່ນໜຶ່ງໃນບັນດາອູ່ຂອງພື້ນຖານວັດທະນະທຳຫວຽດນາມ. ເມື່ອກ່ອນນີ້, ແຂວງຫາຍເຢືອງ ຕັ້ງຢູ່ເຂດທາງທິດຕາເວັນອອກພ້ອມກັບບາງແຂວງ, ນະຄອນທີ່ໃກ້ຄຽງ ແລະ ໄດ້ຮັບຖືວ່າ ແມ່ນແຂວງໜຶ່ງໃນ ຈຳນວນ 4 ແຂວງ, ນະຄອນທາງກ້ຳຕາເວັນອອກຂອງເມືອງຫຼວງທັງລອງເມື່ອກ່ອນນີ້(ໝາຍເຖິງນະຄອນຫຼວງຮ່າໂນ້ຍໃນປະຈຸບັນ). ແຕ່ດົນນານມາແລ້ວ, ຫາຍເຢືອງມີຊື່ສຽງຍ້ອນແມ່ນດິນແດນແຫ່ງອະລິຍະທຳ, ມີມູນເຊື້ອປະຫວັດສາດທີ່ສະຫງ່າລາສີ. ປະຈຸບັນ, ຫາຍເຢືອງແມ່ນແຂວງທີ່ເຕັມໄປດ້ວຍຄວາມສາມາດບົ່ມຊ້ອນເພື່ອພັດທະນາ.
ວັດກົນເຊີນຢູ່ເທດສະບານຈິລິງໃນແຂວງຫາຍເຢືອງ(baohaiduong) |
ນະຄອນຫາຍເຢືອງຫ່າງຈາກນະຄອນຫຼວງຮ່າໂນ້ຍປະມານ 60 ກິໂລແມັດໄປທາງທິດຕາເວັນອອກ. ນັບແຕ່ໃດໆມາ, ຫາຍເຢືອງເປັນທີ່ຮູ້ຈັກກັນດີຍ້ອນແມ່ນດິນແດນແຫ່ງອະລິຍະທຳ ແລະ ມີມູນເຊື້ອມັກການຮ່ຳຮຽນ. ທາງດ້ານການສຶກສາ, ໃນສະໄໝສັກດີນາ, ຫາຍເຢືອງໄດ້ນຳໜ້າກ່ຽວກັບຈຳນວນຜູ້ສອບເສັງໄດ້ລະດັບປະລີຍາເອກໃນຂອບເຂດທົ່ວປະເທດດ້ວຍຈຳນວນ 472 ຄົນ. ໝູ່ບ້ານໂມ້ແຈກ, ເມືອງບີງຢາງໄດ້ຮັບຖືວ່າ ແມ່ນໝູ່ບ້ານປະລີຍາເອກດ້ວຍຈຳນວນ 39 ຄົນຜ່ານສະໄໝສັກດີນາຕ່າງໆ. ມີປະລີຍາເອກຫຼາຍຄົນຂອງຫາຍເຢືອງໄດ້ກາຍເປັນບັນດາຜູ້ທີ່ມີຊື່ສຽງຍ້ອນໄດ້ປະດິດຄິດແຕ່ງບັນດາບົດນິພົນ, ບົດປະພັນທີ່ມີຄຸນຄ່າໃນຂົງເຂດການເມືອງ, ການທະຫານ, ວິທະນາສາດ, ວັດນະຄະດີ, ການຕ່າງປະເທດເຊັ່ນ: ຫງວຽນຈ້າຍ, ເຕ້ວຕິ້ງ, ໝາກດິງຈີ, ຝ້າມຊືແມ້ງ, ຫງວຽນຟີແຄງ…
ດ້ວຍມູນເຊື້ອປະຫວັດສາດແຫ່ງອະລິຍະທຳເຊັ່ນນັ້ນ, ໃນທຸກວັນນີ້, ຫາຍເຢືອງມີຄວາມສາມາດຢ່າງໃຫຍ່ຫຼວງເພື່ອພັດທະນາການທ່ອງທ່ຽວ, ເປັນຕົ້ນແມ່ນການທ່ອງທ່ຽວວັດທະນະທຳປະຫວັດສາດ ແລະ ງານບຸນ. ປະຈຸບັນ, ຫາຍເຢືອງມີປູຊະນີຍະສະຖານປະຫວັດສາດວັດທະນະທຳເກືອບ 2000 ແຫ່ງ, ໃນນັ້ນມີ 125 ແຫ່ງໄດ້ຮັບການຢັ້ງຢືນແມ່ນປູຊະນີຍະສະຖານປະຫວັດສາດລະດັບຊາດພ້ອມກັບທິວທັດທຳມະຊາດຫຼາຍແຫ່ງທີ່ລືຊື່ເຊັ່ນ: ພະວິຫານບູຊາ ເຈີນລ້ຽວ, ອະນຸສາວະລີ ເຈີນຮຶງດ້າວ, ວັດອານຟຸ, ຖ້ຳກິ້ງຈູ…ພິເສດກຸ່ມປູຊະນີຍະສະຖານ ກົນເຊີນ-ກຽບບາກ ຢູ່ເທດສະບານຈີ້ລິງ. ຢູ່ແຫ່ງນີ້ມີ ປູຊະນີຍະສະຖານນັບຮ້ອຍແຫ່ງທີ່ເກັບຮັກສາບັນດາອະນຸສອນກ່ຽວກັບບຸລຸດຜູ້ມີຊື່ສຽງ 3 ຄົນໃນປະຫວັດສາດຂອງຊາດຫວຽດນາມເຊັ່ນ: ເຈີນຮຶງດ້າວ - ນັກການທະຫານທີ່ດີເດັ່ນ, ຫງວຽນຈ້າຍ - ນັກວັດທະນະທຳທີີ່ມີຊື່ສຽງ ແລະ ອາຈານ ຈູວັນອານ. ທ່ານ ເລຢີແມ້ງ ຮອງຫົວໜ້າຄະນະຄຸ້ມຄອງເຂດປູຊະນີຍະສະຖານ ກົນເຊີນ-ກຽບບາກໃຫ້ຮູ້ວ່າ :
“ ຢູ່ບໍລິເວນທາງກ້ຳຕາເວັນອອກສ່ຽງເໜືອຂອງແຂວງ ຫາຍເຢືອງ, ເຂດປູຊະນີຍະສະຖານ ກົນເຊີນ-ກຽບບາກແມ່ນສູນສາສະໜາເຫຼື້ອມໃສຂອງເຂດທາງທິດຕາເວັນອອກສ່ຽງເໜືອເວົ້າລວມ ແລະ ແຂວງຫາຍເຢືອງເວົ້າສະເພາະ. ນີ້ແມ່ນສະຖານທີ່ນອນໃນເສັ້ນທາງໄປນະມັດສະການຕາມທິດຕາເວັນອອກສ່ຽງເໜືອຈາກທັງລອງໄປພູອຽນຕືຊຶ່ງແມ່ນດິນແດນແຫ່ງພຸດທະສາສະໜາ. ຢູ່ເທດສະບານ ຈີ້ລິງ, ມີວັດກົນເຊີນ ຕິດພັນກັບສາສະໜາພຸດ, ຫ່າງຈາກນັ້ນ 5 ກິໂລແມັດແມ່ນວິຫານກຽບບາກ ຊຶ່ງແມ່ນບ່ອນບູຊາເຈີນຮຶງດ້າວ - ນັກການທະຫານທີ່ດີເດັ່ນ, ຄຽງຂ້າງນັ້ນແມ່ນວິຫານບູຊາຈູວັນອານ ຊຶ່ງແມ່ນອາຈານຮັບຖືເປັນແບບຢ່າງຂອງນັກຮຽນຫວຽດນາມ ”
ເຂດທາງທິດຕາເວັນອອກຂອງຫາຍເຢືອງ ບໍ່ພຽງແຕ່ມີຊື່ສຽງດ້ວຍບັນດາປູຊະນີຍະສະຖານປະຫວັດສາດເທົ່ານັ້ນ, ຫາກຍັງແມ່ນທ້ອງຖິ່ນທີ່ມີຫຼາຍງານບຸນອັນເປັນປະເພນີ. ໃນມື້ຕົ້ນປີໃໝ່, ຫາຍເຢືອງໄດ້ມີງານບຸນລັ່ນລະຄັງຢູ່ວັດດົງເງາະ ທີ່ເມືອງແທງຮ່າ ອັນໄດ້ເປີດສາກບັນດາງານບຸນຍາມລະດູບານໃໝ່ຂອງແຂວງ, ຮອດເດືອນ 8 ໂດຍໄລ່ຕາມຈັນທະປະຕິທິນ ຊຶ່ງແມ່ນຍາມລະດູໃບໄມ້ຫຼົ່ນວຽນມາ, ກໍຮອດເວລາຈັດງານບຸນພະວິຫານກຽບບາກ. ມາຮ່ວມງານບຸນ, ແຂກທ່ອງທ່ຽວທັງຫຼາຍຈະໄດ້ຮັບຊົມການແຫ່ວໍ, ເຂົ້າຮ່ວມການລະຫຼິ້ນພື້ນເມືອງທີ່ເປັນເອກະລັກສະເພາະ….
ພ້ອມກັບບັນດາງານບຸນອັນເປັນປະເພນີ, ຫາຍເຢືອງ ແລະ ເຂດທາງທິດຕາເວັນອອກຂອງແຂວງນີ້ ຍັງມີຊື່ສຽງຍ້ອນແມ່ນໜຶ່ງໃນບັນດາອູ່ຂອງພື້ນຖານສິລະປະຂັບແຈວຂອງເຂດທົ່ງພຽງພາກເໜືອ. ນອກຈາກນັ້ນ, ຢູ່ແຫ່ງນີ້ຍັງເກັບຮັກສາບັນດາປະເພດສິລະປະພື້ນເມືອງເຊັ່ນ: ສິລະປະຂັບຕວງ, ຂັບກາຈູ , ຂັບກ້ຽວ, ຂັບກອ່ມລູກ, ພິເສດແມ່ນລະຄອນຕຸກກະຕານ້ຳ. ທ່ານຝ້າມວັນຕອງ, ຫົວໜ້າກອງລະຄອນຕຸກກະຕານ້ຳ ຕາແສງຮົ່ງຟອງໃຫ້ຮູ້ວ່າ :
“ ບັນດາລາຍການສະແດງຂອງກອງລະຄອນຕຸກກະຕານ້ຳ ຕາແສງຮົ່ງຟອງ ແມ່ນບັນດາການເຄື່ອນໄຫວສັງຄົມຂອງທ້ອງຖິ່ນ. ນອກຈາກວຽກໄຮ່ການນາ, ພໍ່ແມ່ປະຊາຊົນກໍຄຳນຶງເຖິງວຽກງານຂອງຕົນຢູ່ຕາມທົ່ງໄຮ່ທົ່ງນາ ເພື່ອສ້າງເປັນລະຄອນຊຶ່ງວາດພາບເຖິງການອອກແຮງງານ, ທຸກເຫດການທີ່ເກີດຂຶ້ນໃນການດຳລົງຊີວິດ. ແລະເມື່ອຈັດງານບຸນແຕ່ລະຄັ້ງ, ກໍນຳມາສະແດງເພື່ອສ້າງຄວາມເບີກບານມ່ວນຊື່ນ, ລະດົມກຳລັງໃຈແກ່ພໍ່ແມ່ພີນ້ອງໃນການອອກແຮງງານ, ທຳການຜະລິດ ”
ຫາຍເຢືອງໃນປະຈຸບັນຫຼືເຂດທາງທິດຕາເວນອອກຂອງເມືອງຫຼວງທັງລອງເມື່ອກ່ອນນີ້ ຍາມໃດກໍມີຄວາມເອກອ້າງທະນົງໃຈຕໍ່ມູນເຊື້ອຂອງດິນແດນທີ່ສັກສິດໃຫ້ກຳເນີດບັນດາບຸກຄົນທີ່ມີຄວາມເກັ່ງກ້າສາມາດ. ບັນດາລູກຮັກຫຼານແພງຂອງຫາຍເຢືອງ ໄດ້ ແລະ ພວມມານະພະຍາຍາມສືບທອດ, ເສີມຂະຫຍາຍບັນດາມູນເຊື້ອອັນດີງາມນັ້ນໃນການດຳລົງຊີວິດໃຮນວັນນີ້ເພື່ອສ້າງສາແຂວງຫາຍເຢືອງໃຫ້ນັບມື້ນັບພັດທະນາ, ພ້ອມກັນນັ້ນ ກໍເສີມຂະຫຍາຍບັນດາຄຸນຄ່າວັດທະນະທຳອັນດີງາມຂອງທ້ອງຖິ່ນ.